Allam Zineddine

بعيدا عن اخطاء الادارة ف بعض الاستقدامات و المدرب الخطأ الاكبر ...
مي كاين حاجة ..خاوتي تقريبا ملي حكمتنا الشركة حققنا تقريبا نفس عدد النقاط ف الذهاب و مكاش موسم كنا فيه على الاقل ف الوصافة ...
هنا نوقفوا امام نقطة انه هل عندنا كوادر لي عندهم عقلية اللقب لي لازم فيها النفس للطويل و تربح برى و لداخل و تربح مباريات عديدة متتالية و باداء محترم ف اغلب المباريات .. ؟!
علاه قلت كوادر مشي لاعبين ...لانه الكوادر هي لي تسربي العقلية الانتصارية او الانهزامية للنادي و اللاعب الجديد يمشي فنفس التيار ...
و الملاحظ هذو السنوات انه الفريق استهواتو البطولات القصيرة ك الكاف "8 مباريات راك ف النصف نهائي "
عكس البطولات لي ولينا نشوفو الفريق مالغري يكون قادر على الحصول على مشاركة قارية او حتى مرتبة ثانية ف جولات اللخرين مي دايما يصرا تقاعس و لحقنا وين لاعبين يدو عطلة مسبقة و يخلو الفريق منقوص ف جولات اللخرين و حتى الاداء دايما زفت ف بطولة بحكم والفوا عقلية اللعب القاري...
ان شاء الله التدعيمات هذو تع شتاء يجيبو حقهم و يخلونا منافسين ع اللقب او على الاقل مرتبة ثانية "لانه العودة للابطال هذا العام واجبة مشي مزية "
و ابتداءا م الصيف نشوفو تبدأ شويا تصفية لي لازم يتباع يتباع و لي لازم يروح يروح و نبداو نعاودو نبنوا قاعدة تع لاعبين من حيث الجودة و من حيث العقلية طبعا ب الدرجة الاولى ....

عزيزي المدرب معلول ....هذا نادي بارادو لاعبيه لا يتجاوزوا 22/23 سنة ...
الطويل فيهم عندو 1.80 م قاع قلال صحة و لعبهم مبني على التقنية و اللعب الاكاديمي ...ما يلعبو ب رجولية ما راهم des gladiateurs كما قلتنا لازم يكون لاعب البطولة تاعنا ...
رغم هذا تلقى اغلبية الفرق راقدة اللور ضدهم و تربحهم بسيف ب هجمات عكسية و كرات ثابتة ...

لهذا لقالب لي ذكرتوا ف حوارك نورملمو مايكلش و مشي مقنع بتاتا ...

حتى و يدخل و الاكيد راح يكون اساسي اليوم
مراحش يلقى نفس ريتم و animation لي ساعداتو بش تألق ف تونس ...
دك راح يلقى سيستام واحداخر قاع
عدواني اكثر و فيه جري اكثر و اقل احتفاظ لل كرة شيء ل مشكتش راح يلقى روحوا معاه البوليفي
و نفس شيء لي خلى لاعب كي يلعب مع بلادو ميلقاش روحوا .هذا بغض النظر انه اخر 90، دقيقة داها اللاعب ف رجليه كانت ف اوت الماضي تخيل ! و بغض النظر شكون راح يلعب معاه ف الوسط بصكو حسب الاصداء مشي ليكونزا و بوخنشوش هههههه
.صفي حسب نظرتي المتواضعة اللاعب يحتاج لوقت و وقت معتبر بش يتوالم مع شخبط شخبيط تع تونسي و يا ربي

ان شاء الله يتحدى الواقع و تكون استجابة و يتألق ابتداءا من اليوم ان شاء الله

صح ناس راهي خايفة على الاستقرار كي يروح معلول هههه ؟...اللااستقرار لاقدر الله راح يجي مع تواصل بقاء المدرب هذا مع تفكيروا الكارثي ...لي راح يولد تكتلات لا محالة
و معليش بلعقل نفهمو احسن لاعب ف الشهر بوخنشوش علاه راه احتياطي ل شيتة العجوزة اخر لي ماتش و راه ف كامل الجاهزية كي برى م الاصابة ؟...
اداليد علاه راه يزكر فيه كل ماتش يا يدخلو يعرق دقايق و لا ميدخلوش قاع بش يدفعو للمغادرة و حنا قاع شفنا سيد كيفاه يلعب خرمن اي صانع لعب راه يدور هنا ..؟
الشاب نعماني احد مكاسب العام الماضي مع غاريدو علاه راه مهمش زكارة و الجوار لي راه ليبيري نعطيلوا دقايق ؟!

