Mohamed Mamdoh - El Analista

الريال يتراقص علي ملعب الميتروبوليتانو🕺🕺💃💃

الريال ينتصر في 6 مباريات متتاليه في الدوري ويتصدر الترتيب ويفوز في 9 مباريات متتاليه بعد احتساب نتائج دوري الابطال ويصبح الفريق الوحيد في أوروبا صاحب نسبه فوز 100% من اول الموسم

الشوط التاني كان رتمه بطيء والريال كان نجح في قتل اللقاء بعد الشوط الأول وانحسرت الاثاره في لقطات العامل المشترك فيها هو هيرموسو لاعب الاتليتيكو اللي لعب 18 دقيقه فقط في الشوط التاني

1- الدقيقه 82 هدف من ركنيه ودي كانت الحاجه الوحيده اللي ممكن كان يجي منها هدف لان الريال قفل كل مفاتيح اللعب وقتل المباراه – خطأ في الخروج من كورتوا والكوره تخبط في كتف هيرموسو وتدخل هدف

2- د 88 خناقه في وسط الملعب وفاول لصالح الاتليتي وانذار لكاربخال ولكن بدون داعي هيرموسو يروح يحتك مع كاربخال وياخد انذار مجاني

3- تدخل غير مبرر واحتكاك اثناء ركنيه بين هيرموسو وسيبايوس يؤدي للإنذار التاني والطرد اللي توقعناه بعد احداث الشوط الأول

تغييرات سيميوني لم تحدث الفارق بل بالعكس جعلت أداء وسط الملعب اضعف بعد خروج دي بول اللي كان العنصر الانشط فب الاتليتي والحقيقه ان سيميوني محتاج يراجع سياسته في المباريات الكبيره لانه لا ينتصر امام الفرق الكبرى في دوري الابطال و في الدوري الاسباني ولو كسب فبيبقي بشق الانفس

التوقف الدولي وكاس العالم للأسف هيأثروا علي الفرق وخصوصا الكبيره لان كل لاعبيها دوليين وبالتالي لازم الريال وبرشلونه والسيتي وغيرهم يقدموا اقصي أداء ممكن ويحصدوا اكبر عدد من النقاط قبل كاس العالم والتوقف الطويل اللي هيؤدي اكيد لتذبذب المستوي بعد التوقف الطويل حوالي شهرين

ملخص الشوط الاول من دربي مدريد 🔥🔥🔥


اتليتيكو ابتدي بضغط عالي وغلق زوايا التمرير و عمل كثره عدديه في الجانب اللي فيه الكوره وسحب المباراه للصراعات البدنيه خاصتا في نص الملعب حيث يتواجد لوكا مودريتش وكروس الغير مميزين في الصراع البدني

تيقن انشيلوتي لخطه سيميوني فتحول ريال مدريد بوجود مودريتش كجناح ايمن وفالفيردي فوسط الملعب بجانب تشاوميني وكروس لزياده التفوق في الصراع البدني والاختراقات مع القوه البدنيه لوسط ملعب اتليتيكو

وبالفعل نجح الريال في تسجيل الهدف الأول بصناعه رائعه من تشاويمني وتسديده رودريجو علي رأي الشوالي كيما جات موقفهاش

بعدها رجع اتليتيكو لتكتله الدفاعي ورجع الريال لطريقه لعبه العاديه وبعد تمريره خد وهات بين فينيسيوس و مودريتش في ظهور فينيسوس المؤثر الأول بعد ثقه الهدف الأول للريال ينفرد باوبلاك ولكن تسديدته تخبط في العارضه ويكملها القادم من الخلف فالفيردي ليتقدم الريال بثنائيه مستحقه ويسجل فالفيردي للمباراه الثالثه تواليا ويحتفل بطريقه هالاند تقريبا ناوي ينافسه في معدل التهديف

فينيسيوس بيدخل في صراعات وتمثيل وحاجات كتير ملهاش لازمه مع لاعبي الاتليتيكو وممكن نشاهد دراما وخشونه وبطاقات حمراء في الشوط التاني خصوصا للاعبي الاتليتيكو

واحد من افضل أشواط الريال في الموسم ✍️✍️✍️

من هو السويسري مارسيل كولر مدرب الاهلي الجديد وهل سيقدم اضافه ؟

الحقيقه انه اسم بعيد جدا عن اي توقعات راجل قاعد فالبيت بقاله اكتر من سنه واكبر تجربتين تدريبيتين ليه هم منتخب النمسا اللي قعد معاه 7 سنين و بعد كده نادي بازل السويسري اللي كان بيلعب فيه محمد صلاح وقعد معاهم سنتين حقق فيهم مره كاس السوبر فاول موسم ليه وفقط

لما هتيجي تبص عندنا عالصفحه هتلاقي في معايير حطيناها علشان نقول ايه الاسس اللي لازم يتم اختيار المدرب الجديد بيها علشان يتوفر ليه عوامل النجاح.

