UAR '05 : Invincible Group

ليست قضية مسفيوية، بل رسالة للمجموعات المغربية.

السلام عليكم

الكل يتكلم عن وثائقي أولتراس عسكري لي تعرض هادي يومين فالقناة الفرنسية RMC sports و كي هضرو بكلام فارغ على المجموعة لي خاصهم يتحناو ليها احتراما على موقفها و المرور ديالها فهد المنبر أو في بزاااف المنابر الأخرى سابقاً لي مكيكونش عبثي ، دون منفعة أو من أجل الشهرة ، بل أولتراس عسكري كتستغل الفرصة و كدوز من خلالها الرسائل لي خاصها دوزهم بدون أي قيود أو مونطاج ، كل ظرفية و شنو كيستوجب معاها ...

من جهة ثانية المتطفلين ( أصحاب بعض الصفحات) لي كيدسوا السم فالعسل و أعضاء بعض المجموعات التشجعية لي حافظين غير عبارة وحدة Script واحد كيظلوا يهللوا بيه Anti media Anti media . ونساو أن المبدأ من الأساس، كان بمثابة شعار ضد الصحافة الفاسدة ، لكيتمثل فسادها في تلبيد الحقائق بأكاذيب و افتراءات ، كتضفي للخبر أو الحدث نكهة الإثارة مخلوطة بمرارة التهم الباطلة، ولعل لقاء أمس خير مثال والتغطية المتواصلة لإحدى قنوات الصرف الصحي لتنقل الجمهور العسكري من نقطة الإنطلاق لبوابات مركب محمد الخامس الحدث الأهم لها هذا الأسبوع ، في محاولة للبحث عن أي Acte غادي يشكل ليهم النشوة فين يطلقوا السموم اتجاه جمهور الكرة بمنع التنقلات بين المدن!

العالم العبثي كيحطك فمواقف لا تحسد عليها، منها تسمية الجمهور الأحماء بالحوالة حيت حقا كيتشاركو فعدة خصال بحال التقليد الأعمى. من نهار بدا النقاش حول تبني المجموعة لتشي جيفارا و الخرفان تابعين نفس النمط فالإنتقاد ولا واحد قدر يبدع أو يجيب حتا صورة جديدة يوصل بيها المعلومة.
لي كيزيد يرسخ نظرية القطيع هو أن هاد الجماهير مقادرينش حتى يتخطاو فكرة إتباع إديولوجية الفريق فكرة أقل ما يمكن وصفها به هي إنتاج خروفي بإمتياز.
رغم أن مخاطبة البهائم لا تنفع و القاموس اللغوي لي كيفهمو محدود ف شااااا و مرادفاتها لكن غانعطيو رأي فهاد الموضوع، فرة إديولوجية ثقيلة بزاف و بالخصوص عند جماعة و من غباء حصرها فعرف أو قانون، هاد العبارات ولات كاضر فالأذن من كثرة السفاهة لي فيها، أي تجمهر غالبا ما كيبني إديولوجية حسب عدة عوامل بحال الظروف الإجتماعية و السياسية لي عايش وسطها، الهدف علاش هو كاين…
بزاف ديال العوامل مجموعة كاتعطينا فالأخير صورة على عقلية الجماعة.

صورة مأخوذة من فضاء Skyblog الخاص بمجموعة الخاسرون تشي جيفارا و تبنيهم لتشي قبل الانسلاخ و التنصل... نسخة طبق الأصل للمجموعة التشجيعية الفرنسية ساوت وينرز

South winners ☭
OR
Spirit winnersⵣ⛦

الألتراس - التشجيع - الدفاع عن الفريق - نكران الذات - التحدي - المواقف - القرارات الصحيحة - الواقع - العمل بعيد عن أضواء الكاميرات - النضال الميداني - العقلية الصحيحة - الكيف بدل الكم - مصابيح بدل قطيع إلخ...

كل هد الصفات إلى توفرت فمجموعةما كون أكيد أنها غادي تصنع بدل مجد تاريخ و اسمها غادي يبقى محفور فالحركة لي كتمثل
بين مجد صنعته صلابة المبادئ ونقاء الفكرة، وواقع تلاشت فيه المعاني وخفت وهج المواقف. والتاريخ في صفحات مجلداته الممتدة، ليس أرشيفا صامتا، بل مرآة تعكس القيم وتذكر بالأصول و من نكون ، حنا أولتراس عسكري 2005

صورة لجلب الانتباه فقط

السلام عليكم ، في المستهل رمضان مبارك كريم ، منشور اليوم هو الأول ضمن سلسلة إقرأ لترتقي نحو الأفضل :

