ქართული რაგბი

მალხაზ ურჯუკაშვილი: გუნდებს აძალებენ არჩევნებზე ტყემალაძეს მიეცით ხმაო და ამათ სურთ რაგბის გ საქართველოს რაგბის კავშირის საარჩევნო ყრილობა 10 მარტს “ექსპო ჯორჯიას” საგამოფენო დარბაზში გაიმართება. არჩევნე...

400-მა ვეტერანმა მორაგბემ ირაკლი აბუსერიძის მიმართ მხარდაჭერა ხელმოწერით დააფიქსირა 400 ვეტერანმა მორაგბემ ირაკლი აბუსერიძის მხარდაჭერა ხელმოწერით დააფიქსირა

ირაკლი აბუსერიძე VS იოსებ ტყემალაძე

როგორც მოგეხსენებათ, 22 თებერვალს ცნობილი გახდა, რომ საქართველოს რაგბის კავშირის პრეზიდენტობისთვის იოსებ ტყემალაძე იბრძოლებს. რაგბის კავშირის ოფიციალურ გვერდზე მხოლოდ ის ეწერა, რომ ტყემალაძე პრეზიდენტობის კანდიდატად დარეგისტრირდა და იქვე ეწერა იმ კლუბების ჩამონათვალი, რომლებმაც ის წარადგინეს.

გულშემატკივრების დიდ ნაწილს მაშინვე ის კითხვა გაუჩნდა, „ვინ არის იოსებ ტყემალაძე“? შეკითხვა, რომელიც აბსოლუტურად ლეგიტიმურია, რადგან ტყემალაძე მორაგბეების და მწვრთნელების დიდი ნაწილისთვის აქამდე უცნობი პიროვნება იყო. სარაგბო სამყაროში მისმა გვარმა საჯაროდ პირველად 28 დეკემბერს, 30 დეკემბერს ჩანიშნულ არჩევნებამდე ორი დღით ადრე გაიჟღერა, როდესაც „საინიციატივო ჯგუფის“ წევრებმა განაცხადეს, რომ ის და გივი ჭიჭინაძე მუნიციპალურ კლუბებზე ახდენდნენ ზეწოლას, რათა არჩევნებზე არ გამოცხადებულიყვნენ და ქვორუმი არ შემდგარიყო, თუმცა როგორც იცით, 30 დეკემბრის არჩევნებზე ქვორუმი შედგა და პრეზიდენტად ირაკლი აბუსერიძე აირჩიეს, რომელიც შემდეგ საჯარო რეესტრმა არ დაარეგისტრირა და ამან დიდი კითხვები გამოიწვია. ვეტერანი მორაგბეების მხრიდან არაერთხელ გაისმა, რომ მაღალჩინოსნებმა რეესტრის საქმეებში „ხელები აფათურეს“ და წნეხის ქვეშ მოაქციეს.

ამ დროის განმავლობაში აბუსერიძის გუნდის მხრიდან ბევრჯერ გაჟღერდა, რომ გადადებული არჩევნების ჩაშლა ბაჩო ხურციძეს იმიტომ სურდა (ბაჩო ხურციძემ საჩივარი შეიტანა საჯარო რეესტრში, რათა 30 დეკემბრის არჩევნები არალეგიტიმურად ეცნოთ) რომ ახალ არჩევნებში ტყემალაძე შემოეყვანა. როგორც ზემოთ დავწერეთ იოსებ ტყემალაძე მართლაც ჩაება რაგბის კავშირის პრეზიდენტობისთვის ბრძოლაში.

ამის შემდეგ, 30 იანვარს ძველმა გამგეობამ ონლაინ სხდომა მოიწვია, რომელიც დაძაბულ ვითარებაში წარიმართა, რადგან გამგეობის წევრების უმრავლესობას ექს-პრეზიდენტი გოჩა სვანიძე დაუპირისპირდა, რომელსაც ბოლოს კითხვის დასმასაც არ აცდიდნენ და თავად დატოვა „ზუმი“. გამგეობამ კი ის გადაწყვეტილება მიიღო, რაც სურდა - ჩანიშნა ახალი არჩევნები 24 თებერვალს, იქამდე, სანამ საჯარო რეესტრი საკუთარ გადაწყვეტილებას გამოაცხადებდა. ირაკლი აბუსერიძის გუნდმა კი პირველივე დღეს ამ არჩევნებს დე ფაქტო და არალეგიტიმური უწოდა.