هتلاقي ان اكبر فريق هو دربه بازل السويسري ومنجحش معاهم ومشي بعد موسمين ليه بنقول منجحش لان المنافسه فالدوري السويسري بتنحصر بين بازل ويونج بويز ويجي بعدهم زيوريخ وجراسهوبر وفالسنتين اللي دربهم كولر بازل طلع فيهم مركز تاني فاول موسم 18-19 ومركز تالت ف 19-20 بعد كده انفصل المدرب عن النادي ولم يدرب من جديد!

نسبه فوز المدرب ده مع بازل حوالي 60% وهي نسبه مش سيئه الحقيقه ولكن اللي يخوفك هو معدل استقباله للاهداف اللي وصل معاه لحوالي 1.2 هدف للمباراه الواحده هي هو نازل اي مباراه كده كده هييجي فيه هدف

مع العلم برده ان ف نفس عدد المباريات 100 مباراه معدل تسجيله للاهداف هو 2.1 اذن هتلاقي تهديف ولكن مش هتلاقي صلابه دفاعيه ودي من المشاكل اللي واجهت موسيماني مع الاهلي بالرغم انه بيكسب.

علي الجانب الخططي او التكتيكي الراجل بيفضل اللعب برباعي فخط الضهر وبيستعمل الخطط التاليه 442 4231 او 4141 ولكن مش بيستعمل الاخيره كتير

بيفضل اللعب بثنائي ارتكاز سواء ف 4231 او 442 ولكن مع ذلك لم يحقق التامين الدفاعي الكامل لفريقه بس مش عارف هل ده لقصور علي الجانب التقني للاعبين ولا بسبب ان التوليفه مكانتش مناسبه لان لسه لم اتعمق في دراسه اسلوب لعبه.

الحقيقه ان انطباعي المبدأي انه لم ينجح فالتدريب في المستوي العالي ومنتخب النمسا مش بلجيكا ولا فرنسا و لا اسبانيا ولا من منتخبات الصف الاول في اوروبا وتدريب الانديه مختلف عن المنتخبات لذلك اكتفيت بدراسه تجربته مع نادي بازل احدث محطاته التدريبيه ومش متأكد برده من نجاحه في اداره غرفه ملابس مليئه بالنجوم زي الاهلي وهيبقي عارف الاجواء الافريقيه ولا هييجي يقول الجو حر اوي وبتتمرنو الصبح فعز الشمس ؟

ارثر ميلو راقص السامبا القابل للكسر

الحقيقه ان تعاقد ليفربول مع ارثر ميلو لما تيجي تفكر فيه من حيث مميزات اللاعب هتلاقي انه فعلا يناسب طريقه لعب ليفربول بسبب مميزاته وتعالا اقولك أهمها:

- حمل الكره للامام : بمعني ان الراجل بيقدر ياخد الكوره ويقطه بيها مسافات ويكسب ارض لفرقته وبالتالي بيكسر الخطوط الدفاعيه للخصوم من غير أي تعقيد الناس اللي متابعه الدوري المصري حاجه كده زي اليو ديانج فالاهلي بس طبعا مع مهاره ودريبل احسن بكتير وعالميا شبه تشافي وانييستا فبرشلونه
- الراجل بيقدر يستخلص الكوره فالتلت الامامي بسرعه بعد فقد الكوره وده بيتفق مع طريقه لعب يورجن كلوب اللي بيحب يفتك الكوره بعد فقدانها من الجزء الامامي فاسرع وقت بدل ما يستني ويرجع يدافع
- القدره علي التمرير حتي تحت ضغط الخصوم وبالتالي بيقدر يحافظ علي الاستحواذ لفريقه وطبعا كلوب بيحب يسيطر ويستحوذ وبالتالي برده مناسب لافكاره
- التنوع والقدره علي أداء مهام اكثر من مركز فعلي سبيل المثال مركز ميلو المفضل هو وسط ملعب 8 علي اليسار ولكن بسبب قدرته علي افتكاك الكوره والخروج بيها من تحت الضغط وكمان فتح ممرات التمرير لزملائه علشان يرتكزوا عليه اثناء الخروج بالكوره في مرحله بناء الهجمه ودقته تمريراته القصيره والطوليه بيقدر يلعب فمركز 6 كمان وحتي لو اصبح صانع لعب فمركز 10 هيؤدي المطلوب وزياده والمرونه دي كلوب محتاجها خصوصا مع تذبذب مستوي نص ملعب ليفربول والاصابات الكتير