ياو لوكان شفنا غرام واحد تع تحسن و اعتراف بالاخطاء و تغيير انا واحد كنت نمشي مع بقائوا للاستقرار ...لكن العكس الفريق راه من سيء ل اسوء خاصة خارج الديار و الهيبة تع الفريق راح يبحرها تماما و مزال مكمل ف خياراتو المجنونة
ف مع وهران راح تزيد تلقى شيتة اساسي و اداليد و بوخنشوش احتياطيين و نعماني خارج الفريق و كي نسجلوا نولوا 20 لور 40 دقيقة لخرة و هي رايحة

صفقة زكريا خالدي راح تضيف صبغة اخرى ل هجوم الفريق

ف اولا الجناح هذا يساري و هو عنصر ناقص عندنا و ثانيا و الاهم لاعب العربي سابقا هو جناح داخلي عكس اجنحتنا لي تقريبا كلها اجنحة تقليدية تلعب على الخط
ف دايما يصبح مهاجم ثاني و تلقاه دايما يزيد supériorité numérique داخل ال 18 ف العرضيات و حتى انه مميز بالرأس وراح نلقاوه دايما مميز ف استغلال انصاف المساحات
بالاضافة الى انه عندو خاصية التسديد لي ممتاز فيها جدا و اغلب اهدافو بها بالاضافة للسرعة و القوة البدنية ..فقلة من اجنحة لي ينشطو عندنا تلقاه سريع وقوي بدنيا ف نفس الوقت .

اشياء كلها مبشرة بهذا اللاعب ...و حتى الصفقات الصامتة دايما نلقاوها تنجح باذن الله
...فقط بش الجميع يكون ف الصورة اللاعب بحكم ظروفو العائلية ف الاشهر القليلة الماضية لم يلعب كثيرا ماعدا ثلاثين او اربعين دقيقة يعني يحتاج بعض من الصبر و العمل للعودة بقوة باذن الله

ف فترة غيابو عن الفريق مع المنتخب احد الاصدقاء نبهني ل نقطة ...
انه معلول جامي ذكر اداليد مع الغيابات او الغائبين عن الفريق كأنه غير معني ب الأهمية ...
و سبحان الله الواقع بعدها اكد انه هذا المدرب مراهش حاطو ف راسو و راه يدفع فيه ف كل ماتش للرحيل القصري لحاجة في نفس يعقوب ...
لكن التونسي تناسى انه المقابلتين الوحيدتين لي مشات فيهم ليكيب ع الخاطر هوما قبل ثلاث اشهر ضد الملعب التونسي و لي كانو ف حضور البوليفي لي كان احد نجوم المبارتين ...
اللاعب هءا اخر تسعين دقيقة لعبها كانت ف اوت الماضي مع فريقو و اخر مباراة كاساسي كانت ف الاكوادور قبل شهر
و بهذا ريتم راح يبيردي قاع la confiance و ريتم لي ماتش ...و مبعد بينا يولوا يطلقوا عليه صفقة فاشلة ...
فكر المدرب لي فاشل مثلا انا متأكد انه لو بقى غاريدو كان هذا اللاعب هو نجم الفريق خاصة مع اعتماد الاسباني على صانع لعب ...مي مع هذا الصبر و خلاص
و ان شاء الله ليوم يولوا ف هبالو و يدخل م البداية

من احسن لاعب ف كوبا سوداميركانا المنافسة الثانية ف القارة الجنوب امريكية للاعب خارج حسابات الفيلسوف

