دس العسل في السم

تكملة للمنشور السابق روماركيت بلي مام عيباد كبرو و دارو دراري بصح ما نساوش واش دارولهم الاستاذة و كاين حتى لي تعقد على جال جاست
الاساتذة اقراو التعليقات و حاولو ما طيحوش في نفس الخطأ
احكولنا اكثر موقف ضركم من عند الاساتذة ، و اكثر حاجة وجعتكم ضرب ولا جاست ولا كاش كلمة؟

موقبيل تلاقيت مع واحد المراقب جابوهولنا في عام اللخر تع السيام لحكاية هاذي عندها قريب عقدين من الزمن و بحكم انا كنت عاقل و حسي ما تسمعوش ، غير شافني شفى عليا و انا تان شفيت عليه ، السيد هذا وليد فاميلية في فترة صغيرة خلانا نحترموه مالڨري اني نقولك فايتة 15 سنة بصح كي تشوفو تسلم عليه تخلصلو قهاوي تڨسر معاه تدعيلو و تروح و نتوما في زوج ڨسارين لحق وين دار معانا ماتش و لعبنا كونطر المراقبين و الاساتذة ، مباراة فيها يا ربي ساعتين بصح مازالنا شافيين عليها و ما تتنساش ، عيباد كما هاذو يخليو اثر طيب في حياتك و ما تنساهمش و كل ما تتفكرهم تدعيلهم بالخير جامي تسمع يقولك ماشي خدمتي ولا ما يحڨرك بالعين كي صغير ، و كانو يعاملونا شغل صحابهم و يربونا شغل ولادهم ، عيباد كما هاذو دوك علابالي راهم فالانقراض لأن الفرد الحالي غلبت عليه الفردانية و الانانية و اخطي راسي ، كاين بزاف اساتذة و مراقبين ناس ملاح كما كاين المسمومين ترجع تكره المادة حياتك كامل بسبتهم و كاين لي يحببهالك ، مع الدخول المدرسي ماذابيا تخلو اثر طيب و المعاملة تسبق الدراسة والله ، تقريبا نسينا واش قرينا بصح تبقى المعاملة لي في راسك ، لذلك قرو من قلوبكم و عاملو الدراري شغل ولادكم سينو شهرية تخلاص و العمر يخلاص و الخير يبقى و العيب يبقى

الأم باش توصل تشارك في قتل ولدها و حرق الجثة ديالو ، تستاهل الاعدام ، لحكاية هاذي عندها فايتة السمانة و هي في راسي و مانيش مآمن بلي صح ، ماشي لحظة غضب و ماشي جنون ، مور ما صرات الجريمة حبت تخفي الجثة ديالو و حرقوه و زادت راحت ديكلارات بلي سرقوه و دارت فيلم

بعدما ما كملنا مع حقوق الانسان و حقوق الاطفال و حقوق المرأة و حقوق المرأة بقاتلنا فئة وحدة برك هما السوكارجية ، و السؤال المطروح :

كما كاين سيد الرجال كاين لمرأة الفحلة
الرجل مواقف و افعال ماشي شكل نعرف واحد اسمه يانيس داير منڨوشة في زوج وذنيه و مڨطع حواجبو في زوج و موشم باربي في ظهرو و يدير الماكياج و الميناج و نيطواياج دو پو و داير لي ماش صفورة و يسمع هيفا وهبي و مصطفى قمر بصح في وقت الصح ينحيها من فمو و يمدهالك و ما تسبقوش في صباح الخير
اما المرأة الفحلة ماشي لي ما تخرجش من الدار ولا لي ما تخدمش ، المرأة الفحلة لي تحطها في وسط ألف رجل خابطين و في جزيرة ايبستين و تكون سكرانة و طالقين غنية تع شابة يمينة مع نصر الدين حرة و تكون كالية ليكسطا و ما تخافش عليها لأن الثقة هي الصح فالعلاقة و مدلها الحرية ماشي تمنعها ، اما هاذوك لي فالدار رانا نسمعو بزاف حكايات غير خلي البير بغطاه...

هكذا عايشين لي يبيعولكم الاوهام و عايشين حياة وردية ....

موجة غباء كبيرة تضرب الجزائر

لي كانو يديرو التبشير كانو يديرو الخير اومبعد يروح يدعم الجنود باش يديرو المجازر ....
لي كانو يتاجروا بالبشر كانت عندهم منظمات خيرية ....
شحال من بيدوفيل داخل فالحقوق الاطفال و كاين منهم لي حتى يدخل الحروب و يدير الخير ....
كمال داوود كان يدافع على المرأة و ضرب مرتو ضربها بفرشيطة ( معلاباليش علاش قلت المثال هذا بصح وقيل في پلاصتو )
فرنسا دارت الخير فالشعب و كانت توزعلو الأكل مور ما هي دارتلو المجاعة .....
لي يبيضو الأموال دراهمهم يروحو كامل فالمساعدات باش يبيض وجهو
لي يخطفك ديما يمدلك حبة حلوة و يقولك اركب معايا ، علابيها نقولو للدراري صغار ما تشدوش الحلوى من عند عيباد ما تعرفوهمش ، و من جهة الشارفات و الشارفين تان نقولولهم ماشي جميع واحد قلبو كبير يستعملو فالخير كاين الخير يديرو انسان شرير باش يبيض وجهو تسمى باينة يهمني شكون راه يدير فيا الخير ،اذا كان انسان ما يساعدنيش فالتوجه ديالي ما نسحقوش يساعدني كامل حتى و نموت .....تسمى الحملات ديالكم باش تبيضو وجوه عيباد يساعدوكم فالتحرر ديالكم ردوهم ليكم ، نتوما ممكن تتشراو بالشوكولا حنا لالا ، كاين بعض المبادئ و الدين و العقيدة ما تتشراش كما نتوما تبيعو روحكم و دينكم و داركم و كلش على جال شوية صرف

مسيح الدجال كي يخرج راح تجيه بزاف سهلة ، يدير ترند برك يتبعوه ولا يساعد الناس ، كي يجي لدزاير يقولولك واش دخلك فيه هذا أعور بألف رجل دير واش دار اومبعد حل فمك ما يهمنا لا دينو لا ميولو مهم وقف معانا ...
فتنة بزاف صعيبة ربي ينجينا منها ، بصح راح تكون ليه بزاف سهلة

ديجي شابلة شحال عفوي و ماشي ڨع متصنع ، رجل بألف مرأة