Enneagram by Manar Mady

بنقول عايزين نحب ونتحب بس بتيجي لحظه تلاقي نفسك بتكش لما حد يحضنك او يقولك أنا بحبك

‎بتلاقي سؤال طلع جواك وايه بعد الحب ؟
‎جسمك رجع ورا خطوه
‎يحاول يفكرك اول مره حبيت فيها وتم استغلالك او حبيت واتخزلت من اللي حبك

‎فإحساس الذنب ظهر لانك مش واثق في الحب
‎الذاكره دي خليتك عندك احساس بالعار من استقبال الحب
‎لأنك اتعودت ان لما تدي ح تتحب
‎فهمت انك مش كافي من غير ما تدي
‎اتربيت انك تبقي ممتاز : هادي وشاطر و محترم علشان يقولوا برافو ويدوك الحب
‎ومعني اني أتحب معني ان لازم ادفع الثمن !!

‎بقي الحب بيجيب قلق واللطف بيجيب خوف فالمعادلة هي الاستقبال = خطر

‎قول لنفسك not any more ووقف لحظه واتنفس بعمق …وصلح المعتقد وردد:
‎-أنا دلوقتي فهمت وعرفت ان الحب واللطف مش لازم يكون بفاتورة
‎-أنا استحق الحب واللطف بدون شروط
‎-أنا قيمه لوحدي من غير مااثبت ده
‎-أنا استقبل الحب بأمان وثقه
@استقبال_الحب

سنين طويلة كنت فاكرة إن ربنا رزقني بابني من متلازمة داون علشان أكون له السند… أساعده، أعلّمه، أفكر مكانه، أجريوراء حقه، وأزعل اللي يزعله وأخاف على مستقبله.
لكن الحقيقة؟ هو اللي سندني… هو اللي علّمني، في صمته الهادئ، دروس عمرها ما كانت تتقال بالكلام.
علّمني يعني إيه نسامح ونحب ، وإزاي نرتقي فوق الخلافات، ونبعد عن الغل والغضب والحقد وزحمة الدنيا اللي بتستهلك الروح.

الأطفال دول مش مجرد أرواح عاديه… دول رسائل سماوية نازلة مخصوص لأهاليهم بنسميهم (مرشد ظل ).
ومن خلال شغلي كمرشدة أسرية لذوي الهمم، وكوتش معتمد للأنماط الشخصيه فهمت إن كل “إعاقة” هي مش ابتلاء… لكنها رسالة حب إلهية موجهة للأسرة كلها.

الأسرة اللي قلبها اتقفل من كتر الأوجاع، يجي فيها طفل يفتح لهم باب الرحمة والمغفره … يعلمهم يسامحوا نفسهم ويسامحوا الناس، ويرجعوا للحب اللامشروط.
والأسرة اللي اتقطعت صلتها ببعض أو جفّت مشاعرها، يجيها طفل توحد… كأنه بيهمس: “اتواصلوا، عبّروا، افتحوا قلوبكم.”
دول الأطفال اللي بيحرّكوا الميّه الراكدة في حياة اهاليهم ، يعلموهم التواصل الحقيقي من غير خوف، ويفكروهم إن الاتصال بالذات هو الطريق للاتصال والقرب من ربنا.

ولادنا من ذوي الهمم عبء في اول الطريق لكن هدايه من ربنا لتصحيح المسارات … دول أرواح راقية جاية برسالة نور، تساعدنا نسلم، نتصالح، ونفهم ليه ربنا اختارنا نكون معاهم.
هم مختلفين عنّا، هم أسبق منّا في النور.
يمكن خلصوا دروسهم، وجايين يمدّوا لينا إيدهم علشان نلحق بيهم في رحلة الصعود والارتقاء.
لما حتديك الدروس اللي جايين بيها روحك ح تتنفس للمرة الأولى نفس بطعم جديد ..

ولو لسه جواك سؤال “ليه أنا؟ وليه ابني كده؟”
تعالى نتكلم سوا.
في جلسات الإرشاد والتوعية هنكتشف المعنى الحقيقي، ونمشي مع بعض في طريق يوصل قلبك لمكان فيه سكينة ورضا وطمأنينة مع نفسك ومع ربك. 🌿

طفل اتولد كبير غصب عنه.
من أول يوم وهو محطوط في مقعد أكبر من مقاسه… حاول يلعب مع اللي في سنه، يضحك معاهم، يتنطط زيهم… لكن اترفض. “إنت مش شبهنا”.
فقرر يغيّر الملعب: قعد مع الكبار. يتكلم ،يحلل، يوزن كل كلمة قبل ما يقولها. صوته يبقي مسموع، ورأيه يمشي. عمره ما يسمح لنفسه يطلع غلط، لأنه بيحسبها ألف مرة.
حبوه علشان “عاقل” مش علشان “طفل”. اتشاف لأنه “مش بيعمل مشاكل” مش لأنه بريء.

دموعه؟ اتعلم يخبيها.
ملامحه؟ ثابتة، مسيطرة.
اتعود ما يميلش على حد، ما يطلبش، ما يعرفش أصلاً هو عايز إيه.
ومع الكبار، فقد لغته الأصلية: لغة اللعب والغلط والتهور والعفوية.

والسنين بتجري… وفجأة يدرك.
“إيه اللي جابني هنا؟ مش مكاني!”
لحظات الإدراك دي بتيجي قاسية، تقطع القلب. يلاقي عمره ماشي من غير ما يعيش، يغضب من الظروف اللي كبّرته قبل أوانه، يراجع اللقطات زي فيلم طويل… ويكتشف إنه زي Benjamin Button: عايش عمر بالمقلوب.

