إستشارات تربوية - أسماء طلحة

السلام عليكم ، لو طفل شاف والده بيضرب والدته ومن ساعتها وهو بيعمل حمام على نفسه هل ده من اثر ما شاهده؟ ولو كان كذلك ما العلاج
**************************
الرد /
أكيد طبعا والطفل ده كده محتاج إحتواء جامد جدا .. إزاى ؟؟
أنه يشوف عكس اللي حصل يشوف معاملة طيبة من أبوه لأمه كتيير علشان يطمئن ... لازم يشوف بعينه طبطبته عليها أو تقبيلها من رأسها أو كلامه الجميل ليها ...

اكتر شئ بيأثر سلبا فى الطفل هو المشهد المؤسف ده فضرووورى ميحصلش ابداً ابداً قدامه ولا يحصل أصلاً .. حتى صوت الأب العالى على الأم أو أى شئ من هذا القبيل بيسيب أثر نفسى سلبى جدا فى الأولاد
.....
ما تأثير ضرب الأم على الأطفال؟

1 / يؤثر على شخصية الطفل ويجعله طفل ضعيف الشخصية

2 / يجعله شخصية عدوانية تميل إلى العنف فى كل تصرفاته

3 / ترسخ فكرة الضرب في عقل الطفل وتقليد ما يفعله الأب

4 / يسيطر على الطفل الشعور بالخوف والقلق وعدم الشعور بالأمان ويفقد الثقة في نفسه ويفقدها في من حوله

5/ صعوبة اتخاذ القرارات

6/ يميل إلى الضرب كحل أمثل في جميع مشاكله

7/ من المحتمل كراهية الأب وتعمد إيذاءه

8/ الضرب يدمر نفسية الطفل ويجعله شخص انطوائى يميل إلى العنف

9/ ضرب الأم أمام الأطفال يجعل الطفل شخصية انقيادية يسهل انقيادها
..................
ربنا يهدى أزواجنا ويصلح حالهم ياااارب

السلام عليكم انا كنت عاوزه ازاى انمى ثقة طفل في نفسه عمره 10سنوات وتبقى جريئة

*************************
الرد /

سؤال حضرتك إجابته محاضرة كاملة بس اللي أقدر اقولهولك هو أن الشخصية هيا ( أساس البنى آدم )..

97% مننا شخصية و 3% فقط معلومات ..

الشخصية بتقوى ( بالمعاملة الطيبة )
وبتضعف ( بالمعاملة القاسية أو السيئة ) ..

لو حضرتك بعدتى عن مدمرات ومضعفات الشخصية هتلاقى شخصية بنوتك قوية بشكل تلقائي ..

لأن الأصل فينا وفى خلقة ربنا لينا أن شخصيتنا قوية والأطفال كلهم مولدين شخصيتهم قوية ...

طيب ايه اللي وصلنا إحنا الكبار لكده وإيه اللي بيوصل الأطفال بعد ال٦ سنين لضعف الشخصية ؟؟

( المعاملة ) أو ( البيئة ) المحيطة بالطفل ..
طريقة تعاملنا معاه هيا اللي بتحافظ على الشخصية القوية الموجودة أصلا
وهيا برده اللي بتضعفها ..

طيب ايه هيا مدمرات الشخصية ؟؟

* الصوت العالى
* الزعيق
* النقد
* اللوم
* التأنيب
* التهديد
* العقاب
* الضرب
* الحرمان
* الإستهزاء
* السخرية
* التوبيخ
وغيرها كتييير

لو توقفنا عن ده هتلاقى تحسن كبيير جدا جدا حتى إحنا الكبار لو شخصيتنا ضعيفة نبعد عن كل مصادر الضعف دى هنلاقى تحسن كبييير جدا
.
وكأن الأطفال والإنسان عموما عامل زى النبات لما بننظف التربة وبنسقيه بيرعرع .. ولما نهمل فيه بيدبل ويموت

.

