19/12/2024
لو عندك ما يكفي من أكل ومكان تعيشي فيه هيكون أسهل حاجه إنك تريحي .. تسترخي وتأنتخي كده زي ما بنقول 🤭
في واحدة ثانية ممكن تختار تضيف على الخلطة دى الحد الأدنى من العبادات أو حد تانى حاجات بسيطة إضافية على فكرة ساعات بتكون شغل (يوم عمل يعنى) لكن أغلبنا هنضيف فيديوهات كتير كتير و scroll scroll scroll ..
بس حتى لو دول كلهم عندك دايما في صوت -قومي يا بت- 😅 بيطلع من جواكي ومعاه شعور بإن الراحة دى .. لأ مش مريحة لأ لأ فى حاجة غلط
عاوزاكي تعرفي إن مجاهدتك وصعوبة خروجك من الحتة دي و تسيبى السرير بتاعك و تقاومى الاكتئاب أو الموود الوحش ليهم ثواب .. تخيلي .. آه ..
تطوير الذات عليه ثواب ، الخروج من الفقاعة اللي انتى فيها دي ومريحاكي نسبياً واي stretch بتعمليه علشان تسقفي لنفسك وتكوني أحسن شكل من أشكال جهاد النفس 🩵
عشان كده التخطيط صعب على أغلب الناس مش شيء سهل إطلاقاً (مره تانية هنتكلم عن أنواع الناس في التخطيط) لكن خليني أقول لك ليه التخطيط صعب أحياناً :
1/ المسؤولية يا عزيزتي مش سهلة ده في علاقات بتتفركش بسبب fear of commitment 😲
احنا لما اتولدنا مكناش مسؤولين عن نفسنا في أشخاص موكلين عننا بالرعاية وعشنا جزء كبير في مرحلة الطفوله والمراهقه معتمدين ع الوكيل ده برضة بس جزئيا ، المسؤولية الجزئية دي بتتغير وبتكبر كل ما بنكبر وبتوضح أكتر في انتقالنا من مرحلة للثانية من حياتنا فتحملك للمسؤولية طبيعي يخوفك (هي الخطة هحطها وهنفذها كمان! يعنى خلاص ملهاش أهل يسالوا عليها).
2/ الشعور بالاحتياج للمساعده
اوقات مش بنفهم ازاي نستجيب للشعور ده والأفكار اللي بتطلع مصاحبه ليه ولإن التعلم رحله مستمرة مهم فيها تعدد المصادر أحياناً فبنحتاج لحد عنده خبره أكتر شويه يساعد في الجزئيه دي وده هيتطلب بحث منك وحبه صدق فى إنك تشوفي انتى واقفه فين وهنا ممكن فيديو او كتاب يساعدوكي في النقطه دي مش شرط شخص.
3/ المقاومه النفسيه
ودي بقى (ممكن نعمل معاها صوت يالهوووى فى الخلفية 😄) اكتر حاجه في المقاومه النفسيه بتأثر على الجزء بتاع تخطيطك للسنه الجديده على الاقل هو الرغبه في تجنب الألم ودي نقطة قوية اوووى
هخطط يعني هتحرك .. هخطط يعني هعمل محاولات .. هخطط يعني في حاجه هتتغير في الوضع الحالي عشان اوصل للوضع المرغوب فيه .. يعني هجرب .. يعني مجهود .. طب هل هوصل .. هل السكة هتكون سهله وسلسه ولا مليانه مطبات .. هل في السكه هتعلم حاجات .. هل لسه هفضل أكتشف .. يمكن ما ينفعش .. هضيع وقت وفلوس .. كل ده على المستوى الفكري مجهود رهيب
فلو مشيتى المشوار وما كملتيش عادى ^^ انتى على الطريق 🩵
اكتبى لى سؤالك عن التخطيط فى التعليقات وهجاوبك
26/12/2022
26/12/2022
12/10/2022
01/10/2022
23/01/2022
21/01/2022
02/01/2022