The Act of Teaching

عارف اللحظة الى هتعرف تحكى فيها الحدوتة من غير ما تكون حاسس انك ضحية

اللحظة الى هتحكى و انت مرتب افكارك و انت عارف ان ده الى كنت تقدر عليه و كان مقاسك

اللحظة الى عرفت فيها انت كسبت ايه و ليه حصل معاك كده
اللحظة الى بتحكى و انت بطل حدوتك

هى دى اللحظة الى انت فعلا تشافيت و تعافيت من الى عديت به ♥️

بوعى او بدون وعى فى شخصيات معينة بتمص طاقتك و بتستتزفك

الشخص الى عايش دور الضحية و الشخص المتلاعب و الشخصية المستفزة

الضحية عايز تعاطف و مش عايز حلول
المتلاعب بيلعب، بس بيلعب على احساسك بالذنب
المستفز بقى ده حكايته حكاية، بيحرجك او يخليك تغضب باى شكل و يخرجك عن شعورك

عايزة اقولك محاولاتهم معاك بتبقى مرتين تلاتة و لو ما لاقوش الاستجابة الى عايزينها بيبعدوا و يدوروا على غيرك

التعامل معاهم بيبقى عن طريق التجاهل لو هما مش فى دايرتك القريبة او الاخماد لو مضطر للتعامل معاهم

التجاهل اكيد عارفه و هو انك تعترف بحقه فى التعبير عن نفسه بس ما تديهوش اى مشاعر او تفكير سلبي او ايجابي
تعالى اقولك الاخماد بيتم ازاى؟
ببساطة هو انك تعمل عكس الى هو مستنيه منك 🤷

كنت زمان لما يبقى عندى مشكلة تعبانى
بوجه نفسي لسؤال ازاى احل المشكلة؟
او ايه الحلول المتاحة؟
او اقدر اعمل ايه؟
دلوقتى بعد شوية نضج بقيت شايفة ان التفكير فى المشكلة حتى لو لايجاد حلها هو مضيعة للوقت🫣

ايه الهدف الى ضاع؟

طب هل انا لسة عايزه نفس الهدف ده و لا محتاحة اغيره؟

بقيت بافكر هو انا عايزة ايه؟

ايه هدفى؟
#اهداف #تخطيط

فى مرحلة كدة بتعدى على الشخصيات المتحفظة بعد المرور ب أزمات و بعد ما يكونوا حكوا و فتحوا قلوبهم للناس و الحياة
و هى مرحلة انا بسميها مرحلة "لم الى اتبعتر"
لان الشخصية المتحفظة بعد ما بتفوق من الازمة بيكتشف ان حياتها بقيت مشاع و ان دى مش شخصيتها و لا شبهها
و انه الانفتاح و البوح و التحرر النفسي حلو بس مش ده الى كانت عايزاه
بيحس انه غريب عن نفسه
مش قابل النظرة الجديدة له
مش مرتاح
فيبدأ يلم الى اتبعتر
يلاقى نفسه بيبعد عن ناس (الناس الى كان بيحكى لها كل حاجة) و هو مش عارف بيعمل كدة ليه
يلاقى نفسه بيجمل الصورة مع انه اصلا بيحب يبقى حقيقي
كل ده محاولات انه يرجع صورته الاولى المتحفظة الى محاوط نفسه و ما حدش عارف دواخله
بس الى بيروح مش بيرجع
لان الناس مش بزراير تبقى منفتح شوية و تبقى غامض شوية
طب انت مين؟
لو انت الشخصية المتحفظة دى محتاج يبقى عندك اشخاص آمنين فى حياتك تأمنهم قبل ما يبقى عندك أزمات
و لو بالفعل بتعدى بأزمة حاول تختار الاشخاص الى هيدعموك مش كل من هب و دب تحكى له عن معاناتك
و لو محتاس إلجأ لمختص
عشان ما تندمش على خسارة علاقات

يارب أعطني السكينة لكي أقبل الأشياء التي لا أستطيع أن أغيرها
والشجاعة لأغير الأشياء التي أستطيع أن أغيرها
والحكمة لأعرف الفرق بينهما
ساعدني أن أحيا يوماً بيوم أستمتع بكل لحظة في وقتها
ساعدني أن أقبل الصعاب وأجتاز فيها لأصل إلى السلام
ساعدني أن أقبل العالم والناس كما هم وليس كما أريدهم أن يكونوا
ساعدني أن أتغير أنا
واثقاً أنك صاحب السلطان وسوف تفعل كل شئ حسنا إن سلمت قلبي وحياتي لمشيئتك.
آمين

