25/10/2026
Ola! Somos Carlota, Olivia e Adriana.
Tivemos a sorte de ser convidadas para recibir clases de ballet en Noruega, pero a viaxe ten un custo moi elevado para nós. A Escola axúdanos asumindo unha parte dos gastos, pero aínda nos queda unha cantidade importante por conseguir.
Como somos unhas auténticas currantas, traballamos arreo para seguir loitando polos nosos soños. Vendemos rifas, lotería… e agora demos un paso máis!
Pedímoslles ás nosas profes que impartan uns talleres de danza abertos a todo o público: nenas, nenos, mamás, papás, avoas, avós, veciñas e veciños de Vilalba… Todo o mundo está convidado! E nós, como non podía ser doutro xeito, tamén estaremos botando unha man nas clases.
Axudádenos a facer realidade o noso soño e prometémosvos unha tarde súper divertida!
Podedes escoller o taller que máis vos guste ou apuntarvos a todos! Cada clase terá unha duración de 45 minutos e, entre unha e outra, haberá 15 minutos de descanso para hidratarvos, coller folgos para a seguinte e, sobre todo, socializar e compartir un bo momento co resto das persoas participantes.
Porque perseguir un soño tamén pode ser unha aventura compartida, chea de danza, risas e novas amizades.
Contamos con vós? Axudádenos a chegar a Noruega!
Pronto publicaremos data e horarios.