ბორჯღალოსნები

გელა აფრასიძე: "ჩემთვის უდიდესი პატივია საკუთარი ქვეყნის წარდგენა"
ფრანგული ტოპ 14-ის გრანდის, ‘მონპელიეს’ ესპუარებთან (დუბლიორები) 3-წლიანი კონტრაქტის გაფორმების შემდეგ, კლუბის ოფიციალურმა ვებ-გვერდი 19 წლის გელა აფრასიძესთან პირველი ვრცელი ინტერვიუ ჩაწერა:

წყარო >>>
http://www.montpellier-rugby.com/news/recrues-2017-2018-gela-aprasidze

„გელა აფრასიძე 2016 წელს ‘ლელო სარასენსთან’ ერთად ქვეყნის ჩემპიონი გახდა და მაშინ ის მხოლოდ 18 წლის იყო. 2015 და 2016 წლებში ის საქართველოს 18-წლამდელთა ნაკრებთან ერთად ევროპის ვიცე-ჩემპიონი გახდა, ხოლო 20-წლამდელთა ნაკრებთან ერთად მსოფლიო რაგბის 20-წლამდელთა ჩემპიონატები ითამაშა. გარდა ამისა, 2017 წლის რაგბი ევროპის ჩემპიონატზე მას ეროვნულ გუნდში დებიუტი ჰქონდა. წელს ის ‘მონპელიეს’ შეუერთდა და ესპუართა გუნდთან 3-წლიანი კონტრაქტი გააფორმა.

- როდის და რატომ დაიწყეთ რაგბის თამაში?

- რაგბზე ჩემი ძმა დადიოდა და როდესაც 12 წლის ვიყავი მეც წამიყვანა. ეს თამაში მიყვარს, რადგან მამაცების თამაშია და ჩემს ხასიათში ჯდება.

- რა გზა გაიარეთ ‘მონპელიემდე’?

- თამაში თბილისში, ‘ივერიაში’ დავიწყე, საიდანაც ‘ლელო სარასენსში’ გადავედი და 2016 წელს კლუბთან ერთად საქართველოს ჩემპიონი გავხდი. 18-წლამდელთა ნაკრებთან ერთად ორჯერ ვითამაშე ევროპის ჩემპიონატის ფინალი, 2015 და 2016 წლებში.

- ჯერ მხოლოდ 19 წლის ხართ და ‘მონპელიე’ თქვენი პირველი უცხოური გუნდია. რას ნიშნავს ეს თქვენთვის?

- მოხარული ვარ, რომ საფრანგეთში ჩამოვედი და უმაღლესი დონის, ტოპ 14-ში მოთამაშე პროფესიონალურ კლუბს შევუერთდი. ამავდროულად, გული მწყდება საქართველოს, მეგობრების და განსაკუთრებით ოჯახის დატოვების გამო.

- საფრანგეთი რატომ აირჩიეთ?

- იმიტომ, რომ ვფიქრობ ტოპ 14 უძლიერესი ჩემპიონატია ევროპაში და შესაძლოა, მთელს მსოფლიოშიც.

- რა იცით ‘მონპელიეს’ შესახებ?

- ვიცი, რომ ესაა უდიდესი კლუბი შესანიშნავი მოთამაშეებით, მათ შორის ქართველებით, რომელთაც ძალიან კარგად ვიცნობ. ყავს ახალი მწვრთნელი ვერნ კოტერი, რომელიც მაღალი დონიის სპეციალისტია. მასთან მუშაობა იოლი არ იქნება და ეს ჩემს პროგრესს ხელს შეუწყობს.

- რა არის თქვენი ძლიერი მხარე და რისი გაუმჯობესება გმართებთ?

- შემტევი მოთამაშე ვარ და კარშიც კარგად ვურტყამ. მიუხედავად ამისა, ბევრი უნდა ვიმუშაო, განსაკუთრებით სისწრაფეზე.

- რა არის თქვენი მიზანი ‘მონპელიეში’?

- მსურს დავიმკვიდრო ადგილი პირველ გუნდში და საუკეთესოდ მოვემზადო 2019 წლის მსოფლიო თასისთვის, სადაც იმედია საქართველოს ნაკრებთან ერთად გავემგზავრები.

- თქვენ იყავით საქართველოს 20-წლამდელთა ნაკრების წევრი და ითამაშეთ მსოფლიო რაგბის 20-წლამდელთა ჩემპიონატი.

- ჩემთვის იყო უდიდესი პატივი ამ კვართის ტარება და საკუთარი ქვეყნის წარდგენა, რამაც ჩემი პასუხისმგებლობა ერთი-ორად გაზარდა.

- მიშა ნარიაშვილმა და დავით ქუბრიაშვილმა ჩვენი სასწავლო ცენტრი გაიარეს, ახლა კი პირველ გუნდში არიან. ეს თქვენთვის დამატებითი მოტივაციაა?

- რა თქმა უნდა. მოხარული ვარ ჩემს კოლეგებს რომ შევუერთდი, მათ ვის მხარდამხარაც მოედანზე მითამაშია. ეს ჩემთვის უდიდესი მოტივაციაა. მათ ხშირად ვესაუბრები და ვეკითხები ‘მონპელიეს’ შესახებ.

- მზად ხართ ახალი გამოწვევისთვის?

- რა თქმა უნდა და მოუთმენლად ველი.

ლაშა ლომიძე: "ყოველთვის მქონდა ამბიცია, რომ რაგბი ინგლისში, უმაღლეს დონეზე მეთამაშა"

