Fundación Ciclista Euskadi

🤍 Asteburu bikoitza Lehendakari Txapelketan!

BBK-Euskadik etxeko errepideetan lehiatzen jarraituko du asteburu honetan, bi hitzordu berri eta zorrotzekin.

Larunbatean, Amurrioko 72. Circuito Aiala izango dugu aurretik: 134 kilometroko ibilbidea, Zaraobe eta Lezamako elizaren gaina behin eta berriz gaindituz, lasterketa pixkanaka hautatzeko.

Igandean, berriz, Aretxabaletak 87. Leintz Bailarako Itzulia hartuko du. 115 kilometroko jardunaldian, Gatzagako igoera izango da puntu erabakigarrienetako bat, helmugatik 17 kilometrora.

Bi egun, bi aukera eta borrokarako gogo bera. Egurre! 🤍

🤍 EGUN BIRIBILA AIEGIN!

Aimar Fernández de Gorostizak Casa Luisa III. Trofeoa – Aiegiko Udala irabazi du, 120 kilometroko jardunaldi gogorraren ondoren helmugara bakarrik iritsita.

Eraul eta Lezauneko igoerek eta Muruko hormak markatutako ibilbide zorrotzean, Aimarrek garaipen handia lortu du BBK-Euskadirentzat. Eta taldearen jardun bikaina biribiltzeko, Aimar Galdos 3. izan da, BBK-Euskadik bi txirrindulari izan dituelarik podiumean.

Garaipena eta podium bikoitza Nafarroan. Egurre! 🤍

💜 Bederatzi etapa. Lausanatik Nizara. Hirugarren Tourra jarraian.

LABORAL Kutxa-Euskadik beste behin munduko txirrindulari onenekin partekatu du errepidea, gure koloreak emakumezkoen txirrindularitzako agertokirik handienera eramanez.

Usoa Ostolazaren 4. postua Polignyn, Idoia Erasok jantzitako maillot berdea, ihesaldiak eta borrokarako grina izan dira Tour honek utzitako uneetako batzuk.

Baina emaitzetatik harago, bizitakoak geratzen dira. Tour de France Femmes-ek lehen aldiz Mont Ventoux igo zuen egun historikoaren parte izatea, bederatzi egunez munduko onenen artean lehiatzea eta urratsez urrats hazten jarraitzea.

Beste Tour bat amaitu da. Beste esperientzia handi bat gure bidean. 💜

🤍 Hitzordu berria Nafarroako errepideetan!

Bihar, BBK-Euskadik Casa Luisa III. Aiegiko Udala lehiatuko du, 120 kilometroko jardunaldi zorrotz batean.

Lasterketaren azken zatian iritsiko dira eguneko une erabakigarriak: Eraul eta Lezauneko igoerak, biak 2. mailakoak, eta Muruko horma gogorra, Casa Luisaren ondoan amaituko den azken kilometroen aurretik.

Beste aukera bat aurrean ibiltzeko eta gure koloreak protagonista izateko.

Egurre, taldea! 🤍

Aste bete-betea Euskadi Fundazioaren taldeentzat, munduko agertoki handienetatik etxeko errepideetara. 🚴‍♀️🚴‍♂️

🧡 Euskaltel-Euskadik izaera borrokalaria erakutsi du Burgosen, bost etapetatik lautan ihesaldian sartuta. Portugalen ere onenen artean jarraitzen dugu, Axel van der Tuuk erlojupekoan podiumera igo eta Jokin Murguialday eta Txomin Juaristi sailkapen nagusiko top-10ean direla. Etorkizunari begira, Gotzon Martínek eta Xabier Berasategik ere laranjaz jarraituko dute 2028ra arte.

💜 LABORAL Kutxa-Euskadik hirugarren Tourra jarraian osatu du bere arrastoa utziz: Usoa Ostolaza 4. Polignyn, Idoia Eraso protagonista ihesaldian eta maillot berdearekin, eta Debora Silvestri 29. sailkapen nagusian. Bederatzi egun munduko onenen artean, taldearen izaera erakutsiz.

🤍 BBK-Euskadik bi jardunaldi sendo osatu ditu Lehendakari Txapelketan: Aimar Galdos 6. Sopelan; eta Muxikan, Galdos 7., Aimar Fernández de Gorostiza 8. eta Joan Cardona 13.

Kilometro asko, protagonismoa eta etorkizuna eraikitzen jarraitzeko albiste onak. Egurre! 🧡💜🤍

🤍 Asteburu bikoitza etxeko errepideetan!

