Yomna Salim - يمنى سالم

المعنى في الحياة له بُعدٌ روحي، لأن البُعد الروحي يفترض وجود قوةٍ أكبر من الإنسان.

فالإنسان بطبيعته ضعيف، محدود، وقليل الحيلة، فيلجأ إلى ما هو أقدر وأبقى منه.

هذا البُعد يحل إشكاليات المعنى، خصوصًا التقدير والاستمرارية؛ فالمعاني المرتبطة بالبشر وحدهم غالبًا ما تفتقر إلى الدوام، وقد تفقد قيمتها مع الزوال أو العجز أو تغيّر الأدوار.

لكن لا وجود لبُعدٍ روحي بلا معنى، فذلك فراغ. نحن على هذه الأرض لرسالة وهدف، لا لمجرد العيش.
وربط المعنى بالبُعد الروحي يمنح الإنسان بصيرة تمتد إلى المدى البعيد، لا تقتصر على الاستمتاع باللحظة، بل تؤسس لحياة واعية ذات اتجاه.

يمنى سالم

وظيفة الشيطان هي انه يحزنك
فلما تبقى حزين انتاجيتك هتقل
هتنعزل عن الناس
لحد لما توصل للتشكيك وعدم الرضا بقضاء الله وقدره
فمتستسلمش 🤍

يمنى سالم

الحمد لله🙂

الحمد لله على نعمة التخطي
الحمد لله على نعمة التأقلم على أحداث جديدة غيرناها بايدينا او اتحطينا فيها

الحمد لله على نعمة الصبر و الرضا وادراك ان كل حاجة بتحصل وراها سبب و حكمة..

الحمد لله على نعمة النضج اللي بيخلينا نشوف الحياة بصورة اوضح واعمق

الحمد لله على نعمة التغيير اللي رغم صعوبته بس بيخلينا نكتشف فينا جوانب جديدة مكناش نعرفها عن نفسنا

الحمد لله على القوة و الصلابة الداخلية اللي مخلينا مكملين وبنجاهد كل يوم رغم التحديات الكبيرة اللي بنقابلها

الحمد لله على نعمة اليقين و التوكل على الله اللي بتحسسنا بالأمان وانك مش لوحدك وان معاك رب عظيم .

الحمد لله على نعمة التعلم اللي بتخلينا انضج وأوعى بعد كل تجربة بنمر بيها ومش بنفضل ضحايا ولا أسرى ليها.

الحمد لله على نعمة البدايات الجديدة اللي بتدينا فرص نصلح من أخطائنا و نتعلم تاني .

الحمد لله دائمًا وأبدًا🤍

يمنى سالم

وظيفة الإنسان الأبدية هي (التوبة) .

وظيفتنا الحقيقية مش إننا نكون معصومين من الخطأ إنما نكون مستعدين دايما اننا نرجع.

الغلط جزء من الطبيعة البشرية لكن الرحمة والمغفرة جزء من رحمة ربنا اللي أوسع من أي ذنب .

“ليه ساعات بتكون أوقات الراحة أو السكون مخيفة ومتعبة أكتر من الحركة والإنتاجية؟”

دايمًا كنت بلاحظ نفسي في لحظات الهدوء، الأوقات اللي مفروض أستمتع فيها بالسكون، أو حتى أقعد من غير ما أفكر في المستقبل أو أحمل عقلي بأي أفكار… كنت بلاقي نفسي بدل ما أحس بالراحة، بيجيني جلد ذات، وصوت جوايا يقول: “إنتِ مقصرة… إنتِ مش بتعملي حاجة مفيدة… عمرك ما هتوصلي لحاجة بالطريقة دي!”

