Abdelrahman azouz -online coaching

عُمر من الناس المجتهدة جدا بقالنا ٦ شهور و لسة مكملين 💪🔥🔥

بقالي تقريبا اسبوع مش بنزل محتوي بسبب بعض المشاغل كده بعتذر عن التاخير … بس في سؤال اتسألي و كان لازم ارد عليه

واحد سألني بيقولي اعمل ايه في الفترة اللي جاية انا هبطل تمرين و دايت ؟؟!
بص يا سيدي حاول تعدل اوجه و طريقه انفاقك …
دلوقتي مش وقت فشخره و بعزقه مش لازم تنزل تجيب طلباتك من كارفور يا سيدي انزل السوق و اعمل اكلك في البيت مش هتموت لو مكلتش من بره ...بلاش النمط الاستهلاكي عموما لازم يتغير هات دايما علي قدك
طيب هاتقولي كل حاجه غليت و بقت الضعف هقلك انت مش روني كولمان هتاكل البياض بس و ترمي الصفار و تاكل صدور فراخ و تسيب الوراك ،و الشوفان الي سعره وصل ١٠٠ جنيه الكيلو بقي ينافس جرام الدهب 😂💔 استغني عنه هات بطاطس يا سيدي … انت مش طالع تلعب اولمبيا … اهم حاجه تحافظ علي صحتك و شكل جسمك الفتره دي و مشي نفسك بالمتاح و متشغلش بالك الدولار طلع ولا نزل قوم اشتغل و ربنا هيرزقك …

متنساش ان صحتك هي راس مالك متستخسرش في نفسك و ده الهدف الاساسي من التمرين و الدايت مش صورتين علي البحر في الساحل

واخيرا لو معاك وربنا فاتحها عليك ياريت تتصدق

حديث أبي هريرة ، أن رسول الله ﷺ قال: ما نقص مال من صدقة ، وما زاد الله عبداً بعفو إلا عزًّا، وما تواضع أحد لله إلا رفعه الله

وربنا يحفظنا و يحفظكم جميعا

شويه نصايح حطها في اعتبارك و انت في مرحله التنشيف هتساعدك تحرق سعرات اكتر 👇

•خلي عداتك في التمرين عاليه (بين ١٢-٢٠)
•زود مجموعاتك في التمرين
•ما تطولش في الراحات بين المجموعات (٣٠-٦٠ ثانيه) بطل زغي و سيب الموبايل و انت بتتمرن
•دخل السوبر سيت في تمرينك
•اهتم بالcompound movment التمارين المركبه زي الbench press و squat و deadlift
•العب كارديو بعد التمرين او علي معده فاضيه الصبح
•زود معدل نشاطك اتحرك كتير علي مدار اليوم

في دراسه ظريفه كده عملها برفيسور في جامعه كانسس في الولايات المتحده سنه ٢٠١٠ اسمه Mark haub
كان عايز يثبت ان اكتساب او فقدان الدهون مرتبط بالسعرات الحراريه
زي ما قولنا قبل كده
calories in VS calories out
المهم جاب مجموعه من الاشخاص و ادالهم نظام غذائي مدته ١٠ اسابيع محتويات النظام عباره عن سناكس ( دوريتوس - كيك- شيكولاته - اوريو - براونيز ……)
يعني دايت مليان سكر و اكل مصنع و كاربوهيدرات عاليه
بس…..
كان عامل عجز في السعرات مثلا لو الشخص محتاج ٢٥٠٠ كالوري في اليوم كان بيدخل جسمه ١٨٠٠ كالوري junk food

كانت المفاجئه ان الناس دي خسرت وزن

نستنتج ايه من الدراسه دي طول ما انت عامل عجز في السعرات هتخس و هتفقد وزن سواء اكلت صحي او كلت اكل مش صحي مدام في نطاق سعراتك

لينك الدراسه 👇

https://edition.cnn.com/2010/HEALTH/11/08/twinkie.diet.professor/

هيجي واحد يقولي انا عملت كل ده و حسبت سعراتي و بتمرن و بلعب كارديو و بنزل الچيم و النتيجه ضعيفه او تكاد تكون معدومه الغلط فين بقي ؟

هقلك و انت بتختار اكلك في نظامك الغذائي تاخد بالك من حجات زي

-السكر الابيض قلله خالص و الاحسن تمنعه هتقولي خلاص هبدله بعسل يا كابتن 😀 هقلك واله انت الي عسل😂😂 العسل مفيد وبس سعراته هي هي زي السكر الاحسن السكر الدايت

-اختار في اكلك الحبوب الكامله زي الشوفان و البليله والتوست البني و ابعد عن اي حاجه معموله بالدقيق الابيض زي العيش و التوست الابيض و المخبوزات