الطفل ده ممكن يكون اتربى وسط أسره، وممكن يكون يتيم في ملجأ…
لكن الألم واحد، والسؤال واحد:
مين أنا؟؟

شاركني هل كنت طفل ام اتسرقت طفولتك ؟ وايه هي قصتك؟

#طفوله

الخيانه انواع فيه خيانة عهد ، خيانه فكريه ، عاطفيه خيانة زوجيه …
لكن أخطرهم؟
خيانة النفس.

مش لأنك جرحت حد تاني…
لكن لأنك جرحت “نفسك”،
الذات الوحيدة اللي فـ عمرك كله
مالكش غيرها ❤️‍🩹

خيانة النفس بتحصل لما: تمشي في طريق مش طريقك
او تختار حياة ما بتحبهاش
او تسكت صوتك الداخلي علشان “يرضوا عنك”
او تتجاهل جزء منك وتعمل نفسك مش سامعه
النتيجة؟
فراغ…
لا فرحة بتفرّحك
ولا إنجاز يحركك
ولا حب بيوصل لقلبك
كأنك عايش، بس مطفي.

الفراغ ده بيخليك في معاناه لغايه ماتقرر وتدرك ان نفسك عليك حق ،
دي بداية الإدراك
والتغيير هو أول خطوة لـ
نفس راضية مرضيه تحب اللي بتعمله وتبقي حقيقيه رغم أنف الحاقدين

فاكر لما
• دخلت كلية مش بتاعتك علشان ترضي أهلك
• اتجوزت حد مش بتحبه علشان “ما تزعلش الكبار”
• مشيت مع الموضه علشان متبقاش “المختلف”
• خنت طبيعتك علشان خايف تترفض

خيانة النفس = إنك تطفّي نورك بإيدك،
وتلوم الناس ليه مش شايفينك وليه ياجماعه بتخان !!

وايه الحل:
١. اعترف بمسؤوليتك… بلاش تلعب دور الضحية
٢. اسأل نفسك بصدق
أنا باختار ده علشان إيه؟
علشان هو حلمي؟
ولا علشان أغيظ حد؟
ولا علشان آخد اللقطة؟
ولا علشان خايف أواجه؟

واي كانت النتائج بعد الصراحه دي حتبقي أهون عليك من خيانتك لنفسك


“وَلَا تَكُونُوا كَٱلَّذِينَ نَسُوا۟ ٱللَّهَ فَأَنسَىٰهُمْ أَنفُسَهُمْ ۚ أُو۟لَـٰٓئِكَ هُمُ ٱلْفَـٰسِقُونَ”
سورة الحشر – الآية 19

“لأَنَّهُ مَاذَا يَنْتَفِعُ الإِنْسَانُ لَوْ رَبِحَ الْعَالَمَ كُلَّهُ، وَخَسِرَ نَفْسَهُ؟”
إنجيل متى 16:26

#جلسات _فرديه
#وعي # Enneagram_by_manar

في بيوت كتير… فيه قصة مش بتتحكي.

لما الأسرة تستقبل طفل من ذوي الاحتياجات، الحياة بتتغير.
المعادلة بتتقلب.
الأولويات بتتعاد ترتيبها من غير ما حد ياخد باله.

الطفل ده بيحتاج أساسيات مش أي طفل تاني محتاجها:
تدخل مبكر، تعليم مهارات، دعم مستمر…
علشان نقربه من خط النمو،
نحاول نكسب الوقت قبل ما يفوت،
علشان يكون مستقل، قوي، قادر يعيش بكرامة.

لكن التحدي الحقيقي مش في التعب، ولا في مشوار الجلسات والعلاجات ،
ولا حتى في ألم الحلم اللي اتكسر…

التحدي الحقيقي في العدل.
العدل بينه وبين أخواته التانيين.

الأبناء الأصحاء اللي كبروا في صمت،
من غير متابعة كفاية،
من غير مساحة في تفكير الأهل،
من غير صوت عالي يطالب باحتياجاته،
لأن النداء كان دايمًا جاي من طفل تاني…
طفل عمره ما هيعرف يعبر لوحده.

ومش لأن الأهل بيحبوا واحد أكتر من التاني،
ولا لأنهم ناسيين…
لكن لأنهم مضطرين،لما يبقى قدامي طفل مايعرفش يعيش لوحده،
وحوليّ طفل تاني قادر يتعلم ويستقل ويعدي.

الاختيار هنا مش اختيار… هو واجب.
واجب الأم، واجب الأب، واجب الرحمة.

لكن اللي بيحصل إن الأخوات بيسألوا نفسهم في السر:
ليه أنا مش باخد نفس الاهتمام؟
ليه بابا وماما مش شايفيني؟
ليه أنا دايمًا اللي بضحي وباجي على نفسي؟

الإجابات مش بتوصل وقتها.
بتتأخر سنين،
بتفضل موجعة لحد ما هما كمان يكبروا،
يتجوزوا،يخلفوا،ويعرفوا إن أهاليهم كانوا بيعيشوا تحدي مش مفهوم…
وإن التضحية كانت جماعية،
وإن الرحمة اللي زرعوها، ربنا بيرفع بيها الكل درجات.

الأسرة كلها كانت في اختبار،
واختاروا الرحمة،
وهو ده أعظم درجات الإنسانية.