لي راه يستنا عقوبات و كذا و رد حق حبيت نقولو انه حنا
نصلح ل دور واحد و هو دور المظلوم الذي بلا حول و لا قوة ماعدا هذا ماراناش تع رد ظلم و جلب حق و التاريخ يؤكد

ف مثلا خلية الاعلام قلك عندنا فيديو سينشر من بعد ف ليل يفضح فيه كل التجاوزات لي حدثت ....هل نشر هذا الفيديو ؟ للآن لا و الاقرب لن يخرج بحكم انه يكون وصل اتصال ما من احدهم ...
احداث البارحة ترجعك ب ايام لما حدث ف الدويرة و كيفاه خرجت الاتحادية التونسية تضرب ب كل قوة من اجل ناديها
و حاولوا حتى التأهل على البساط و هي نفس الاتحادية لي سحبت مرشحها للكاف من اجلنا ؟! تصور !
يعني حنا خاوة و نسمح ف منصب علاجالك لكن كي تولي ف بلادي و فريق بلادي يسمونا اعداء
عكسنا حنا 0 تحرك 0 بيان تنديد 0 غيرة و احتواء ل نوادي البلد خارجيا
و ما حادثة بركان ببعيدة بحيث الهيئة هذه لم تكتفي انها ضيعت حق ناديها ف الوصول للنهائي ب سوء تعاملها ف تاس زيد احد اعضائها يسرب وثيقة الاقصاء دقائق قبل نصف نهائي الكأس ل تكون الضربة المعنوية مضاعفة و خسارة مسابقتين ف ساعات ...هذا لي نصلحو فيه ثقافة الثأر بيناتنا برك ...
و ف سياق ثاني لي راه تاكل على تقرير المكلف من الكاف حبيت نقول انه هو نفسه لي دار polémique كحلة مع معلول ف الندوة بعد المباراة علاجال موضوع تافه تع اللغة
و الحديث قياس ...

احد اكثر القرارات السلبية لي ان شاء الله متأثرش من بعد ف ترتيب انه ماتش تع بارادو متلعبش ...خاصة بحكم المنافسين راح يلعبو عادي
و م الاساس من غير المعقول فريق ف ذروة الموسم تصرالو الانقطاعات هذه تع 15 يوم .12 يوم ف كل مرة امبعد يصرا حشو تع لي ماتش ف كل ثلث ايام بش يعوضوها...

ان شاء منمشوش ب نفس عقلية الموسمين الماضيين و لو راني نشوف انه رانا ماشيين فيها هذيك تع نفضلو المنافسة القارية و نوجهوا قاع الانظار ليها و كي نتفرغوا منها نلقاو المنافسين هربو قاع
و حتى و يكون عندك مقابلات متأخرة ....دير ف حسبك كي تكون بعيد ب 10 نقط مثلا و حتى و يكون عندك اربع مقابلات متأخرة ....شبه مستحيل تلحق لانه الفارق هذا راح يولد عائق ذهني فحسب التجربة البقاء قريب من السباق و تكون متاخر ف نقاط و بعدد مباريات نفسه افضل من تكون بعيد بنقاط و حتى و تكون لديك مقابلات متاخرة قادرة تحطك الاول ...
ان شاء الله تكون العكس و الفريق يقدر يقاوم البرمجة لي راح تكون بين 15 ديسمبر و 05 جانفي لي يمكن يكون فيها 5 لي ماتش ....و ميصراش سيناريو كل مرة

بعودة اداليد و مونديكو ...
نظن ان معلول لن يتباطىء في العودة ل التشكيلة الاولى ف العام لي لعبت ضد الملعب التونسي "ماعدا قناوي لي في مكانو يكون موسى "
لعل و عسى نسترجع الديناميكية لي كنا فيها ف هاتين المبارتين ...
و لي فقدناها بعدها بحكم الاصابات و الغيابات و طبعا خيارات المدرب ...
ان شاء الله دك كل واحد يتحمل مسؤوليتو مكاين حتى سبب يمنع الفريق انه يعود بقوة بعد تقريبا اكتمال التعداد