طيب هو لو الراجل عنده كل الإمكانيات دي وبيطلع نار من بوقه ليه مش واخد حقه وليه مش بيتم تصنيفه فافضل لاعبي الوسط في أوروبا وليه أصلا جاي اعاره مش بيع نهائي وليه كمان صفقه انتقاله لارسنال فشلت قبل كده ؟

الناس أجمعت علي موهبه ارثر ميلو تشافي مثلا قال عليه انه يحمل جينات برشلونه – بيرلو والليجري اللي دربوه فيوفنتوس قالوا انه يمتلك موهبه خارقه للعاده ولكن عوامل اخري وقفت فالطريق

اهم حاجه عطلت مسيرته هي قدرته البدنيه واصاباته ارثر ميلو صلب وقوي ولكن معندوش قدره كبيره علي التحمل وبالتالي بيتصاب كتير إصابات عضليه ومبيبقاش قادر يدي دايما 100% من مستواه بعد العوده من الاصابه وبالتالي بيبقي صعب الاعتماد عليه كأساسي

ليفربول بيلعب اكتر من 60 مباراه فالموسم وتخيل ان ارثر ميلو ملعبش فحياته من ساعه ما راح برشلونه اكتر من 19 مباراه فالدوريات فالموسم الواحد – اخر موسمين لاعب فكل مميلوسم حوالي 1500 دقيقه يعني 16 مباراه فقط لانه كان بيخسر مكانه فالتشكيل الأساسي حتي بعد العوده من الاصابه لان في لاعيب غيره جاهز ورجله فالملعب

هل هيقدر يورجن كلوب يعالج موضوع اصاباته الكتير وجاهزيته البدنيه و قدرته علي التحمل خصوصا ان الموسم ابتدا وفتره الاعداد خلصت ؟ ميلو عنده إصابات متكرره فالعضله الخلفيه وفكاحل رجله

وعلي الرغم من ده احصائيا ميلو لما بيشارك مع يوفنتوس بيبقي افضل لاعب وهديك نبذه عن ارقامه فال 90 دقيقه في اخر موسمين

1- اعلي لاعب لمسا للكره في يوفنتوس
2- اكثر لاعب تمريرا للكرات في يوفنتوس
3- ثاني اكثر لاعب تمريرا للكرات في الثلث الامامي من الملعب في اليوفي
4- اعلي لاعب في دقه التمريرات
5- اللاعب الأكثر استخلاصا للكره في الثلث الامامي

تفتكر هيقدم اضافه ليورجن كلوب ولا هينضم لمستشفي ليفربول؟

Mohamed Mamdoh

كيف يختار الأهلي مدربه القادم بعد رحيل سواريش رسميا ؟

الحقيقه ان مفيش معيار واضح ولا اي تصريح رسمي طلع حتي بقايمه مرشحين - الطبيعي ان كانت شركه الكوره تجيب مدير رياضي وهو اللي يتولي الملف ده علشان يحدد فلسفه النادي من طريقه لعب وتعاقدات ولكن للاسف موصلناش للمرحله دي فمصر لسه وعايشين علي زمن السير الذاتيه اللي اختفي من العالم كله ولكن الاكيد ان لازم في بعض المعايير يتم مراعتها وهي:

