خمسينة كورة

"هل هذه كورة القدم التى تريدوها فى مصر"

البرتغالي جوزيه جوميز
١٧ يونيو ٢٠٢٤

هتكلم في مواضيع انتقال لاعبي الزمالك مؤخرا للاهلي باستفاضة من اول مؤمن ربنا يشفيه مرورا بكهربا وإمام

امام محضرتش كواليس ومعرفش حاجه اكتر من انه راح الاهلي وخدع اقرب الناس له كذبا انه لم يوقع ولن يذهب للاهلي رغم توقيعه..

لكن حط تحت لكن دي الف خط

اللاعب عرض نفسه علي الادارة الاول ؟؟
حصل

اللاعب اتطفش لان كان فيه مصلحة من وراه ؟؟
حصل

اللاعب مكنش ينفع يرجع لان النادي ماشي بالمينص ؟؟
حصل والايام اثبتت مديونيات لسه منتهتش بالمناسبة😅

كده امام بقي بره النقاش لان اهلاوي محترم او حتي صادق مع نفسه عارف ان كل تفصيلة حصلت وهي ما أدت لما حدث..

نخش بقي علي كواليس حضرتها من بدايتها لنهايتها تفصيلة تفصيلة وهتكلم عن ارقام بالجنية مش سرديات عامة

قصة كابتن مؤمن زكريا لبعض الشباب الصغير اللي معرفش ملحقش او نسي ما حدث
ان والله لا النادي الاهلي باسمه العريق خطف اللاعب من فم نادي الزمالك المسكين الذي لا حول له ولا قوة ولا اي هجص لما يتم ترويجه بتعمد زائف ساذج لدرجه ان فيه ناس كبيرة فسوشيال ميديا الزمالك منساقة وراه وكانه بات امرا واقعا وفعلا اي لاعب بيشاوروله بيسيبنا ويروحلهم 😅

مؤمن كان اعارة من نادي انبي لنادي الزمالك بأحقية شراء كامل متكامل ب 9 مليون جنية وانا فاكر الرقم ومتأكد منه

كان وقتها مجلس المحترم محمود طاهر
وكان كعادة مرتضي في صدام وتراشق مش طبيعي مع مجلس الاهلي حلو؟؟

فجاة وبدون اي توقع محمد عبدالوهاب عضو مجلس ادارة الاهلي انذاك تواصل مع مرتضي وقاله يا مرتضي بك محتاجين مؤمن زكريا

لعدم الاطالة اكثر مرتضي وافق

بالمناسبة الدليل علي كلامي تصريح تلفزيوني لمرتضي نفسه وسط رغي كتير قالك مؤمن هديتي لصديقي محمد عبدالوهاب عضو مجلس ادارة الاهلي بكل بجاحة كده

دي كانت كواليس الصفقة

واللي ظهر منها للاعلام ان ميدو كان بيطالب بضرورة الحفاظ علي مومن وانه لاعب كبير واللاعب طلب من الادارة رسميا تخلصه لانه مش حابب يسيب النادي بعد تألقه ولعب بعدها مباراة معانا وسجل وعمل احتفاله الشهير وحط ايديه علي ودنه

مرتضي اتحط فخانة اليك طلع خبطها عالهوا فمداخلة وقالك مؤمن مين اللي ادفع فيه 9 مليون انسوا

انا جايب صفقات صوبر الخخخخ

بعدها مؤمن امامه خيارين اما يرجع انبي
او يروح الاهلي

فانتقل للاهلي وبقي بيسدلنا ودانه😅

واصبح من الحراقين المشطشطين وكده وان الاهلي هو اليد العلي

فحين اقسملكم بالله فالعقد الاخير ورغم وضاعة مرتضي ومحدوديته فالتفكير والتنفيذ
ان لولا تركي الشيخ كان عبدالله واحمد فتحي فالزمالك واللي مش محتاج اتكلم عن نجوميتهم وقتها فالاهلي

لاعب الاهلي بيعيش ضغوطات مع جماهيره مفيش لاعب علي كوكب الارض بيتعرضلها
ودي نقطة بحسدهم عليها فبعض الوقت

عندنا مش محتاج اتكلم 😅😅

وبدون ماادخل في تفاصيل كهربا وانه فعجالة راح لامير بعد وعود سنه كاملة بتعديل العقد وقاله الاهلي كلمني وهروح عاوز 20 مليون فالموسم وهقعد
ميرو برشلونة كعادته مع اي حد قاله مع السلامه وريني هتروح ازاي 😅

وده كلام خرج للاعلام اصلا اكتر من مرة لكن سردية الاهلي دائما من كتر ترديدها بتبقي واقع حتمي لازم تؤمن بيها وتستصيغها والا حرب الهاها ستنهال عليك من حيث لا تدري..

