Ahmed S. Emam - English Trainer

“تمر الأيام وتتجدد الذكريات، لكن بعضها يترك في القلب ألماً لا يزول. بعد ثلاثة أيام تحل ذكرى وفاة أخي الغالي، وفي نفس الوقت يصادف اليوم ذكرى عيد ميلادي. بدلًا من الفرح والسعادة، أشعر بحزن عميق ووجع لا يوصف.
ذكرى فقدانك يا أخي تملأ قلبي ألماً، وأتمنى لو كنت هنا لتشاركني هذه اللحظات. أسأل الله أن يرحمك ويجمعنا بك في جناته.
اللهم ارحم موتانا واغفر لهم، واجعل ذكراهم نوراً في حياتنا.”

واعذرني تلميذي إن قسوت عليك يومًا
فإني أريد أن أراک غدًا عظيمًا.

الاجابة ف الكومنتات

في عينه بسيطة المدرس ممكن يقابلها
وهي ولي الامر الجلياط قليل الذوق
عادي حط حدودك وقواعدك والتزم عليها
واللي يخالفها مفيش مشكلة يبقي برا الجروب
هتكسب صحتك النفسية وراحتك
وهتكسب احترامك لنفسك كمان
وهتعلم ولي الامر انه ياخد باله من تصرفاته عشان ميخسرش مدرس شاطر.

عزيزي المعلم:-
⚠️ انت أحسن مدرس ؛ شرحك متميز جداً وبسيط..
⚠️ ابني بيحبك جداً جداً ؛ إحنا خلاص بنعتبرك واحد مننا..
⚠️ أول مرة أشوف حد زيك كده ؛ انت فنان ، وعبقري وعالمي..
عبارات هتسمعها من ولي الأمر في بداية التعامل والتعارف..
نصيحتي لك "متصدقهوش"..
واعلم أنها علاقة قائمة على المصلحة المتبادلة..
نفس ولي الأمر ده اللي طلعك السما هيسيبك وهيآكل عليك شهر واتنين ؛ فدوام الحال من المحال..

شغلانة المدرس تشبه اوي شغلانة السيرك
وانا ف الفصل بفتكر دايما محاسن الحلو وهي بتروض الاسود وبترقص مع دبه و راكبه فيل و سايقه عجله ..
انت بتشرح الدرس و بتسكت واحد ورا قرر يسال اللي جنبه امه عامله علي الغدا وبتسمح لواحد يروح الحمام بسرعه لانه مزنوق و بترد علي سؤال واحده كيف بدأ الخلق و بتدي لواحده حاجه مسكره علشان هبطت ومفطرتش و بتبرق لواحد بيشاور عقله يدي اللي ادامه بالقفا بلا اي سبب او هدف و بتضرب بعينك عل الجنب علشان تتاكد ان اللي جنب الشباك مش سارح في ملكوت ربنا و بتفض خناقه بين اتنين علي اجابة سؤال وانت محرج تقولهم الاجابتين غلط و بتفوق واحد مطبق من امبارح وعنيه غربت و بتشوف الغياب و بتلم الواجب و تعالج المكتئب و تفرفش الحزين و ترد الغايب و تفك العمل وتجلب الحبيب ....
ويجي واحد يقولك دي شغلانه سهله واجازتها كتير ..عقبالك زينا ان شاء الله قول يارب .

