في العارضة - Fi Al3arda

بما اننا في فترة توقف دولي وفيه حالة ملل في الجو شوية فا قررت اعيد مشاهدة بعض مباريات ريال مدريد

عشان اقدر اوصل ل ايه المرحلة اللي وصلها تشابي الونسو لغاية دلوقتي هل فيه تغيرات حصلت ولا لأ

وفي البوست ده هنشرح بشكل أكبر ايه اللي اتنفذ في ريال مدريد ونعمل تحليل للفريق في المباريات اللي لعبها قبل التوقف




#ريالمدريد

رسميا ايزاك الي ليفربول في صفقة تقدر ب 130 مليون باوند من اغلي خمس صفقات في التاريخ!!

جمهور ليفربول دلوقتي هما اسعد جمهور في العالم اكيد امبارح بيفوزوا ماتش ارسنال خصم مباشر وفي الدقائق الأخيرة بهدف عالمي وبيتصدروا بالعلامة الكاملة وبعدها ب كام ساعة بيتعاقدوا مع افضل مهاجم في الدوري واهم صفقة تقريبا حصلت

بس في اسألة كتيرة فنية تتسأل .. يعني مثلا مباراة امبارح شوفنا بعض الأوقات ليفربول مبيقدروش يضغطوا علي ارسنال أو يجاروهم فنيا بسبب وجود فيرتز وصلاح الاتنين دفاعيا مش موجودين وضغطهم برضو قليل وكمان ايكتيكي ضغطه مش بنفس الحدة أو الشراسة المطلوبة وكده كده خارج الدفاع

فا هل الملعب هيستحمل وجود اتنين مهاجمين وراهم اتنين أجنحة فيرتز وصلاح مش بيدافعوا؟ يعني كده في الحالة الدفاعية الفريق هيبقي ناقص اربع لاعيبة!!

وكده برضو هتقعد سوبوسلاي اللي بادئ الموسم بفورمة كويسة وقادر يجاري الدوري بدنيا هتقعده دكة ليه ؟ ولا تضطر تقعد فيرتز وتلاعبه ؟ ولا هتقعد ايكتيكي اللي جاي بمبلغ واصلا هو احسن لاعب عندك السيزون ده

وبرضو فكرة انك تلاعب حد فيهم جناح هتبقي نفس الكلام مش هيقدم الادوار الدفاعية وكمان هيفقد خطورته وهو موجود علي الخط

هي كلها اسألة محتاجة اجابات اكيد ارني سلوت عامل خطط في دماغه لتوظيف ايزاك بس لسة مش عارفين هتنجح ولا لأ خصوصاً أن مع الانتصارات لكن ليفربول من وجهة نظري لسة مقدموش المستوي المطلوب لغاية دلوقتي

عموما صفقة كبيرة جدا واكيد هيفرق معاهم حتي لو بعض العناصر التانية اتأثرت

السبت الممتاز النهاردة كان ممتاز فعلا واوفي بكل التوقعات وقدملنا متعة مشوفنهاش بقالنا كتير !!

يعني بداية من توتنهام الفريق اللي بدء الموسم بشكل ممتاز النهاردة بيخسر علي أرضه ضد بورنموث في مفاجأة كبيرة من وجهة نظري

كمان فريق ايفرتون عاملين انطلاقة كويسة جدا بعد الخسارة اول جولة من ليدز بيقدروا يفوزوا في ماتشين منهم ماتش النهاردة ضد الولفز اللي كان رايح جاي وممتع جدا

وبنفس النتيجة مانشستر يونايتد اخيرا بيفوز ويحقق اول انتصار له في الدوري فوز مهم جدا بعد الضغوط الغير طبيعية اللي كانت علي اموريم والفريق كله وبالمناسبة هما لعبوا كويس النهاردة قريب من ماتش ارسنال

نيجي بقي لساندرلاند الفريق اللي عامل حالة مختلفة في الدوري في ظرف تلت اسابيع بيحققوا انتصارين ضد فرق من الدوري النهاردة بيفوزوا في الدقائق الأخيرة امام برينتفورد في أجواء ملعبهم الخيالية ويحققوا افضل انطلاقة لفريق صاعد لغاية لما نشوف ليدز هيعملوا ايه ضد نيوكاسل

