رأي زملكاوي

مشكلة ممدوح عباس انه فاكر نفسه عشان بيدفع يبقي هو المتحكم ومن حقه ينفذ اى قرار هو عايزه، ممدوح عباس من يومين بيتكلم علي الارض والاستاد وحل القضايا امبارح اختلف من المجلس وجون إدوارد فنزل تويتة قال فيها انه هيبعد عن النادي الفترة دى، ممدوح عباس عاوز معتمد يكمل وجون إدوارد عاوز مدير فني اجنبي، فكلام جون اللي هيمشي والزمالك هيجيب مدرب اجنبي فممدوح عباس زعل، وانا هنا مقدرش اغلط عباس لازم نغلط مجلس الإدارة اللي دخل خرب النادي ومبقاش عنده اى موارد يصرف منها غير جيب ممدوح عباس، عموما اتمني الاستاذ ممدوح يبتعد عن النادي لانه مهما صرف الناس الموجودة فشلة ومش هيبطلوا يطلبوا، سيبوا جون يشتغل وهات فلوس من جيوبكم انتوا

من يومين كان بيتكلم عن ستاد الزمالك الجديد وطالع يطمن الناس عن حل الازمات والمشاركة الإفريقية، من شوية نزل تويتة بيقول فيها خلاص دى استراحة محارب وهيبعد شوية، الاستاذ ممدوح كل لما المجلس مينفذش اى طلب له يتقمص ويطلع علي تويتر يقول انه هيبعد، هل الخلاف مع المدير الرياضي علي كابتن معتمد هو السبب، هل الاستاذ ممدوح شايف ان معتمد يكمل وجون إدوارد رافض وعاوز مدير فني اجنبي هو السبب؟ الاجابة ايوا، انت بقي شايف كابتن معتمد يكمل ولا الافضل مدرب اجنبي؟

احمد حمدي

عندك ايقاف قيد وبنسبة كبيرة مش هيتشال يبقي لازم تحافظ علي كل اللاعبين، احمد حمدي خامة كويسة وظهر في بدايته بشكل كويس معانا لغاية اصابته بالصليبي، عقد خلص وتقدر تجدد له لانه مستني حد يكلمه ومأجل مناقشة اى عرض انتظارا للزمالك، حصل اختلاف؟ طبيعي، عاوز يجدد برقم كبير يتقال له دى امكانيات النادي، لو في امكانية نحافظ عليه ياريت نحافظ، الزمالك محتاج بشدة تدعيم وسط الملعب واحمد يستاهل انك تقعد معاه تاني وتحاول تجدد له

مش قادر متكلمش والله، عيب يا كابتن حسام لما تعاتب المهدي سليمان انه اتكلم عن نادي الزمالك وقال انه سبب وجوده في المونديال، انت نفسك يا حسام الاهلي طردك والزمالك هو اللي اعادك للساحة تاني، تاريخ محدش يقدر ينكره لا مع الاهلي ولا منتخب مصر، لكن لولا الزمالك كنت هتختفي من ٢٠٠١ ومكنتش هتعمل التاريخ ده ولا تحقق كل البطولات من غير الزمالك، وانت اللي استفدت من وجودك في الزمالك مش العكس، انت دخلت علي فريق مدجج بالنجوم، حتي تاريخي التدريبي محدش بيذكر اى نجاح ليك غير فترتك مع الزمالك اللي نافست فيها علي دورى ٢٠١١، اخدت دعم وحب جماهير الزمالك والحقيقة انت لا تستحق كل ده.

من المنطقي ان الزمالك يحافظ علي القوام الموجود، في قوام اساسي مينفعش يكون رحيل اى لاعب منه محل نقاش من ادارة النادي مهما كان المبلغ المعروض، احنا داخلين علي بطولة افريقيا هدفنا نكسب البطولة، مينفعش تقول عاوز اكسب البطولة وتروح تبيع حسام عبد المجيد او عدي او بيزيرا، في ناس ممكن تسمح لهم بالرحيل لتوفير رواتبهم زي احمد حسام وسيف جعفر وعمرو ناصر، لو كملوا مش هيشاركوا حتي لو في نقص عددي

حسام حسن خلال محاضرته الأخيرة مع اللاعبين اكد علي رغبته في وصول مصر الي نهائي كأس العالم، واكد علي كلامه محمد صلاح بان مصر ليست متواجدة للتمثيل المشرف فقط

مفيش شغف غير للزمالك، لا ماتشات كأس عالم ولا غيره، لا شئ يعادل متعة مباريات الزمالك

الزمالك يتمم اتفاقه مع ٢ رعاة جدد ستظهر اعلاناتهما علي قميص الفريق بداية من الموسم المقبل

كابتن معتمد جمال عمل موسم كبير جدا مع الزمالك وقدر يكسب الدورى وصعد نهائي الكونفدرالية بس الزمالك خلاص بنسبة كبيرة مش هيقدر يعمل اى صفقات عشان إيقاف القيد، محتاجين مدير فني اجنبي يقدر يقود المجموعة الموجودة حاليا، المجموعة الموجودة فيها عناصر مميزة كتير ولاعبين قابلين للتطور بس محتاجين مدرب يقدر يشتغل معاهم بشكل فردي المدرب الاجنبي يجي بحهاز كامل ويكون فيهم حد متخصص في تطوير اللاعبين، عشان تقدر تستفيد بيوسف الفرنسي، ومحمد ابراهيم، والسيد اسامة، واحمد شريف، وشيكو بانزا، العناصر دى لو حد اشتغل معاهم بشكل فردي هيقدر يطروهم بشكل كبير والنادي يقدر يستفيد بيهم في منافسات الموسم الجاي، وجود كابتن معتمد مع كامل الاحترام له مش هيخلي الزمالك ينافس علي اى حاجة خاصة انه فقد اعصابه في مراحل الحسم وده بان في مواجهة الاهلي ومواجهتي اتحاد العاصمة.

اى مسئول في منصب حساس لو زملكاوي هتلاقيه بيحاول يجي علي الزمالك عشان يبان انه محايد، الواحد بيرتاح لما يبقي المسئول محايد، بيحاول يشتغل من غير ضغوط ومش محتاج يثبت حاجة، اشرف صبحي لما كان وزير الرياضة خاف يدي الزمالك حقه في الارض عشان محدش يقول عليه الحق ده خدم الزمالك عشان زملكاوي، شكرا للوزير المحترم جوهر نبيل علي جهوده في اعطاء الزمالك حقه في الأرض البديلة باكتوبر