الزمالك مع مرتضي
اللاعبين كانت بتقعد بال ٦ شهور مفيش رواتب
غير متأخرات بعض المكافات غير غير غير

وكل هذه عوامل رئيسية بخلاف طريقة تعامل واسلوب الادارة القديمة مع اللاعبين
طارده لاي لاعب او اي صفقة
وتجعلك نادي منبوذ من اي لاعب حتي من ابنائك
وفتوح اخر مثال واللي كان قاب قوسين او ادني من الانتقال للاهلي

لك مطلق الحرية ان تقلق في حالة واحدة فقط
عدم توافر سيولة لرواتب ومستحقات والتزامات اللاعبين
او وجود شخص مريض يتغذي علي اهانة الجميع ماديا ومعنويا

لكن في حالة الاستقرار المادي والمعنوي داخل النادي
هتبقي مرغوب اكثر من الاهلي ليس لانهم اقل لا طبعا هنا اعلاميا اقوي بمراحل وعلي مستوي كرة القدم مؤخرا فرقوا فرق شاسع

لكن مع لاعب كرة القدم المصري لا ينظر الا لشيئين
ظهير جماهيري مع فلوس قريبة من لاعبي الاهلي وعدم التعرض لضغوطات تفوق امكاناته وقدراته الفنية والذهنية..

ف تيجي تقولي اصل لاعب لسه معرفش اسمه كده بنعده للاهلي يبقي الاعلام والسوشيال ميديا عرفت توصلك لقد من احتقار الذات جعلك تنسي اسم وكاريزمة نادي اسمه الزمالك

ولا الوم علي احد
يكفي ان رئيس الزمالك كان مرتضي منصور

وصفقة القرن التي تحدثت عنها قبل 7 سنوات في مقال مطول علي منصة zamalek.tv
حدثت وتحررنا من سرطان كرة القدم، نقطة ومن اول السطر.

نفسي الاسكواد يضم اربع ديفندرات رقم 6 ممتازين
ودونجا يكون الخامس
او علي الاقل 3 ودونجا الرابع

لكن فكرة الاعتماد علي دونجا هولدينج رئيسي للاسكواد
لو معاك منتخب العالم هتبقي تيم عادي

الجلسة التصويرية الرسمية لابطال الثنائية موسم 2020-2021❤️🤍🏹

مفيش هولدينج صح
اذن هضطر العب بتلاته فلات سنيده يسندوا بعض
فهفقد ميزة اللعب باتنين ميدفيلدر بيعرفوا يعملوا ربط وتحول هجومي لان التكتيك بيعتمد عليهم كليا في صناعة اللعب والتدرج بالكرة لالغاء مركز ١٠ في 4/3/3
فالنص بيتعزل عن خط الهجوم
فصلاح ميبنش
فمنظهرش هجوميا
فمنسجلش
فتركب سته الا تلت

عوامل مترتبة علي بعض خسرتنا كأس أفريقيا وبطاقة التاهل لكأس العالم مع مدرب متميز لكن رميه لودانه خدوه للهاوية وهناك حمادة كان مستنيه..

وجود طارق حامد زيه زي وجود صلاح بالظبط ليه
لو مفهمتش اللي فوق افهمك براحة
انت فمصر فقير جدا فمركز 8 والتوبات عندك سولية ونني بيتعالجوا من الانيميا الحادة وتحولاتهم الهجومية بالكورة او بدونها صفر
ووجود حمدي فتحي بيحتم عليك تلعب باتنين راكزين وحافظين وجبات مركزهم اوووووي عشان حمدي مبيعرفش يغطي زووون ١٤ لوحده ولو مخدتش بالك من دي فانت مبتفهمش كورة واها رايي أنا اللي انت معندكش فكرة
وعشان كدة كل التغييرات في ولاية كيروش ٩٥٪ منها علي الدايرة ولما اتفاجئ بحمدي في افريقيا قام مقعد مهند لاشين المميز هجوميا وضم دونجا الافضل دفاعيا عشان في سيناريو الكومباكت هيحتاج بديل لحمدي قبل الاتنين اللي جنبه..