يوم ملئ بالمتعة في البريميرليج 🔥⚽

ليفربول ايوة فازوا بس فيه علامات استفهام كتير جدا !! يعني أول مباراتين فوز وتصدر الدوري بشراكة مع ارسنال وتوتنهام و فوزين ضد خصوم صعبة ايوة بس الأداء غريب جدا

معتقدش أن في مشجع لليفربول مش فرحان جدا بس في نفس الوقت قلقان بسبب المستوي ده النهاردة بالرغم من الفوز الصعب بسيناريو اصعب وفي ملعب من أصعب ملاعب الدوري ضد واحد من الفرق الكبار من وجهة نظري لكن اكيد الأداء يقلق

نيوكاسل عملوا كل حاجة في الماتش مطرود منهم لاعب وبرضو مسيطرين ومقدمين جيم تاريخي ضد بطل الدوري وبيقدروا يرجعوا في النتيجة بعد التأخر بهدفين ده شئ صعب جدا

وأنا رأيي أن النتيجة مكنتش عادلة الصراحة والسيناريو كان قاسي جدا علي نيوكاسل خصوصا بعد الملحمة اللي اتقدمت من المدرب واللعيبة والجمهور طبعا وأجواء السانت جيمس بارك التاريخية

صفقات ليفربول محدش ظهر غير ايكيتكي وظاهر بشكل ممتاز كمان احسن لاعب في الفريق منذ بداية الموسم كمان غير كده حتي المستويات الفردية تثير الشكوك

فوز مهم ل ليفربول قبل مواجهة الجانرز وطبعا لازم ارني سلوت يعيد حساباته تاني وهارد لك ل نيوكاسل هزيمة غير مستحقة اطلاقا لكن لازم يتم التعاقد مع مهاجم ساعتها هيقدروا يعلوا من المستوي كمان

توتنهام أصبح اكتر فريق يخسر منه بيب جوارديولا مع ليفربول بعد ماتش النهاردة المعني الحرفي لكلمة عقدة

توماس فرانك هو كان السبب في اني اقول في بداية السيزون أن توتنهام هيبقوا مختلفين الراجل ده غير حاجات كتير جدا ولغاية دلوقتي اهو العلامة الكاملة وتصدر الدوري اول ماتشين

السيتي بقي زي ما قولت أن الموضوع كله متوقف علي مستوي الصفقات لأن خلاص بان اللعيبة القديمة شطبوا يعتبر إلا قليلين لسة

لكن انا شايف أن مشكلة السيتي الحقيقية أن الأسلوب بتاعهم خلاص اتحفظ اللعب التموضعي والاستحواذ والريتم البطئ زي ما اكتسحت بيه كل حاجة برضو ممكن يكون سبب لخسارتك

ده غير أن اللعيبة بتاعت الفريق حتي من ضمنهم بعض الصفقات الجديدة بدنيا ضعاف ودلوقتي كل ماتشات الدوري الانجليزي بقت عبارة عن خناقة الاقوي بدنيا هيكسب وده هيتعب السيتي جدا جدا جدا لو متعالجش

كمان فيه شوية لاعيبة مش مفهوم دورهم ولا مفهوم وجودهم اصلا ريكو لويس ده من ساعة ما طلع انا معرفش هو بيلعب ليه وجوارديولا واضح أنه عايز يعمل حاجات معقدة بلعيبة جودتها أقل زي لويس ده مثلا فا الموضوع بيبان أنه فتي وتأليف من بيب

هكرر تاني توتنهام هيكونوا مختلفين اكتر اللعيبة نفسها بقي بعيدا عن المدرب امثال قدوس ريتشارلسون بالينيا وسار فان دي فين كل دي عناصر سواء الجداد أو اللي كانوا موجودين دول هيفرقوا جدا مع الفريق السيزون ده

عمتا لسة بدري علي الموسم لكن في حاجات ابتدت تبان من اول ماتشين

ايه الانطباعات اللي ممكن ناخدها بعد نهاية الجولة الأولى من البريميرليج ؟

حامل اللقب ليفربول بدأ بفوز مهم وكان واضح أن الصفقات الجديدة هتحتاج وقت للتأقلم مع انهم فردياً تمام لكن الفريق كله لسه محتاج وقت وكان مهم الفوز في اول جولة عشان المعنويات متتلخبطش خصوصا بعد خسارة الدرع الخيرية

