25/09/2026
ძვირფასო ივერიონელებო, ჩვენო ერთგულო გულშემატკივრებო და მეგობრებო!
დღეს, როდესაც საკალათბურთო კლუბ „ივერიონის“ 5 წლის იუბილეს ვზეიმობთ, მსურს თითოეულ თქვენგანს უღრმესი მადლობა გადავუხადო იმ უდიდესი მხარდაჭერისა და სიყვარულისთვის, რომელსაც ამ წლების განმავლობაში ყოველდღიურად ვგრძნობთ.
ჩვენი წამოწყების მთავარი იდეა და მიზანი თავიდანვე გაცხადებული იყო - კალათბურთი გორსა და მთლიანად შიდა ქართლის რეგიონში სრულიად ახალ საფეხურზე აგვეყვანა. გვსურდა, აღმოგვეჩინა ახალგაზრდა ტალანტები, უზრუნველგვეყო მათი სწორი აღზრდა-განვითარება, გაგვეხსნა შესაძლებლობების ფანჯარა კალათბურთით დაინტერესებული მოზარდებისთვის, შეგვექმნა ჯანსაღი, კონკურენტუნარიანი გარემო და საკალათბურთო საზოგადოება, რომელიც უშუალოდ იქნებოდა ჩართული რეგიონში კალათბურთის განვითარებაში.
დღეს ამაყად შეგვიძლია ვთქვათ, რომ პირველი ეტაპის მიზანს მივაღწიეთ:
შევქმენით გუნდი, რომელიც რეგულარულად ასპარეზობს ქვეყნის უმაღლეს ლიგაში და წვრთნა-მომზადებას სწორედ გორში გადის. აღსანიშნავია, რომ 2026-2027 წლების სუპერლიგის სეზონზე „ივერიონის“ შემადგენლობაში ნახევარზე მეტი გორელი კალათბურთელია წარმოდგენილი.
დავაფუძნეთ საკალათბურთო აკადემია, სადაც ვარჯიშისა და განვითარების თანაბარი შესაძლებლობა აქვს ყველა ასაკის ბავშვსა და მოზარდს, არა მხოლოდ გორიდან, არამედ მთელი შიდა ქართლის რეგიონიდან. აკადემიის წევრების ოსტატობასა და სწორ აღზრდა-განვითარებაზე ქართველი და უცხოელი სპეციალისტები ზრუნავენ წამყვანი საკალათბურთო ქვეყნებიდან.
ეს პროექტი გახდა კერძო და საჯარო პარტნიორობის უნიკალური მაგალითი.
ეს შედეგი ვერ დადგებოდა გორის მუნიციპალიტეტის, საქართველოს სპორტის სამინისტროსა და საქართველოს კალათბურთის ეროვნული ფედერაციის ერთობლივი უდიდესი მხარდაჭერის გარეშე.
განსაკუთრებით აღსანიშნავია საქართველოს სპორტის სამინისტროს დანაყოფის, შპს „სპორტმშენსერვისის“ უდიდესი დამსახურება სუპერლიგის გუნდთან მიმართებაში - სწორედ მათი ჩართულობით გახდა შესაძლებელი დარბაზის FIBA-ს სტანდარტებთან დაახლოება და სუპერლიგის საშინაო მატჩების მასპინძლობის შესაძლებლობისა და უფლების მოპოვება.
განსაკუთრებით გვინდა გამოვყოთ „გორი ინი“ - ჩვენი გენერალური სპონსორი, ერთგული პარტნიორი და „ივერიონის“ მუდმივი მხარდამჭერი.
ძალზე მნიშვნელოვანი და აღსანიშნავია გორელი მეწარმეების აქტიური ჩართულობა კლუბის გაძლიერების პროცესში.
ადგილობრივი ბიზნესის მხარდაჭერა ჩვენთვის უდიდესი სტიმულია. აქვე მინდა აღვნიშნო, რომ ჩვენ ყოველთვის ღია ვართ ახალი პარტნიორობისთვის და სიხარულით მივიღებთ ყველას, ვისაც სურს თავისი წვლილი შეიტანოს რეგიონში სპორტისა და ჯანსაღი მომავლის შენებაში.
„ივერიონის“ მისია ორი მთავარი ბურჯისგან შედგება: პროფესიული — კალათბურთის განვითარება რეგიონში, და სოციალური — ჯანსაღი ცხოვრების წესის პოპულარიზაცია და რაც შეიძლება მეტი ახალგაზრდის ჩართვა კალათბურთში.
უდიდესი ბედნიერებაა იმის დანახვა, თუ როგორ იზრდება „ივერიონის“ ოჯახი დღითიდღე. მიხარია, რომ ჩვენს ზურგს სწორედ ასეთი ჯანსაღი, მოტივირებული და სპორტული საზოგადოება უმაგრებს.
მადლობა თითოეულ თქვენგანს იუბილის მოლოცვისთვის, გვერდში დგომისთვის და იმ ენერგიისთვის, რაც ახალი მწვერვალების დაპყრობისკენ გვიბიძგებს. ეს მხოლოდ დასაწყისია - წინ კიდევ უამრავი საერთო გამარჯვება გველოდება!
პატივისცემით,
ილია ჯოლბორდი
საკალათბურთო კლუბ „ივერიონი - გორის“ პრეზიდენტი