وبالتالي مقدرتش تلعب بزيزو وتريزيجيه او زيزو وامام علي الدايرة بشكل اساسي وعارف انه كان لا يجرؤ علي ذلك فوجود حمدي

كل ده بقي كوم والبدء بربيعة علي حساب علي جبر كوم تاني
اللي هو انا نازل مغلوب واحد صفر من كرة عرضية هههه
اي والله زي ما بقولك
ولولا ان اليو سيسيه مدرب متواضع
ولولا إنهم اتقدموا بأول كروس عرضي
كنا ممكن نعيد تجربة غانا مع الستة السريعة من دون الم
لكن من نصيبنا الحلو انهم اتقدموا بدري ومدربهم اهطل انه ملعبش باتنين سنتر فرود فقلب ملعبنا ولعب علي الكروسات بس
كان لو حظه وحش هيكسب ٤ بس

اللي بينتقد صلاح فالغالب هو يااما مبيفهمش كورة أو عيل اصفر ناقم علي حياته أصلا

ملك❤️🏹

كل فترة تجديد لطارق أتكلم فالنقطة دي واللي بستعجب إزاي ناس متابعين كورة من سنين ولسه مش بيفهموا أو عالاقل يهضموها..

حضرتك مش معني إن اللاعب عاوزك ومش قابل غيرك إللي هو عقد اضعاف مضاعفة للي هياخده منك إنك تجحفه حقه وتركب حد اقل منه عليه وطارق كله اقل منه من حيث كل النواحي..

لما لاعب يبقي له أكثر من نصف عقد اخر موسم وميفتحش بوقه وتيجي تجدد معاه بعد ما نهيت كل مستحقات بن شرقي اللي بيتلحسله من ٦ شهور عشان التجديد، يبقي لازم عالاقل تكون نهيت متأخرات طارق صح؟؟
لا هما دخلوا يتكلموا معاها علي جدولة القديم وطبعا هو مفتحش بوقه مع إن حقه يرفض عادي جدا ويبقي برضه عاشق للنادي لان ده حق وهو اللاعب الوحيد اللي بيعمل بكل قرش بيدفع فيه من مجهود لتحمل مسئولية لمستوي ثابت، لكنه وافق
قوم إيه بقي
بيفاصلوا معاه في مقدم التعاقد الجديد وهو أساسا لسه له بلاوي تانية
فهل مفترض هو يقول اها حاضر عشان بحب تراب النادي ؟؟ لا طبعا
طارق لو مش بيحب النادي فعلا كان طلع اتحاد جدة من موسمين ونص برقم عقد اتعرض عليها وقتها كان ممكن بعدها ميحتجش يقبض تاني😂😂
او في عهد تركي كان وافق علي عرض تركي وانضم لبيراميدز اللي مرتضي نفسه وقتها كان عاوزها تتم ووقع للزمالك ب ١٠٪ واقل من قيمة العقد اللي رفضه..
لما تتكلم عن طارق حامد أقف وافهم الأول إنت بتتكلم عن مين.

لماذا لجأ الاهلي لتكتيك 3/4/3 بدون سابقة إنذار ولماذا فريق بطل للشامبيونزليج مرتين علي التوالي يغير استراتيجيته من الاساس؟؟

مبدئيا كل الأندية المصرية لا يصلح افرادها لتكتيك 4/4/2 ومشتقاتها لأن باستثناء التوب فورم لمحمود حمدي الونش لا يوجد سيردباك او باك طرف بالتوازن والتكامل الذي يمكن فريقه من إنجاح التاكتيك، بمعني انك ستجد مدافع قوي للغاية لكن لديه قصور قد يتسبب فقتلك بأي لحظة
مثلا
ايمن أشرف سيردباك يجيد الخروج بالكرة وقوي بالالتحامات لكنه بطئ وضعيف في الهوا..