ბორჯღალოსანი ლაშა ლომიძე ახალ სეზონს ინგლისის პრემიერშიპში დაბრუნებულ ‘ლონდონ აირიშში’ დაიწყებს და კლუბის ოფიციალურმა ვებ-გვერდმა 24 წლის მორაგბესთან ექსკლუზიური ინტერვიუ ჩაწერა.
„ყოველთვის მქონდა ამბიცია, რომ რაგბი ინგლისში, უმაღლეს დონეზე მეთამაშა და მოხარული ვარ კარიერის ‘ლონდონ აირიშში’ გაგრძელების შესაძლებლობა რომ მომეცა. ჩემთვის კარგადაა ცნობილი ამ კლუბის ისტორია და ტრადიცია“ - ამბობს ლომიძე, რომელიც ინგლისში გადასასვლელად ემზადება:
„დიდ ბრიტანეთში მარტო მოვდივარ და ეს სირთულეებთან იქნება დაკავშირებული, როგორც მოედანზე, ასევე მის მიღმა, თუმცა ამ გამოწვევისთვის მზად ვარ და მიმაჩნია, რომ ცხოვრების ამ ეტაპზე სწორი ნაბიჯი გადავდგი“.
ინგლისამდე ლომიძე ბორჯღალოსნებთან ერთად ამერიკაში, 3-კვირიან ტურნეზე იმყოფებოდა და კანადის, აშშ-სა და არგენტინის წინააღმდეგ ითამაშა. ახლა მას ნიკ კენედის (ლონდონ აირიშის მთ. მწვრთნელი) ხელმძღვანელობით წინასასეზონო მომზადება ელის:
„ვიცი, რომ რთული მოსამზადებელი პერიოდი მელის. ვგრძნობ, რომ შემიძლია გუნდის შერკინებას მეტი ძალა და აგრესია შევმატო. შთამბეჭდავია იმ მორაგბეთა რაოდენობა, რომლებიც კლუბმა მომავალი სეზონისთვის დაიმატა. თითოეული ადგილისთვის უდიდესი კონკურენცია იქნება და ეს გუნდისთვის ძალიან კარგია“.
ლომიძე 2012-2014 წლებში ტოპ 14-ის ‘მონპელიეში’ ირიცხებოდა, 2016 წლის ბოლომდე პრო დე2-ის ‘ბეზიეში’ თამაშობდა, გაზაფხულზე კი რუსეთის ვიცე-ჩემპიონ ‘კრასნი იარს’ ჩელენჯ ქაფის საკვალიფიკაციო ტურნირზე დაეხმარა.

7-კაცა | სტაბილურად მერვე

საქართველოს 7-კაცა ნაკრებმა ევროპის გრან პრის მესამე ეტაპიც მე-8 ადგილზე დაასრულა. მოსკოვისა და ლოძის მსგავსად, მეტის მიღწევა კლერმონშიც შეიძლებოდა, მაგრამ იღბალმა ზურგი გვაქცია.
პალიკო ჯიმშელაძის გუნდს ჰონკონგის საგზურის მოპოვების შანსის შესანარჩუნებლად მაქსიმალურად მაღალი ადგილის დაკავება მართებდა და ექვსივე შეხვედრაში ბოლომდე იბრძოლა, თუმცა ხუთ შემთხვევაში ერთი გარდასახული ლელოს (და ნაკლები) ფარგლებში დამარცხდა.
პირველი მატჩი გერმანიასთან გვქონდა და საფინალო სასტვენამდე 2 წუთით ადრე ანგარიში 0:12 იყო, როდესაც ლევან გოგოლაშვილმა ფინტებით მცველები მარცხენა ფლანგზე შემოიკრიბა, ბურთი მარჯვნივ ჩათამაშდა და ბექა ურჯუკაშვილის ლელო მამუკა ნინიძემ რთული პოზიციიდან გარდასახა. ბოლო წუთზე ფლანგზე აკაკი ტაბუცაძე გაიქცა და ანგარიში გაათანაბრა, ხოლო ნინიძემ გარდასახა და 14:12 ვიმარჯვეთ.
ესპანეთმა ერთადერთი ლელო პირველი ტაიმის გაწითლებულ დროზე მიითვალა და მეორე ტაიმში ანგარიში აღარ შეცვლილა - 0:7. უქულო გამოდგა პირველი ტაიმი პორტუგალიასთან, შესვენების შემდეგ კი სისწრაფეს მოვუმატეთ და ლაშა ხმალაძემ ბურთი ძელებსშუა დაამიწა - 7:0. პორტუგალიამ ერთი ლელო გაქვითა, მაგრამ გასატანი გარდასახვა გაუცუდდა და თამაში 7:5 უნდა მოგვეგო, თუმცა გაწითლებულ დროზე ჩვენს 22-ში ჩვენივე დერეფანი წავაგეთ, ლელო-გარდასახვა მივიღეთ პლეი ოფში მესამე ადგილით გავედით (7:12)
მეოთხედფინალში კვლავ ესპანეთი გვერგო და ისევე, როგორც ჯგუფურ ეტაპზე, ლელო პირველი ტაიმის ბოლოს მივიღეთ. თამაში რომ განახლდა ჩვენივე შეყვანილი ბურთი მოვიგეთ და იოსებ მათიაშვილმა ლელო ძელებსშუა გაიტანა, ხოლო გიორგი ბაბუნაშვილმა გარდასახვით დაგვაწინაურა. მეორე ტაიმის შუაში შეცდომების სერიას ხმალაძის სინბინი მოყვა, ესპანეთმა მეტობა გამოიყენა და 10:7 იმარჯვა.
მე-5 ადგილის ნახევარფინალში მასპინძელი საფრანგეთი ორი ლელოთი დაწინაურდა, ზედ შესვენების წინ ბიძინა სამხარაძემ სწრაფად გაათამაშა ჯარიმა და ლელოში ხმალაძე შეუშვა, ბაბუნაშვილმა გარდასახა. მეორე ტაიმში მეტოქე ცენტრში შევავიწროვეთ, ბურთი მოვიპოვეთ, მიხეილ გაჩეჩილაძემ ხაზი გაჭრა და ლელო ძელებსშუა გაიტანა, ბაბუნაშვილმა წინ გაგვიყვანა - 14:12. ფრანგებმა ლიდერობა მალევე დაიბრუნეს, სულ ბოლოს სალელოვედ შევუტიეთ და მიზნამდე სულ ცოტა რჩებოდა, მაგრამ შებოჭილმა ტაბუცაძემ ბურთი ვეღარ ამოაგდო.
მე-7 ადგილისთვის ბელგიას შევხვდით და გამარჯვებასთან ძალიან ახლოს ვიყავით, თუმცა უპირატესობა ვერ შევინარჩუნეთ, მეტოქემ 22:19 იმარჯვა და წინა ორი ტურნირის მსგავსად მე-8-ზე დავრჩით.
ევროპის გრან პრის მეოთხე, დასკვნითი ეტაპი ინგლისში, ექსეთერში 15-16 ივლისს გაიმართება.

