دردشه

من جمال الحياة أن الله يبعث في طريقك ما يوقظك بين الحين والآخر ، أنت الذي ظننت لوقت طويل أنك مستيقظ.

- جلال الدين الرومي

مش عارف انا بكتب الكلام ده دلوقتي ليه .. بس إكتشفت إني ماطلعتش صاحب جدع ولا حاجة !
خصوصا اني حد إجتماعي زي مالناس شايفة وليا صحاب كتير ..

بس انا مابعرفش أفضل على تواصل دايما مع كل اللي بحبهم ! ويمكن ده ظهر في شخصيتي مؤخراً اكتر وبقي بيزيد مع الوقت !
وإكتشفت إن اغلب اللي فهم أو تقبلني زي مانا هما دايما اللي بيسألوا عليا ..
بس برضو اكتشفت ان ده عمره ما غير مكانتهم جوايا ! وأنه مش بمدى تواصلنا سوى فانت الأقرب وغيرك لأ !

أنا فعلا في ناس كتير اوي غاليين عليا جدا ومكانتهم في قلبي عمرها ماتغيرت بس للأسف مابعرفش ابقى دايما موجود في الصورة وأبادر وأسأل بأستمرار ! يمكن نقول مابقاش في طاقة !
وللأسف برضو مش كل الناس بتتقبل ده واغلبهم بيستسهل ويبعد ويمشي لاقتناعه التام أنه لازم يبقى فيه هات وخد وحقوق وواجبات وقواعد وشروط ...
بس انا عمري ماشوفت للمحبة شروط !
وعمري ماخدت الموضوع بالصورة دي .. المهم اني حبقى موجود وقت الحاجة .. وإن عمري ماحتخلي عن اي حد او اصُده وقت مايحتجني لمجرد اننا ماتكلمناش بقالنا فترة .. وهو ده مفهوم الجدعنة بالنسبالي ..
أنا دايما موجود وفي أي وقت بابي مفتوح للبوح وححزن و حفرح معاك من كل قلبي حقيقي ولا حيفرق معايا مسافات البعد ...

يمكن بقول الكلام ده عشان خايف اكون سببت أي خيبة أمل لأي حد في يوم من الأيام دون قصد ..
وحقيقي ممتن جداً من كل قلبي للكام حد القليلين اللى باقيين وفاهميني وعمرهم ما ملّوا أو فقدوا الأمل فيا 💙

اعُذروا تقصيري ...🌻🌼

"لا تتركني يا الله اتبع شيئاً ليس لي ؛ واحب شيئاً لا تحبه ، لا تجعلني احلم بما اشاء ؛ ولكن اجعلني احلم بما شئت فهو خيراً وابقى."💙🌼

الكوبلية الاكثر قسوة في تاريخ الست ..

" بكرة تتمناني أحاسبك أو ألومك أو أعاتبك
مش هحاسبك .. مش هعاتبك
لا .. دا أنا كفاية إني سبتك للزمن 🎼 🎶 "

Fact:
الغيره علي الصحاب متعبه اكتر من الغيره علي الحبايب.

ما فائدة الحُبِّ وكلانا يمضي الليل وحده، في عينيه دمعة، وفي عقله سوء الظنون؟.

كنت بدور عليه من زمان ولما لفيته حبيت انشره ....
شروط دخول مكتبه السفاره الامريكيه♥♥