فضلت أسأل نفسي: ليه بنحس كده؟ ليه الراحة اللي مفروض تكون طبيعية وسهلة، بتتحول لشعور بالذنب والتقصير؟

ولما دورت على الإجابة، لقيت إن السكون والراحة بيخلونا نحس بعدم الأمان…

مش لأن فيه حاجة غلط، لكن لأن عقلنا متعود يكون دايمًا مشغول، دايمًا في حالة حركة. أول ما نرتاح أو ما يكونش عندنا حاجة نعملها، يطلع صوت جوايا يقول: ليه واقف؟ مش المفروض تعمل حاجة؟ مش المفروض تكون أكثر إنتاجية؟

يمكن ده اللي بيخليني لما أخد راحة، مش بحس إنها راحة، بحس إنها تقصير. كأن الإنجاز هو اللي بيثبت قيمتي، وكأن الهدوء معناه إني مش كفاية.

بس الحقيقة إن السكون مش عدو، السكون هو المساحة اللي ممكن نسمع فيها نفسنا بوضوح، المساحة اللي فيها بنتعلم إننا نكون موجودين حتى لو مش بنعمل حاجة. يمكن المشكلة مش في السكون، المشكلة في الأحكام اللي بنحطها على نفسنا لما نسكت.

متجلدش نفسك، لأنك مش آلة. أنت إنسان، لك أثر وأنت موجود في هذه الحياة لأسباب أكبر من مجرد الإنجاز. إذا كانت قيمتك مرتبطة فقط بإنتاجيتك، فاعلم أن الأشخاص الذين لا يرونك إلا في ضوء ذلك ليسوا جديرين بالبقاء في حياتك.

يمنى سالم

نضارة جديدة … رؤية مختلفة … بداية أحلى ✨

يلا بينا نجرب نضارة النهاردة و نشوف الحياة من زاوية تانية ❤

تخيل إنك في يوم من الأيام لبست نظارة جديدة تمامًا 🤓، نظارة مختلفة عن أي نظارة جربتها قبل كده. يمكن ملامح الأشخاص اللي تعرفهم هتظهر لك بشكل جديد 👀، حتى الألوان هتكون مختلفة! لكن هل فكرت في يوم أن هذه النظارة مش بس نظارة مادية، بل هي نظارة فكرية وحياتية؟ 🌱

النهاردة هنبدل نضارة العقبات بنضارة الفرص ✨ … وتعالوا نشوف هنحس باختلاف ولا لا؟

كلنا بنمر بمواقف في حياتنا، وفي كل موقف فيه فرص مكنتش شايفها بسبب النظارة القديمة اللي بنلبسها: نظارة التفكير السلبي أو نظارة الأحكام المسبقة 💭. هل فكرت قبل كده إنك ممكن تشوف نفس المواقف بشكل مختلف لو لبست “نظارة الفرص”؟ 👓

مثال واقعي: يمكن أنت في موقف تتعامل فيه مع شخص جديد 🤝، لكن بترتدي نظارة “العقبات”، ممكن تكون مش شايف الفرصة لبناء علاقة أو شراكة مع هذا الشخص. لكن لو لبست “نظارة الفرص”، هتشوف إن هذه لحظة قد تكون بداية لشيء جديد، قد يكون له تأثير إيجابي في حياتك 🌟.

الفرق بين النظارتين مش بس في الشكل، الفرق الحقيقي في الطريقة اللي بنشوف بيها العالم. النظارة دي مش بس بتخليك تشوف الحياة بشكل جديد، لكنها بتخليك تلاقي فرص مكنتش شايفها قبل كده.

أنت في الحقيقة محتاج تبص للحياة من زاوية مختلفة 🔄، يعني لو اتعودت تبص بعين “نظارة الفرص”، هتشوف إن كل تحدي هو فرصة جديدة. لو حطيت دي في دماغك، هتلاقي إنك دايمًا متحمس للمستقبل ومتحمس للمواجهة.

وصدقني، الحياة هتكون أكثر أملًا لما تلبس نضارة الفرص دي، وتتعلم إزاي تستغل كل لحظة، كل خطوة وكل علاقة 🕒.