მესამე, კლერმონის (საფრანგეთი) ეტაპზე ითამაშეს: იოსებ მათიაშვილი (აკადემია), ანზორ სიჭინავა (აკადემია), ზურაბ ძნელაძე (აია), ლევან გოგოლაშვილი (ლოკომოტივი), მირიან მოდებაძე (აია), აკაკი ტაბუცაძე (ლელო სარასენსი), მიხეილ გაჩეჩილაძე (ენისეი, რუსეთი), გიორგი ბაბუნაშვილი (აია), მამუკა ნინიძე (ჯიქი),ბექა ურჯუკაშვილი (არმია), ლაშა ხმალაძე (ლელო სარასენსი), ბიძინა სამხარაძე (ბაია მარე, რუმინეთი).

ქართველი მსაჯები ელიტისკენ მიიწევენ

‘მსოფლიო რაგბიმ’ ივნისის ტესტ-სერიის ერთ-ერთი მატჩის განსჯა ქართველ რეფერის პირველად ანდო და ეს მისია შოთა თევზაძემ წარმატებით შეასრულა.
23 წლის ქართველი მსაჯი 31 მაისიდან 18 ივნისის ჩათვლით საქართველოში გამართულ 20-წლამდელთა ჩემპიონატზე მუშაობდა და ვითარდებოდა, 24 ივნისს კი ბუქარესტში, რუმინეთისა და ბრაზილიის ტესტ-მატჩისას მთავარი მსაჯი იყო.
რაგბი კომპლექსური სპორტი და იმისათვის, რომ ქართული რაგბი წინ წავიდეს, მორაგბეები, მწვრთნელები და მსაჯები ერთდროულად უნდა განვითარდნენ. ამისათვის საჭიროა მეტი გამოცდილება და სასიხარულოა, რომ ამ გამოცდილებას, საერთაშორისო მასშტაბით თევზაძე და ნიკა ამაშუკელი იღებენ. ისინი ნაბიჯ-ნაბიჯ მიიწევენ წინ, ყოველ წელს ერთი საფეხურით მაღლა ადიან და მიუხედავად ახალგაზრდული ასაკისა (რასაც მსაჯობაში განსაკუთრებული ყურადღება ექცევა), მსოფლიო რაგბის უმაღლესი დონის ტურნირებსა და მატჩებზე გამოჩნდნენ.
ბუქარესტიდან დაბრუნებულ შოთა თევზაძეს ‘მსოფლიო რაგბიდან’ ივნისის ტესტ-მატჩზე მიწვევის შესახებ დავეკითხეთ:

- მსოფლიო რაგბის 20-წლამდელთა ჩემპიონატისთვის ვემზადებოდი, სადაც გვერდით მსაჯად უნდა მემუშავა, როდესაც ‘მსოფლიო რაგბისგან’ ივნისის ტესტ-მატჩზე მიწვევა მივიღე. ასეთი დონის შეხვედრა აქამდე არასდროს მიმსაჯია. ერთხელ ვიყავი ბუქარესტში, მსოფლიო რაგბის ერთა თასზე, სადაც ესპანეთი-იაგუარები და ესპანეთი-ნამიბია ვიმსაჯე, რომელიც ასევე ტესტ-მატჩი იყო, თუმცა ტურნირის ფარგლებს მიღმა ამ დონეზე აქამდე არასდროს მიმუშავია.
ბუქარესტში რუმინეთისა და ბრაზილიის შეხვედრა ვიმსაჯე. ვფიქრობ, ამოცანას კარგად გავართვი თავი და იმედია, მსგავსი მიწვევა მომავალშიც მექნება. ველოდები თამაშის გარჩევას, რომლის შემდეგაც მივიღებ შეფასებას. მე თამაშის ჩანაწერს უკვე ვუყურე, მცირე შეცდომები მქონდა, თუმცა სერიოზული არაფერია და ვფიქრობ, შეფასებაც კარგი მექნება.

- რუმინეთმა 56:5 მოიგო.

- ბევრი ფიქრობს, რომ როდესაც დიდი სხვაობა ფიქსირდება, ამ დროს მსაჯობა ადვილია, თუმცა ასე არაა. როდესაც ამ დონის თამაშში ასეთი სხვაობა ფიქსირდება, მსაჯზე ზეწოლა დიდია. თამაშის შემდეგ რუმინელთა უელსელმა მწვრთნელმა ლინ ჰენესმა მითხრა - ძალიან ახალგაზრდა ხარ და არ ველოდი ასე კარგად თუ გაართმევდი თავსო. მან თქვა, ასეთი სხვაობის დროს მსაჯობა უფრო რთულიაო და ბიჭების სახელით მადლობა გადამიხადა: ზუსტად ვიცოდით მსაჯი ჩვენგან რას ითხოვდაო.

- ბრაზილია რა დონის გუნდია?

- ეს გუნდი ამერიკის თასზე მუდმივად პროგრესირებს. როგორც ჩანს, ამ ქვეყანაში გადაწყვიტეს, რომ 15-კაცა რაგბი განავითარონ და სისწრაფეზე ორიენტირებული მზარდი გუნდია. ჯანში მოიკოჭლებენ, აქცენტს სისწრაფეზე აკეთებენ და ხაზით ძალიან ლამაზი ლელოც გაიტანეს.

- რუმინეთი ჩვენი მუდმივი კონკურენტია და საინტერესოა, როგორია მსაჯის თვალით დანახული ‘მუხები’?

- რუმინეთი საგრძნობლად გაძლიერდა. მათ თამაშის სტილი შეცვალეს, ხაზში სულ ორი რუმინელი ყავდათ, დაიმატეს ტონგელი, ზელანდიელი, სამოელი მორაგბეები და გათვლა ხელით თამაშზე ჰქონდათ, რაც ბრაზილიასთან კარგად გამოუვიდათ.

- ბუქარესტში გამგზავრებამდე კიდევ ერთი ნაბიჯი გადადგით წინ და მსოფლიო რაგბის 20-წლამდელთა ჩემპიონატზე გვერდითი მსაჯი იყავით. რა შეგძინათ ამ ტურნირმა?

- მე და ნიკა ამაშუკელმა ვიცოდით, რომ ჯგუფურ ეტაპზე გვერდით მსაჯებად ვიმუშავებდით, ხოლო პლეი ოფებზე მეოთხე-მეხუთე მსაჯები ვიქნებოდით. როგორც ჩანს, ჯგუფურ თამაშებში შევძელით ხელმძღვანელობისთვის თავის მოწონება და ნახევარფინალში საკმაოდ დაძაბული შეხვედრა - სამხრეთ აფრიკა-ინგლისი და მესამე ადგილისთვის მატჩი ვიმსაჯე.