حجازي مميز في الهوا وتمركزاته هايلة جدا لكنه بطئ وريأكشناته نفسها بطيئة وهكذا وهكذا علي كل المدافعين وباكات الطرف واظن لا يوجد خلاف في تلك النقطة..

ومدلول عدم تلائم هذا التكتيك مع اللاعب المصري وضح وضوح الشمس في مؤشر نجاحات المنتخب الوطني الكارثي من بعد التحول ل 4/4/2 ومشتقاتها بدلا من 5/3/2 ومشتقاتها..

اريدك ان تتخيل اننا لم نحقق علي مدار 11 عام انجاز واحد إلا بالصعود لمونديال روسيا 2018 وحتي هذا انجاز مشروط بمنظومة كوبر وبمعجزة مباراة الكونغو ببرج العرب..
و منظومة كوبر الدفاعية أيضا اوصلتنا لنهائي كان الجابون ولكن امام مهاجمي الكاميرون المتميزين تمكنوا من استغلال ثغرة كوبر الوحيدة وهي بطئ ريأكشنات الاتنين سنتر باكات حجازي وعلي جبر واتفسحنا..
11 سنة كل نجاحاتنا التي ستذكر هي الصعود لكأس العالم فقط وبمعجزة كروية، بلص إن غانا كانت في أضعف نسخة لها من 30 سنة..

ومن هنا بتبدأ تنظر لمكون المنتخب الوطني (الزمالك والاهلي)
الاهلي حاول الصمود مع 4/4/2 ومشتقاتها بعد الفوز بشامبيونزليج كورونا وضحي بمكان لسيردباك اجنبي وتعاقد مع بانون أملا فيه أنه سيكون ثنائي كاف مع ايمن أو ياسر للوصول إلي التكامل الخططي دفاعيا، ورغم فوز الاهلي بالشامبيونزليج للمرة الثانية علي التوالي الا انه أيقن أن التطور الدفاعي التكاملي لن يحدث الا بتغيير التاكتيك برمته وهو ما حدث..

قمة العظمة في كرة القدم ان تدرس وتطور وانت بطل لكي تظل بطل وهو ما فعلته لجنة الكرة بالاهلي وموسيماني، رغم عشوائية تطبيق التكتيك الجديد، ولا اريدك تنصدم
نعم التاكتيك يطبق بعشوائية بالغة
لأن 3/4/3 ليست مجرد خطة الثلاث مدافعين فقط كما يعتقد البعض..

هناك 3/4/3 فلات بثلاث مدافعين صرف
يعني ال 3 سيردباكات شبه بعض وباكات الطرف وينجات..

وأخري بإثنين مدافعين ولبرو متأخر مع باكان طرف..
وثالثة بإثنين مدافعين وليبرو متقدم وباكان طرف..
ورابعة وخامسة وسادسة، ولكن النقطة الاهم ما الوجه الامثل في 3/4/3 التي تتناسب مع امكانات لاعبي الزمالك الحاليين؟؟

بدون تردد تاكتيك الليبرو المتأخر وبالمناسبة الاهلي لمن لا يعلم يلعب بتكتيك ليبرو متقدم فهناك اختلاف كبير في مهمام بعض اللاعبين عند التنفيذ..

الليبرو المتأخر هو الخيار الامثل لان الزمالك لا يملك لاعب بمواصفات ليبرو متقدم نهائيا بل يملك محمد عبدالغني الذي سيجيد تماما بامكاناته المهولة في توقع أحداث هجمات الخصم وتوجهاتها..
المميزات

1/طارق حامد لن يضطر للنزول بين السردباكين وسيتفرغ للسكاندبول(اكبر آفات الزمالك الدفاعية وسبب خسارة افريقيا واغلب مبارايات الموسم الماضي ان لم تكن كلها) بشكل اكبر، وبالتالي تخلصت من اكبر مشكلة دفاعية تواجه التيم..

2/ستحصل علي 100% من مستويات عبدالغني وسيظهر بشكل غير مسبوق لانه بين الونش وعلاء سيتفادي مساوئه في كرات الهوا..

3/ كثافة عددية دفاعية بشكل مستمر وتحكم في زمام امورك بدون انتظار لتعاطف القدر معك لاننا فريق غير محظوظ اساسا وايضا نقطة مهمة جدا..

