Manta swimming academy

تم بدأ الموسم الشتوي
للاستفسار من خلال الصفحه او الارقام الظاهره علي الصفحه

أنا السباح
انا السباح الي انت شوفتني و انا واقف في الشارع عندي ٤ سنين و شايل بورد
انا السباح الي لو فتحت شنطة عربية اهلي هتلاقي فيها زعانف وبورد و بدلز
انا السباح اللى ما رحش كل العزومات والأفراح وضحى بايام العيد علشان البطوله
انا السباح اللى بتمطر تلج عليا
فى حمام السباحه
انا اللى بصحي خمسه الفجر لتمرين قبل المدرسة
انا السباح الي عومت اكتر من اللي انت مشيته علي رجلك في حياتك
انا السباح الي مينفعش يشرب بيبسي او ياكل حاجه بيحبها او ياكل من الشارع عشان ميعاد البطولة قربت.
انا السباح الي قابل في حياته الاف الناس قالولوه عاش بطل دوس وحش شد
انا السباح اللي ما كنتش فاضي اطلع معاكوا رحلة عشان عندى تمرين
انا السباح اللي معظم ايام حياتي بنام من التعب و بصحي علي تعب عشان حابب اكون بطل

دي شوية نصايح مهمة تساعد السباح يحضر نفسه صح لبطولة الجمهورية، من ناحية الأكل، النوم، التفكير، وتنظيم الوقت.

1. الأكل قبل البطولة:

الأسبوع الأخير: خلي أكلك متوازن ومليان كربوهيدرات زي العيش، الأرز، والمكرونة. الكربوهيدرات دي بتديك طاقة تخزنها عضلاتك عشان تكمل بيها في السباق.

قبل السباق بيومين: قلل الأكل الدسم والتوابل الكتير، وخليك على الأكل الخفيف اللي معدتك بتستحمله زي البطاطس المسلوقة، الخضار، والفاكهة.

يوم السباق (الفطار): خليه سهل الهضم زي شوفان مع موزة أو عسل مع زبادي. اشرب مية كفاية عشان جسمك يبقى مترطب، لكن بدون إفراط عشان ما تتعبش معدتك.

2. النوم:

الليلة اللي قبل السباق: حاول تنام بدري وتهدي أعصابك. نام 8 ساعات على الأقل عشان جسمك يبقى مستريح. النوم الكافي بيساعدك تكون مركز ويقلل التوتر.

3. تفكيرك في السباق:

قبل السباق: حاول تهدي نفسك وتراجع خطة السباق. فكر في كل مرحلة من السباق، إزاي تبدأ، إزاي توزع طاقتك، وازاي تعمل انطلاقة قوية في آخر المسافة.

أثناء السباق: ركّز على تنفسك وحركاتك بدون ما تتشتت. لو سباق طويل، قسمه لمراحل صغيرة عشان ما تحسش بالتعب بسرعة.

ما تفكرش كتير في النتايج: ركّز على كل خطوة بتعملها وبلاش تفكر في غيرك، خلي تركيزك كله على أدائك.

4. ترتيب وقتك:

قبل البطولة بيوم: جهز شنطتك وكل حاجتك اللي هتحتاجها، زي اللبس، النظارة، البورود، وأي سناك ممكن تحتاجه.

يوم البطولة: اعرف مواعيد السباقات بتاعتك، وخصص وقت للراحة والاسترخاء بين السباقات. حاول ما تبقاش في الاستعداد طول الوقت، خد فترات تهدئة بين السباقات، واعمل إطالات خفيفة عشان تحافظ على مرونة عضلاتك.

5. تنظيم الأفكار:

أولوياتك: خلي دايمًا تفكيرك على هدفك وأدائك بس، مش على المنافسين أو التوقعات.

الثقة بالنفس: افتكر التدريبات اللي عملتها وازاي حضرت نفسك كويس، وخليك واثق إنك هتعمل أفضل ما عندك.

ركز في النصايح دي، وإن شاء الله البطولة هتكون خطوة كبيرة في مسيرتك. بالتوفيق!

الناس الي فكره ان مهنه مدرب السباحه من المهن السهله ....

1-و انت بتبقي نايم الساعه ال 5 الفجر في عز الشتاء و مدفي احنا بنبقي واقفين علي حمام السباحه عندنا تمرين .. انت متخيل يعني ايه واحد بيبقي بالمايوه في الوقت ده في الشتاء ... و انت رايح شغلك احنا بنبقي راجعين من الشغل ..

2-يااه بقي لو بتشتغل شغلانه تانيه تخلص التمرين الفجر و تروح الشغل و ترجع تاني النادي عشان عندك تمرين بليل ... يعني بنبدا يومنا الساعه 4 و بنخلص يومنا الساعه 8 بليل .. و حضرتك بتصحي تروح علي مكتبك 5 6 ساعات و بتروح لبيتك ..

3-لو انت معلم سباحه اصعب قرار ممكن تخده في حياتك انا تطلع من الميه تجيب البرنس في الساقعه ديه ..