ال ACT اكثر برنامج علاجى قائم على الاهداف السابقة
ACT يعنى العلاج بالتقبل و الالتزام
تقبل الاشياء الخارجة عن ارادتك
و الالتزام بتغيير الاشياء الى يمكنك تغييرها
و هدفك فى الاخر انك تعيش حياة افضل😍
#تقبل
#اهداف

المؤمن مرآة أخيه♥️

بس خليك فاكر ان
انت الى بتروح للمراية مش هى الى بتيجى لك🙈

تعالى اخدك معايا فى التاكسي نص ساعة تقريبا من راس التين لمحطة مصر
سواق فى التلاتينات من عمره
جاله تليفون ( يوسف صاحبه) من غير الدخول فى تفاصيل المكالمة
الى كان بيحكى فيها عن مراته سلمى و اد ايه هى بتقول كل حاجة لاهلها الى بيستغلوه عشان بيكسب ٧٥٠ جنيه فى اليوم و شتم عليها بالاب و الام لانه بقى مديون ب خمسين الف جنيه بسببها

نرجع بقى للرحلة الى كلها مخمضة جوا التاكسي و غرز
(ما هو ماسك الموبايل من اول ما ركبت)
فجاة كان هيعمل حادث و داخل فى عربية ف زعق للسولق و قاله ما هو انت مش مركز عشان ماسك الموبايل و بترغى 🙈
اه و الله
كنت فى حالة زهول حقيقي
هو عارف ان المفروض يركز فى الطريق و ان ما ينفعش يتكلم فى الموبايل و بيزعق للسواق التانى باعتبار ان هو بس الى غلطان
و بيقول ل يوسف اد ايه السواقة بقيت صعبة عشان الاشكال الى بتسوق حواليه 🤣

و عجبى🙃

دايما بنعرف نطلع اخطاء غيرنا بسهولة بس بيبقى صعب علينا نبص على اخطاءنا او نشوف ان احنا الى غلطنا او على الاقل شركاء فى الغلط
مش لازم دايما الاخر يكون هو بس الى غلطان
ممكن نركز شوية و نفكر و نلاقى الغلط مشترك او احيانا كمان بنكون احنا بس الى غلطانين

#تاكسي #اخطاء

قابلت ناس شكاية
يعشقوا الشكاوى
بيمتصوا طاقتك
عايشين دور الضحية طول الوقت
خايفين يطلعوا منه لا يفقدوا الاهتمام و التعاطف إلى بتقدمه لهم
هما يقولوا مشاكل و انت تدى حلول
و النتيجة كل حل له قفلة عندهم
لحد ما تحس بقلة الحيلة و انك مستنفز مع ان كان غرضك تساعدهم

الحل مع الناس دى انك تديه إلى هو محتاجه من غير ما تسمح له انه يستنفزك و يمتص طاقتك
تقولى إزاى
اقولك : تقوله مثلا
أنا حاسس بيك، و مقدر وجعك ،هتعمل ايه بقى؟ ناوى تتصرف إزاى؟
و إوعى تديه احتمالات أو تقترح عليه اى حلول
و إفتكر انى قولتلك بلاش
بلاش تسيبه هو إلى يسوق عشان هيلففك حوالين نفسك
#شكاوى #ضحايا

ما تركزش على حل المشكلة
ركز دايما على الهدف✅

تعالى اقولك
كان عندى مشكلة فى الغسالة و هى لسة فى فترة الضمان
اه زى ما باقولك كدة (الغسالة بتكهرب 🙄😟)
المهم كلمت الشركة و ما فيش تغيير و كلام المسئول ان دى حاجة عادية 🙄😭
و اتكرر نفس الموضوع اكتر من مرة اكلمهم و ييجى الفنى و ما فيش نتيجة و اكلمهم و اضايق و الغسيل يتراكم و اتعصب و هكذا

و بعدين فى يوم قررت اسأل نفسي فين المشكلة يا سمر
انهم باعولى غسالة بايظة؟
ان خدمة العملاء سيئة؟
انى مش عارفة اوصل لشخص يحل مشكلة انها بتكهرب؟

الحقيقة و لا حاجة منهم كانت مشكلتى الحقيقية
مشكلتى الحقيقية او هدفى كان انى عايزة اطلع الغسيل من الغسالة من غير ما اتكهرب 🤷 بس كدة