وبالمناسبة في فرق كتير هتكون (رخمة) في الدوري السنادي زي كريستال بالاس وبرايتون وفولهام ولسة نيوكاسل والفيلا هنشوفهم بجانب نوتنجهام اللي مكملين في المستوي العالي

برضو السيتي أظهر أن الصفقات الجديدة هي اللي هتحدد شكل الفريق الموسم الماضي كانوا محتاجين دماء جديدة فعلا وبمجرد انضمام بعض العناصر الممتازة المستوي اتغير والموسم كله السنادي هيبقي غير

توتنهام هيكونوا مختلفين السنادي بكرر كلامي بعد السوبر وبالنسبة لتشيلسى فا معتقدش أن التعادل هيعمل أزمة لأن الخصم صعب واصلا فترة الراحة والاستعداد كانت قليلة

اليونايتد بقي اظن أن كله اجمع علي تغيير مستوي الفريق شغل اموريم ابتدي يبان والصفقات الجديدة ساعدتوا جدا وبرغم الخسارة لكن النسخة دي من المانيو لو كملت تنافس علي اي حاجه لكن يبقي السؤال هل هيكملوا بنفس المستوى ؟

عكس الكلام ل ارسنال فوز مهم ضد غريم علي أرضه لكن المستوي غير مطمأن خاصتا بعد تقريبا اكتمال سكواد الفريق لكن نفس السؤال برضو المستوي ده هيكمل ولا لأ ؟

اخر حاجة بخصوص الصاعدين الجدد الموضوع مختلف السنادي سندرلاند وليدز بيكسبوا أداء ونتيجة وشكلهم ناويين انهم يعملوا حاجة السنادي لسة هنشوف بيرنلي لأن اول اختبار كان صعب

لسة مفيش حاجة وضحت طبعا بس ده ملخص اللي شوفته في أول جولة

اول قمة من قمم الموسم مانشستر يونايتد ارسنال مباراة انتهت بفوز ارسنال بهدف نظيف

بس لكل اللي اتفرجوا علي الماتش هل اليونايتد ده هو اليونايتد بتاع الموسم اللي فات والمواسم الماضية عامتا ؟ هل الأداء ده كان بيتقدم ضد فريق من التوب 6 والمركز التاني في الدوري و واصل ل سيمي فاينال التشامبيونز و واحد من أفضل الفرق في العالم ؟ الإجابة اكيد لأ

مباراة كاملة سيطرة بالطول والعرض من مانشستر يونايتد الخروج بالكورة بأفضل شكل ممكن دي ليخت وكاسيميرو بين قلوب الدفاع يورو ولوك شاو اللي متطرفين فا بالتالي الوينج باكات ماسكين الخط كله وماونت ومبويمو وكونيا في العمق معاهم برونو شكل سيطر بيه اموريم علي ارتيتا معظم احداث المباراة

حتي الهدف اتسجل من ركلة ركنية بغض النظر عن صحته لكن ارسنال كالعادة افضل فريق في الكرات الثابتة في العالم واكتر فريق بيستغلها بقت تعتبر جليتش بالنسبالهم

لكن غير كده اللي متابع مانشستر يونايتد قبل كده كان عارف ان من ضمن مشاكلهم أن أي كورة مع المنافس بنسبة كبيرة هتشكل خطورة لكن في الموسم اللي فات بعد قدوم اموريم منظومة الدفاع ابتدت تتحسن وكملت اول ماتش في الموسم النهاردة مفيش فرص محققة وقافلين علي مفاتيح ارسنال الهجومية كلها

هجوميا بقي واضح جدا الفارق اللي عاملينه كونيا ومبويمو فعلا من أفضل الصفقات الميركاتو ده فارقين جدا مع اليونايتد هجوميا وحتي بعد تدارك خطأ الشوط الأول ونزول ديالو بدل دالوت الوضع اتحسن بشكل أكبر

وبالنسبة لأستغلال الفرص فا اكيد لو سيسكو جاهز الفترة الجاية الكلام هيبقي مختلف

بالنسبة لأرسنال فا بالرغم من الفوز فا هو جيم سئ ليهم العناصر مظهرتش بشكل كويس وعلي الجانب التكتيكي اموريم تغلب علي ارتيتا اكيد الفوز معنويا هيفرق أنه بالرغم من الأداء السي لكنك بتكسب ضد فريق قوي وخارج ملعبك اكيد هتفرق معاهم نفسيا