ازاي تستفيد/ي من مكتبة السفارة الأمريكية ف مصر؟
1- لو بتتعلم انجليزي وحابب تطبق عملي :
كل يوم أربع السفارة بتعمل محادثات مع ناس أمريكيين عن مواضيع مختلفة وأي حد يقدر يحضرها ببلاش بس بشرطين هنقولهم ف الآخر.
2- ف الأيام العادية تقدر تروح وتعمل محادثة برضو مع ناس مصريين بس هتلاقي فيهم ناس جامدين جدا.
3- زهقت من الكنبة والبلكونة والسرير ولعب البلايستيشن وحابب تتفرج ع افلام اجنبي بترجمة انجليزي وسماعات عالية آخر حاجة وتليفزيون الفرق بينه وبين السينما ملم 3:) (اللي هو مللي ) ، هتروح تلاقي الناس هناك عندها افلام اجنبي طازة وشاشات عالية تنين وسماعات وكدزة، وللأسف كمان ببلاش:D .
4- عمرك ما لعبت ع الاكس بوكس وطول عمرك تسمع عنه بس زي حالاتي، هتلاقيه هناك 3:) وببلاش برضو.
5- عندك بحث وعايز نت سريع ما يفقعكش، الناس هناك جايبين وصلة نت سريعة تنين ( تقريباً شادين سلك من أمريكا) وشوية أجهزة apple على قدهم كدة، وعلى فكرة... ببلاش برضو 3:) .
6- بما أن الناس هنا في تعداد المثقفين وممكن كتير يكون بيدور على كتب أدب انجليزي أو تاريخ أو اجتماع أو تنمية أو أي بتنجان، الليلة دي كلها هناك ببلاش، لا وايه،،، كل الكتب اصلية.
7- فاضي ومش وراك أي حاجة وعايز تلعب شوية انت واخوك أو انتي واختك ومش حابين الاكس بوكس، هتلاقي هناك طن العاب ذكاء وحروف متقاطعة وشوية العاب معرفتش حتى اسمها، وكله بالانجليزي.
8- عايز تسمع محادثات انجليزي بهاند فري وجهاز audiobook مليان محادثات مختلفة، هتلاقيه هناك.
9- طيب ليك ف جو الايفينتس والمحاضرات والاجتماعات والبتنجانات، هتلاقيه هناك، محاضرات عن مختلف المواضيع من تعليم ف الخارج ومنح وووووو.
10- ليك فى جو تجميع الـ buzzles هناك بيكون كل يوم فى buzzle واللى بيجمعها بياخد تيشرت من المكتبه ;)
11- اوقات كتير بتلاقى ترابيزات محطوط عليها مجلات علمية ومكتوب على الترابيزة فيما معناه خد واحدة واتكل على الله B| :D
خد التقيلة :
تقدر تستعير كتاب التحضير للتوفل TOEFL
اللي هو مش عارف بكام ميت جنيه ومعاه الاسطوانة بتاعته كمان ;)
بس بيشترطوا فى البند دا انك تكون من القاهره والجيزة او حلوان
أسئلة شائعة بعد البوست ده :/
>> هي المواعيد بتاعتها امتة؟
كل يوم من الأحد للخميس من 10 ص : 4 م
>> هو في شروط عشان أدخل؟؟!!
اه
- اول حاجة يكون معاك البطاقة الشخصية مش مكسورة أو منتهية أو يكون معاك باسبور.
- ميكونش معاك أي شيء اليكتروني غير الفون اللي هتسيبه هو والهاند فري ع البوابة برة قبل ما تدخل، غير كدة بقى سواء فلاشة، شاحن، لاب، اي بود، أي بتنجان بينور حتى لو قصافة ظوافر مش هتدخل بيها.
>> طب لو نسيت وجبت معايا فلاشة أو أي حاجة من الممنوع ده ؟!
أولا لو قلبت شامبانزي إفريقي خليك متأكد ان الأمن مش هيدخلك، بس هتلاقي قدام السفارة بتديله الحاجة وهياخد فلوس لحد ما تخرج، وخلي بالك الفلاشة ب 5 جنيه عشان هيقولك عشرة، قوله انا داخل المكتبة ;) 3:) .
>> ايه هي شروط المحادثة اللي انت قلت عليها فوق؟!
- شرطين، أولهم انك تكون عامل كارنيه عضوية في المكتبة بتاعة السفارة،،، ازاي،؟؟؟ عادي بتروح أي يوم قبل الساعة 12 وتقول للريسيبشن عايز اعمل كارنيه، هيقوم رازعك صورة زي بتوع البطاقة وتستلم الكارنيه ف نفس اليوم.
تاني شرط انك تكون حاجز المحادثة عن طريق الميل، ودي سهلة، انت اول ما تدخل قول للريسيبشن عايز اعرف شروط المحادثة هيديك ورقة فيها كل حاجة.
>> ينفع استعير كتب أو أسطوانات افلام أو كتاب صوتى؟!
اينعم
بس لمدة أسبوع، وممكن تجدد أسبوع كمان عن طريق الميل أو رقم الأرضي بتاع المكتبة، هتلاقيه ف ورقة الارشادات هناك.
طب لو نفضت بعد المدة؟! ;) 3:) اليوم الزيادة ب خمسة جنيه تقريباً :/ ,, والساعة بخمسة جنيه والحسابة بتحسب :/
>> يعني اول ما اروح اعمل ايه بقى؟!
بص يا صديقي هتسال ع البوابة عايز أدخل المكتبة اللي
تمام ( IRC ( information resources center
وتعتبر انك داخل سفارة الحاج أو الحاجة ;) 3:) عجبك فلم ناس مشغلاه وفي مكان جنبهم، شدلك كرسي وسماعة من ع الترابيزة واتفرج، عايز تلعب أدخل العب، عايز كمبيوتر، الجهاز الفاضي اشتغل عليه ;) 3:)
انطلق يعني :/
استنى استنى انت عرفت العنوان فين؟
أمانة حملتهالك : انك تنفع عشرة أو أكثر بالكلام ده سواء بالمنشن أو أنك تاخدهم معاك أو تحكيلهم أو أي طريقة، المهم #علم10
وده الجدول بتاع الشهر ده ^_^
الحاجات المفتوحة للناس كلها هى اللى مكتوب فيها open to Public والشهر دا كتيرة ^_^
فى حاجات معينة للى معاه كارنية فى المكتبة بتاعة السفارة وفى حاجات بالتسجيل
بس هما ماشيين بمبدأ اللى يجى الأول هو اللى بيلاقى مكان يعنى لو العدد كمل تقريبا مبيدخلوش حد تانى الورشة اللى بتبقى شغاله دى
وخليك في الامان واعمل الكارنيه "كل اللى محتاجه صورة البطاقه تاخدها معاك وانت رايح مش اكتر والكارنيه بيكون لمدة سنتين وببلاش بردو :D

..
كل الحاجات الضايعة ليه اتعلقنا بيها💙