მთავარი ის იყო, რომ ამ არჩევნებზე ახალ კანდიდატს შეეძლო შემოსვლა. ისიც უცნაური იყო, რომ კანდიდატურის დარეგისტრირების ბოლო ვადად 23 თებერვალი დასახელდა. ანუ, გამგეობის აზრით, კანდიდატს საზოგადოებისთვის პროგრამის გაცნობადა სხვა აქტივობები არ სჭირდებოდა, რაც გულშემატკივრებისთვის ძალიან გასაკვირი იყო. ისიც გასაკვირი იყო, რომ 22 თებერვლამდე კანდიდატებზე არაფერი იყო ცნობილი, ხოლო ამ უცნაური სერიების აკორდი ახალი და უცნობი კანდიდატის გამოჩენა იყო, თანაც იმ მხარის მიერ წარდგენილი კანდიდატი, რომელიც აქამდე ბაჩო ხურციძეს უჭერდა მხარს, ადამიანს, რომელმაც ჯერ კიდევ 2019 წლის სექტემბერში დაანონსა, რომ პრეზიდენტობისთვის იბრძოლებდა, ორჯერ გამოუცხადა არჩევნებს ბოიკოტი, შემდეგ საჯარო რეესტრში შეიტანა სარჩელი, რომ ირაკლი აბუსერიძის პრეზიდენტად დარეგისტრირება არ მომხდარიყო და საბოლოოდ გამოვიდა, რომ სხვა კანდიდატისთვის იბრძოლა.

სხვადასხვა მედია საშუალებებში არსებული ინფორმაციით, ახლადგამოჩენილი კანდიდატი ბატონი იოსებ ტყემალაძე ბიზნესმენია და ის არის ყოფილი პრემიერ-მინისტრის ბიძინა ივანიშვილის ნდობით აღჭურვილი პირი, რომელსაც ჩაბარებული აქვს წყალტუბოს და აბასთუმნის პროექტები. არ გეგონოთ, რომ ამბის პოლიტიზირებას ვახდენთ, უბრალოდ იმას ვწერთ, რაც ცნობილია: გუშინდელამდე საძიებო სისტემა გუგლში მხოლოდ ორი ფოტო მოიპოვებოდა და ორივე ბატონ ბიძინა ივანიშვილთან ერთად. ასე რომ, ამ პოსტში ჩვენ შევეცდებით გავცეთ პასუხი კითხვას, რატომ არის სოსო ტყემალაძე რაგბის კავშირის პრეზიდენტობის კანდიდატი, რა დამსახურებისთვის? შესაძლოა, იოსებ ტყემალაძეს რაგბი ძალიან უყვარდეს და მისი წარმატება სურდეს, თუმცა მოდი დავფიქრდეთ, რაგბის რამდენი გულანთებული გულშემატკივარია საქართველოში? რამდენ ადამიანს სურს რაგბის წინსვლა და რამდენია ისეთი, რომელსაც შესაძლოა, ჯანსაღი იდეები ჰქონდეს რაგბის განვითარებისთვის? მაგრამ, ექნება უბრალო გულშემატკივარს რაგბის კავშირის პრეზიდენტობის კანდიდატად დარეგისტრირების შანსი? რა თქმა უნდა, არა! უბრალო გულშემატკივარს ამის საშუალებას არავინ მისცემს, ამაშია საქმე.

30 დეკემბერს რაგბის კავშირმა უკვე აირჩია პრეზიდენტი, რომელიც რეესტრმა არ დაარეგისტირა, თუმცა როგორც ცნობილია, სამართლებრივ ჭრილში საქმის განხილვა გაგრძელდება და საქმე სასამართლოში წავა, ხოლო 24 თებერვალს კიდევ ერთი ყრილობაა ჩანიშნული და შესაძლოა, რაგბის კავშირს სულ მალე ორი არჩეული პრეზიდენტი ჰყავდეს.

ამ პოსტში, ჩვენ სწორედ ამ ორ პიროვნებას, ირაკლი აბუსერიძის და იოსებ ტყემალაძის სარაგბო საქმიანობას განვიხილავთ ამ დრომდე: რა გზა გამოიარეს, რა მიღწევები აქვთ რაგბის კუთხით, რა გაუკეთებიათ ქართული რაგბისთვის, რა ჯგუფი უჭერს მათ მხარს და ა.შ.

