Trainer Marian Milad

الحياة النفسية محتاجة صيانة زي العربية، لو فضلت تسوقها وهي بتشتكي، هتيجي في يوم وما تتحركش... خد وقتك وصلّح اللي بايظ جواك.

متاخدش كل حاجة على أعصابك... حتى الإنترنت لما بيهنج بنقفل الراوتر ونفتحه تاني، جرب تعمل كده مع دماغك!

القلق ساعات بيبقى زي العيال الصغيرة، كل ما تطنشه، يعلي صوته أكتر... بس جرب تديه اهتمام بحدود، اسأله: "عاوز إيه بالظبط؟"، يمكن يسكت!

#قلق

المود الوحش مش بيجي لوحده، بيجي شايل معاه كيس ذكريات قديم ويقعد يفرشه قدامك... قوم شغّل مزيكا وافتح الشباك، يمكن يطفش!

"الحب مش ورد أحمر وقلبين في السما…"

الحب إنك لما تبقي مخنوقة ومش قادرة تتكلمي، هو يفهمك من نفس واحد تقيل طلعتيه… الحب مش بس كلام حلو، الحب هو مين اللي هيفضل ماسك إيدك وأنتِ أصلاً مش متأكدة إنك تستاهلي!
#علاقات

"متاخدش حاجات مش بتاعتك... إلا لو كانت شامبو الفندق!" 😂🧴

تخيل معايا، داخل فندق خمس نجوم، بتفتح شنطتك قبل ما تمشي، وتلاقي جواها:
✅ شامبو ✅ صابون ✅ شاور كاب ✅ ٣ أكياس شاي ✅ ٢ ظرف سكر ✅ معلقة من المطعم مش عارف دخلت إزاي! 🤭

هنا السؤال الفلسفي العميق: ده كليبتومانيا ولا عادة شعبية متوارثة؟ 🤔

الحقيقة إن الكليبتومانيا مرض بيخلي صاحبه يسرق بدون ما يقدر يتحكم في نفسه، حتى لو الحاجة ملهاش أي قيمة عنده. إنما إحنا؟ إحنا بناخد الحاجة واحنا عارفين كويس أوي إنها ببلاش، وبنعتبرها هدية وداع رسمية من الفندق! 😂

يلا قول الصدق... إيه أغرب حاجة "استضفتها" من فندق قبل كده؟ 🤭

العلاقات دي عاملة زي اللبن…"

لو باظت، مفيش حاجة هترجعها زي الأول… لا اعتذار، ولا محاولات، ولا حتى غليها على نار هادية! فخد بالك من تاريخ الصلاحية، لأن في حاجات لما تبوظ، الوحيد اللي هيشربها للأسف هو إنت!
#علاقات

لعبة (أنا هاجننك)..

علمياً.. مافيش حاجة اسمها حد يتسبب فى جنون حد.. لكن على أرض الواقع ممكن حد يلخبط حد.. يحير حد جداً.. أو يُفقده الصواب بالمرة..

ممكن حد يحط حد تحت ضغط نفسي شديد جداً.. ممكن حد يوصل لحد رسايل مزدوجة.. ممكن حد يخلى حد يشك فى قواه العقلية..

حد يقول لحد (بحبك).. لكن كل أفعاله معاه تعبر عن العكس.. عدم اهتمام.. وعدم تقدير.. وأحياناً اهمال.. واساءة.. بل وكراهية.. فيلتخبط.. ومايبقاش عارق يفهم إيه.. أو يحس بإيه..

حد يحملك فوق طاقتك.. يحسسك طول الوقت انك مقصر.. انك مش كفاية.. ان مالكش لازمة أصلاً.. فتتملى شعور بالذنب والتقصير.. وتكره نفسك.. وتكره الدنيا كلها..

حد يعشمك.. ويخذلك.. ياخد منك.. ومايشبعش.. يوعدك.. ويرجع طول الوقت فى كلامه.. فتحس بالاحباط.. واليأس.. وفقدان الأمل..

حد يوحي لك.. وبعدين يوصل لك.. وبعدين يقنعك.. بمنتهى الإصرار والثبات.. إنك انت الجانى.. وان هو الضحية..

عارف إيه السر؟ ايه المفارقة؟

السر والمفارقة ان كل ده فى الأصل مكانه جوا هذا الشخص المؤذى نفسه.. تصور!

