11/08/2026
مش كل مين معاه حزام أسود... ينفع يربي طفل.
لأنك مش بتختار لابنك مكان يقضي فيه ساعة تمرين وخلاص.
إنت بتختار شخص ابنك هيسمع كلامه، هيحترمه، هيقلده، وهياخد منه جزء من شخصيته.
وعشان كده اختار مدرب طفلك زي ما بتختار مدرسة .
متسألش بس:
الاشتراك بكام؟
والتمرين كام يوم؟
والبطولة الجاية إمتى؟
اسأل عن المدرب نفسه.
بيتعامل إزاي مع الطفل الضعيف قبل البطل؟
لما الطفل يغلط، بيعلمه ولا يهينه؟
لما يخسر، بيسنده ولا يحسسه إنه خيّبه؟
ولما تحصل مشكلة، همه مصلحة اللاعب فعلًا... ولا همه إن الاشتراك الشهري ميتأثرش؟
لأن للأسف فيه مدربين شايفين اللاعب اشتراك .
طالما بيدفع وبيتمرن، تمام.
لكن نفسيته؟ ثقته في نفسه؟ حبه للعبة؟ علاقته بزمايله؟
تيجي بعدين.
والبطولات والأحزمة مهمة طبعًا...
لكنها مش شهادة إن صاحبها يعرف يتعامل مع طفل.
المدرب الحقيقي مش بس بيعلم كاراتيه.
المدرب الحقيقي يعرف إن قدامه طفل بيتكوّن...
وإن كلمة منه ممكن تزوده ثقة،
وكلمة تانية ممكن تخليه يكره رياضة كان بيحبها.
فمتختارش أقرب مدرب.
ولا أرخص اشتراك.
اختار الإنسان اللي تطمّن تسيب ابنك معاه.
لأنك مش بتختارله تمرين بس...
إنت بتختارله قدوة.
#كاراتية