დღესდღეისობით გვერდითი მსაჯი მხოლოდ აუტს აღარ აფიქსირებს, სრულადაა ჩართული თამაშში და ამ მსოფლიო თასმა უდიდესი გამოცდილება შემძინა. მთავარი მსაჯები ტოპ 14-ში, პრო 12-ში, სუპერ რაგბში ნამუშევარი რეფერები იყვნენ და მათგანი ბევრი რამ ვისწავლე. გვქონდა სემინარებიც, ყოველი სათამაშო დღის შემდეგ განვლილი მატჩების გარჩევა, ვიღებდით მითითებებს ალან როლანისგან (‘მსოფლიო რაგბის’ მსაჯების უფროსი) და ბევრი სიახლე აღმოვაჩინე.

- 20-წლამდელთა მსოფლიოს ჩემპიონატი ახალი წესებით ჩატარდა.

- მსაჯებისთვის ახალ წესებზე გადართვა სირთულეს წარმოადგენდა, თუმცა ვთვლი, რომ ეს საჭირო ცვლილებები იყო და შედეგად თამაში უფრო დინამიური გახდება. დიდი 10-ის მომავალი გათამაშება შეცვლილი წესებით დაიწყება.

- 20-წლამდელთა ჩემპიონატზე მსაჯების ზოგიერთმა გადაწყვეტილებამ კითხვის ნიშნები გააჩინა.

- ზოგ შემთხვევაში ეს კითხვის ნიშნები უსაფუძვლო იყო და მსაჯებმა სწორი გადაწყვეტილება მიიღეს, თუმცა იყო შეცდომებიც და ამას გვერდს ვერ ავუვლით. მსაჯიც ადამიანია მასაც მოსდის შეცდომები, ისევე, როგორც მოთამაშეებს. როდესაც მორაგბეები მთელი 80 წუთი უშეცდომოდ ითამაშებენ, მერე მოვითხოვოთ მსაჯებისგან უშეცდომო მუშაობა.

- თქვენ და ნიკა ამაშუკელი ბოლო წლებში რეგულარულად მსაჯობთ სხვადასხვა დონის საერთაშორისო შეხვედრებს. სხვა ქართველ მსაჯებს რატომ არ ეძლევათ ამის შესაძლებლობა?

- 20-წლამდელთა მსოფლიო ჩემპიონატზე დიდი 10-ის ყველა მსაჯი ვიყავით ჩართული და დანარჩენები მე-4-მე-5 მსაჯებად მუშაობდნენ. მათ უმაღლესი დონის მსაჯებთან ურთიერთობით ასევე დიდი გამოცდილება მიიღეს. ადრეც ვთქვი და ახლაც გავიმეორებ, დიდი 10-ის ყველა მსაჯი ერთ დონეზე ვართ, უბრალოდ მე და ნიკას სხვებზე მეტად გაგვიმართლა, ენის ცოდნა დაგვეხმარა და საქართველოს საზღვრებს გარეთ გავედით, რითაც ცოტა მეტი გამოცდილება შევიძინეთ. დანარჩენი მსაჯები არაფრით ჩამოგვივარდებიან, ენის ბარიერის დაძლევაზე მუშაობენ და დარწმუნებული ვარ, საერთაშორისო მატჩებს მალე ისინიც განსჯიან.

თანამედროვე რაგბში მსაჯს ძალიან დიდი როლი აქვს. თამაშის დონემ აიწია და ეს მოთამაშეებთან და მწვრთნელებთან ერთად მსაჯების დამსახურებაცაა. საქართველოში მსაჯები და მოთამაშეები ერთმანეთს მხარში უნდა ამოვუდგეთ, ერთად გავიზარდოთ და ქართული შიდა რაგბის დონეც აუცილებლად აიწევა. მსაჯებს გვაქვს სურვილი და ამბიცია, რომ ქართული რაგბის განვითარებას ხელი შევუწყოთ. ერთ დროს მეც მოთამაშე ვიყავი, ახალგაზრდულ ნაკრებებშიც ვიყავი, მაგრამ ტრავმის გამო აქტიურ სპორტს ვეღარ გავყევი და ამიტომ ვირჩიე მსაჯობა. მსაჯობა ძალიან შემიყვარდა და ჩემი პროფესიით ვამაყობ!

- ახლა თუ ხართ მიწვეული რომელიმე საერთაშორისო ტურნირში?

- ამისთვის ჯერ ძალიან ადრეა, თუმცა მე და ნიკას გვქონდა შეხვედრა ევროტურნირების მსაჯების დანიშვნების უფროსთან ჟოელ რუშთან. მან გვითხრა, რომ აუცილებლად გვექნება შანსი ევროტურნირებში დიდი ალბათობით ახალი სეზონიდან ჩელენჯ ქაფის შესარჩევი ტურნირის შეხვედრებს ვიმსაჯებთ.

7-კაცა | საფრანგეთში გაძლიერებული შემადგენლობით

საქართველოს 7-კაცა ნაკრები დღეს საფრანგეთში გაემგზავრა, სადაც კლერმონ ფერანში ევროპის გრან პრის მესამე ეტაპს ითამაშებს.
მოსკოვისა და ლოძის ეტაპზე გუნდმა ერთნაირი შედეგი აჩვენა და ორივეჯერ მე-8 ადგილი დაიკავა, საერთო ჩათვლაში კი, 12 ქულით მე-9 საფეხურზეა: ჯგუფურ ეტაპზე ორ-ორი თამაში მოვიგეთ და პლეი ოფებშიც ბოლომდე ვიბრძოლეთ, მაგრამ მეტოქეებს მცირედით ჩამოვრჩით.
„მოსკოვშიც და ლოძშიც პირველი დღე კარგად ჩავატარეთ და მეორე დღის პირველი მატჩი პატარ-პატარა შეცდომების გამო დავთმეთ. ალბათ, ეს გამოცდილების ნაკლებობის ბრალი იყო. არ გაგვიმართლა, მოსკოვში ჯგუფში გვყავდა ირლანდია, რომელიც ეტაპის გამარჯვებული გახდა, ხოლო მეოთხედფინალში ორივეგან რუსეთი შეგვხდა, რომელმაც ლოძის ეტაპი მოიგო.
ყველა მარცხი გულგასატეხი იყო და მიმაჩნია, რომ ამ გუნდს მოსკოვსა და ლოძშიც თავისუფლად შეეძლო საპრიზო ადგილებისთვის ბრძოლა. მივედით დასკვნამდე, რომ მეორე დღის პირველ მატჩში კონცენტრაცია გვაკლდა და ტურნირებს შორის შესვენებისას აქცენტი ამაზე გავაკეთეთ“ - განვლილ ეტაპებს აჯამებს 7-კაცას მთავარი მწვრთნელი პალიკო ჯიმშელაძე.