وأهم حاجة هنا، التغيير بيبدأ في لحظة معينة ⏳، لحظة بتقرر فيها إنك عايز تشوف الحياة بطريقة مختلفة. التغيير مش هيجي من الخارج، لكن هيجي من جواك أنت 💡. لما تختار تتغير، هتشوف الدنيا بنظرة جديدة تمامًا.

يمنى سالم

أهم هدفين عندك في الحياة ✔️

انت محتاج تركز على نفسك
تركز ف افكارك
تركز ف انفعالاتك
تركز في اخطائك
تركز عشان ترجع نفسك لطبيعتها بعد كل اللي بتمر بيه

ده اللي المفروض تعمله

مش انك تركز ع اخطاء غيرك وتطلق في احكام وتحط الناس في قوالب ومسميات…

كل ده مش هيساعدك ف حاجة ولا هيرجع لنفسك طبيعتها بالعكس هتشغلها بكلام فاضي و هيخليك دايما مش شايف عيوبك وبالتالي عمرك ما هتقدر تكون احسن.

انشغل بنفسك خليك انسان احسن و متحكمش ع حد
واشغل نفسك بما يفيد

لطالما آمنتُ أن أفضل انشغال ينشغل به الإنسان هو العمل على نفسه، وذلك من سِمَات الرُقيّ، فلا يعنيه تتبُّع الآخرين، وما قالوا، وما فعلوا، فهو مُنهمك في عوالمه الخاصّة، مُحَلِّق في آفاقِه التي تعنيه، مُدرِك أن الانشغال بحياة الغير استنزاف، وفراغ، وانعدام للجدوى .

يمنى سالم

أي قرار بناخده دايما بيكون معاه مكسب وخسارة .

ده قانون من قوانين الحياة عشان تاخد حاجة لازم تخسر ادامها حاجة وكل حاجة بتقولها (اه) بيكون قصدها حاجة هتقولها (لا).

حتى الجنة اسمها سلعة
" ألا إن سلعة الله غالية، ألا إن سلعة الله الجنة"
سلعة معناها انك لازم تدفع حاجة عشان تاخدها
يعني لو عايز الجنة هتبعد عن حاجات كتير بتحب تعملها عشان ده المكسب اللي انت عايزه.

ف لو عايز تنجح ف شغلك هيبقى قصاده حاجة هتستغنى عنها
زي مثلا انك مش هتستمتع بعيلتك ومش هتقضي معاهم وقت كفاية.

ف اي قرار بتاخده خليك متأكد ان المكسب هيعوضك الخسارة .

📍ليه مهم تعرف الكلام ده؟

عشان مافيش حد بيقدر يعمل كل حاجة ف متحملش نفسك فوق طاقتها وتقول اني هكون perfect ف كل حاجة
لما بتحاول توصل للمثالية ف كل حاجة ده بيخليك مضغوط كل الوقت وبيخليك ف الاخر مش قادر تدي ف اي حاجة خالص…

خليك متصالح مع فكرة المكسب والخسارة اهم حاااجة انك :

تحسبها صح

يمنى سالم

حاسس انك تايه؟ جواك مشاعر كتير مش فاهمها؟ لو انت بتمر بالحاجات دي شوف الفيديو ده

لقد خلقنا الانسان في كبد
يعني في (مشقة وتعب )
هو ده حال الدنيا حقيقة و لازم نتقبلها
طيب و هو احنا هنستعين ب ايه عشان نقدر نقاوم التعب والمشقة دي؟
هو ربنا مش هيسيبك كدة من غير ما يديك الحل
فقال( واستعينوا بالصبر والصلاة)
فالصبر والصلاة اهم مفتاحين يعينوك ع اي تعب ف حياتك

أرحنا بها يا بلال ❤️
فالصلاة رحمة مهداه من رب العالمين لتهدأ النفس وتسكن وتستريح ❤️

يمنى سالم