ირაკლი აბუსერიძის სპორტული მიღწევები

ირაკლი აბუსერიძე 2000-2013 წლებში საქართველოს ნაკრების წევრი იყო;
მან ნაკრებში 85 კეპი მოიხვეჭა და 8 ლელო დადო;
ითამაშა სამ მსოფლიო თასზე (2003, 2007, 2011);
პირველი ქართველი მორაგბე ისტორიაში, რომელმაც 80 კეპი მოიხვეჭა;
ნაკრების კაპიტანი 2008 წლიდან 2013 წლამდე;
„ბორჯღალოსნების“ კაპიტანი 39 მატჩში, რაც სარეკორდო მაჩვენებელია;
რაგბი ევროპის ჩემპიონატის 6-გზის ჩემპიონი;
ღირსების მედლის მფლობელი;
ღირსების ორდენის მფლობელი;
სპორტის რაინდის წოდების მფლობელი;

„რაინდის წოდება არის ის წოდება, რომელიც უმაღლესი არის უმაღლესი ჯილდო, რაც გააჩნია სპორტის და ახალგაზრდობის საქმეთა სამინისტროს, იმ ღვაწლისთვის, რასაც გასწევს სპორტსმენი, ეს იქნება ვეტერანი სპორტსმენი თუ მოქმედი სპორტსმენი და კიდევ ერთხელ მინდა, რომ ირაკლი აბუსერიძეს მადლობა გადავუხადო სამინისტროს სახელით და გულშემატკივრების სახელითაც“, - განაცხადა სპორტის და ახალგაზრდობის საქმეთა ყოფილმა მინისტრმა ლევან ყიფიანმა ირაკლი აბუსერიძისთვის რაინდის წოდებით დაჯილდოების შემდეგ (2013 წელი).

იოსებ ტყემალაძის სპორტული მიღწევები

იოსებ ტყემალაძეს სარაგბო საზოგადოება, გულშემატკივარი მხოლოდ ახლაღა იცნობს. როგორც გაირკვა, უფრო სწორად თავად განაცხადა ტელეკომპანია „რუსთავი 2“-ის ეთერში, ის წარსულში მორაგბე არ ყოფილა და შესაბამისად, მის სპორტულ მიღწევებზე ვერ ვისაუბრებთ.

ირაკლი აბუსერიძის საქმიანობა სარაგბო მენეჯმენტში და მის მიერ განხორციელებული სარაგბო აქტივობები

რაგბის კავშირის სპორტული დირექტორი 2013 – 2015 წლებში;
შეასრულა ერთ-ერთი მნიშვნელოვანი როლი საქართველოს ნაკრებში შერკინების ცნობილი ფრანგი მწვრთნელის დიდიე ბესის ჩამოყვანაში, რომლის ხელმძღვანელობითაც ქართულმა შერკინებამ ბრწყინვალე შედეგი აჩვენა 2015 წლის მსოფლიო თასზე და ძლიერმა შერკინებამ, დიდი როლი ითამაშა იმაში, რომ „ბორჯღალოსნებმა“ 2 გამარჯვება მოიპოვეს;
შეიტანა მნიშვნელოვანი წვლილი რუსთავის „ხარებს“ და ფრანგულ „კლერმონს“ შორის ურთიერთმემორანდუმის გაფორმებაში;
2018 წელს ვაზისუბანში აშენდა „არმაზის“ სარაგბო ბაზა, რომლის ერთ-ერთი მთავარი ინიციატორი ირაკლი აბუსერიძე იყო;
2020 წელს თბილისის #156-ე ბაგა-ბაღში სარაგბო მოედანი გაიხსნა. ეს იყო პირველი შემთხვევა, როდესაც საქართველოში ბაგა-ბაღში რაგბის შეტანა მოხდა და სარაგბო მოედანი გაიხსნა. პროექტის ავტორი ირაკლი აბუსერიძეა;

იოსებ ტყემალაძის საქმიანობა სარაგბო მენეჯმენტში და მის მიერ განხორციელებული სარაგბო აქტივობები