هو اللى من جواه ملخبط.. هو اللى من جواه بيكره نفسه وبيكره اللى حواليه.. وهو اللى مليان يأس وفاقد للأمل فى أى شئ.. لكنه بالرغم من ده.. مش باين عليه حاجة خااااالص.. أعصابه فى تلاجه.. منتهى الهدوء.. احساس رهيب بالسيطرة والكونترول.. مش بيرمش حرفياً.. مافيش نبضة قلب زيادة (غير فيما يخصه).. مافيش دمعة عين (غير تمثيل).. مافيش غير وش جامد.. وملامح ثابتة.. مافيش ذرة تعاطف.. مافيش ذرة ضمير..

طيب ازاى يا دكتور؟ ازاى هو اللى جواه كل ده؟ ودا كل ده فين؟

وهنا السر التانى.. أو المأساة التانية..

هو رمى ده بكل براعة داخل ضحيته.. مارس معاها لعبة نفسية بشعة جداً شرحتها فى أحد كتبى السابقة اسمها (التقمص الإسقاطي).. خلا ضحيته فيها هى اللى تتلخبط (بدل منه).. وهى اللى تكره نفسها (لدرجة الانتحار).. وهى اللى تفقد الأمل (لدرجة الاكتئاب).. رمي كل اللى جواه داخلها (بمزيج هائل من الرسائل النفسية المختلطة والضغط النفسي الشديد).. وأصبح هو زى ما شوفنا كده.. لوح ثلج مصمت.. سيكوباثى من الكتاب.. بُص فى عينيه وانت تعرف..

ضحايا اللعبة دى بتكون حدودهم النفسية - فى أوقات كتير- ضعيفة.. هشة.. قابلة للاختراق.. وهو بيعرف يلقط النوع ده من الناس.. يخترق حدودهم ببراعة.. يتسلل داخلهم فى هدوء.. ثم يعيث فيهم خراباً..

ضحايا اللعبة دى بيحتاجوا وقت علشان يتعافوا.. بيحتاجوا يتطهروا من جواهم ويتخلصوا من كل ما تم القاؤه داخلهم.. زى ال(دي توكس) كده.. بيحتاجوا يستعيدوا نفسهم ويتعرفوا عليها من جديد.. لأنهم بيكونا فعلاً نسيوها واغتربوا عنها.. ودى رحلة مش سهلة..

دى مش بس لعبة نفسية..
ده فيلم رعب..

زى السرقة.. وزى الذنب..

"العلاقات بقت زي الشبشب في البيت..."

لو مريحك، هتفضلي لابساه حتى لو مبهدل شوية… ولو تعبك، هترميه أول ما تلاقي بديل أنضف وأريح! بس الفكرة إنك تستاهلي تلبسي حاجة محترمة من الأول، بدل ما تعوّدي نفسك على وجع الرجلين!

#علاقات

"العلاقات السامة زي الأحذية الضيقة"

عارف الإحساس لما تجيب جزمة شكلها عسل بس كل ما تمشي بيها شوية تلاقي رجلك بتصرخ؟ في الأول بتقول "هتوسع مع الوقت"، بعدين تلاقي نفسك ماشي زي البطة ومش قادر تكمّل، بس برضه مكسوف تقلعها عشان "خسارة شكلها حلو"!

العلاقات الغير سوية بالظبط كده، في الأول بتبان جميلة ومغرية، بس كل شوية تلاقي نفسك مضغوط، مقيد، مش عارف تاخد نفسك، وكل ما تحاول تمشي طبيعي، تلاقي الألم بيزيد.

الحل؟ اخلع الجزمة اللي بتوجعك، حتى لو شكلها حلو، حتى لو غالية، وحتى لو كنت متعود عليها. رجلك – وقلبك – يستاهلوا حاجة مريحة أكتر.

"فقدان الشغف زي لما تفتح نتفليكس ساعتين ومش عارف تتفرج على إيه!" 🎬😵

عارف الإحساس ده؟ إنك تبقى عاوز تعمل حاجة، بس فجأة كل حاجة تبان مملة؟ حتى الحاجات اللي كنت بتحبها زمان بقت "meh"! 🤷‍♂️

الحقيقة إن فقدان الشغف مش معناه إنك فاشل أو إنك فقدت طريقك للأبد… ده زي البطارية اللي محتاجة تتشحن! 🔋

💡 جرب الحاجات دي:

بدل ما تستنى "المزاج" ييجي، ابدأ بأي خطوة صغيرة!

غيّر الروتين… أحيانًا المخ بيملّ من التكرار! 🔄

ارجع للحاجات اللي كانت بتبسطك زمان حتى لو نسيتها! 🎨🎸

خد بريك… الشغف مش سباق، ومش لازم تكون متحمس طول الوقت!

وأهم حاجة… متستسلمش! الشغف مش حاجة سحرية بتيجي وتروح، لكنه حاجة بنبنيها مع الوقت. ✨