بس عشان اوصل للمشكلة الحقيقية و ابدا ادور على حل غير انى اشترى غسالة جديدة😢 و الى عندى لسة فى الضمان كنت محتاجة الاول اهدا و الاقى اجابة الاسئلة او المشاكل السابقة
الى هى ادت الى
مش هتعامل مع الشركة دى تانى
طب وبعدين استفدت ايه انا دلوقتى 😏

اقدر اعمل ايه عشان ما اتكهربش
استخدم كيس بلاستيك و انا بطلع الهدوم مثلا
جربت و كانت فكرة بدائية بس فعالة نسبيا
ف لما العقل بدأ يشتغل بشكل ايجابى
طلعت فكرة افضل

هى الكهربا بتيجى منين 🤣
يعنى لو شيلت فيشة الغسالة قبل ما اطلع الهدوم منها
مش هتكهرب 🤔

الحل كان موجود من الاول بس ما كنتش شايفاه
مش ظاهر لى
ظهر لما ركزت و سالت نفسي (( انا اقدر اعمل ايه عشان اوصل لهدفى؟! ))

ركز على اهدافك مش على التحديات الى بتواجهك و استخدم امكانياتك المتاحة من غير ما تضغط على نفسك

#اهداف #غسالات

اتعلمت من الشطرنج 😍

إن مش عشان بدأت ال game وحش إنى انسحب
بالعكس اتعلمت إنى حتى لما البداية ما تكونش عجبانى فى احتمال إنى اكسب
بل بالعكس ده بيكون تحدى أكبر ليا إنى ألعب أحسن و أفكر أكت💡

اتعلمت إنى ابص لل game نظرة holistic
يعنى اشوف كل القطع و افكر فى كل الاحتمالات و كمان أفكر فى خصمي هيرد عليا ازاى و ده هيترتب عليه ايه فى الدور🤔
(صحيح مش باعرف افكر فى اكتر من خطوتين قدام بس لسة باحاول)

اتعلمت ان مش كل حاجة ما بحبهاش بتكون وحشة يعنى مثلا انا مش بأحب
ال online gaming بس اكتشفت انه احسن من مافيش👩‍💻
و كمان فيه مرونة فى الوقت و بيوضح مستوايا و بيسهل المقارنة و بيدينى مهارات كتيرة

اتعلمت إنى مش لازم كل مرة أكسب و إنى لو ما كسبتش من أول game لازم اكمل لعب لحد ما اكسب 👊
بقى عادى عندى إنى اخسر بس لازم أحلل انا خسرت ليه

اتعلمت ان الوزير مش اهم قطعة و لا حاجة
عادى ممكن اكسب من غيره💪
لو اعتبرته قطعة زى اى قطعة بس لها قيمة أعلى سيكا مش اكتر 🤷

التحدى الى بجد إنى اعرف استخدم المهارات الى بتعلمها فى اللعب فى حياتى اليومية و علاقاتى

انت بقى بتعرف تستغل المهارات الى بتتعلمها و توظفها فى حياتك؟

Lower your expectations

دايما يقولولك انزل بسقف توقعاتك

ما تتوقعش حاجة كويسة من حد🙃

ما تستناش حاجة من حد 😒

بس انا عايزة اسأل ليه، بجد ليه؟؟؟

ليه عايزين ما يبقاش عندنا معايير ؟

ليه عايزينا نشيل مسئولية خذلان الآخرين لينا ؟

ليه عايزينا نحس ان احنا الى غلطنا لما استنينا طريقة تعامل احنا اصلا بنتعامل بيها و نستحقها؟

قولولى بس مين الى قالى كدة 🙊

ملحوظة :الصورة عشان لو السقف وقع عليا🫡

تيجى نفرق بين ٣ كلمات
الوضوح
الصراحة
الوقاحة

الوضوح مطلوب، حلو إنك تكون شخص واضح لنفسك قبل لغيرك، حلو إنك تكون بتعرف تعبر عن احتياجاتك بشكل راقى و توكيدك لذاتك بيزيد ثقتك بنفسك

زى مثلا: إنك لو صحابك بيتفقوا على خروجة و انت مش مناسب ليك، ما تحورش و قول مش هاقدر بشكل مباشر

الصراحة بقى احب اقولك ما تتبرعش برأيك ما حدش طلبه منك

الوقاحة 🙃 نبعد عنها على أد ما نقدر، نحاول نختار كلامنا ، جرحك لغيرك مش إضافة ليك