10/09/2026
إعلانات تيك توك ولوحات إعلانية في شوارع جانبية… دي مش القضية أصلًا.
القضية إن الراعي الجديد خرج يتكلم عن الزمالك بمنطق «دي قيمتك في السوق، إبني اسمك الأول وبعدين تعالى اتكلم عن الفلوس»!
هنا لازم أسأل مجلس إدارة الزمالك: إنتوا ساكتين ليه؟!
الزمالك مش شركة ناشئة مستنية حد يعمل لها براند، والزمالك مش محل موبايلات محتاج يثبت نفسه في السوق. الزمالك كيان عمره وتاريخه وجماهيريته أكبر من أي شركة وأي راعٍ وأي مسؤول.
الفلوس مهمة، والرعاية مهمة، والاستثمار مهم، لكن كرامة الزمالك وهيبته وتاريخه مش للبيع.
وأي مجلس إدارة محترم كان المفروض من اللحظة الأولى يحط حد للكلام ده، مش يسيبه يعدّي وكأن مفيش حاجة حصلت.
المطلوب الآن واضح وصريح: إلغاء التعاقد فورًا، وبدون نقاش، وبدون تبريرات، وبدون إبداء أسباب.
مش عايزين بيانات ولا لجان ولا مبررات من نوع «ده اتفاق تجاري» و«Win-Win Situation».
الـ Win-Win مش معناها إن الطرف التاني يقلل من قيمة الزمالك، والمجلس يقف يتفرج.
الزمالك فوق أي راعٍ، وفوق أي عقد، وفوق أي مبلغ.
ولو المجلس مش قادر يحافظ على هيبة النادي واسمه وتاريخه، يبقى لازم يعرف إن كرسي الإدارة مش أهم من الزمالك نفسه