عزيزي ولي الأمر
غير المتخصص او غير الشغوف بمجال ممكن يأذيك حتي لو كان قصده خير
من كام شهر كنت رايح اعمل عملية خلع ضرس العقل لان عندي ضرسين طالعين غلط وروحت اشيل واحد منهم ف الدكتور كشف واداني معاد بعد اسبوعين وكتب ادوية ومضادات حيوية ومكتبش المواعيد بتاعتهم وقال لي ان الادوية دي ابدأ استخدمها قبل العملية ب 24 ساعه بس مكونتش مركز وهوا بيقول كدا
روحت الصيدلية والبنت اللي هناك قالت انت خد الادوية دي من دلوقتي ولحد ما تروح للدكتور عادي عشان لو في ورم يتشال وخليك واثق فيا
سمعت كلامها وكنت باخد مضادات حيوية زي اوجمنتين وحقنة زي فولتارين مرتين في اليوم، كنت فعلاً بتعب لان الادوية شديدة جداً وبدون داعي وانا معرفش
لما روحت للدكتور يوم العملية ف حكيت ليه اتعصب جداً وكان عايز عنوان الصيدلية عشان ياخد ضدها إجراء قانوني لأن اللي قالته غلط تماماً، ماذا لو كان المرض اكبر وعملت بلوة اكبر ضيعت حياة مريض؟؟
بعد مرور ايام اكتشتف ان البنت دي مش صيدلية خالص وهيا كانت في قسم ادبي اصلا وملهاش علاقة بالصيدلة
وقتها عرفت ان صاحب الصيدلية استرخص وجاب حد ب مرتب قليل عشان يمشي له الدنيا واهمل الجانب المهني تماماً وطبعاً مفيش اي رقابة
_______
نفس الموضوع بيحصل في مجالات كتير جداً، واحد غير متخصص ولا دارس ولا حتي بيتعلم في مجال وبيشتغل فيه لمجرد انه لقي واحد مسلم له تفكيره وماشي يجرب في الناس
زي مثلاً مهنة التدريس
تلاقي حد ولا عمره عرف يعني ايه classroom management ولا عرف ازاي يحضر درس lesson planning ولا activities ولا اي حاجة وبيشتغل عادي
وخصوصاً لو في لغة زي الانجلش مثلا
تلاقيه نطق صفر خالص للأسف وكمان يعقد الطالب في المادة بسبب استخدامه طرق تربوية خاطئة، النطق مهم وتعليمه مهم لانه بيرفع الحالة النفسية للولد لانه بيحس انه بينطق زي الاجانب! مش لما يسمع جملة بسيطة من فيلم ميعرفش يطلع معناها ف يصاب ب الاحباط لان اللي بيتعلمه مش انجليزي!
ولي الامر مش هيستوعب حاجة زي دي، لان كل اللي يهمه الدرجات... طيب لو الدرجات دي جت علي حساب ضعف شخصية الولد وانه ينضرب كل شوية ويترعب، هتبقي حاجة حلوة؟. لو الدرجات دي جت من مدرس بيجيب رقاصات زي ما بنشوف دلوقتي، هتنبسط؟ مقولتش الدرجات مهمة،. بس في حاجات أهم
اغلب الناس بتكون متعقدة من اللغة خصوصاً لأنها بتتكسف تتكلم ف تغلط والمدرس يعنفها
افتكر المدرس بتاعي كنت بخاف منه بس كان لما ييجي عليا الدور في سؤال كان بيقول : اغلط يا احمد، انا عايزك تحل غلط... المهم تحاول... عمره ما كان بيعاقبني علي واجب محلول غلط، كان دايماً بيعاقبني لو محاولتش
الحمد لله بقيت زيه وبفتخر بيه، لكن للأسف لانه كان نابغه سافر برا مصر ومبقيتش بشوفه زي زمان، لكن مازلت علي تواصل معاه
انا مش هقول اختاروا لاولادكم مدرسين بعينهم، بس هقول لكم اختاروا مدرسين صح، واعرفوا بيتعاملوا ازاي مع الطلبة وبيقدموا لهم ايه، وحتي لو اللي بيقدموه مش عاجبك اوي، أسأل متخصص قبل ما تحكم، لانه ممكن اللي بيعمله يكون حاجة صحيحة او جديدة في التدريس وحضرتك مش واخد بالك
تعديل :
انا قولت غير المتخصص او غير الشغوف
يعني ممكن واحد حتي يكون متخصص بس غير شغوف ويخرب الدنيا واعرف متخصصين بس مش ناجحين كتير في مجالات كتير مش مجال التدريس بس، آسف لو حد هيزعل مني بس والله ما قصدي حد معين
يتبع.....

هدية مجانية لطلاب اولي ثانوي
شرح الجزء الاول من الوحدة الاولي مجاناً
علي اليوتيوب

الحصة الاولى للصف الاول الثانوي - الوحدة الاولي - الجزء الاول كلمات وpast simple tense فى الحصة الاولي من الوحدة الاولي ل اولى ثانوي بنشرح اهم نقاط الكلمات ودرس الماضى البسيط past simple tense وكمان بنحل اسئلة عليهتقدر تبعتلنا علي 01125503155 ...

وصلني الان خبر وفاة عمي “عاصم” إنا لله وانا اليه راجعون أعزي نفسي وابناء عمي وجميع أفراد العائلة

تفتكر إيه الهدف من درس البسبوسة في سنة ٥ ابتدائي 🤔🧐

بص ياسيدي دا نوع من انواع writing اللى هو
Rules of writing a recipe
ودا كان موجود فى كتب المستوى الرفيع فى المدارس التجريبية فى اخر كل وحدة ولكن المدرسين بيطنشوه للأسف وبيدربوا الطلبة على موضوعات عادية وتقليدية زى زيارة للبيتش او لحديقة الحيوان او عن الروتين اليومى وهكذا...... واكتب يابني I can see ويلا

❓طيب بردو ايه الهدف من الدرس دا
👇الهدف هو ازاى نعلم الطلبة يكتبوا وصفة عمل اى طبخة او طبق أكل زى البسبوسة
فمثلا من ضمن rules 👇👇👇

📌وايه هى اجزاء تقديم اى وصفة وايه البداية (ingredients,method,notes )

📌 إن كل مكون يكون فى سطر لوحده
📌انك بنستخدم لغة الامر وتبدأ بالفعل مباشرة في المصدر
📌استخدام comma بعد الامر
📌بتستخدم simple language or sentences for describing

علشان كدا بنقول ان المناهج دى محتاجة مننا نكون معلمين فاهمين ونتعب شويه في تحضير المادة وانا اؤيد بشده المناهج دي ومن انصارها اوي بالرغم ناس كتير هتهجمني لكن كلمة حق مناهج ممتازة ولازم نلغى طريقتنا التقليدية فى تقديم المادة للطالب وبلاش نسخن اولياء الامور ونرمي كسلنا علي شماعه وحجة المنهج والوزير

✋✋ياريت إذا هتنقد البوست يكون نقد بناء