იოსებ ტყემალაძეს აქამდე რაგბის მენეჯმენტის კუთხით არ უმუშავია, თუმცა ჩვენთვის არსებული ინფორმაციის მიხედვით, ის „ლელო სარასენსთან“ დაახლოებული პირია და როგორც ვიცით, ამ კლუბს სხვადასხვა გზებით ეხმარებოდა, მათ შორის ფინანსურადაც. „თუ წარმატებული კლუბია „ლელო“, ერთ-ერთი კონტრიბუტორი მეც ვარ ამაში. აქედან ვიცნობ კარგად კლუბის მენეჯმენტს, მის საჭიროებებს, რა თანხებია საჭირო… ამაში ცუდს ვერაფერს ვხედავ. უმძიმესი წლები იყო, სადაც ბიჭებს არ ჰქონდათ მოედნები და ადეკვატური პირობები. ვეხმარებოდით ფინანსურადაც, შედგა პროცესი და შემდეგ უკვე კონტაქტებით და უნარ-ჩვევებით ვეხმარებოდი საქართველოს რაგბის კავშირს, როგორც ნიჟარაძის, ისე სვანიძის პერიოდში და სრულ თანადგომას ვუცხადებდი. ცხადია, მზად ვიყავი, კავშირის მომავალ მენეჯმენტთანაც მქონოდა ამ ფორმის ურთიერთობა, თუმცა, სამწუხაროდ, პროცესები მშვიდობიანად არ წავიდა“ , - განაცხადა "პირველი არხისთვის" მიცემულ ინტერვიუში ბატონმა ტყემალაძემ.

სხვა სარაგბო აქტივობების მხრივ, იოსებ ტყემალაძეზე არანაირი ინფორმაცია არ გაგვაჩნია და საძიებო სისტემაშიც არ იძებნება.

ვინ უჭერს მხარს კანდიდატებს?

ირაკლი აბუსერიძის მხარდამჭერები

ირაკლი აბუსერიძის მხარდამჭერებში მოიაზრებიან საქართველოს ნაკრების ლეგენდარული მორაგბეები და კაპიტნები: ილია ზედგინიძე, დავით ზირაქაშვილი, ლევან ცაბაძე, ირაკლი მაჩხანელი, შალვა სუთიაშვილი, თედო ზიბზიბაძე, აქვსენტი გიორგაძე, გოდერძი შველიძე, მალხაზ ურჯუკაშვილი, ვიქტორ კოლელიშვილი, პალიკო ჯიმშელაძე, გიორგი შკინინი, ვიქტორ დიდებულიძე, ლევან დათუნაშვილი, რევაზ გიგაური და სხვა დამსახურებული მორაგბეები.

ირაკლი აბუსერიძის გუნდში არიან პერსპექტიული და წარმატებული მწვრთნელები, მენეჯერები, როგორებიც არიან: გიორგი ზაბახიძე, რომელმაც „იუნკერები“ უმაღლეს ლიგაში გადაიყვანა და ბრძოლისუნარიან გუნდად აქცია, რომელიც დიდი შანსია, საჩემპიონო ექვსეულში ვიხილოთ. ლევან ობოლაძე, რომელმაც „აკადემია“ საძირკველიდან ააშენა და დღეს ეს გუნდი ჩემპიონობისთვის იბრძვის. სიმონ მაისურაძე, რომელიც რაგბის კავშირის მაღალი მიღწევების მენეჯერი იყო. ამავე გუნდშია კვალიფიციური ფინანსისტი, ვეტერანი „ბორჯღალოსანი“ სანდრო საკანდელიძე.

იოსებ ტყემალაძის მხარდამჭერები

იოსებ ტყემალაძის მხარდამჭერებში მოიაზრებიან პირველ რიგში გამგეობის წევრები: ბათუ კევლიშვილი, ლევან ვასაძე, გია კობახიძე, ალექსანდრე გრიგალავა, ზურა ზოიძე, ერეკლე ტრიპოლსკი და კიდევ ოთხი წევრი. გარდა ამისა, როგორც ცნობილია, მას მხარს უჭერს ნაკრების მოქმედი მთავარი მწვრთნელი ლევან მაისაშვილი, რომლის მეჯვარეც სწორედ ტყემალაძეა. ასევე ტყემალაძის მხარდამჭერთა შორის არიან რაგბის კავშირის ყოფილი პრეზიდენტები გია ნიჟარაძე და მერაბ ანთაძე, საშეჯიბრო კომიტეტის ხელმძღვანელი ნიაზ მამრიკიშვილი და პრეზიდენტობის ყოფილი კანდიდატი ბაჩო ხურციძე. ყოფილი „ბორჯღალოსნებიდან“ საჯაროდ ამ გუნდს მხარდაჭერა ნოდარ ანდღულაძემ და ლექსო გუგავამ გამოუცხადეს, სხვა ფაქტი, რომ საჯაროდ ნაკრების რომელიმე ვეტერანს გამგეობასთან დაკავშირებული კანდიდატისთვის მხარი დაეჭიროს, საზოგადოებისთვის უცნობია.

