Moataz Al Attar

سؤال ناس كتير بتسألو انا مموت نفسى فى التمرين وبرضو مش بزيد ؟
او انا مباكلش حاجه وبرضو مش بخس ؟

اجابة السؤال ده تقريبا واحده سؤاء عشان تزيد او تخس لازم تكون عارف ان فى اساسيات و انها دايره وبتكمل بعضها مينفعش اركز فى حاجه واسيب حاجه زى العماره الى بتتبنى مينعش فيها عمود واحد لازم كذا عمود عشان يقومو العمارة:

- اول عمود هوا (التغذيه) :-

لازم تكون عارف انتا بتدخل اكل قد ايه او حاسب السعرات الحراريه اللى داخله جسمك يوميا وتكون ثابت عليها كل يوم عشان لما تحب تزيد تكون عارف هتزود قد ايه ولو هتخس تكون برضو عارف انتا هتقلل قد ايه ؛ ولازم تعرف انتا جسمك محتاج كام سعر حرارى يوميا عشان تعرف تحسب سعراتك ولو الموضوع صعب عليك يبقى ركز فى كميات اكلك اليوميه وابدأ قلل تدريجيا عشان تخس ولو بتزيد يبقى هتزود عن الكميه .
لازم تدخل يوميا بروتين ،كربوهيدرات ،دهون صحيه ، ڤيتامينات ، معادن وتنوع فاكهه وخضار ، وتقسم وجباتك بدل متاكل ٣ وجبات فى اليوم كبار قسمهم على ٥ او ٦ وجبات صغيرين
ومش محتاج اقول ان سواء بتزيد او بتخس مفيس سكر ولا سكريات ولا زيت صناعى ولا سمن طبعا .

- تانى عمود هوا (التمرين) :

لو انتا بتخس فانتا محتاج تركز اكتر فى تمرين الكارديو او التمارين الهوائيه او التمرين الى بيعتمد على عضلة القلب والجهاز التنفسى زى الجرى ونط الحبل والعجله والسباحة و مدة التمرين متقلش عن نص ساعة ولو هتتمرن weight lifting او على اجهزة الجيم يعنى يبقى تمرين الكارديو فى الاخر بعد ال weight lifting هيكون افيد ليك عشان تكون بتحرق فى دهون .
ولو بتزيد بالبلدى كده هتزود اوزانك وطبعا تكون بتلعب صح وعدات من ٧:١٢ عده فى المجموعه وممكن تزود المجموعات لو انتا بتتمرن بقالك فتره .

- تالت عمود هوا (النوم) :

اى بنى ادم محتاج ينام حوالى ٧ ساعات وميكونش فى دوشه حواليه وتكون الاوضه ضلمه يعنى الاحسن انو ينام بليل وده عشان افراز هرمون النمو او ال GH وكمان التغيرات بتاعت الجسم كلها بتحصل فى فترة النوم فانتا محتاج تدى جسمك وقتو فى انو يرتاح ويعمل استشفاء لجميع اعضائك الحيويه.

- رابع عمود هوا (حالتك النفسيه) :

اها حالتك النفسيه مسؤله عن تخنك او رفعك او وزنك الثابت ، العامل النفسى ليه تاثير كبير جدا فى زيادة الكتله العضليه او تخسيس الدهون بسبب ان فى اشارات سلبيه بتروح للمخ وده بيخليه يفرز هرمونات بدورها تهدم وتقلل تركيزك فا حاول تبعد عن التوتر والضغوطات ، زى مبنشوف ناس بتزعل فتاكل بشراهه وناس تانيه مبتكولش خالص .

- ده كلام باختصار وبسيط بدون كلام كبير وكتير وباقل التكاليف وان شاء الله هشرح كل واحده فيهم بالتفصيل فى البوستات اللى جايه .