طبعا فيه حاجات تانية بعد الإمتناع عن ده زى أنشطة ومشاركة وتعاون وبيئة صحية ومليانة مقومات بتضيف للطفل قوة شخصية ومتانة وعبقرية ..

بس لايمكن اعرف أضيف قبل مااظبط الأساس نفسه
( التخلية قبل التحلية )

جزاكي الله خيرا @⁨أسماء طلحة⁩
ع الكورس الجميل دا
وحقيقي استفدت وبحاول اطبق مع بنتي رغم اني عصبيه جدا بس بحاول اهدي علشان اكون ليها شخصيه سويه وكويسه
ومنتظره ان أحضر لحضرتك كورسات تانيه ❤️
**************************
وجزاكى الله كل خير 🌹
الحمد لله رب العالمين

أول حاجة تعمليها علشان تكونى أهدى إنك تقولى ( أنا هاديه )
كلامنا مع نفسنا بالصفات اللي إحنا عايزين تكون فينا زى الهدوء .. هو ده اللي بيوصلنا للصفات دى

احذروا ما بعد كلمة ( أنا )
أنا .........

دايما قولى بعد ( أنا ) صفات إيجابية وده لنفسك ولأولادك لنفسك ( أنا ) ولأولادك ( انت )
... زى /

أنا هادية
أنا جميلة
أنا قمر
أنا .....
أنا .....

وهكذا ... كل اللي تتمنيه حطيه بعد أنا وشوفي النتيجه

نفس الكلام بيحصل بالضبط لما بنحط صفه سلبيه بعد ( أنا ) برده عقلنا بيتبرمج بيها وبيتمسك بيها وبيحولها لقناعة
....
فاحذري انك تقولي ( أنا عصبية )

بنتي عندها 5شهور ونص ديما تلتفت للتلفزيون مهما ابعدها او اشغلها باي حاجه تانيه ف ساعات بسيبه شغال واقفل الصوت تتفرج بس هل كده ممكن يأثر عليها بردو

**************************
الرد /
طبعا يأثر عليها جدا وفى غاية الخطورة لأن عنيها لسة مش جاهزة لمشاهدة الشاشات مش موضوع الصوت بس بيأخر الكلام ....
الشاشه للطفل قبل السنتين ممنوعة تماما صوت وصورة
رجااااااء متتهاونوش فى الموضوع ده لأنه أثره سئ جدا على دماغ أطفالنا

https://youtube.com/-ui7mw7by8m

إستشارات تربوية - أسماء طلحه - YouTube 🌟 هذا الطفل سيحمل فى قلبه دائما ذكرى من أمسكت بيده وساعدته على المشى .. من إحتضنته عندما سقط .. من ساعدته أن يكون نفسه.. مثلما تحمل مياه النهر الصخور التى ...

السلام عليكم ورحمه الله وبركاته
أستاذه أسماء
ابنتي مسافره ومعاها حفيدتى خمس شهور ومن عمرها شهر وأنا بكلمهم عن طريق النت صوت وصوره عن طريق التليفون وكمان بتصورها صور وفديو
هل هذا يؤثر أي تأثير سلبى على الطفله؟؟
وجزاك الله كل خير ا اسماء

***************************
الرد /
وعليكم السلام ورحمه الله وبركاته

هي لما تصورها صور أو فيديو مفيش أي مشكله لأن البنوتة بتبقى مش واخذه بالها
لكن لما تخليها قدام الكاميرا كثير ده اللي غلط عينيها مش مستعدة أصلا إنها تشوف شاشه أي شاشه حتى لو مقاسها 120 بوصه مش موبايل صغير

فبالتالي تصورها براحتها فيديوهات أو صور وهيا مش واخذه بالها ولما تكلمها فيديو تحاول متبقاش البنوتة قدام الكاميرا مباشرة