- قوه الشخصيه علشان يقدر يسيطر علي غرفه خلع الملابس المليانه بالنجوم

- سبق له تدريب انديه قمه او منتخبات قمه بمعني ان مثلا زي فايلر يكون درب اقوي فريق ف بلجيكا - او اقوي فريق ف البرتغال او اي بلد وبالتالي هيبقي ليه خبره في التعامل في كذا جانب اهمهم ازاي يفك تكتلات الفرق الاضعف اللي هتواجهه وهتقف كلها جوا ال 18 وهيبقي عنده القدره كمان علي التعامل مع الضغوط الجماهيريه والاعلاميه

- سبق له اكتشاف مواهب صاعده او عمل تعاقدات ناجحه لان ده اللي الاهلي بيحاول يعمله الفتره دي

اعتقد دي اهم النقط اللي يتم اتخاذها في الاعتبار وممكن بسبب الكلام ده نشوف مدرب مرشح زي كارلوس كيروش ينطبق عليه كل ما سبق ( درب ايران منتخب قوي في قارته وكذلك كولومبيا - علي درايه بالاجواء الافريقيه - قوي الشخصيه ومكتشف للمواهب )

بس ارجو من الاداره متستسهلش لان رصيد كيروش عند الجمهور مش كبير بسبب اداء المنتخب معاع علي الرغم من النتايج الجيده

وحيد خليلوزيتش مرشح كذلك ولكنه مدرب صدامي من الدرجه الاولي مع اللاعبين والادارات وحتي الاعلام فبرده مش احسن حل متاح

طيب هل ممكن معين الشعباني يبقي اختيار جيد؟

مين من وجهه نظرك المدرب الامثل وايه المعايير اللي شايفها مهمه في الاختيار ؟

Mohamed Mamdoh

اول بوست بعد فتره غياب نتيجه ظروف حبيت اتكلم فيه عن ريكاردو سواريش

هل اخطأ ام هو ضحيه ؟

- تعالا نبص علي الحقايق قبل ما تطلق حكمك علي الراجل

1- الراجل جه فوقت صعب بعد سوء النتايج مع موسيماني وخساره افريقيا وخساره الافضليه فترتيب جدول الدوري

2- اختيار سواريش كان اختيار حتي لو كان مدروس ولكنه مش فوقته الراجل لا يعلم شيء عن الكوره خارج البرتغال وغير معتاد علي الاجواء ولا عدم وجود نظام

3- الراجل خبراته التدريبيه كانت دايما مع فرق متوسطه او ضعيفه وبالتالي اولويته هي الدفاع والتحول واللعب علي المرتدات واكيد هيواجه صعوبه ففك التكتلات الدفاعيه المنخفضه لانه مش متعود علي تدريب الفرق الكبيره اللي بيتكتل قدامها الخصوم

4- انخفاض مستوي اللاعيبه الكبيره اللي المفروض تشيل الفريق نتيجه تلاحم 3 مواسم ومتنسوش هتاف الجمهور فالمدرجات ( شمال يمين صعدوا الناشئين ) وبالتالي تم تصعيد الناشئين واراحه اللاعبين الكبار

5- اللاعيبه الناشئين الكويسين فالاهلي قليلين الحقيقه معندهمش خبرات كفايه وعندهم مشاكل تقنيه محدش فيهم متكامل او جاهز للفريق الاول

6- تخيل ان مع كل ده تم تحقيق 13 كلين شيت للاهلي بدفاع احتياطي وناشئين يغيب عنه ( علي معلول - بدر بنون - ياسر ابراهيم - ايمن اشرف ومن غير باك يمين اساسا يرتقي للمستوي وقبل كل دول بدون الشناوي ) مع العلم ان موسيماني بصفوف كامله كانت ارقامه كارثه دفاعيه

7- لغه الارقام بتنصف سواريش فعلي سبيل المثال نتايجه فاول 13 مباراه افضل من نتايج اول 13 مباراه لفيريا مع الزمالك في الولايه الحاليه مع العلم ان اختيار فيريرا كان سليم فظل المعطيات.