მიზნები

ირაკლი აბუსერიძის გუნდის მიზნები

წელიწადზე მეტია, რაც ირაკლი აბუსერიძე და მისი გუნდის წარმომადგენლები ამბობენ, რომ განსაკუთრებული ყურადღების დათმობას ბავშვთა რაგბის განვითარებაზე აპირებენ. ასევე უმიზნებენ ფრენჩაიზის შექმნას, საკლუბო რაგბის გაძლიერებას და რეგიონალური რაგბისთვის მეტი ყურადღების მიქცევა, ხოლო ოთხწლიანი ციკლის უმთავრესი პრიორიტეტი მსოფლიო რაგბის რეიტინგის ათეულში მოხვედრა ან მაქსიმალურად მიახლოებაა. ასევე ერთ-ერთი უმთავრესი მიზანია საერთაშორისო ურთიერთობების გაღრმავება „მსოფლიო რაგბთან“, რათა მოხდეს უფრო მეტი გრანტის მოზიდვა, რომელიც მოხმარდება ადგილობრივ პროექტებს და ასევე უცხოურ კლუბებთან ურთიერთობების გაუმჯობესება, ურთიერთმემორანდუმების გაფორმება ფრანგულ კლუბებთან, რისი რესურსიც ნამდვილად არსებობს, იქიდან გამომდინარე, რომ აბუსერიძის გუნდში ავტორიტეტული ქართველი მორაგბეები მოიაზრებიან, რომლებიც ახლაც ფრანგულ კლუბებში მუშაობენ და მზად არიან, რომ ყველანაირად დაეხმარონ აბუსერიძის გუნდს რაგბის განვითარებაში.

იოსებ ტყემალაძის მიზნები

ამ მხრივ საუბარი ცოტა გაგვიჭირდება, რადგან ის ასპარეზზე მხოლოდ 22 თებერვალს გამოჩნდა და მის საარჩევნო პროგრამას არ ვიცნობთ, არც ის ვიცით, არსებობს თუ არა. ბატონი იოსების საუბარში რაც მოვისმინეთ, უცხო არ ყოფილა, მისი მიზანიც საკლუბო რაგბის გაძლიერებაა, ფრენჩაიზის შექმნა, ბავშვთა რაგბის განვითარება და ა.შ.

თუმცა, ჩვენ ყურადღება ერთ რაღაცაზე გვინდა გავამახვილოთ. მან გუშინ „რუსთავი 2“-ის ეთერში გადაცემა „სპორტის საათში“ გააჟღერა ასეთი რამ: „ჩვენ უნდა დავიწყოთ დიდ გეგმაზე მუშაობა, რომელსაც ჰქვია მსოფლიო ჩემპიონობისკენ სვლა.“ მისი თქმით, ეს გეგმა შესაძლოა იყოს 15-20 წლიანი. ჩვენც გვქონდა ინფორმაცია, რომ ბატონი ტყემალაძე აპირებდა 25-წლიანი გეგმის შემუშავებას, რომლის მიზანიც მსოფლიო ჩემპიონობა იქნებოდა.

მსოფლიო ჩემპიონობა ყველა გულშემატკივრის ოცნებაა, მაგრამ ერთია ოცნება და სურვილი, მეორე კი - რეალობა. ნებისმიერი რაგბიში ოდნავ გარკვეული ადამიანი (არ სჭირდება ამას მწვრთნელის, მორაგბის და სარაგბო ექსპერტის თქმა) კარგად მიხვდება, რომ ეს არის უტოპია და ტყუილი დაპირება, რომელიც შესაძლოა გამოწვეული იყოს იმისგან, რომ ადამიანს გაცნობიერებული არ ჰქონდეს რაგბის სპეციფიკა და სირთულეები, ან უბრალოდ პოპულისტური განცხადების გაკეთება სურდეს, რითაც შესაძლოა ხალხის იმ მასაზე სურდეს შთაბეჭდილების მოხდენა, რომელიც რაგბიში იმდენად კარგად ვერ ერკვევა და ჰგონია, რომ რუსეთთან რეგულარული მოგებები იმას ნიშნავს, რომ საქართველო ტოპ დონის გუნდია.

