محاسب كوره mo7asib koora

هيا حاجه من الاثنين ومفيهمش ثالث
اولا الراجل ده عاوز حقه كامل لو الاداره هتمشيه وخلينا نقول أنه فعلا م اخترش اللعيبه الموجوده فى القائمه حاليا كلها كانت اختيارات ريبيرو ودا قاله للاداره أنه مش مسؤل عن الموسم ده والغريب أن الاداره وافقت من الاول على الكلام ده وبكده يبقى احنا ظالمين المدرب عشان هو عنده حق فى كل اللى بيعمله
ثانيا المدرب ده واخد تحدى مع نفسه للموسم الجاى أنه بيقول لاى حد تعالى ورينى نفسك وانا هقولك مين هو توروب واللى يحصلنى يكسرنى وانا هوري كل اللى غلط فيا وقالى امشى مين انا فى عالم التدريب وبعدين انا اللى همشي حتى لو انا اللى هدفع الشرط الجزائي
بس ممكن اى حد يختلف معايا بس هل أنا الوحيد اللى حاسس انى الراجل ده لو كمل الموسم الجاى هنشوف الاعلى بمستوى مغاير بتاتا والله اعلم

اكتر حاجه مؤسفه أن كل الإعلام الرياضى عاوز كل حاجه تمشي على خططه يعنى لما يكون مدرب منتخب بلاده استبعد لاعب او اتنين تلاقى كل البرامج تتكلم ازاى وليه ويقلبوها اهلى وزمالك مهو مدرب انجلترا استبعد فودين وبالمر وحتى ارنولد مشفناش كل الضجه ديه اما عندنا عشان حسام حسن مخدتش مصطفى محمد اللى مبيلعبش اصلا بقاله اكتر من سنه فى نانت وهبط كمان ومخدتش ناصر منسي ولا ناصر ماهر الدنيا مقلوبه وكله حاطط على حسام حسن ليه مش عارف مهو واخد لاعيبه صغيره تقدر تفيد المنتخب فى المستقبل زى أقطاى وحمزه عبد الكريم ولا هو لازم يكون منتخب اعمار لعبته كبيره ولازم ندى فرصه للمدرب نشوف وجهه نظره وفى الاخر احنا مش رايحين ناخد البطوله أو نعمل زى المغرب ودى حقيقه واضحه احنا املنا نتاهل م المجموعه وكدا فل أوى

من وجهه نظرى مو افضل اتنين مدربين فى اخر تلت او اربع او عشر سنين كل واحد فيهم ايه فكر مختلف عن باقى المدربين اللى بيشتغلوا باليوميه كابتن سيد عيد تحس انه مدرب عتيق بفكر جديد بيفيد بيه اى فريق يدربه يعنى عمل فريق النجوم والنصر ودلوقتى بتروجيت وتخصص تلميع لاعبيه وعمل استثمار لاى نادى بيدربه انا التانى دا هيبقى داهيه فى التدريب اقيم بالله شفتله لقاء وهو بيتكلم عن التدريب وطرق اللعب عرفت اد ايه اننا فى مصر عندنا مدرب مش عككاك لا دا فاهم ودارس وشفنا وادى دجله وهو الحصان الاسود فى الدورى السنادى واكتر حاجه بستغربلها بصراحه إن فرق زى الاهلى والزمالك بالاخص الاهلى يروح يجيب مدرب اوروبي محدش عارف جيه منين ويقولوا مشروع للمستقبل دا كان ماسك فريق من الصفر فى الدورى البلغارى مثلا وخلاه يقعد فى الدورى طيب م احنا عندنا مدرب زى الشيخ دا نقدر نجيبه ومقعد معاه ونشوف فكره ومتطلباته ولو نقدر نديله معايشات اكتر واظن واحد زى الشيخ إذا كان عمل كده مع دجله امال مع امكانيات الاهلى يعمل ايه دى وجهه نظرى مش اكتر

بص هو اولا هارد لك للزمالك والله بتفرج ع الماتش وحاسس إن الماتش كان بيهرب من الزمالك ودى حاجه غريبه وكان المفروض معتمد جمال يجازف من بدرى وينزل ناصر وكان يسيب عدى بدل سيف اللى تحسه عجز وكمان معلش على بقوله ومش عاوز اخواتى الزملكاويه يزعلوا منى مبحبش الواد بيزيرا واول م شوف اى حركه بيعملها مبتفائلش زى بعد ضربه الجزاء عموما الزمالك فريق كبير كان يستحق البطوله بصراحه بس تفاصيل صغيره هيا بتفرق

الناس مستغربه من التطور الجسمانى لحمزه فى فتره قصيره بس الحقيقة هيا مش فتره قصيره هو الواد شغال على نفسه كويس وفى خلال الثلاثه شهور اللى فاتوا ظهر دا كويس ودا كان نتيجه شغل جامد ودا اللى اتكلمت عليه زمان إن إحنا فى مصر معندناش فكره اننا نوصل اللعيبه الصغار انهم يهتموا بجسمهم بحس إن اللعيبه فكره انها لما تمسك دمبل وتتمرن حد قايلهم انهم جسمهم هيبقى رونى كولمان ولا حاجه وكمان دا يبين التقصير الرهيب فى كل قطاعات الناشئين واد ايه إن فلوسهم حرام وبيقبضوا فلوس حرام عشان محدش بيشتغل بما يرضى الله واطالب جميع المسؤلين فى الدوله ان يكون فى رقابه عليا على كل قطاعات الناشئين والنادى الغير ملتزم فى تطور لاعبيه فى خلال فتره معينه يتم الغاء القطاع من النادى ولنا فى حمزه مثل كبير وايضا لامين يامال وكل لاعبيه اوروبا وحتى افريقيا بيطلع منهم عمالقه وتلاقيه ف الاخرى عنده ١٥ او ١٦ سنه