الجين الأناني هو عنوان كتاب البريطاني ريشارد دوكينز لي خرج سنة 1976
بداية من العنوان لي كيحمل مصطلح "أناني" ما هو إلا تعبير مجازي وصفا للطريقة لي كاتعمل بها الجينات فنظر الكاتب، حيث أن الجينات لا تملك دوافع أو أحاسيس لكن التعبير وافق طريقة العمل ديال الجينات لأن هدفها الأساسي هو إنتاج أكثر عدد ممكن من النسخ (أي التكاثر) و الحفاظ على وجود النوع و أضاف أن أجسادنا و أجساد جميع الكائنات الحية من حيوانات و نباتات ما هي إلا عربات ناقلة للجينات عبر الأجيال، قبل داوكينز كان الناس يعتقدون أن التطور كيعمل لصالح الفرد أو النوع و الكاتب بدورو كيجادل هاد الفكرة بنظرة معكوسة هنا غانكونو فهمنا وحدة من أهم العوامل فالإنتقاء الطبيعي حيث أهم حاجة فيه هي الجينات. هاد الخاصية كاتخلي النوع يتأقلم و ينضوي تحت الظروف لي تفرضات عليه من أجل الإستمرار.
من بين أهم الانتقادات لي كاتخلينا نفهمو الفكرة كثر هي علاش فبعض الحالات كيكون فرد كيخاطر بحياتو من أجل جماعة، مثلا إنسان مستعد يموت من أجل ولادو أو حيوان كيحط حياتو فخطر من أجل إخبار الجماعة بوجود حيوان مفترس، الجواب هو أن دماغنا كاتحكم فيه كيمياء لي كاتخلينا عندنا أحاسيس لي كاتعطينا الرغبات و الجينات عندها عامل كبير فتحقيق هاد المعادلة، الجينات ديال الكائنات الحية فالأمثلة لي عطينا كتفضل أنها تضمن إستمرار أفراد أخرين كيشاركوك نفس الجينات يعني الجين الأناني مستعد للتضحية "بالوسيط" لي هو الجسد من أجل إنقاذ وسطاء أخرين.
من بين أبرز الأفكار الأخرى لي تذكرات هي الهدنة أو "السلام"، إلى كان حقا كل ما في الأمر هو البقاء للأصلح إذا علاش الكائنات ما كيقتلوش بعضهم كلما دعات الضرورة علاش فبعض الحالات كاتكون "سلوكات مهذبة" أو متعاونة بينها؟
هاد الأمر هو بمثابة عرف سلوكي أو قانون غير مكتوب لي فهماتو الكائنات بشكل تلقائي بعد تطاحن طويل عندنا مثال بسيط فوقت التنافس على الموارد (طعام، أرض،أنثى…)
عندنا مثلا صقر بإستراتيجية عدوانية،كيقاتل ديما إلى ربح غياخد كولشي و إلى خسر غايتعرض لإصابة
و حمامة بإستراتيجية مسالمة غير كاتهدد إلى واجهات الصقر كاتهرب لتفادي الإصابة و إلى واجهات حمامة أخرى كيتشاركو المورد أين يكمن الإستقرار هنا؟
نتخيلو مجموعة فيها غير الصقور، كل لقاء غايسالي بقتال يعني خسارة و إلى كانت حمامة وحدة وسط الصقور غاتهرب يعني هنا ما عندناش خسارة حيت النتيجة 0 لكن أفضل من المثال الأول و الأن تخيل جماعة كلها حمَامَات هنا النتيجة مربحة لكن غير مستقرة لأن ظهور صقر واحد أو طفرة جينية تنتج سلوك الصقر غاتكون كارثة للحمام لكن نجاح للصقر حيت الموارد غاتكون سهلة المنال بالنسبة ليه و الجينات ديالو غانتاشرو بسرعة. الإستقرار غايبان بشكل تلقائي ملي غايكون المكسب المتوسط للصقور كيساوي المكسب المتوسط للحمامات
(فرق أعداد بينهم) مثلا 60% حمام و 40% صقور يعني مكينش إستراتيجية غاتفوق على الأخرى و من هنا كاناخدو نبذة حتى على مفهوم الأخلاق حيث أن التعاون و الاعتدال فالطبيعة ماشي حيت بعض الكائنات كاتمتاز باللطف لكن ماشي فمصلحة الجينات القتال فبيئة فيها غير الصقور كيفما تذكر فالمثال لي قبل.
ختم ريشارد دوكينز الكتاب بفكرة الميم أو التطور الثقافي، الفرق بينو و بين الجينات هو طريقة النقل حيث أن الميم كينتاقل عن طريق التواصل و التعلم عبر التقليد أو اللغة المفاد من هاذ الفكرة أن يمكن لنا نتغلبو على دوافع الجينات لي باغا منا على سبيل المثال الأكل و التكاثر بالعزوبة و صيام الأكل و بنفس المنطق خاص نكونو مدركين للميمات لي كيستقبلها عقلنا حيت ماشي أي فكرة كانتبناوها بضرورة غاتكون صحيحة بعض الأفكار ماهي غير فيروسات عقلية كاتنتاشر حيت هي مزيانة فالإنتشار.
هنا كيبقا الباب أمامنا مفتوح باش ناقشو فوقت لاحق فكرة الإرادة و التمثل و الجدل لي تخلق فالمحيط الفلسفي عن طريق هاد الفكرة و ما نساوش حتى نقد العقل العملي و نقد العقل المحض للفيلسوف كانط
كانتمناو تكون الأمور السابقة ذكرها غير مبهمة و الباب مفتوح للنقاش طبعا و الموضوع المقبل شبه محسوم كيفما قيل قبل قليل.

