31/05/2021
شوية نصايح هتفرق معاك كتير للمبتدئين وغير المبتدئين بس المبتدأ يركز اكتر 💖
الشباب الجديد في عالم كمال الأجسام بيبقى محتار وتايه وعايز يفهم صح .. خد منى بقى الكلام دة وركز شوية
(1) اسمها لعبة بناء الاجسام يعنى محدش بياكلها بالساهل ومحدش بيعمل عضلات ببلاش .. إتعب وابني علشان تلاقي
(2) البروتين عنصر اساسي فى يومك تاخد من ١.٦ لـ ٢ جرام بروتين بس لكل كيلو من وزنك .. مش لازم تصرف كتير ولا تاكل كل يوم فرختين
(3) شوف صاحب ينزل معاك التمرين تشجعوا بعض .. ما تتمرنش لوحدك علشان هتكسل بعد يومين 💪😴
(4) الأداء والتكنيك السليم أهم من الوزن التقيل .. بلاش غشومية وبلاش تستعجل
(5) تمرين الرجلين مهم بالظبط زي تمرين باقي جسمك .. بلاش تطنشها علشان هتتبهدل تريقة
(6) التغذية والدايت جزء مهم سواء بتضخم أو بتخسس .. يمكن أكتر من التمرين نفسه بس بنظام عشان متفقدش العضلة
(7) إشرب ماية كتير طول الوقت وخلي الإزازة في إيدك .. من غير الماية هيجيلك إصابات كتير ولو بتاخد مكمل بتمنع تريب الزيادات منة على الكلي والكبد
(8) أيام الراحة مهمة علشان جسمك يحصله إستشفاء وعضلاتك تزيد .. بلاش الحماس ياخدك وتتمرن طول الإسبوع مش 💪💪 مولد سيدى العريان هو 😄
(9) غير نظام تمرينك كل فترة علشان ما تحسش بالملل عشان العضلة تزيد ومتحفظ تمرينة واحدة وتقف عندها
(10) إعمل لنفسك جدول تدريب إسبوعي مكتوب .. ماتنزلش الجيم تلعب اللي نفسك فيه مش حادى يبادى 😄
(11) ماتبدأش تمرين الحديد من غير ماتسخن .. مش ناقصين إصابات الله يكرمك 👌👌
(12) إستخدم الأوزان الحرة أكتر من الأجهزة عشان بتبنى اسرع .. الأجهزة هتساعدك لكن مش هي الأساس
(13) إصبر على النتايج وماتستعجلش علشان ماتحبطش .. مش هتبقى بيج رامي ولا فيل هيث في شهرين
(14) المكملات الغذائية مش هي الأساس .. إسمها مكملات يعني مجرد وسيلة مساعدة بنلجألها وقت الحاجة يعنى ليها وقتها
(15) دخل نظام الدروبسيت والسوبرسيت في تمرينك .. أساليب ممتعة في التمرين وهتحس بالفرق فى العضلة الصافية
(16) كُل دهون صحية علشان تحرق دهون .. صفار البيض والمكسرات وزيت الزتون
(17) مرن العضلات الضعيفة في بداية تمرينك .. ما تركنهاش لآخر التمرين علشان تديها حقها وانت عندك طاقة
(18) إعمل تمارين الإطالة قبل وبعد تمارين الحديد
(19) راقب جسمك وصور نفسك كل فترة .. النتايج اللي هتشوفها هي اللي هتخليك تكمل وتشجعك اكتر لما تشوف الفرق وبقول كل فترة مش كل ساعة زى ناس 😄
(20) الحاجات اللي نفعت مع صاحبك مش بالضرورة تنفع معاك .. إفهم جسمك علشان تعرف هو عايز إيه كل طبيعة جسم مختلفة عن التانى
(21) نام كويس مش أقل من ٧ ساعات .. إدخل سريرك وسيب الموبايل وإنت هتنام على طول 😴
(22) إلعب كارديو (جري - مشي - عجلة) .. الكارديو هيفرق معاك في تمرينك ويزودك عضلات👌💪
(23) كُل وجبة كبيرة كاربوهيدرات قبل التمرين بساعتين عشان تمدك بالطاقة .. بطاطساية مسلوقة بطاطا مكرونة رز
(24) ماتاخودش حبوب ولا حقن مجهولة لمجرد إن الكابتن قالك عليها .. كل اللي إتأذوا قبلك كانوا بسبب كابتن لانة هدفة الربح
(25) شيل أوزان تقيلة على قد ما تقدر بس ماتبقاش مبالغ في الاوزان وغشيم من عتالة هية .. الأوزان الخفيفة دي إديها لأخوك الصغير يلعب بيها 😄
(26) ما تسمعش كلام حد يقولك خد هرمونات
(27) إسأل كتير وإقرا كتير وإتعلم .. اللعبة بقت علم ودراسة مش بالفهلوة والنصاحة
(28) ما تشيلش وزن تقيل غير وإنت معاك زميل يأمنك .. أبطال قدك مرتين إتصابوا بسبب التهور والاستعجال على الاوزان
(29) إحسب سعراتك الحرارية وشوف جسمك محتاج قد إيه عشان يدبك نتائج اسرع وعالج النقص اللى محتاجة
(30) ماتصرفش فلوسك على المكملات عمال على بطال .. وفرهم وهات بيهم فراخ وبيض ومكرونة أفيدلك وافضل
(31) إطبخ أكلك من غير زيت وسمنة وسكر و ملح .. إقنع والدتك أو سيب البيت وعيش لوحدك 😄😄
🇰\ⒺⓈⓛⓐⓜ ⓛⓞⓜⓐ 👌🏻💪🏻💪🏻