E-Laban Swim Club نادي اللبان للسباحة

هااام جدا لكل السباحين
👈( بطولات المناطق ٢٠٢٥ )
نصايح ممكن تهمك لو انت من ( ١١ : ١٤ سنة ) ( لو عايز تكمل فى الرياضة دى و تنافس بشكل سليم و صحى )

السباحين :🏊‍♂️🏊‍♂️🏊‍♂️🏊‍♂️

١- المنافس بتاعك الحقيقى هو شكلك القديم ( خوفك - ستارت - ترن - ستايل - رقمك القديم - ترتيبك القديم )

* لو كل ده انت حسنته و الرقم و الترتيب متحسنش يبقى انت برضو ماشى صح مدام فيه حاجات اشتغلت عليها و اتحسنت*

٢- من الميدالية البرونزية للمركز ال١٠ او ال١٥ فى السباق بتاعك احتمال يبقى من أجزاء : ثانية فا ده مش معناه انك فشلت ده معناه ان ده اختيار ربنا عايزك فى المكان ده عشان ده الخير ليك. ( فى حالة مفيش أخطاء فى السباق بتاعك )

٣- السبق الى يخلص متفكرش فيه مهما كان حلو او وحش ( كل سبق و له ظروفه ) و كل سبق تنزله اعتبره الأول و الأخير.

٤- تحمد ربنا و تبقى راضى من جواك و تخلى قلبك ابيض عشان ده اكبر فايده هتاخدها من السباحة لما تبطل ان شخصيتك تبقى مستقرة و سليمة.

٥- متستعجلش على الميدالية عشان لو انت ماشى بشكل سليم هيوصل بيك الحال بعد كدة انك بتاخد اول و معلى رقمك او مثبت رقمك و هتعرف ان الميدالية مش تارجت تشتغل عليه لما تكبر بالعكس الرقم هو الى هيبقى مهم بعد كدة ( بطولات العالم و الاولمبياد ممكن تبقى احسن سباح فى دولتك و متسافرش عشان محققتش الرقم الى مطلوب انك تسافر ) فا خلى خطتك سليمة و طويلة.

٦- خلى نفسك طويل فى السباحة بمشاكلها و نتايجها ( عمرك ما هتفضل بتخسر و عمرك ما هتفضل بتكسب ) عشان الى نفسه طويل هو الى هيكمل.

٧- الى اتمرنت عليه ده الى هتنزل تنفزه فى الحارة بتاعتك و ملكش دعوة بنتايج الى حواليك.

٨- ظروف السبق و عدم خوفك و توترك ممكن يخلوك تعمل احسن من تمرينك و خوفك و توترك هيخلوك تعمل اوحش من تمرينك بكتير.

٩- انت بتتمرن بالسنين عشان سبق مدته ثوانى او دقايق فا ده يستاهل منك انك تعمل الى بقول عليه.

١٠- اياك تاخد اى قرار فى قمة حزنك او قمة سعادتك عشان بنسبة ٩٠٪؜ القرار ده بيبقى غلط.

🛑المدربين و أولياء الأمور :🛑

( يا ربيت توصل للسباح بتاعك او ابنك البوست ده و تكون مربيه و ممرنه على الحاجات دى و دايما تقوله الكلام ده عشان السباح ده مش سلعة بتاجر بيها كمدرب عشان تزود شهرتك و فلوسك و ابنك مش لازم يبقى زى ابن مدام سعاد الى بيحطم الأرقام خليه يركز على نفسه عشان ميطلعش أهبل زى حضرتك )
🏊‍♂️🏊‍♂️🏊‍♂️🏊‍♂️🏊‍♂️🏊‍♂️🏊‍♂️🏊‍♂️🏊‍♂️
بالتوفيق للجميع 😍🫶🏻♥️