მკითხველისთვის ძალიან მარტივ მაგალითს მოვიყვანთ: რაგბის მსოფლიო თასი 1987 წელს დაარსდა და მას შემდეგ ჩატარდა 9 ტურნირი. სამ-სამჯერ მსოფლიო ჩემპიონები სამხრეთ აფრიკა და ახალი ზელანდია გახდნენ, ორჯერ ავსტრალია და ერთხელ ინგლისი. წარმოიდგინეთ, შოტლანდიის ნაკრებმა პირველად შორეულ 1871 წელს ითამაშა, ქვეყანას აქვს 150-წლიანი სარაგბო ისტორია და ფინალშიც კი არ გასულა მსოფლიო თასზე. იგივეს თქმა შეგვიძლია უელსზე და ირლანდიაზე. ირლანდია საერთოდ მეოთხედფინალზე შორს არ წასულა, მიუხედავად იმისა, რომ თითქმის 150 წელია რაგბის თამაშობს და უდიდესი წარმატებები აქვს მოპოვებული, უდიდესი მორაგბეები ჰყოლია. არც საფრანგეთს მოუგია მსოფლიო თასი, არც არგენტინას. იტალია, რომელიც რაგბიში საკმაოდ დიდ რესურსს ხარჯავს, არასდროს გასულა ჯგუფური ეტაპიდან და იაპონიის ნაკრები, რომელსაც უდიდესი ფინანსური რესურსი და სხვა შესაძლობლები გააჩნია და 1987 წლიდან თამაშობს მსოფლიო თასზე, 2019 წელს პირველად გავიდა მეოთხედფინალში.

ქართული რაგბის განვითარება 2000-წლიანები დასაწყისიდან გავიდა და პროგრესირებს, მაგრამ ბოლო წლებში არ პროგრესირებს იმ ტემპით, როგორითაც იგივე იაპონიის ნაკრები. გავიხსენოთ 2014, 2015 და 2016 წლების მატჩები, ვიხილეთ ორი თანაბარი გუნდის ასპარეზობა და რა ვნახეთ უკვე 2018 წელს? 0:28 იაპონიის სასარგებლოდ, შემდეგ კი მსოფლიო თასზე იაპონელთა საოცარი თამაში და ჩვენი ნაკრების სუსტი გამოსვლა. არ გვაქვს ძლიერი საკლუბო ჩემპიონატი და არ არსებობს იმის რესურსი, რომ მკვეთრად მოხდეს მისი გაძლიერება, იგივე ლეგიონერების ჩამოყვანის რესურსი, არ გვყავს ფრენჩაიზი და ამ გადმოსახედიდან უახლოეს წლებში უმაღლესი დონის ტურნირზე ჩართვა ურთულესი საქმეა. მოკლედ, რაგბიში ჩახედული გულშემატკივრებისთვის, 15 და 20 წელში მსოფლიო ჩემპიონობაზე ფიქრი უტოპიაა და ვინც ამას იტყვის, ან რაგბისგან შორსაა ან კიდევ პოპულისტური განცხადების გაკეთება სურს, სხვანაირად ამას ვერაფრით ავხსნით და ამგვარი განცხადებებით, რაგბის გულშემატკივრების ნდობის მოპოვება ვერ მოხერხდება.

მოკლედ რომ ვთქვათ, „პური მეპურემ უნდა გამოაცხოს“ - ანუ რაგბი მორაგბემ უნდა მართოს ან მინიმუმ ისეთმა პირმა, რომელსაც რაგბის სტრუქტურასთან შეხება ჰქონია, მისი საქმიანობის და მის მიერ გაკეთებული პროექტების შესახებ გულშემატკივრებმა იციან და ყველაზე მინიმუმ, გულშემატკივრები უბრალოდ სახეზე ცნობენ მას და არ კითხულობენ პრეზიდენტის კანდიდატზე „ეს კაცი ვინ არისო“?

[VIDEO. რაგბი. აქცია კანცელარიასთან] ქვეყანას მიხედეთ, ჩვენ რაგბს მივხედავთ! საქართველოს სახელმწიფო კანცელარიასთან ირაკლი აბუსერიძის მომხრეების აქცია, bdquoჩემი მხარდაჭერა კაპიტანს პროტეს.....

ვითარება რაგბის კავშირში ▪️ რაგბის კავშირში მიმდინარე პროცესსა და დაპირისპირებაზე მალე დიპლომატიური კორპუსი იქნება ინფორმირებული📣 გა.....