ثابتون كالأهرامات، نظلّ أوفياء في كل زمكان، فلا القمعُ يُثنينا، ولا القيودُ تُجبرنا على التراجع !

VERI ULTRAS, GRUPPO DELLA SFIDA - AVANTI LA CHE

السلام عليكم

مهم هد الفقرة غتكون جديدة فالصفحة ، الأعضاء لي عندهم حب المطلاعة و القراءة ، مهوسوا الكتب و الروايات ، الجاعلين منها سلاحا لهم ، المتشبتون بالمعرفة و البحث في زمن النظرة المحدودة و تدني مستوى الفكر !

المجموعة منذ التأسيس كانت فيها نخبة مهووسة في البحث و القراءة في مختلف المجالات سياسية (داخلية أو خارجية) اجتماعية اقتصادية دينية أدبية و هدشي لي خلانا نشوفوا نقاش بين الأعضاء فهد المواضيع عبر فوروم UAR05.org ، إذن الهدف باين منذ التأسيس زرع حب القراءة و المطلاعة فالأعضاء ، لي غادي ينعاكس بشكل مباشر على المستوى الفكري و الحس النقدي و الفني للفرد و يقيس مستوى أعمال المجموعة..

كل مرة غنهضروا على كتاب وصاحبه و ناقشوه في إطار الممكن مع رأي شخصي حول العمل . فالاخير حنا مكنداعيوش الكمال أو نطلب المثالية ، نعادي عضو وزن الريشة و نبحث عن الفرد الواعي بذاته و من ثم محيطه فاقرأ و ارتقي للأفضل!

الغاية من الوجود : الجيش الملكي

الفريق هو أساس وغاية ولادة حركة الأولتراس و مجموعاتها، حيت كيبقى هو الهدف الأول والأخير، التشجيع و المساندة اللامشروطة حتى فأصعب الظروف من بعدما كلشي كيتخلى على الألوان ، و كتبقى هي أول مبدئ تبنات عليك الحركة ، لذالك يجب إعطاء الفريق حصة الأسد على حساب المجموعة، سواء في الأفكار أو المنتوجات و هدشي لي خدمات عليه أولتراس عسكري ( وشاح As Far per la vita - only as Far أوفياء للأبد و جاكيط درع الزعيم ) أو الجداريات أو الألبومات الغنائية ( ألبوم الزعيم و الملوك) و بعد المقاطع دخلات رسائل وما إلى ذلك ...

ليفار هي سبابنا فالوجود و عمرنا مغادي نسبقوا مصلحة المجموعة أمام مصلحتها ، بخلاصة نقدرو نحرقوا ذاتنا باش نضويو ليها طريقها ، وعلى مدار واحد وعشرين سنة من الوجود أولتراس عسكري الرباط كانت حاطة الفريق هو الأولوية وهدشي لي تجسد خلال أول عمل منظم ULTRAS ASKARY TOUJOURS FIDÈLES تيفو ضد النجم الساحلي عام 2006 .
هذ العبارة تخدات كشعار أبدي للمجموعة ، إذن المجموعة التوجه ديالها واضح من البداية ، دب جا الدور على الأعضاء لي كيشوفو راسهم بصح Veri soldadi Veri UAR خاص يتبعو منهل المجموعة و تكون عندهم دراية مسبقة بتاريخ الجيش الملكي و يعرفوا كل صغيرة و كبيرة لماضيه وحاضره، حيت من العيب نشوفو أعضاء كيحفضو تاريخ المجموعة عن ضهر قلب على حساب تاريخ الفريق ، و معرفتوا بتاريخ الزعيم غير سطحي حيت هو فالأساس حاط المجموعة أولوية و الفريق ثانوي وهادشي هو الطامة الكبرى ، لكل واحد كيشوف راسوا هاكا خاصو يستحضر هد العبارة :
" يوجد فريق بدون مجموعة، ولا توجد مجموعة بدون فريق"