فالمجمل انا شايف ان رحيل سواريش ظلم ليه وان الراجل مع الصفقات الجديده اللي هو محتاجها و فتره اعداد كويسه كان هيقدر ينقل الفريق ويلاعبنا كوره اكثر تقدما ومواكبه للعصر الحديث بعكس المدارس الدارجه والمعتاده فمصر

Mohamed Mamdoh
Ricardo Soares
Ricardo Soares

الاهلي يخسر من بيراميدز بهدفين والمتسبب الرئيسي فالهدفين هو علي معلول

الحقيقة ان علي معلول معملش حاجه مهمه من اساسيات الكوره وهي عمليه ال scan او بالعربي انه يرفع وشه ويعرف هو واقف فين ومين حواليه

فكوره الهدف الاول السوليه كان في بدايه الهجمه بتاعت بيراميدز رجع يغطي جنب علي وكان هو اللي ماسك فخر الدين بن يوسف لما الموره ابتدت تطلع من منطقه الجزاء وتعلي راح السوليه لمكانه الطبيعي فنص الملعب واصبح فخر الدين بلا رقابه
كل ده حصل وعلي معلول بيتفرج عالكوره حرفيا لا اهتم بتمركز ولا بتغطيه ولكن اكتفي بمشاهده الكوره

في الهدف التاني علي معلول من بدايه الموره الطويله وتراوري لازق فضهره بس معلول مش مدرك لانه مبيرفعش وشه ويشوف تمركزات فريقه والفريق الخصم
وبالتالي ادي الكوره هديه لايريك تراوري

الماتش كان ممكن يخلص ٠-٠ وساعتها نتكلم عن العقم الهجومي فقدان الشراسه و التكتيك اللي مشي عليه سواريش
ولكن يأبي معلول ان الاهلي حتي يطلع بنقطه

مع تقدمه في السن لازم نلاقي بديل لان كمان علي عنده مشاكل فالارتداد ومعاناه بدنيه واضحه تحسه لاعب ماتش تاني قبل بدايه المباراه مؤخرا

من العبث الحكم علي سواريش في اول مباراه بس الكل اجمع ان اول 10 دقايق للاهلي كانت مختلفه وفيها ادوار مركبه كتير.

عايزك كمان تبص علي لقطه الهدف بتاع قفشه هتلاقي ان كل لاعيبه الاهلي اللي فالملعب بلا استثناء بتتحرك وشريف و طاهر اتحركوا عكس بعض بيفتحوا مساحه لقفشه وقفشه اتحرك فالمساحه و نص الملعب جاي بيتحرك علي المهاجمين علشان لو الكوره اتقطعت ياخدوا الكوره التانيه ويعملوا كمان زياده عدديه علي مدافعين بتروجيت.

حاجات كتير وكل ده فلقطه واحده - بعد الهدف واستسهال اللاعيبه المباراه واللي بقت من عيوب الاهلي مؤخرا ولاعيبه مصر عموما الدنيا فكت والادوار المركبه اختفت والتحركات بقت قليله اكيييد مش المدرب اللي قلهم ميتحركوش ويبطلوا اللي ابتدوا بيه.

سواريش لسه مطبقش كل افكاره وهيحتاج شغل كتيير عالافراد علشان يخليهم قادرين يطبقوا افكاره بشكل مستمر ويقلل من اخطائهم والكلام ده لا يمكن الحكم عليه قبل 10-15 ماتش يعني لاخر موسم الدوري الحالي الاهلي هيبقي فمرحله تجهيز واعداد فني وبدني لحد مالماكينه تطلع قماش.

اخر حاجه حابب اتكلم عليها هو محمد فضل ! انا مش فاهم بجد هو مالو يعني هيج الدنيا علي موسيماني ومشي بيهاجم سواريش بعد اول ماتش علشان بيسلم علي لاعيب! يعني تخيل حد يطلع يهاجم انشيلوتي مثلا علشان بيلم علي بيدري ولا جافي- قمه العبث

بدل ما يشكر ان الراجل شايف ال 22 لاعيب اللي فالملعب يعني بيشوف فرقته والخصم بشكل كويس فنفس الوقت وممكن الرؤيا دي تخليه يدير المباريات بشكل احسن لانه اكيد بيقدر يحدد بسرعه نقاط قوه وضعف الخصوم!

علي الناحيه التانيه في راجل عقلاني في كل تصريحاته وكلامه وتحليله فكل المباريات الحقيقه وفالبرنامج بتاعه فالراديو كمان وليد صلاح الدين احد الرجال المحترمه القليله اللي موجوده فمصر دلوقتي في مجال التحليل.