ماتش مبشر جدا لليونايتد والعكس لأرسنال لكنه اول ماتش في الموسم ولسة طبعا الوضع هيختلف تماما في باقي الموسم

خلينا متفقين إن السيناريو كان صعب جدا علي توتنهام انك تكون كسبان فرق هدفين لحد آخر عشر دقايق ويحصل ريمونتادا عليك وتخسر بضربات الجزاء عقاب قاسي جدا اكيد

لكن ده مينفيش ابدا الشغل اللي حصل من توماس فرانك في الماتش يعني هو الشوط الاول كامل متفوق علي افضل فريق في العالم ومقدم فريق صلب ومتماسك

تنظيم دفاعي كان كويس وتحس اللعيبة بتلعب بالخطة دي بقالها فترة مش اول مباراة رسمية لأنهم اجادوا فعلا اوقات كتير من المباراة

حتي مثلاً الكرات الثابتة اللي اتسجل منها هدفين اتوقع فريق توتنهام هيبقي خطير في الضربات الثابتة الموسم ده

الناحية التانية هي بداية كانت خاطئة من لويس انريكي أو قراءة خاطئة للماتش ده نتج عنه التأخر بهدفين وكان هيفقد بطولة

لكن المدرب الكبير احسن حاجة يعملها أنه يتفادي ويعالج ويصحح أخطاءه بمجرد نزول فابيان رويز والتغييرات الأخري رجع توازن باريس تاني وقدروا يكسبوا البطولة

طبعا فرق الإمكانيات بين الفريقين يدي كريديت كبير ل لاعبي ومدرب توتنهام ولسة الأخطاء في الكوتشينج بتاع المباراة هتتعالج اكيد

ف انا شايف أن نادي زي توتنهام مفيش ضغوطات أو توقعات ضخمة عليه واللعيبة والصفقات الجديدة اكيد هتصنع الفارق متوقع من توماس فرانك أنه يعمل نسخة شرسة من توتنهام الموسم ده

أما باريس فا هما دلوقتي عندهم فرصة ذهبية لتحقيق السداسية بيتهيألي مش هيفرطوا فيها

اول مباريات الموسم الجديد واول البطولات كأس الدرع الخيرية بيفوز بيها نادي كريستال بالاس بركلات الترجيح علي ليفربول بعد التعادل 2/2

كنت شايف من نهاية الموسم قبل اللي فات أن البالاس مع جلاسنر هيبقوا مختلفين مدرب عنده هوية وأسلوب واضح بيطبقوا مع فريقه بشكل كويس وبيجني ثمار المشروع

الموسم اللي فات توج ب كأس الاتحاد بعد الفوز علي السيتي في النهائي ودلوقتي الدرع الخيرية علي حساب بطل الدوري عشان الفريق يحقق أولي بطولاته في تاريخه !!!!!!! مكنوش كسبوا غير التشامبيونشيب بس !!

ده غير أن الفريق أداءه كويس فعلا وفي عناصر ممتازة واتوقع انهم هيبقوا مختلفين في الدوري السنادي

بالنسبة لليفربول بقي الشوط الاول كانوا ممتازين افكار سلوت اللي كان بيطبقها مع فينورد كانت موجودة بشكل واضح وجابت نتيجة في التنفيذ وكان باين أن الصفقات الجديدة لايقة وماشية مع السيستم

كركيز ورا مع قلبين الدفاع جاكبو وفريمبونج فاتحين عرض الملعب صلاح مع اكيتيكي في العمق وراهم فيرتز وحتي سوبوسلاي وجونز كانوا كويسين والفريق عمتا ظهر بشكل كويس واتوقع ده الشكل اللي هيلعب بيه باقي الموسم

الشوط التاني كل حاجة اتغيرت اللعيبة مستواها نزل الفريق كله بقي قليل كريستال بالاس سيطروا واستحوذوا وترجموا السيطرة

ومن وجهة نظري يستحقوا اللقب اكتر بسبب افضليتهم في معظم احداث الماتش

وليفربول لسة عندهم كتير وهيقدموا كتير وهيظهروا بشكل مختلف كمان عن الموسم اللي فات ده رأيي