-اختار دايما الكارب المعقد و قلل من الكارب البسيط

-ابعد عن اللحوم المصنعه نهائي و خليك في الاكل الطبيعي الفريش

-خلي اكلك كله نضيف من الزيوت و الدهون

-اختار الاكل ال low glycemic و ابعد عن الhigh glycemic

-اسوا حاجه انك تسهر عشان هيعلي عندك الشراهه

-التلقيط متقعدش طول ما انت ماشي تلقط ما انت بتدخل جسمك سعرات و انت مش حاسبها

-اخر حاجه متحطش توقعات تحبطتك
ما تقولش ايه ده بقالي اسبوع و مخستش
انت بقالك سنين او شهور سايب جسمك مش في يوم و ليه هتتحول اي شي في الدنيا بيحتاج وقت و مجهود
احمد ربنا علي نعمه ان الي انت عامله في جسمك و صحتك السنين دي كلها تقدر تصلحه في مده بين ٣-٦ شهور

الترانسفورميشن دا مش عادي بقي صديقي الي كان بيذاكرلي في الكليه 😂❤️
٣ شهور بظبط من غير مكملات و باقل نسبه بروتين جسمه محتاجها ١.٢ جرام بروتين لكل كيلو من وزنه و تمرين حديد ٣ ايام بس في الاسبوع
مين يقول عاش 🏋️

اتكلمت قبل كده عن الزياده العضليه
نتكلم عن خساره الدهون شويه
ايه هي الدهون ؟
مخازن الجسم بيستخدمها كا دعم backup لما يتحط تحت ضغط او ظروف قاسيه
بمعني جسمك بيتكيف علي الظروف المحيطه بيه لان جسمك كل هدفه انه يخليك علي قيد الحياه
يعني انت قصدك يا كوتش احرم نفسي من الاكل ؟
انت لو حرمت نفسك من الاكل هتتعب نفسيا و جسمك هيضعف و مش هتستحمل و هتنفجر و ترجع تاكل بشراهه اكتر من الاول
جسمك بيفهم سعرات داخله في هيئه اكل و سعرات خارجه في هيئه طاقه او مجهود مبذول
calories in = calories out هتثبت
calories in > calories out هتزيد
calories in < calories out هتخس

يبقي عشان تخس هتعمل عجز في السعرات

هناخد شخص بيحتاج ٢٥٠٠ سعر حراري كمثال
لو نقص منهم ٥٠٠ هيبقي بيدخل ٢٠٠٠ سعر حراري و بيتمرن و بيلعب كارديو يعني مثلا بيستهلك كمان ٥٠٠ سعر حراري
لا محاله هيخس 😁

هيجي واحد يقولي انا عملت كل ده و حسبت سعراتي و بتمرن و بلعب كارديو و بنزل الچيم و النتيجه ضعيفه او تكاد تكون معدومه الغلط فين بقي ؟

هجاوب عليك في الموضوع الجاي

سؤال كتير بيتسألي امتي ابلك و امتي انشف ؟!

هقلك علي ٢سيناريو
الاول: واحد نسبه دهونه ٢٠٪؜ و بدأ في مرحله البلك و حاسب سعراته كويس هيزيد لحد ٢٥٪؜ نسبه دهون

الثاني: واحد نسبه دهونه ١٠٪؜ يعني ال 6 packs باينين هيوصل نسبه دهون ١٥٪؜ طبعا شكلهم هيختفي شويه بس مازال شكلك كويس

الاول هيطول في فتره التنشيف ويزهق ويمل و ممكن ما يكملش و معرض اكتر للخساره العضليه

الثاني هيبقي شكله احسن طبعا و هياخد وقت اقصر بكتير في التنشيف

الخلاصه من وجه نظري افضل نسبه دهون تبتدي تبلك عندها
الرجاله ٨-١٢ ٪؜
البنات ١٧-٢١ ٪؜

اكتبولي في الكومنتات المواضيع الي حابين اتكلم عنها 🙌

مسألتش نفسك قبل كده ليه محاوله التغيير دايما بتفشل ؟!
ده لأنك معتقد انك هتتغير في يوم و ليله بالعكس التغيير بيحتاج وقت بيحتاج تشتغل عليه مده
عشان الانسان يغير عاده او يكتسب عاده جديده بيحتاج ٤٠ يوم يكرر نفس الفعل

انت لما بتزرع زرعه مش بتنام و تصحي في ليله تلاقيها كبرت لازم تتابعها و تهتم بيها و تراعيها
لازم تحط في اعتبارك ان التغيير بيحتاج وقت و مجهود
و افتكر دايما ان حسن استثمار انك تستثمر في نفسك سواء بتهتم بصحتك او بتطور من نفسك في مجال او لغه او بدات مشروع …..

مش مجرد Motivational speech بس اهم شرط انك تحدد اهدافك و طموحاتك و الاهم انها تكون قابله للتنفيذ

التدريب كمثال
لما تحط اهداف لازم تبقي مناسبه لحاله جسمك و ظروف حياتك عشان ما تتصدمش و تدخل في دائره الاحباط و الفشل لازم تبقي احلامك تقدر تحققها داخل حدودك و طبق الكلام ده علي كل اهداف حياتك عموما .

و افتكر يا صديقي ان اصعب خيانه هي ان صحتك تخونك و ان احسن مشروع تشتغل عليه هو تطوير نفسك
The best project to work on is you ✌️

تفتكروا ايه علاقه الشتا بالbulk و الصيف بال cut 🤔🤔