الاهلى فوق الجميع هيا مش من فراغ بس المرادى انا جاى اقول الاهلى فوق الجميع حتى المشجعين اللى عاوزين كل حاجه تمشي على هواهم وعاوزين اداره الاهلى تبقى ليهم وعاوزين مجلس اداره الاهلى يمشي على قرارهم اللى بياخدوا من المدرج ودا فى كره القدم ملوش اسم الا اسمه جهل كروى لا يمت بقريب او من بعيد بحب النادى وتشجيعه ولا يجوز ابدا انتقاد الاداره فى اختيار مدرب او لعيب بل العكس الوقوف بجانبه وتشجيعه وهو واجب على كل مشجع ومحب للنادى ولم يعجبني انتقاد الاداره وشتيمه حسام البدرى بالمدرجات بمباراه انبي ونصيحه لكل المشجعين الحاليين ايا كانت اعمارهم من انت لتقرر من يدرب الاهلى وهل تعلم انجازات حسام البدرى وهل رايت الاهلى وهو تحت قيادته وإنجاز ٢٠١٢ بدون دورى فى مصر اصلا وايا كنت تحب او تكره البدرى هو ابن اصيل من ابناء النادى ولكن من حق كل مشجع إن ينتقد القرار بادب وليس بالشتيمه واللعن يجب علينا كمشجعين للنادى الاهلى ان نكون قدوه لكل مشجعين الكوره فى مصر والعالم اجمع لااننا مشجعين لافضل نادى بالعالم

هو اولا لو الخبر دا حقيقى هيبقى فعلا الاهلى على الطريق الصحيح فى اختيار المدرب والافضل للاهلى هو مدرب مصرى بشخصيه اجنبيه وهو م يمتلكه حسام البدرى من صرامه وجديه وعدم التهاون بعيدا عن انت بتحبه ولا لأ بس سيرته التدريبيه بيتكلموا عنه وعن إنجازاته وبطولاته وانا هنا هتكلم لنا درب الاهلى فى ولايته كلها تصوروا ١٨٢ ماتش تقريبا كسب ٧٠% يعنى حوالى ١٢٢ أو ١٢٣ ماتش ودى نسبه كبيره مش قليله وكسب ٣ دورى و٣وسوبر مصى وواحد افريقيا وواحد سوبر افريقى و٣كاس مصر ورابع كاس العالم للانديه وعاوز تشوف وتعرف يعنى ايه ضغط عالى اتفرج على الفرق اللى بيدربها البدرى وآخرهم الاهلى الليبى وحتى لما كان بيدرب الاهلى من افضل الأوقات اللى كنت بشوف الفريق بيضغط من زهق يعنى انا بتكلم عن مدرب مصرى وليس اجنبى واللى يفهم كلامى اللى اتفرج ع الاهلى من ٢٠١٢ انا كل اللى مش موافق على البدرى الجيل الجديد اللى بيسمع أنه سبب اعتزال متعب ووشه المكشر أما محدش شاف الاهلى معاه وارجع اقول بتمنى أنه يرجع تانى عشان هو الوحيد المناسب للفتره الجايه وليس مدرب أجنبي

خلينا نتكلم كلام ناس فاهمه هنقول فى امل ممكن هو استحاله بس ممكن بس الاصعب من دا أنه ناقص ماتشين لكل فريق مش ماتش واحد عشان كده كل الحسابات مش فى صالح الاهلى والاصعب من كل ده ان الاهلى مياخدتش مركز تانى على الأقل وانا أظن أن كل الكلام اللى بنسمعه أن الاتحاد الأفريقى عاوز يزود الفرق فى بطوله الانديه الافريقيه كلام فكسان لا أساس له مع انى بتمنى ومش عاوز اشوف الأهلى بيلعب كونفدراليه عشان دا بيصعب حاله الاهلى فى الوصول لكأس العالم الانديه القادمه واظن إن الزمالك وبيراميدز فوز واحد لكل فريق كفيل بأن الأهلى يحتل المركز الثالث فبلاش كلام كتير. ان الاهلى ممكن ياخد الدورى عشان منصدقش كدبه ونمشي وراها هو املنا حاليا مركز تانى والأهم الفوز فى الماتشيين الجايين بإذن الله ونسيب كل حاجه لمشيئه ربنا وانا بالنسبالي كاهلاوى مش عاوز اشوف بيراميدز رافع درع الدورى عشان هيكون الاهلى السبب فى دا والأولى والاحق بالدور.ى ولاد عمنا الزملكاويه ودا رايى الشخصى

سؤال مجننى هو ايه سبب اختفاء المهاجم الصريح مش فى مصر بس لا فى كل دوريات العالم وايضا صانع اللعب