16/08/2026
კვირის ვარდი : Augusta Luise (ავგუსტა ლუიზა) 🌹
Augusta Luise (ავგუსტა ლუიზა) განსაკუთრებული ვარდია, რომლის უჩვეულო სილამაზე პირველივე შეხედვით იპყრობს ყურადღებას. მისი დიდი, უხვად შევსებული ყვავილები ფერების საოცარი თამაშით გამოირჩევა: ვარდისფერი, გარგრისფერი, ატმისფერი და თბილი ნარინჯისფერი ტონები ერთმანეთში ჰარმონიულად გადადის. ამ ყველაფერს კი ძლიერი, ტკბილი და ხილისებრი სურნელი ემატება, რის გამოც ავგუსტა ლუიზა ერთ-ერთ ყველაზე გამორჩეულ სურნელოვან ვარდად ითვლება.
ყვავილის ფორმა:
ყვავილები დიდი, უხვფურცლიანი და კლასიკური, ძველებური ვარდებისთვის დამახასიათებელი ფორმისაა. ფურცლები მჭიდროდ და მრავალრიცხოვნადაა განლაგებული, მათი მსუბუქად ტალღოვანი კიდეები კი ყვავილს განსაკუთრებულ და გამორჩეულ იერს სძენს. ყვავილის დიამეტრი საშუალოდ 10-12 სმ-ია, თუმცა სრულად გაშლისას, ზოგიერთ შემთხვევაში, მისი ზომა 12-15 სმ-მდეც შეიძლება გაიზარდოს.
ფერი:
ყვავილები გამოირჩევა გარგრისფერი, ნარინჯისფერი და ვარდისფერი ტონების ლამაზი შერწყმით. ყვავილობის სხვადასხვა ეტაპზე შეფერილობის ტონალობა შეიძლება შეიცვალოს: კვირტის გახსნისას უფრო ვარდისფერი ელფერი ჭარბობდეს, სრულად გაშლისას კი გარგრისფერი და ნარინჯისფერი ტონები უფრო მკაფიოდ გამოიკვეთოს. სწორედ ეს ფერთა ცვალებადობა აძლევს მას განსაკუთრებულ და გამორჩეულ იერს.
სურნელი:
Augusta Luise მხოლოდ დიდი და ულამაზესი ყვავილებით არ გამოირჩევა, მას ძლიერი, ტკბილი და ხილისებრი სურნელიც აქვს. ინტენსიური სურნელი მისი ერთ-ერთი გამორჩეული თვისებაა და ყვავილობის დროს ვარდს განსაკუთრებულ ხიბლს სძენს.
ყვავილობის ხანგრძლივობა:
Augusta Luise განმეორებით მოყვავილე ჯიშია (Repeat flowering) და მთელი ზაფხულის განმავლობაში არაერთხელ გვახარებს ულამაზესი, სურნელოვანი ყვავილებით. ყვავილობა რამდენიმე ტალღად მიმდინარეობს და ჩვენს პირობებში გვიან შემოდგომამდეც გრძელდება.
ბუჩქის ფორმა და ზომა:
ბუჩქი კომპაქტური, ძლიერი და სწორად მზარდია, კარგად დატოტვილი ყლორტებით, რომლებიც მას ლამაზ და მოწესრიგებულ ფორმას აძლევს. სიმაღლეში საშუალოდ 80-120 სმ-ს, ხოლო სიგანეში დაახლოებით 80-100 სმ-ს აღწევს. თუმცა, ჩვენს კლიმატურ პირობებში ზოგჯერ შეიძლება უფრო მაღალი და განიერი ბუჩქიც გაიზარდოს.
დარგვის ადგილი:
Augusta Luise-სთვის საუკეთესოა მზიანი, ნათელი და ჰაერგამტარი ადგილი, სადაც დღის განმავლობაში საკმარისი მზის სხივი ხვდება. უყვარს ნოყიერი, ტენიანი, მაგრამ კარგად დრენირებული ნიადაგი, სადაც წყალი არ გუბდება. ბაღში დარგული მისი დიდი და უხვი ყვავილები განსაკუთრებით შთამბეჭდავად გამოიყურება, თუმცა მისი კომპაქტური ზრდის გამო დიდ ქოთანშიც შესანიშნავად იზრდება და ძალიან ლამაზად გამოიყურება.
არ მოსწონს:
Augusta Luise-ს არ უხდება ხანგრძლივი ჩრდილი და წყლის დაგუბება. მუდმივად სველი, ცუდად დრენირებული ნიადაგი ხელს უშლის მცენარის ჯანსაღ ზრდას, ამიტომ განსაკუთრებით მნიშვნელოვანია, რომ ფესვებთან ზედმეტი წყალი არ გროვდებოდეს. ასევე, უხვი და კარგი ყვავილობისთვის მას საკმარისი მზის განათება სჭირდება.
მავნებლები და დაავადებები:
Augusta Luise ზოგადად ჯანსაღი და გამძლე ჯიშია, თუმცა, როგორც სხვა ვარდებს, მასაც შეიძლება შეაწუხოს ბუგრებმა და გავრცელებულმა სოკოვანმა დაავადებებმა. კარგი ჰაერის ცირკულაცია და სწორი მოვლა ხელს უწყობს მის ჯანმრთელობას.
მცირე ისტორია:
Augusta Luise 1999 წელს გერმანელმა სელექციონერმა Tantau-მ შექმნა და გოეთეს 250-ე დაბადების წლისთავზე მისი ცნობილი მეგობარი, გრაფინია Augusta Louise zu Stolberg-Stolberg პატივსაცემად დაარქვა. გრაფინია ახალგაზრდა გოეთესთან აქტიური წერილობითი მიმოწერით იყო ცნობილი და ლიტერატურულ ისტორიაში მისი „Gustchen“ სახელით შევიდა. სწორედ ამ ისტორიულმა კავშირმა შთააგონა ვარდისთვის მისი სახელის მინიჭება. 🌹
