22/07/2021
💥اهم العناصر للحفاظ علي الشعر اثناء فترة الدايت💥
1- البروتين
2- الحديد
3- فيتامين سي
4- الزنك
5- اوميجا 3
العناصر دي موجوده في اللحوم الحمراء والكبده البقري 💫 وفي الأسماك زي السالمون والماكريل والسردين 💫 وفي البيض والفراخ 💫 وفي المكسرات زي اللوز وعين الجمل 💫 وفي الفواكه زي الجوافه والفراوله والبرتقال والكيوي والافوكادو 💫 وفي الخضروات زي البروكلي والفلفل الالوان والرومي 💫
وفي الحبوب زي بذور الشيا و حبوب بذر الكتان 💫
الخلاصة 👌: ناس كتير بتلجأ للدايت السريع لإنقاص الوزن في اقل وقت ممكن وده من أكبر أسباب حدوث نقص العناصر دي ( خس براحتك و بطريقة صحيه احسن ليك وصحتك عموما ) 👉
دمتم بصحه وعافيه ❤️
19/03/2021
👌ازاي اقلل احساس الجوع أثناء فترات الدايت 👌
بلاش نقلل اكلنا مره واحده يعني لو كنت باكل 6000 سعر في اليوم ماينفعش اقللهم ل 1000 سعر بس (خير الامور الوسط) 🤔
ناكل كميات بروتين كويسه لأنها بتدي احساس بالشبع بالاضافه أنها بتستهلك سعرات اعلي خلال عملية الهضم👍
ناكل ألياف طبعا و دي موجودة في الخضار والفاكهه🍓🥒 وعلي فكره حجمها بيزيد مع المياه وبتاخد حيز اكبر في المعده وبالتالي احساس بالامتلاء والشبع 😉
نحاول ناكل بالراحه عشان نحسن عملية الهضم طبعا وبردوا ندي فرصة لمنبهات الشبع تلحق تشتغل ⏱️
شرب المياه بكميات كافيه بيدي احساس بالشبع طبعا والإمتلاء 🥛
. لو الوجبه عبارة عن ٥ معالق ارز ليه بنحطهم في طبق كبير ، نحطهم في طبق علي قدهم احسن
ده سبب نفسي بيحسسك بالاقتناع بكميات اكلك القليله أثناء الدايت 🍽️
❤️دمتم بصحه وعافيه ❤️
11/01/2021
الامساك 🙆♂️
من اشهر المشاكل المصاحبه للدايت نتيجة تغير الكميات وأنواع الاكل 👌
امتي اقول عندي إمساك ...؟ 🤔
- لو بدخل الحمام أقل من 3 مرات أسبوعياً 🤗
إزاي اتغلب علي المشكلة دي أثناء الدايت ؟ 🙄
• لازم نحافظ علي أكل الألياف الموجوده في الخضار والفاكهه 🍎🥒
• الشوفان كمان فيه ألياف بنسب عاليه 🙋♂️
• شرب المياه بكميات كافيه بيقلل من فرص حدوث الإمساك 🥤
• الزبادي ومايحتويه من بكتيريا مفيدة لحركة الأمعاء 🤗
دمتم بصحه وعافيه ♥️
17/09/2020
الناس اللي بتخس كويس بس عطلت شوية في نص الطريق ...... ( الصبر ) * 🙋🏻♂️
طبيعة جسمنا بتقول أن كل ماتخس اكثر كل مامعدل نزول الدهون بيقل 😇
عشان كده عدد السعرات اللي كنت ماشي عليها في الاول وبتخس عادي مابقتش تنفع دالوقتي ولازم تتغير أو تتظبط علي مقاساتك و وزنك الجديد 👬
الخلايا الدهنية طبيعتها متغيرة لأن فيه منها اللي بيتحرق بسرعه ومنها اللي بياخد وقت أطول علي حسب مستقبلات الخلايا دي 🤗
يفضل طبعا تلعب رياضة خاصة تمارين المقاومه 🏋️
- الخلاصة : 🧐
الناس اللي ماشية علي نظام غذائي ومعدل نزولها قل عن الاول ده شئ طبيعي 🤗
والناس اللي النزول عندها وقف خالص لازم تظبط كميات أكلها علي المقاسات والوزن الجديد 👌
بس اهم حاجه ماتكسلش وتضيع تعبك اللي قبل كده 💪
يعني ايه يا كوتش ؟؟ 🤔
( الصبر ثم الصبر ثم الصبر ) 🙋🏻♂️♥️
30/08/2020
كل ما أعرق اكتر دليل اني بخس اكتر 🤔
لا طبعا 😇
العرق ده هو جهاز التكييف اللي ربنا وضعه في جسم الانسان 👌
يعني اول ماجسمك ترتفع درجة حرارته هتلاقي الغدد العرقية ابتدت تفرز العرق علي سطح الجلد عشان تنزل من درجة حرارة جسمك 🤗
طيب ليه ياكوتش لما بدخل ساونا بلاقي فيه نزول في الوزن تقريبا من نص كيلو الي كيلو ؟؟ 🙋🏽♂️
عشان حضرتك فقدت مياه من جسمك في الساونا وبمجرد ماتشرب مياه هيرجع الوزن اللي انت فقدته تاني ✔️
يعني بلاش بدل التخسيس والأكياس والملابس التقيلة اللي بنلبسها واحنا رايحين نعمل رياضة مش هتفيدك بحاجه 🤗
هتضايقك وتقلل من حرية الحركه عندك ع الفاضي 🤦🏽♂️
دمتم بصحه وعافيه 💙
25/08/2020
انواع أدوية التخسيس وأضرارها : 🤗
1- أدوية تعمل علي هرمونات الجسم
يعني ترفع من معدل إفراز هرمونات الحرق عن المعدل الطبيعي في جسمك وبالتالي خلل في الغدد لعدم التحكم في الكميات المناسبه والطبيعيه يعني معدل إفراز الهرمون هيقل نتيجة الخلل ده وبالتالي زيادة في الوزن علي المدي الطويل واستحالة خسارة الوزن ده الا بعد علاج للغده 🙆🏻♀️
2- أدوية تعمل علي تقليل امتصاص الدهون في الوجبات
يعني حضرتك تضرب البرشامه قبل الاكل 😅 وبعد عملية الهضم تلاقي الدهون نازله مع البراز وبكده تكون منعت امتصاص الدهون ودي خطورتها أنها منعت جسم حضرتك من الاستفاده من فيتامين أ ، ي ، د ، ك ... لان الفيتامينات دي بتحتاج الدهون كمساعد للذوبانيه والامتصاص 👌
3- أدوية تعمل علي رفع معدلات ضربات القلب
لما حضرتك بتعمل مجهود زياده شوية سواء ثابت أو متغير معدل ضربات قلبك بيزيد وبالتالي استخدام اكبر للاكسجين وبكده معدل الحرق في الوقت ده هيزيد .