لأن هيا في الآخر لسه صغنونة يعني حتى مش هتعرف تتفاعل أو تتكلم مع حضرتك ومش مستوعبه أصلا حضرتك في الكاميرا ... ده الطفل يا دوب في سن الخمس شهور بيستوعب وجود امه اللي قدام عينيه وبيدرك انها كائن حي بيتحرك قدامه
. يعني الطفل في السن ده لو الأم دخلت المطبخ أو مشيت من قدامه بيتخيل انها اختفت من الوجود مش من قدامه بس ... تخيلي 🙄

لازم لما الأم تسيب طفلها في مكان وهيا في مكان تتكلم علشان يدرك انها حيه ترزق

ودا سبب بكاء الأطفال لما الأمهات بتسيبهم

.. وما شاء الله ربنا يبارك فى حضرتك وفى اهتمامك بحفيدتك وخوفك عليها ربنا يبارك لك فيها يارب ويحفظها وتشوفيها قريبا ان شاء الله

دكتورة طيب بنتي ٦ سنوات وعلطول تقف امام المرآة وكأنها بتعمل فيديو او بتكلم اصحابها عشان هي لوحدها وانا بقولها كده غلط
***************************
الرد /
لأ مش غلط خالص دى مرحلة طبيعية جدا كل الأطفال بيعملو كده لأن دا نمو للخيال عندهم ..

ونمو الخيال دا نمو عقلى لازم يحصل للطفل علشان عقله ينمو النمو السليم ... وهيا مش بتعمل كده علشان لوحدها وانما دا نمو أساسى للعقل لازم يحصل ... سيبيها واوعى تمنعيها

دكتور انا بنتي سنه وشهرين
اللهم بارك عاوزه تلعب وتتحرك وتتعامل طبيعي زي اي طفل
بس اول ما اخد منها حاجه ما ينفعش تمسكها او حتي افهمها بكلام اننا ما ينفعش نعمل كدا او نمسك كذا
تصوت مع ان الحمد لله مافيش موضوع الصويت ولا الصوت العالي في البيت لحد كبير ونفسي اعرف اتعامل مع رد الفعل ده او اعدل السلوك ده
**************************
الرد /
شايفة حضرتك الكلام اللي حضرتك كاتباه اللي جوه الإطار الأحمر ده .. هو ده بالظبط سبب المشكلة هو ده سبب الصويت والصراخ اللي هيا بتصوته هيا عايزة تقولك ( أرجووووكى ياماما متمنعنيش من حاجة أبدا انا ربنا خلقنى لازم أمسك كل حاجة قدامى علشان مخى يشتغل وشخصيتى تتكون .. لما بتمنعينى انتى كده بتموتينى حرررام عليكى أموت ومخى يتأخر نموه وشخصيتى تدمر وأنا لسة جايه الدنيا مبقاليش فيها سنه وكام شهر حرااااام عيكى ياماااااما 😭
.....
خايفة على حاجة شيليها متخليهاش قدامى .. لأنى أنا عاملة زى الفراشة اللي بتمتص الرحيق علشان تتغذى وتكبر .. مخى بيحتاج يتغذى زى جسمى بالظبط
مخى جعااااان لو مكلش ( بلمس واكتشاف كل حاجة قدامه ) وحاجات كتيير تانية المفروض توفريهالى .. مخى هيموت وهبقى فى المستقبل ولا حاجة عايشة خلاص ... سيبنى براحتى أنا ربنا خلقنى جواية البرنامج اللي انا محتاجاه ربنا اللي عايزنى أعمل كده والعب فى كل حاجة علشان أنمو نمو سليم وأكون إنسانة سوية وناجحة فى المستقبل أبوس ايدك يا ماما شيلى اللي انتى خايفة عليه واللي فيه خطر عليا وسيبينى براحتى ...