لحقنا ل نقطة وين الناقوس الاحمر لازم يندق ....
ف بزاف يقلك رانا دوزيام ب ماتش روطار ...لكن ينساو انه الفرق قاع راهي لاصقة وبحكم راح نلتاو ف افريقيا ف زوج جولات. جايين ممكن جدا تلقى رحك سادس ولا ...
و كاين حتى لي يقلك تحسنا بارابور لعام لي فات معليش نقلك رصيدك النقطي الحالي كان راح يخليك خامس ولا سادس بعيد ع الصدارة العام لي فات بوحد 11 نقطة و ع دوزيام ب 4 ...
و هي كي تجي للواقع animation offensive ولات اسوء من العام الماضي مالغري الجودة تحسنت و تم استثمار ف عدة اسماء مي رحنا للاسوء علاه ؟ هنا مربط الفرس راه عند المدرب ....
الفريق حرفيا رانا ندخلو نتكتلوا و نروحو بلا افكار لبارح لي جوار دايرين طامبوناج بناتهم من قوة مشي فاهمين ادوارهم ..
وحتى الحسنة الوحيدة الانسان كي يخمم مع راسو الي هي الدفاع حنا ف عوام لخرين دايما مكانش عندنا مشكل فيها مالغري الاسماء تبدلت صافي مام نقطة مضيئة تاعو كانت مكتسبة ...مي هجوميا من سيء لاسوء و الله ...شفت رحيم بن واحي زغدود شارف بن شيخة و الله هجوميا مكاش اتعس من هذا العام و المفارقة ف الاستقدامات
ف شتان بين واش لقاو لي ذكرتهم وواش لقى هذا

ضربة طلة على احصائياتنا هذا العام مقارنة مع العام لي فات
بش نعرفوا مدى تقدم الفريق ...
لقيت انه الحقيقة الفريق راه يتقدم لكن للوراء !

ففي اول 10 مباريات للمدربين (حتى و يفوز معلول ب الداربي المؤجل ) حصيلة غاريدو افضل ..ف الاسباني جاب 20 نقطة اما معلول ف احسن الاحوال راح يجيب 19 ...
لقيت انه معلول من خروجوا 5 خطرات جاب 6 نقط 1ف/3ت/1خ ..عكس غاريدو لي حقق من 6 خرجات 10 نقاط !!
الحصيلة لداخل نفسها للثنائي لحد الآن ....و زيد الحصيلة هذه تحققت ف قلب زحمة المباريات الافريقية لي حققنا فيها التعادل ف رابع ماتش و حقننا 10 نقط ..يعني 30 نقطة من 14 ماتش !!!
و كي نتمعنوا نلقاو الاسباني جاء لقا ادارة مخطوفة فراغ اداري رهيب تسيير كارثي تعداد مخيروش هو تربص مشي هو دارو ...تحط امام امر الواقع عكس تونسي ....
زيد تعداد كي تقارن لجودة شتان بين واش لقى الاسباني وواش لقى تونسي ...واحد لقى دهيري ظهير و مبارك و شيتة و بن خليفة ف وسط و باشا و بوسليو و طوال و فتوحي و بوزيان ف هجوم ...(للاشارة اني نحكي قبل مانجيبو بوخنشوش و اتيبا و بلطرش يعني ب التعداد لقديم لي لقاه )
اما الآخر كانت عندو رفاهية الاختيار لقى ادارة جديدة طموحة و تم وضع ميزانية تعتبر الاحسن منذ تولي الشركة و عدد كبير من لي جابهم سبق و انه كانو دوليين ف منتخباتهم شتي مونديكو ليكونزا اداليد بلا منذكرهم لان الجميع يعرفهم ...
مع اداء مشي من اروع مايكون من الاسباني لكنه كان معقول وولينا نتمناوه ف زمن تونسي !

رغم ذلك منقدروا نغيروا حتى شيء ..و الاهم الحاضر و الموجود
و اذا حب التقني التونسي ارجاع الثقة لابد و لابد من مقابلة كبيرة ضد اورابا لانه تعداد تقريبا راح يكتمل ماعدا غناوي طبعا ...و هذا منتمناوه كأنصار