განვლილი ეტაპის ანალიზის გარდა, საფრანგეთის ტურნირისთვის მწვრთნელმა შემადგენლობა მნიშვნელოვნად გადაახალისა და ექვს ისეთ მოშვიდკაცეს უხმო, რომლებსაც წელს არცერთ ეტაპზე არ უთამაშიათ.
ამერიკული ტურნეს შემდეგ გუნდს შეუერთდნენ ბორჯღალოსნები ლაშა ხმალაძე და იოსებ მათიაშვილი; მსოფლიო რაგბის 20-წლამდელთა ჩემპიონატზე ნათამაშები უმცროსი ბორჯღალოსნებიდან ჯიმშელაძემ მირიან მოდებაძეს და აკაკი ტაბუცაძეს უხმო; გუნდს შეუერთდნენ გამოცდილი მოშვიდკაცეები - მიხეილ გაჩეჩილაძე და ანზორ სიჭინავა; მოსკოვის ეტაპზე მიღებული ტრავმა მოიშუშა და საფრანგეთში მიდის ბიძინა სამხარაძე.

თამაზ ანდღულაძის პორტრეტი

თამაზ ანდღულაძეს ქართული რაგბის ისტორიაში გამორჩეული ადგილი უკავია. მეოთხედი საუკუნის წინ, ქართული სარაგბო თემის მსოფლიო რაგბის ოჯახში მიღებას და შესაბამისად ირბ-ში (მსოფლიო რაგბის საბჭო) გაწევრიანების ისტორიული მისია სწორედ თამაზ ანდღულაძემ შეასრულა. ქართული სპორტის ისტორიაში, სათამაშო ბურთიან სახეობათა შორის რაგბი პირველია, რომელმაც საერთაშორისო აღიარება ოფიციალურად მოიპოვა.
ვერის აბანოს უბნელი, გურული წარმომავლობის თაზო (თამაზ)ანდღულაძე გამჭრიახი გონებით, ანალიტიკური აზროვნებითა და არაორდინალური გადაწყვეტილებებით სიყრმის წლებიდანვე გამოირჩა. 51-ე საშუალო სკოლასაც წარმატებით დაამთავრებდა, რომ არა ყოფაქცევაში დაკლებული ნიშანი. ონავარ კლასელებთან ერთად სკოლას წლების განმავლობაში „აზანზარებდა“. „არასერიოზული კაცის“ - გია ფერაძის სკოლაში დადგმულ მრავალ სახალისო „წარმოდგენას“ თაზო და უნიჭიერესი მწერალი ჯემალ თოფურიძე (ნოდარ დუმბაძის უფროსი სიძე) კარგად უბავდნენ მხარს და პრესტიჟული სკოლის დირექტორსა და პედაგოგებს არაერთ თავსატეხსაც უჩენდნენ.
სკოლის პერიოდში თაზო ფეხბურთით იყო გატაცებული. ტყავის ბურთს კარგად იმორჩილებდა, თუმცა მშობლებს უფროსი ვაჟის სპორტსმენად ჩამოყალიბების პერსპექტივა ნაკლებად ხიბლავდათ. მამა - ნოდარ ანდღულაძე, 26 კომისრის რაიონის (ისნის რაიონი) სასამართლოს თავმჯდომარე გახლდათ და თაზოში მომავალ იურისტს ხედავდა. დედა - ქეთევან ჩაკვეტაძე, მეან-გინეკოლოგი კი შვილის „დოხტურობაზე“ (ექიმობაზე) ოცნებობდა.
თაზომ ყველასათვის მოულოდნელად სწავლის გაგრძელება საქართველოს პოლიტექნიკურ ინსტიტუტში, ინჟინერ-მშენებელის სპეციალობით არჩია. სპი-ში თაზო თავიდან წყალბურთით დაკავდა, თუმცა მცირე ხნით. 60-ანი წლების შუაში საქართველოში ფრანგ მორაგბეთა სამოყვარულო გუნდის სტუმრობამ თაზოზე დიდი შთაბეჭდილება მოახდინა და ოვალურ ბურთს სამუდამოდ დაუმეგობრა. თამაზ ანდღულაძემ მორაგბის კარიერაში პირველად თბილისის „სპარტაკის“ მაისური მოირგო. ამბიციურ „სპარტაკს“ იმხანად თაზოს სიყრმის მეგობრები: ვასილ (ბათუ) კევლიშვილი და შიო ვასაძე (ლევან ვასაძის მამა) დამრიგებლობდნენ.
სხარტი აზროვნების მქონე ანდღულაძე მორაგბის უნივერსალური თვისებებითაც გამოირჩა. თაზოს, თამაში ერთბაშად სამ პოზიციაზე (ჰავბეკი; მგეზავი; ფულბეკი) ერთნარი წარმატებით ხელეწიფებოდა, თუმცა თავად გული მაინც ჰავბეკის ამპლუისკენ მიუწევდა. თანაგუნდელებმა თაზოს კაპიტნობაც ანდეს და „სპარტაკმა“ ყველაზე დიდ წარმატებას მიაღწია - ამიერკავკასიის თასი შემართა. თაზოს კარგი თამაში, იმხანად ქართული წამყვანი გუნდის „დინამოს“ დამრიგებელ ზაურ მგელაძეს არ გამოჰპარვია, თუმცა ავტორიტეტულმა მწვრთნელმა ანდღულაძის გადაბირება ვერ მოახერხა. თაზო მეგობრებს არ ღალატობდა, თუმცა „დინამოში“ თავმოყრილ ოვალის აღიარებული ოსტატების (ირაკლი კიზირია; დათო დავითაია; გოჩა აბაშიძე; ნუგზარ ბუგიანიშვილი; ზურა რეხვიაშვილი) გვერდით თამაშის წყურვილმა ბოლოს თავისი გაიტანა და ანდღულაძემ 1973 წლიდან თამაში გივი მრელაშვილის თავკაცობით „დინამოში“ განაგრძო. ამ პერიოდში ანდღულაძეებს ლეგენდარული „ბაბულია“ (ვლადიმერ აბაშიძე)დაუსიძდა. გამოჩენილი პიროვნებისა და შესანიშნავი მორაგბის ვლადიმერ(ნუკრი) აბაშიძის ვაჟი ვასკა აბაშიძე შემდგომში ეროვნული ნაკრების ერთ-ერთ საკვანძო ფიგურად იქცა.
თაზო “დინამოში“ ჩვეულ, ჰავბეკისა და ფულბეკის პოზიციებზე თამაშობდა და ირაკლი კიზირიას რაგბიდან წასვლის შემდეგ გუნდის კაპიტანიც გახდა. „დინამომ“ საქართველოს ჩემპიონობა რამდენჯერმე მოიგო. განსაკუთრებული აღნიშვნის ღირსია, 1976 წელს საგარეჯოში გამართული საქართველოს ჩემპიონატის ფინალი, სადაც თამაზ ანდღულაძის ჩინებული თამაშის წყალობით „დინამომ“ , იმხანად შემადგენლობით გვარიანად გაძლიერებულ და პრინციპულ მეტოქედ ქცეულ თანაქალაქელ „ლოკომოტივს“ სძლია.
მორაგბის მომადლებული ნიჭის მიუხედავად, თამაზ ანდღულაძემ სიზარმაცის სენი ვერაფრით მოიცილა(რასაც დღემდე მტკივნეულად განიცდის) და 1978 წელს, მოქმედი სპორტსმენის კარიერაც ნაადრევად, 30 წლის ასაკში დაასრულა. მომდევნო 10 წლის განმავლობაში თაზოს რაგბთან უმეტესად ვეტერანთა მატჩები აკავშირებს. 1989 წელს კი საქართველოს რაგბის ფედერაციის ვიცე-პრეზიდენტის პოსტს იკავებს და პრეზიდენტ დავით კილასონიასთან ერთად ირბ-სკენ გზის გაკვალვას იწყებს, რაც 1992 წელს წარმატებით სრულდება. 1991 წელს ირბ-ს მესვეურებმა კილასონია და ანდღულაძე თვიქნემში , ინგლის-ავსტრალიის ეროვნულ ნაკრებთა მსოფლიო თასის სატიტულო შეხვედრაზე დაპატიჟეს. ანდღულაძე ლონდონში რჩება და... მომდევნო წლის თებერვალში, მაშინდელი ირბ-ს უელსელმა მდივანმა ქის როულენზდმა აღმასკომის დასტურის შემდეგ, ქართული სარაგბო თემი მსოფლიო რაგბის ოჯახის რიგით 52-ე წევრად აღიარა.