ابنى ٥ سنين دايمآ عنده حب التقليد لي ودايما ميوله في المدرسه سوا اللعب او الكلام مع بنات ونادر لما بيحكي انه اتكلم مع ولد او صاحب ولد وبيحب يقلد البنات في كل شي اكلو ايه ولبسو الزي المدرسي ازاي اعمليلي زي فلانه وفلانه جابت معاها في اللانش كذا على هذا القبيل توجيه حضرتك 🙏😍🥰

***************************
الرد /
أهلا وسهلاً بحضرتك ❤️

موضوع *التقليد* ليكى دي مرحله طبيعيه جدا اسمها *مرحله التقمص*

مرحله التقمص دي بتحصل بعد الثلاث سنين وبتخلص أربعه أو أربعة ونصف بالكثيير
( انتى أم جميلة حنونة ابنك بيحبك فبيقلدك لا أكثر ولا أقل )

ليه مستمره معاه لحد دلوقتي لأن حضرتك بتعلقي عليها ... لما بنعلق للطفل على أي تصرف بيعمله بيصبح التصرف ده *اتجاه* يعني *قناعه* يعني *معتقد*

يعني لما بنمنع الطفل من سلوك عابر بيتحول السلوك ده *لقناعه* عند الطفل ودى الخطورة ..

الطفل بيتمسك بالسلوك بدل ما يسيبه اللي هو أصلا سلوك عابر بيدل على *ذكااااء الطفل* *وبينمى عقله ومهاراته*

فممنوع تماما ان حضرتك تمنعيه من تقليدك أو من إهتمامه بالبنات
هو أصلا إهتمامه بالجنس الآخر جاي من تركيزك معاه بس مش أكثر

بأكد تانى أن التنبيه والمنع والتأكيد مننا على عدم فعل أي سلوك الطفل بيعمله نتيجته ( تمسك الطفل بالسلوك ) لأن السلوك بيصبح عادة وقناعة واتجاه

لذلك المفروض إننا نعمل نفس الكلام لما نُكون عايزين نِكَون قناعات صح لأولادنا ..
نأكد على كل الحاجات الجميله اللي نفسنا أولادنا يكونوا عليها زي
انت قوي .. انت شجاع .. انت رائع ممتاز .. انت تستحق .. انت عارف .. انت شاطر .. انت بتحب اخوك .. انت بتحب ربنا .. أنا بحبك بابا بيحبك انت غالي علينا .. انت متعاون .. انت صادق ...... وهكذا



https://youtube.com/-ui7mw7by8m
قناتى إستشارات تربوية

*******************
https://youtube.com/
قناتى لتعليم المنتسوري

*******************
https://instagram.com/trainerasmaatalha?igshid=Njc5ZjliZWU=
حسابى على الإنستجرام

*******************
https://www.facebook.com/asmaa.talhaa?mibextid=ZbWKwL
حسابى على الفيس بوك

*******************
https://www.facebook.com/TrainerAsmaaTalha?mibextid=ZbWKwL
صفحتى إستشارات تربوية

*******************
https://www.tiktok.com/?_t=8Y0UovOnQ17&_r=1
حسابى على التيك توك

*******************
https://chat.whatsapp.com/LCW4ZhMbz1OHw0tiKNxYgM
جروب إستشارات تربوية على الواتساب

🌸 أستقبل إستشاراتكم التربوية على ستوري الإنستجرام

كل عصر وليه أوانه 👀
أوعى تفتكر طريقة التربية من ١٠ سنين هتنفع دلوقتي !

ومن أحدث مناهج التعلم دلوقتي منهج (المنتسورى)
المنتسوري:- منهج حياة وهو منهج تعليمى يعلم الطفل بطريقة سهلة ومبتكرة وبأدوات تصل إلى إدراكه بسرعة من الميلاد وحتي 6 سنوات.