الميركاتو الصيفي لغاية دلوقتى مشتعل وفي اخبار كتير بما اني بقالي كتير مكتبتش فا تعالوا نتكلم عنها النهاردة

نبدأ بالصفقة اللي اتحسمت النهاردة براين مبويمو إلي مانشستر يونايتد صفقة قوية ومهمة لليونايتد واحد من أفضل لاعبي الدوري الانجليزي الموسم اللي فات واللي هيبقي مثالي مع كونيا في خطة اموريم

كمان اليونايتد ابتدي يركز علي سيسكو هدف ارسنال السابق بما انهم بيخلصوا في جيوكريس وبالمناسبة سيسكو مش مهاجم سئ بس عشان مفيش ضجة حواليه وهتبقي صفقة مربحة سواء كانت لأرسنال أو اليونايتد

بطل الدوري ليفربول بيعمل تقريبا اقوي ميركاتو له من فترة كبيرة جدا خلص في فريمبونج وفيرتز وكيركيز ولسة في كلام علي جويهي

ده غير قصة ايزاك طبعا اللي يعتبر هدفهم الرئيسي وفي رأيي لو راح ليفربول بسهولة جدا يبقي الافضل في أوروبا ويكسب التشامبيونز ده غير الدوري كمان

بس ايزاك نيوكاسل بيعاند شوية ومستني يخلص ايكيتيكي الاول فا ليفربول قرر يخش في صفقة ايكيتي يخلصها ويبقي عنده فرصة كمان كده انه يروح ل رودريجو

و النهاردة سمعنا خبر مدوي إن ايزاك اعطي الضوء الأخضر للهلال بس اعتقد انها ممكن تكون إشاعة عشان ليفربول يرجعولوا تاني

بما اننا جبنا سيرة رودريجو فا الريال برضو دلوقتي في اتجاه أنهم يبصوا لعرض فيني اللي جاي من السعودية عشان ساعتها يبقي حل مشكلة فيني وامبابي و وفر فلوس كتير يتحرك بيها في الميركاتو ورودريجو هيقعد خصوصا أن فينيسيوس شخصيته دلوقتي غريبة أنه متعنت شوية في مفاوضات التجديد وفي مشاكل عمتا في مدريد

عموما لسة السوق فيه كلام كتير ولسة أندية بتبدأ وأندية خلصت واخبار كتير هنتابعها الفترة اللي جاية

بيريز لازم يفهم إن تشابي الونسو مدرب كويس اه وجامد ومن افضل مدربي العالم بس هو مش معاه عصا سحرية هيفضل محتاج تدعيمات برضو

لأن اللي انت عملته ده مجرد جزء بس محتاج تدعم ولسة مجبتش اي حاجة جديدة اديك اهو بمجرد ما الصفقتين اتصابوا رجعت تلعب زي الموسم اللي فات واسوء كمان

أيوة باريس دلوقتي اقوي فريق في العالم ومحدش وقف قصاده بس انت من الاول مش ماشي صح انت اكتفيت بصفقتين ولقيت نفسك بتكسب والمدرب شغله باين فا تمام بس ده هو المستوي اللي انت هتلاعبوا باقي الموسم

يعني من وجهة نظري انت محتاج اتنين كمان في الدفاع مش واحد بس لأن زي مانتوا شايفين من أول بطولة الإصابات والايقافات بدأت فا مليون في المئة هتلاقي نفسك في نص الموسم مضطر تلعب بالدفاع ده عشان كده انت محتاج طقم دفاع تاني خالص

حتي الصفقة المتداولة دلوقتي كاريراس لاعب كويس وكل حاجة بس برضو هيفضل الفارق في المركز ده بينك وبين باقي الفرق الكبيرة

ده غير انك محتاج لاعب برضو في نص الملعب لأن ده نص ملعب ميوصلش الريال ل اي حاجة الناس بمجرد ما أردت جوبر ابتدي يشتغل في وظيفة معينة قالوا خلاص مش محتاجين بس لأ هو مش هيسعفك طول الموسم تلعب بواحد في مركز مش مركزه قصاد منافسين زي بيدري ولا رودري ولا فيتينها

الريال لو مجابش صفقات اكتر في الميركاتو معتقدش الحال هيتغير عن السيزون اللي فات ويمكن اسوء كمان