4-تيجي مع صحابك بقي الي بره السباحه تبقي قاعد معاهم و تيجي الساعه 9 بليل و تقولهم المقوله الشهيره « معلش يا جماعه انا مرواح انام عشان عندي تمرين الفجر » الجمله ديه تكفي انها تبوظلك اي خروجه ...

5- تيجي في الصيف بقي المشهور بالاجازات و السفريات و كده .. و انت يا عيني مفحوت في التمارين ...

6- تيجي بقي في وسط الموسم و دماغك تروح و تيجي العيال هتعلي العيال هتخيش ... انت ممكن تتطلق مراتك بسبب انك بتكلم نفسك في البيت ...

7-تيجي البطوله بقي انت بتقضي شهر انت مش بتشوف اهلك فيه من كتر التعب ده غير الضغط الي عليك ... قيس علي كده 4 بطولات في السنه ..

ويجي واحد يقولك يعني ايه مدرب سباحه ......
منقوول
اشكر مدربك في تعليق

اغلب الاتحادات الرياضية فاسدة والفضايح فيها ملهاش آخر بس محدش بيسمع عنهم، وأغلب لاعبيتهم فاشلين وكتير منهم بيلعبوا بالوسايط، والفضايح مش بتظهر غير في وقت الأولمبياد لمجرد أن الناس بتركز معاهم.

كرم جابر يكاد يكون أعظم رياضي في تاريخ مصر، وحقق ذهبية في أثينا العالم كله حكى عنها بدون أي رعاية حقيقة، وبعدها حاربوه، ولا اهتموا بيه ولا قدروه، بس فضل يكافح وبعد 8 سنين صدمهم بالفضية في لندن.. كرم لو في بلد زي أمريكا ولا الصين كان زمانه حقق 5 ميداليات ع الأقل.

وعندك فارس حسونة ابن المحلة، اتحاد رفع الأثقال شقلبه وما اهتمش بيه، وقبلها طفشوا أبوه اللي هو مدرب كويس علشان يجاملوا مدربين تانيين.

الاتحاد القطري شاف إمكانيات الولد وعرضوا عليه الجنسية وقدموا له برنامج إعداد محترم بإشراف من أبوه مش مدرب عالمي ولا واحد أجنبي.. لا دا أبوه اللي دربه والولد حقق أول ذهبية في تاريخ قطر.. وأنت مش بس خسرت بطل أوليمبي لكن كمان خسرت معاه مدرب قدير قادر يصنع أبطال عالميين.

وفي الآخر مطلوب مننا نتغاضى عن كل ده ونشارك الفاشلين بتوع الاتحادات وأتباعهم، مواساة الفاشلين الصغيرين اللي بيطلعوا في المراكز الأخيرة.

ياترى بتقعد مع فريقك او سباحينك تتكلم معاهم و تتواصل معاهم قبل او اثناء او بعد التمرين و شكل العلاقة بينك و بينهم علاقة اب او اخ و صديق و لا مجرد مدرب (موظف ) تروح التمرين تفرتك التمرينه و تمشى و خلاص
المدرب مش تمرينه و بس المدرب بيعلم و بيربى و بيغير فى السلوك..... المدرب قدوه......

✍️المدرب ماينفعش يبقي ليه أسلوب واحد بس
المدرب لازم يبقي ليه أكثر من اسلوب

و الاهم انك تعرف امته تغير اسلوبك علي حسب دماغ الطفل او ال( ADULTS ) الى معاك بس

لأن مينفعش تعامل واحد بيخاف من المية بنفس الأسلوب او ال DRILLS الى هاتديها لحد مش بيخاف منها

ماينفعش تتعامل مع كل الأطفال بنفس الوش في طفل بيحتاج يتشد عليه وطفل بيحب الهزار
بس وقت ما بيعوم بيعوم بجد 🏊‍♂️

في دايما حاجة بتجمع بين الهزار والشدة في التمرين
انت لازم تعرف توفق بينهم وتفهم شخصية الي قدامك وتتعامل علي اساسها مش علي اساس شخصيتك انت

مش كل ال DRILLS تنفع لكل السباحين ولازم يكون في ابتكار
مش غلط انك تفكر برا الصندوق وتخترع DRILLS المهم تخدم المهارة

مافيش حاجة اسمها DRILL غلط
مادام جاب نتيجة يبقى انت ماشي صح ماجابش نتيجة غيره
مافيش طفلين زي بعض وكلها فروق فردية لذالك ماينفعش تمشي باسلوب واحد.