وعشان كده بنقدملك كورس (المنتسورى ) اللي هتتعلم فيه 👇
• نظرة على فلسفة منتسوري
• إدارة فصل منتسوري.
• الحياة العملية.
• الحياة الحسية.
• الحساب.
• اللغة (عربي وإنجليزي).
• العلوم.
• الجغرافيا والتاريخ.
مع المحاضرة المتميزة
✨د.أسماء طلحة✨

📌بداية الكورس :- 12/7 الساعة ٨م

مستني إيه كومنت بتم وسجل بالكورس
العدد محدود 👌🏻



#منتسوري

السلام عليكم ازيك يا دكتور
بنتي الكبيرة 6 سنوات حنينه جدا وحساسة اوي بس حساسية بحزن و شكوي داائمه و طيبه وذكية ماشاء الله تبارك الله
بنتي بقي الصغير سنتين ونص
بس بتبهدلها حرفيا شد شعر وضرب فيها وتاخد اي حاحة من ايديها مش مهنياها ع حاجة ابدا ولا كن هي روحها حلوة اوي والكل بيحبها ماشاء الله
بس ع طول بتضرب الكبيرة وتاخد كل حاجة ف ايديها وبتموت فيها لاكن مش مهنياها ع حاااحة ابدااا
وتيجي الكبيرة كل 5دقايق تشتكي وتعيط وكد اعمل مع الاثنين اي لان يومنا كله عبارة عن شكل
بقول للكبيرة خدي حقك بنفك وهاتي حاحتك واعملي فيها زي ما بتعمل فيكي واي حد بس بتقولي لا مش عاوزة اتعود ع كد ولا اضرب بس مقابل ده تقعد تعيط وتتخلي عن حاجتها كلها وهي زعلانه زمغلوبة ع امرها اعمل اي معاها غشان اغيرلها شخصيتها

**************************
الرد /
وعليكم السلام ورحمه الله وبركاته 🌹 ربنا يبارك لك فيهم يارب

المفروض تعملى ايه ؟؟

*المفروض ما تعمليش حاجه خالص*

لأن ضرب بنوتك الصغنونة لأختها الكبيره بيقوى شخصيها .. ربنا دايما بيساعد الأولاد انهم يقووا شخصياتهم عن طريق أطفال تانيين اخواتهم او أصحابهم ..

فعلا الطفل اللي بيزعل ده وبيتضرب بيبقى محتاج انه يتعلم يدافع عن نفسه ويقول ( لأ ) ( مش يضرب ) حطى تحتها كام خط .. الضرب ممنوع ومرفوض مهما حصل

مش انتى اللى تقوليلها ( لأ ) ولا انتى تدافعى عنها

ده غير انه مفيد جدا ومش مضر ابدا بالعكس بيفيد لانهم بيتعلمو يتعاملوا مع بعض ويقوي شخصيتهم

ما تخافيش خالص إيديهم خفيفه على بعض وزى ما قولتلك هى أكيد محتاجه حد يقوى شخصيتها ويخليها جامده شويه وربنا رزقها بأختها الحمد لله .. ده يفرحك مش يزعلك خالص 🥰

ومينفعش ابدا تقولى للكبيرة خدى حقك بنفسك لأن كده بتخليها تزعل وتشيل من أختها حتى وإن كانت هيا جميلة ما شاء الله عليها وردت عليكى الرد الجميل ده انى *مش عايزة اتعود على كده* ما شاء الله ربنا يحفظها يارب على فهمها ووعيها ده ... صح متضربش حتى لو بتتضرب ...

عياطها وزعلها ده لأن حضرتك حسستيها بمشكلة وان كده اختها غلطانه
سيبيهم تماما ومتتدخليش ابدا ولما تيجى الكبيرة تشتكى تردى ( اختك بتحبك ... اختك عايزة تلعب معاكى بس مش عارفه تعبر بالكلام ... ماليش دعوه هيا أختك مش أختى ... دى اختك الصغنونة اللي بتحبيها اللي فرحتى بيها اوى لما اتولدت ..... ) ... وهكذا

دا اللي هيغير شخصيتها ويقويها
مش تشجيعها على ضرب اختها ( اللي بيضرب مش شخصيته قوية ولا حاجة اللي بيضرب دا ضعيف الشخصية برده ) لكن مش سن السنتين ونص .. السن ده قوى الشخصية بالفطرة