Mohamed Mamdoh

بيدي لا بيد عمرو - يخسر الاهلي امام سموحه في مباراه تميزت بهدايا الاهلي ورامي ربيعه لهجوم سموحه و رعونه الاهلي في انهاء الفرص

برغم ان الاستحواذ وصل ل ٧٢٪؜ للنادي الاهلي الا ان الكوره اجوان ولك ان تتخيل عزيزي القاريء ان مروان حمدي كمان ضيع فرصتين لا يضيعو وكان زمانه احرز سوبر هاتريك

الجمهور حاول يستفز اللاعبين بهتافات من نوع لاعيبه عاله مفيهاش رجاله ولكن كان معظم اللاعبين بلا روح

طاهر محمد طاهر كان الافضل والاكثر قتال والحقيقه ان هو الوحيد اللي كان يستحق يسجل فمباراة النهارده من النادي الاهلي

بعد المباراه اللي فاتت قولت ان تغييرات سامي قمصان مكانتش منطقيه وان الاندفاع الهجومي و حشو المهاجمين مش هو الحل والناس معجبهاش الكلام علشان النتيجه كانت ايجابيه طب والنهارده؟

خروج علي معلول وخروج ربيعه وتحويل هاني لقلب دفاع وكوكا لمدافع ايسر والشحات مدافع ايمن جعل دفاع الاهلي مستباح ولولا التوفيق للشناوي وهاني وسوء قرارات مروان حمدي كان عالاقل استقبل الاهلي ٣ اهداف كمان

خروج ديانج والابقاء علي افشه والابقاء علي محمد شريف اللي تفنن في اهدار الفرص علامات استفهام

هل يا تري المدرب الجديد هيقدر يغير كل ده فوقت قصير؟

فيريرا قلب تأخرة امام بيراميدز بمكسب
قلب تأخرة امام المصري بمكسب
قلب تأخرة امام الداخلية بمكسب
قلب تاخرة امام الاهلي بمكسب ثم تعادل
قلب تعادل امام ايسترن بمكسب
قلب تأخره امام البنك الأهلي بمكسب

اخيراً نقدر نقول ان بصمات فيريرا بانت و حط ايده علي مفاتيح اللعب و امكانيات فرقته و حكم قبضته علي غرفة ملابس نادي الزمالك

تأخر النتيجة في بداية المباراه و العودة ده شئ ايجابي و سلبي ، ايجابي انه يبين ان معاك مدرب بيعرف يقري احداث المباراه و يتخذ قرارات سريعة و دقيقة و سلبي عشان ليه البدايات مبتكونش زي النهايات ، الفريق اللي بكلمكو عليه اسكواده تقريبا شبه فارغ مش عايز اقول ان اسكواد زي البنك الأهلي فيه تنوع و عمق اكتر من الزمالك ، لاعبين بامكانيات في الخط الهجومي علي سبيل المثال يقابلها ضعف و عوار في خط النص و الدفاع .. اسكواد هزيل جدا و لا يمتلك عمق بالمرة .

فاكر شكل الزمالك و هو بيلعب بنفس الوجوه الجديدة يوسف و سيف و حمدي علاء و نيمار مع كارتيرون في كأس الرابطة ؟ .. اللاعيبة دي كانت محل سخرية و خسرت بنتايج كبيرة قصاد فرق مش قوية زي الغزل و انبي و بعض من جماهير الزمالك طالبت بإغلاق قطاع الناشئين لو الكفائة اللي فيه زي اللي شوفناه في كأس الرابطة

و لكن البروف مش كارتيرون .. الموضوع محتاج مدرب عنده خبرة في تكوين الفرق و اصطياد الناشئين و الوجوه الجديدة و ده طبعاً بمساعدة الداهية " روي أجواش " اخصائي اعداد و تجهيز الفرق .. و لنا في تجربته مع فاركو و الرأس الأخضر عبرة .

اجواش مع فريق الراس الاخضر كان محقق نجاحات كبيرة اوي
فريق ضعيف و قدر يكسب تونس و البرتغال و يصعد امم افريقيا علي مجموعته الأول .و لولا فقر الإمكانيات كان هيبقي واحد من المشاريع الناجحة في الكرة الأفريقية

الأمل الوحيد لنادي الزمالك هو فيريرا و جهازه لو كنا عايزين نحسن مستوي الكورة في النادي و نبني فريق قادر علي مناطحة الغريم او حصد الألقاب .

Mahmoud Elhawary ✍🏻