طيب مالدنيا جميلة اهي وممكن العب اي رياضة🏋️ حتي لو مشي 🚶 وارفع ضربات قلبي طبيعي بدل مارفعها بحاجه تضرني
طيب هتضرني ازاي ؟؟ 🤔
لما حضرتك هتعمل رياضة وتلاقي نفسك تعبت وقلبك مش مستحمل هتوقف تمرين . طيب لو خدت حباية ورفعت ضربات قلبك زياده وانت مش مستحمل هتوقفها ازاااااي 🤐
( ربنا يسترها علينا وعليكوا ) ♥️
4- أدوية تعمل علي الوصلات العصبية بين المخ والمعدة
انا خليتها للاخر عشان دي بقي اخطرهم 🤦🏻♀️
لأنها بتأثر علي جميع الخلايا العصبية في الجسم مش الخلايا الواصلة بين المخ والمعدة بس وتؤدي الي حالات اكتئاب شديد وصداع مستمر وتعرق والعامل الاساسي اللي بتشتغل عليه هو ارسال إشارات عصبية من المعده الي المخ بشعور الشبع وعدم الرغبة في الأكل 😇
طيب لما حضرتك تبطل الدوا ده هيحصل خلل في الخلايا العصبية دي وهتبتدي تبعت إشارات جوع مستمر وهتنسي خالص شعور الشبع اللي انت أجبرتها علي إرساله طول فترة استخدام الحبوب
البوست طويل شوية بس حاولت اوضحلكم اضرار أدوية التخسيس وأنها بقت تجارة عالمية مربحه جدا نتيجه لجهلنا باضرارها 👌
الخلاصة : ليه أضر نفسي والموضوع كله في أيدي انا .
حاولوا تاكلوا احتياجاتكوا فقط وياريت الاختيارات تبقي صحية 🤗
العمر عند ربنا واحد ولكل اجل كتاب بس الاختيار في أيدي اني اعيش عمري اللي ربنا كاتبهولي بصحه كويسة أو اني أعيشه بأمراض مزمنة واقامه شبه دائمة عند الدكاترة والمستشفيات 🙋
دمتم بصحه وعافيه ♥️
30/06/2020
الدهون 🔥
فيه منها المفيد ولازم تكون في نظامنا الغذائي زي الأسماك والمكسرات والافوكادو وحبوب الشيا وحبوب بذر الكتان و زيت الزيتون والكاكاو الغامق والبيض 👌
وطبعا دي مهمة جدا في الآتي :
• تصنيع بعض الهرمونات زي التستستيرون والبروجيستيرون والاستروجين .
• امتصاص بعض الفيتامينات واهمها فيتامين (د) اللي ناس كتير بتعاني من نقص فيه ( ياريت الجماعه اللي بياخدوا اقراص اورلي للتخسيس يركزوا شوية في النقطة دي وهنبقي نتكلم عن أدوية التخسيس في موضوع منفصل إن شاء الله)
• سرعة التئام الجروح وصحة الجلد وتغليف الخلايا العصبية بالتالي انتقال الإشارات العصبية بيكون أسرع وأحسن🙋
• تحافظ علي أماكن الاعضاء في الجسم
تمام ياكوتش عرفنا انها مفيده ... ناخد منها قد ايه بقي
بص ياسيدي هنخلي نسبة من ٢٠ :٣٠% من سعراتنا اليوميه دهون صحية
كده خلصنا الدهون الصحية المفيدة للجسم 🤗
نتكلم بقي عن الدهون المضرة ( الدهون المتحولة) :🙄
زي اللي موجوده في البسكويت والشيبسي ومبيضات القهوة والنسكافيه والزيوت النباتيه عموما
الدهون المتحولة هي المصدر الرئيسي لأمراض تصلب الشرايين وأمراض القلب 😔
طيب مادام هي مضرة المصانع بتستخدمها ليه ؟🤔
اقولك ياسيدي 🤗
لانها بتزود عمر المنتجات وتاريخ صلاحيتها
الخلاصة: الدهون الصحية مفيده جدا وماينفعش نمنعها 👌
دمتم بوافر الصحه والعافية ♥️
24/05/2020
واحدة واحدة كده يا جماعه . البسكوت بالواحدة مش بالكرتونه ،😂😂😂
17/05/2020
الماركتنج في ابهي صوره
القطه شربت البيبسي الدايت خست وقدرت تدخل من المكان اللي يا دوبك الفار بيقدر يدخل منه ،😂😂😂
عااااش والله
21/01/2021
30/08/2020
25/08/2020
24/05/2020
17/05/2020