ზაზა ლეჟავა: "ვაჩვენეთ, რომ სარაგბო ერი ვართ"

საქართველოს რაგბის აკადემიის დირექტორი ზაზა ლეჟავა ამბობს, რომ მსოფლიო რაგბის 20-წლამდელთა ჩემპიონატის მასპინძლობით ქართულმა რაგბმა უზარმაზარი გამოცდილება შეიძინა.
მას პირადი საუბრები ჰქონდა უცხოელ სტუმრებთან და ორგანიზაციული კუთხით, ყველა მათგანისგან მხოლოდ დადებითი ემოცია მოდიოდა. ეს რომ მხოლოდ ზრდილობის გამო ნათქვამი სიტყვები არ იყო, კონკრეტული ფაქტებითაც დასტურდება - კარდიფის აკადემიამ საქართველოში 16-წლამდელთა ორი გუნდის ჩამოყვანის სურვილი გამოთქვა, ხოლო ფრანგებმა 19-წლამდელთა ოთხთა ტურნირზე მიგვიწვიეს.
ზაზა ლეჟავასთან საუბარი უმცროსი ბორჯღალოსნების თამაშის შეფასებით დავიწყეთ.

ზაზა ლეჟავა: ამ 20-წლამდელთა ჩემპიონატზე არგენტინის დამარცხებით დიდი, ისტორიული გამარჯვება მოვიპოვეთ. ესაა სამწვრთნელო შტაბის, მოთამაშეების და საქართველოს რაგბის კავშირის თავდაუზოგავი შრომის შედეგი.
ძალიან კარგი თამაში ვაჩვენეთ ირლანდიასთან და მეორე ისტორიულ გამარჯვებამდე სულ ცოტა დაგვაკლდა. ირლანდია რაგში ჩვენზე ბევრად წინაა, მაგრამ იმ დღეს თამაშის ხარისხით არ ჩამოუვარდებოდით და ისეთი შეტევითი პოტენციალი ვაჩვენეთ, რომელზეც მთელი სარაგბო სამყარო საუბრობს.
მთლიანობაში, კმაყოფილები უნდა ვიყოთ, რადგან დავინახეთ როგორი კარგი თაობა მოდის. არავის გამორჩევა არ მინდა, ეს ბიჭები (ყველა) თამაშიდან თამაშამდე ჩვენს თვალწინ გაიზარდნენ. პოზიტიური ჩემპიონატი ჩავატარეთ და დავინახეთ, რომ რაც უფრო ხშირად ვეთამაშებით მაღალი დონის გუნდებს, მით უფრო სწრაფად მივიწევთ წინ. არ აქვს მნიშვნელობა რა ტურნირის და რა ჩემპიონატის ფარგლებში, მაგრამ მნიშვნელოვანია, რომ ყველა ასაკში რაც შეიძლება ხშირად ვეთამაშოთ უძლიერეს ნაკრებებს და პროგრესი უფრო თვალსაჩინო იქნება.

- თქვენი აზრით, რამ განაპირობა ჩვნი ასეთი წრმატებული თამაში?

- მწვრთნელებს კარგად ჰქონდათ გეგმა გაწერილი. მათ გათვალეს, რომ ბოლო თამაშებში გუნდს შეთამაშების პრობლემა ნაკლებად ექნებოდა და ფიზიკურადაც კარგ კონდიციაში იქნებოდა. გეგმა იყო მსოფლიოს 12 ელიტურ გუნდში დარჩენა, სადაც პირველად შარშან ვითამაშეთ და ეს გეგმა წარმატებით შესრულდა. ჩვენ ამ 12-ში მე-10 ადგილზე ვართ და თუ გავითვალისწინებთ საიდან მოვდივართ, ეს უდიდესი მიღწევაა.