BBK-Euskadik Lehendakari Txapelketako bi hitzordu izango ditu asteburu honetan Bizkaian. Gaur, Sopela Udala Saria; bihar, San Roman Sari Nagusia Muxikan.

Bi egun, bi aukera, hazten, ikasten eta errepidean protagonista izaten jarraitzeko.

Egurre, taldea! 🤍

💜 Historiaren parte izan gara.

Tour de France Femmes-ek lehen aldiz igo du gaur Mont Ventoux, txirrindularitzaren mendirik mitikoenetako bat. Eta han izan da LABORAL Kutxa-Fundación Euskadi ere, munduko txirrindulari onenekin batera, egun berezi eta gogor batez gozatzen eta sufritzen.

Gure koloreak Ventouxeko gailurrera eraman ditugu, Debora Silvestri 23. postuan helmugaratuta.

Beste egun bat ahaztezina Tourrean. Beste pauso bat bidean. 💜

📸 Sprint Cycling Agency

Abuztuan ere, harrobia martxan! 🤍

Tourreko bosgarren etapa jokatuko da gaur, eta LABORAL Kutxa-Euskadik dagoeneko utzi du bere arrastoa lasterketan. Idoia Eraso lehen jardunaldiko ihesaldian izan zen protagonista, tarteko esprintean lehena igaro zen eta hurrengo egunean maillot berdea jantzi zuen. Polignyn, berriz, Usoa Ostolazak taldearen lehen emaitza handia sinatu zuen, hirugarren etapa laugarren postuan amaituta. 💜

Gaurtik aurrera, Tourraren zati erabakigarriena hasiko da. Mâcon eta Belleville-en-Beaujolais arteko 140 kilometroko jardunaldi gorabeheratsuak 2.850 metroko desnibela izango du, Mont Brouilly helmugatik hamar kilometrora kokatuta; ondoren, Mont Ventoux eta Nizako azken asteburua iritsiko dira. Aurrean lehiatzen eta aukera bakoitzaren bila jarraitzeko bost etapa.

Etxeko klasikoek, Tourreko lehen ihesaldiak eta etorkizunari begirako albiste handiek markatutako astea Euskadi Fundazioaren egiturentzat.

🧡 Euskaltel-Euskadik etxean lehiatu du asteburua, Donostiako Klasikoan eta Getxoko Zirkuituan, hasieratik aurrean egoteko jarrerarekin. Donostian, Nico Alustiza eguneko ihesaldian sartu zen eta Jon Agirre izan zen lehen laranja helmugan. Getxon, Jonathan Lastra eta Iker Mintegi ihesaldiko protagonistak izan ziren, eta Jordi Lópezek taldearen lana borobildu zuen 7. postuarekin.

Asteko albiste handia, ordea, Mikel Landaren etxerako itzulera izan da. Euskadi Fundazioan profesionaletarako bidea hasi zuen txirrindulariak berriro jantziko du Euskaltel-Euskadiren maillot laranja 2027an eta 2028an. Esperientzia, anbizioa eta lotura berezia duen izen bat itzuliko da proiektura.

💜 LABORAL Kutxa-Euskadik bere hirugarren Tour de France Femmes jarraian hasi du, Usoa Ostolaza taldeko erreferentzietako bat dela. Idoia Erasok lehen kilometrotik erakutsi du taldearen izaera: lehen etapako ihesaldian sartu zen eta egunaren zati handi bat lasterketa buruan eman zuen. Hurrengo egunean maillot berdea jantzi zuen, eta berriro saiatu zen aurreko mugimenduetan.

🤍 BBK-Euskadiren harrobi-lanak beste urrats bat eman du. Kepa Ormazabalek, Ander Otegik eta Alain Suárezek Euskaltel-Euskadirekin lehiatzeko aukera izango dute stagiaire gisa, abuztuaren 1etik denboraldi amaierara arte. Hiru profil indartsu eta moldakor, afizionatuen mailatik profesionalen tropelerako jauzian.

💙 Team Iparraldek Saint-Palaiseko Grand Prix de l’Amikuze lehiatu zuen bost txirrindularirekin. 77 kilometroko hiri-zirkuituan, 22 itzuli osatu behar izan zituzten, taldeko gazteentzat lehiaketa-erritmoa eta esperientzia pilatzen jarraitzeko beste hitzordu batean.

Etxean, Tourrean eta harrobian, beste aste bat aurrean lehiatzen eta Euskadi Fundazioaren proiektua hazten jarraitzeko.