4/ ستقصي علي آفة تمكن الخصم الدائم من خلق موقف واحد علي واحد علي اي باك من باكين الطرف واللي بدورهم اساسا ضعاف جدا فيه..

5/ وسط الملعب لن يصبح فرس الرهان الأول والأخير في حال استقبال اللعب كما يحلو لكارتيرون لان هناك ليبرو متأخر يستطع في اي لحظة بكل سهولة يتحول كليبرو متقدم ومنه لزون مركز 6 تحت الدائرة..

6/ سنتخلص من آفة مركز 10 للابد..

وشكل التيم يصبح كالاتي حتي فتح القيد وابرام صفقات تدعيمية للتاكتيك..
عبدالغني
الونش علاء
فتوح طارق زيزو
امام
بن شرقي مصطفي
عمر السعيد

بس يا ريس مفيش وفرة في السيردباكات!!
هو لو سيردباك نقص هدخل النار لو حولت التاكتيك ل 4/4/2 اللي بقالنا سنين أصلا ماشيين عليها؟؟
أكيد مش معضلة نهائيا
وان شاء الله القيد يفتح ونداوي نقص كل المراكز التي تحتاج تدعيم..

ولديك عبدالله جمعة بديل بنفس كفاءة فتوح، وحازم أو اونجم في هذا التكتيك بديلان جيدان لزيزو..

دائرة وسط الملعب بدلائها محمود عبدالعزيز وأحمد سيد زيزو..

مركز صناعة اللعب سيكون بالتناوب بين بن شرقي ومصطفي فتحي وشغلهم مع الكرة سيكون من خارج الملعب للداخل لخلق الفراغات اللازمة لمهاجمي الطرف احمد زيزو وفتوح..
بدلاء مصطفي وبن شرقي سيكونا رزاق واوباما
والصيغة التكتيكية في حالة وجود اوباما هي ان احمد فتوح سيثبت بجوار الثلاث مدافعين وأحمد سيد زيزو يتحول لوينج يمين هجومي بشكل مستمر لان اوباما علي الأطراف لا يجيد مثلما يجيد في عمق الملعب وبالتالي سيقحم اوباما كشادو صريح خلف الاسترايكر الرئيسي بخطوات قليلة وبن شرقي هو مهاجم مركز الجناح الأيسر، ويكون شكل التشكيل كالاتي

عبدالغني
فتوح الونش علاء
طارق
امام
بن شرقي احمد زيزو
اوباما
عمر السعيد

والنقطة الفنية الاخيرة هي نقل فقطة ترحيل امام الرئيسية دفاعيا من اليسار لليمين خلف زيزو.

🇦🇹🏹❤️

عشان تكسب الاهلي لازم تعمل اللي محدش بيعمله او بمعني اصح تجبره يضع نفسه في موقف غير معتاد عليه تمام وده بانك تبادر وتنزل بتكتيك فعل مع
جراءة ومبادرة اول ٢٠ ل ٣٠ دقيقة علي حسب قدرة اللاعبين البدنية ومدي تحملهم
اندفاع هجومي
زيزو فضهر معلول
بن شرقي فضهر اكرم
الجزيري بره المنطقة خالص مشتت حمدي
اوباما استرايكر تسعة ونص بيقلب صريح بدل من الجزيري لمدة لا تقل عن ٢٠ دقيقة وتكرارها في جزء من الشوط الثاني..

عبدالشافي لازم يبدا عشان سرعاته وميتقدمش، والمثلوثي يكمل مع زيزو ورا معلول كجبهة مركز لعب..

طارق وامام ميطلعوش من تحت الدايرة واقصي مساحة حركة لامام تكون قوس الدايرة الهجومي فقط، وطارق لازم يكون بين قلبين الدفاع والكرة معاهم وهجوميا اخره يوصل للدايرة ويرحل شمال ويمين بدون كرة للضغط وخلق كثافة عددية دفاعية..

توقعي كارتيرون هينزل يباغت الاهلي واعتقد هيلعب في التشكيل وهيبقي فيه مفاجاة في لاعب او اتنين، ويارب احداث المباراة تكون شبيهة لما حدث في الصورة أدناه.

تاريخ مواجهات الزمالك وإنبي

واجه الزمالك نادي انبي في 36 مباراه .. فاز الزمالك في 20 وتعادل في 10 مباريات وخسر في 6 مباريات