- თქვენ პირადი ურთიერთობები გქონდათ სტუმარი გუნდების წარმომადგენლებთან. როგორ აფასებდნენ ისინი ტურნირის ორგანიზაციულ მხარეს?

- ყველა შეფასება უაღრესად დადებითი იყო. ტრადიციულად, სტუმართმოყვარე ერი ვართ და ეს ყველა სტუმარმა იგრძნო. ჩვენ თავი არ დავზოგეთ და გუნდებს საუკეთესო პირობები შევუქმენით. ეს მეათე 20-წლამდელთა ჩემპიონატი იყო და რამდენადაც ჩემთვისაა ცნობილი, ყველაზე მეტი მაყურებელი საქართველოში ყავდა.
მქონდა საუბრები უელსელებთან, ინგლისელებთან, არგენტინელებთან, ფრანგებთან და ყველასგან მხოლოდ დადებით შეფასებას ვისმენდი. ერთ-ერთი გუნდის შერკინების მწვრთნელმა, რომლისთვისაც ეს მე-9 20-წლამდელთა ჩემპიონატი იყო მითხრა, რომ ორგანიზაციული თვალსაზრისით საქართველოში ჩატარებული ტურნირი საუკეთესო იყო. თუ სხვა ქვეყნებში გუნდებს სამ და ოთხ ვარსკვლავიან სასტუმროებში აცხოვრებდნენ, ჩვენ 5-ვარსკვლავიან სასტუმროებში განვათავსეთ; მოეწონათ აქაური საკვები; კმაყოფილები იყვნენ მომსახურე პერსონალით, რადგან მათ სურვილებზე რეაგირება მომენტალურად ხდებოდა. ყველა ნიუანსი მნიშვნელოვანია და ისიც კი თქვეს, რომ საქართველოში საუკეთესო ამინდები იყო.

- ტურნირის სპორტული დონით თუ დარჩით კმაყოფილი?

- თამაშების უმეტესობის ხარისხი ძალიან მაღალი იყო. შეხვედრების უმეტესობამ თანაბარ ბრძოლაში ცაიარა. იყო სიურპრიზებიც - იტალიამ ირლანდიას მოუგო, ჩვენ არგენტინას. ეს ჩემთვის საინტერესი იყო, რადგან გუნდების დონე თანაბრდება და პერსპექტივაში, 2023 წლის მსოფლიო თასმა დაძაბულ ბრძოლებში უნდა ჩაიაროს.

- ფინალში თუ ელოდით ასეთ სხვაობას?

- ნამდვილად მოულოდნელი იყო. გარკვეულ მომენტებში იმასაც ვფიქრობდი, რომ შეიძლებოდა ინგლისს მოეგო, თუმცა, როგორც ჩანს, ზელანდიელემა შარშანდელი ჩაგდებული სეზონის შემდეგ სწორი ანალიზი გააკეთეს. ინგლისი საწყისი 15-20 წუთში დაცვაში ტაქტიკურად სწორად თამაშობდა, მაგრამ ზელანდიელმა მორაგბეებმა ორთაბრძოლები მოიგეს და თუ ზელანდიელი ერთი-ერთზე გაჯობებს, ამას ქულეში აუცილებლად ასახავს.

- და ბოლოს, რა სიკეთის მომტანი იქნება ქართული რაგბისთვის ეს ჩემპიონატი?

- მივიღეთ მაღალი დონის და მასშტაბური ტურნირის მასპინძლობის გამოცდილება. ეს იყო ერთი დიდი ნაბიჯი და უკვე შეგვიძლია გამოვთქვათ კიდევ ერთი მსგავსი ტურნირის, ან 7-კაცას მსოფლიო ჩემპიონატის ჩატარების პრეტენზია; ახლოდან დავინახეთ მსოფლიო დონის გუნდები და ვნახეთ, რომ მათგან არც ისე შორს ვართ, რამაც თავდაჯერება უნდა შეგვმატოს; უცხოურ ნაკრებებთან მიმაგრებული იყვნენ ქართველი ლიაზონები, უმეტესად მოქმედი მწვრთნელები, მოთამაშეები და მენეჯერები. მათ საკუთარი თვალით იხილეს როგორ ცხოვრებენ, ხურდებიან, ვარჯიშობენ დიდი გუნდები და მიიღეს ის გამოცდილება, რასაც სხვა შემთხვევაში ვერ მიიღებდნენ. ამ ტურნირის მასპინძლობა იმის წინაპირობაა, რომ საქართველო სარაგბო ელიტის, ამ დიდი ოჯახის და სრულფასოვანი წევრი ხდება, არა მხოლოდ მოედანზე, არამდ მის მიღმაც; სტუმარი გუნდების სპეციალისტებმა ჩგვიტარეს სემინარები; ყველას დავანახეთ, რომ ჩვენ სარაგბო ერი ვართ.
პირადად მე, როგორც საქართველოს რაგბის აკადემიის დირექტორს, მქონდა საუბარი უელსის აკადემიის რაგბის დირექტორთან და შევთნხმდით, რომ ამა წლის ოქტომბერ-ნომებრეში კარდიფის აკადემიის 16-წლამდელთა ორი გუნდი გვეწვევა, ჩვენც ორი ან ოთხი გუნდით დავხდებით და ჩავატარებთ ტურნირს.
საფრანგეთის რაგბის კავშირიდან მივიღეთ შეთავაზება, რომ თებერვალში საფრანგეთში ჩავიდეთ და ვითამაშოთ 19-წლამდელთა ტურნირში, რომელშიც იტალიისა და რუმინეთის ნაკრებებსაც იწვევენ. გვაქვს შანსი, რომ იქ 20-წლამდელთა ნაკრებით გავემგზავროთ და ეს ტურნირი მომავალი 20-წლამდელთა ჩემპიონატისთვის გამოვიყენოთ.