____________________________________________
- انت كمُدرب مش مطلوب منك إنك تعجب كل لاعب او كل ولي أمر وتكون علي هواه ، لكن مطلوب منك تشتغل بضمير وبِجد وتأدي رسالتك الاخلاقية والعلمية علي أكمل وجه عشان انت بتتعامل مع ربنا وبس

- الناس كلها مش بتتفق علي حد فالبتالي مش كل الاعيبه هتتفق عليك ولا كلهم هيختلفوا عليك عشان متقعدش تجلد في ذاتك وتسأل نفسك انت قصرت في ايه !
متشلش هم هي دي طبيعة البشر حتي لو قِدت صوابعك العشرة شمع

- طول ما انت شغال باجتهاد وبتقوي نفسك وبتطور نفسك ومش همك الضحك والهزار والمرقعة في التمرين .. هتلاقي اللاعب اللي بيحب الضحك والهزار والدلع دا مش جاي تاني ودا خير وبركة جدا لان نوعيه اللاعب دا بيقلل من هِمتك ونشاطك ، وهتلاقي اللاعب المحترم المجتهد مكمل ودا اكبر مقياس لشغلك الصح 👌🏻

- الرزق كدا كدا هيجيلك والله .. ومفيش حد كبير في الشغلانة دي والشغلانة دي مش احتكار لحد

- المهم تراعي ضميرك لأن معيارك الوحيد ودعايتك هو الضمير وشغلك الصح مش الضحك والهزار وقلة الادب عشان تجذب اللاعب لأن اللاعب الصغير دا مسيره يكبر ويعرف مين اللي كان بيضحك عليه ومين اللي كان بيعلمه صح

يمكن في مدرب أشطر من مدرب في الشرح ، يمكن أقوى ويمكن مشهور أكتر .

بس صدقني مفيش مدرب أحسن من اللي تقدر ف أي وقت تتصل بيه .

اللي مش مسوّوحك ولا عامل بينه وبينك ألف سور عشان تعرف حتى توصله .

المدرب المتوفر دايمًا ، اللي متابعك ومطمنك ، اللي عارف شكلك وعارف إنك معاه .

مش اللي بيتصدم في آخر البطولة إنك كنت بين اللعيبة بتاعته ، اللي إنت مهم بالنسبة له ومشاكلك مهمة ومش شايف إنك حكر لتدريبه بس يعنى مجرد تدريب .

المدرب المحترم اللي بيقدر ظروفك وبيساعدك وبيضحكلك ، اللي عاملك مواعيد وحاللك أي أزمة وحرفيًا بيشرح بمليون طريقة تناسب كل مخ .

مفيش أحسن من المدرب اللي بيبصلك في عينك وهو بيشرح لما يلاقيك تايه ويتأكد إنك فهمت فيبص لغيرك .

التدريب من أصعب المهام من وجهة نظري وبيني وبين اللعيبة علاقة مش بفهمها بس بحبها ، علاقة أكبر من كون الشخص ده بيتعلم تحت ايدي و بس ..

لا ده ابني و صاحبي و اخويا الصغير اللي دايما بحب اشوفه ناجح ، ممكن أي شخص في الدنيا يوصلك معلومة بس مش أي مدرب يقدر يخليك واثق من نفسك و تبقي قدام نفسك و الناس بطل كبير .. بغض النظر حتى على النتايج .

مش أي مدرب يقدر يديك دعم نفسي وتخرج من تمرينته مقبل على الحياة وعلى أحلامك .

مش أي مدرب يقدر يخليك دايما مطمن إنك لو توهت هتعرف توصله ، مش أي مدرب مُعلم مربي .

اقتناعى التام ان مهنتى نفسيا اكتر من اى حاجة ودمتم بخير🙏

٨ قواعد لو طبقتهم هتكون سباح فتاك مفيش منك ٢ 💪🏿💪🏿🥇
🏊‍♂️🏊‍♂️🏊‍♂️🥇🏊‍♂️

القاعد الاولي : ديما اسمع لكلام مدربك بعنايه وافهمه من اول مره وطبق كلامه بالظبط

القاعده الثانيه :متتكلمش مع صحابك كتير في التمرين وتستنفذ طاقتك في الكلام

القاعده التالته :ديما ابعد عن صاحبك الرغاي اللي بيهري علطول ويفضل يقولك انا تعبان انا مش قادر صاحبك ده بيديك طاقه سلبيه حتي لو مش قصده

القاعده الرابعه:اهتم انك توصل اول واحد في التمرين وتسخن قبل الميه كويس ومتفوتش دقيقه في التمرين صدقني لو عملت الحركه دي هتكون مميز 💪🏿💪🏿🏊‍♂️

القاعده الخامسه : اهتم ديما بشربك للميه في التمرين 👌

القاعده السادسه : اهتم بوجباتك كويس جدا ومتبقاش عشوائي ومش اي حاجه تاكلها في الشارع وخاليك منظم واهم حاجه الوجبه اللي بعد التمرين دي مهم جدا 🤚🤚

القاعده السابعه : ديما خالي في هدف قدامك بتسعي وراه واوعي حد يحبطك وخاليك ديما شجاع ومفيش اس كلمه توديك وتجيبك وخاليك واثق من قراراتك واختبار مدربك بعنايه واصحابك

القاعده الثامنه: اهم قاعده اهتم بصلاتك لانك من غير صلاتك صدقني جسد من غير روح

لو مشيت ع ال ٨ قواعد دول صدقني هتبقي سباح مفيش منك ٢