7-ქალა | მესამე ადგილი სლოვაკეთში


საქართველოს 7-ქალა ნაკრებმა სლოვაკეთში გამართულ რაგბი ევროპის კონფერენც დივიზიონი მესამე ადგილზე დაასრულა და ‘ალაფაზე’ აღზევებამდე სულ ცოტა დააკლდა.
კოშიცეში გამართული ტურნირის პირველ დღეს გოგონებმა ჯგუფური ეტაპის ორი თამაში მოიგეს: სადებიუტო შეხვედრაში ავსტრიას 3 ლელო დაუდეს და დაძაბულ ბრძოლაში 19:14 სძლიეს, ხოლო მეორე მატჩში ბოსნია ჰერცოგოვინასთან 4 უპასუხო ლელო მიითვალეს, 24:0 იმარჯვეს და თასის მეოთხედფინალში თამაში ნაადრევად დაიბევეს. ჯგუფური ეტაპის დასკვნით მატჩში ჩვენს 7-ქალას დანიამ 17:5 აჯობა.
მეორე დღის პირველ მატჩში ჩვენი გოგონები ანდორას შეხვდნენ, რომელმაც პირველი დღე დაუმარცხებლად - 2 მოგებით და ერთი ფრით დაასრულა. მიუხედავად იმისა, რომ 2 წუთით მოედანზე კაცნაკლულები ვიყავით, ანდორელებს 3 უპასუხო ლელოთი ვძლიეთ (17:0) და ნახევარფინალში ნაცნობ ავსტრიას შევხვდით, რომელმაც ერთი საათით ადრე ხორვატიას მოუგო (22:0).
ჯგუფური ეტაპის მსგავსად, ავსტრიელებთან მატჩი ახლაც დაძაბული გამოდგა, მეტოქემ 3 ქულის სხვაობით, 10:7 იმარჯვა და თასის ფინალში გასვლით ‘ალაფის’ საგზურიც მოიპოვა. საქართველო მესამე ადგილისთვის ასევე ჯგუფიდან ნაცნობ მეტოქეს, დანიას შეხვდა, წინა დღის მარცხისთვის რევანში აიღო და 7:5 იმარჯვა, რითაც სლოვაკეთში მესამე ადგილი დაიკავა.
შეგახსენებთ, შარშან კონფერენც დივიზიონში ჩვენი გუნდი მე-5 ადგილზე გავიდა, წელს კი ორი პოზიციით დაწინაურდა.

ჩვენმა 7-ქალამ კოშიცეში ასეთი შემადგენლობით ითამაშა:

ქეთევან მოდებაძე, სალომე საღარაძე, ნიკოლ გალუზინსკაია, ლოსანა ფოლადაშვილი, ნინო ტაბატაძე, ირმა გულიაშვილი, თინათინ პაპუაშვილი, მარიამ გოგუაძე, სალომე სირაძე, ნანი სირაძე, თამარ მანაგაძე, თინათინ სიხარულიძე.

მწვრთნელები: ჯაბა მალაღურაძე, გიორგი მაისურაძე

ბორჯღალოსნებმა კანადის ნაკრები მისსავე მიწაზე 13:0 დაამარცხეს და 2017 წლის ივნისის ტესტ-სერია მოგებით გახსნეს.

ესაა ქართველების პირველი გამარჯვება ჩრდილოეთ ამერიკიში. კანადასთან სტუმრად აქამდე ორჯერ გვქონდა ნათამაშები, ორივეჯერ მნიშვნელოვნად გადახალისებული შემადგენლობით. ამჯერად მილთონ ჰეიგმა ოკეანის გაღმა თითქმის ოპტიმალური შემადგენლობა წაიყვანა, ამ შეხვედრისთვის მხოლოდ რამდენიმე მორაგბე მოისაკლისა და ისტორიულმა გამარჯვებამ არ დააყოვნა.

#კაჭი100

კანადასთან ტესტში მე-100 კეპი მოიხვეჭა და მეორე ქართველი ცენტურიონი გახდა დავით კაჭარავა. პირველმა ცენტურიონმა მერაბ კვირიკაშვილმა მეტოქეს ლელო დაუდო და გარდასახა, ორი ჯარიმა გაუტანა და ბორჯღალოსნების 13-ივე ქულა საკუთარ ანგარიშზე ჩაიწერა.
ქალგარი არამეგობრულად დაგვხვდა და შეხვედრა ძლიერ ქარსა და წვიმაში წარიმართა. სუსხმა და გარემო პირობებმა თამაშს თავისი კვალი დაამჩნია და ის სანახაობრივი ვერ გამოდგა. ხშირი იყო ტექნიკური წუნი, განსაკუთრებით ბურთის წინ დავარდნა, თუმცა შერკინებაში ბორჯღალოსნები უდიდეს უპირატესობას ფლობდნენ და უმრავლეს შემთხვევაში ეპიზოდი ჯარიმით სრულდებოდა.
პირველ ტაიმში პირქარში მოგვიწია თამაში. კანადელებმა ტაქტიკა ფეხით თამაშზე და ქართველების შეცდომებზე ააგეს. ამან გაამართლა, შეცდომები მართლაც მრავლად იყო, თუმცა მასპინძლებმა მისი გამოყენება ვერ მოახერხეს, რადგან ღია თამაშში ქართველთა დაცვამ უკან არ დაიხია.
ანგარიში კვირიკაშვილმა დებიუტშივე ჯარიმით გახსნა. შესვენებამდე დაგვიშავდა და შევცვალეთ ორი მორაგბე - ბურჯი ანტონ ფეიქრიშვილი და მესამეხაზელი გიორგი თხილაიშვილი.

მეორე ტაიმში ქარი ჩვენს სასარგებლოდ ქროდა და ახლა ჩვენ გამოვკეტეთ მეტოქე მისსავე ნახევარზე. დებიუტში კვირიკაშვილმა კიდევ ერთი ჯარიმა გაიტანა. საქართველომ დროის უმეტესი ნაწილი შეტევაში გაატარა, თუმცა ლელომხოლოდ მატჩის მიწურულს ვიხილეთ: გიორგი ბეგაძემ ბურთი ფეხით მეტოქის ლელოს ხაზთან გადაკიდა, მცველმა მისი შემაგრება ვერ მოახერხა და კვირიკაშვილმა დაამიწა. მანვე გარდასახვა ზუსტად შეასრულა და დარჩენილ 3 წუთში ანგარიში აღარ შეცვლილა - 13:0.

ახლა ბორჯღალოსნები აშშ-ში გადაინაცვლებენ და თბილისის დროით 18 ივნისს, გამთენიის 3 საათზე ‘არწივებს’ ატლანტაში შეერკინებიან.