CoachRuben WildboarLifting

應承了自己在今年開始，要好好將自己的想法及感受表達出來，所以就由發佈一篇早係2022年已寫下的文章開始。

鑽研運動同人既身體耐左，就會發現生理同心理有時都好似，尤其是當中身體受傷、痛楚、復原機制，以及人面對受傷嘅時候嘅各種處理做法。

只求止痛止果及避開未來所有受傷的風險
痛楚真係一樣好複雜既訊號。唔係話痛就代表受傷，亦唔係傷口愈合左就代表無痛楚，亦唔係唔痛就代表功能正常，有時都需要更多既時間同耐性，亦有時唔只需要時間。

而大部份人係欠缺知識同面對痛楚的經驗下，第一個直覺應對都係：點樣去令痛楚這個感覺消失。即係太過俾個痛楚去帶住自己處理既方法，只係識諗點樣減輕痛楚。在意的，只是當下的果。

所以會買埋啲傻鳩護具或停止任何嘅動作，又或停止任何的人生經歷，覺得總會像上一次一樣，受傷收場。
 
但會痛嘅往往係受害者，而唔係加害者，不斷去舒緩個痛其實係冇撚用，所以麻煩大家咪撚再買按摩椅，你一張按摩椅夠同我買50堂(置入式廣告)。

甚麼的痛及傷要找出成因並修正? 甚麼的痛及傷不用解釋及檢討?

可能我們往往都易落在極端的一邊，扮演無辜的受害者，所以沒有自己的事去反思及學習改變，又或者自責不已，連好好放過自己都做不到。

痛楚有時係代表人類動作系統有功能異常，所以反而應該係要諗自己一直以來有咩嘢係無能為力，專心去創造返嗰個能力出嚟，原來就會自然唔痛。

但點解我講痛及傷係好複雜，就係佢又唔一定係身體機能失衡。亦都真係可以你所有功能正常，只係因為有純粹意外，即係你經歷親人過世。咁又確實係冇嘢需要去查去學 ，只需要時間慢慢癒合。

時而逃避，時而強求
好多人以為係唔好彩/解釋唔到的事件導致受傷。所以好多人復完後，就咁由佢就算。但其實所有傷過嘅地方都會更容易再受傷，所以真係唔可以就咁算，好返少少就逃避囉。

可以係唔去搞自己的生活、飲食、訓練方式的問題。亦可以係始終都不面對自己的某段關係、內心的恐懼、

逃避的對面是執著：有一些傷，就算付出了無窮的時間、錢及心力，就係唔可以100%復原，強求又會是另一痛苦，或者是浪費自己人生的時間，或訓練量。

知識固然會幫我們找到大致的平衡，餘下的是個人智慧及決定。

執行及其困難
自身錯誤嘅模式/過弱的部份 》受傷(事件)  》傷口。所以更加要搵出錯誤的模式去修正，同埋強化因受傷弱左既部份，再鬆綁返其他因為受傷而暫時緊張左既部分， 例如因為後悔決定帶來的overthinking 、俾背叛過後對別人的過份警戒、斷左某樣野後既附近的肌肉。

係放鬆部份，係要一層一層咁處理落去，冇得跳step，唔處理第一層都唔知道原來第二層係咁。

強化過弱部份、修正錯誤模式、鬆綁代償部份。其實三者又係缺一不可，我諗做到其中兩樣已經好犀利。但無論係身體定心理，現代都市人又點會有嗰個時間、心機、知識(情緒智商)、金錢和周圍嘅幫助，去處理好每一次受傷嘅事件。

社會的急速推每個人做社會運作機器的零件，所以我們就只可亦習慣對自身的一切草草了事。

我都成日諗，啲人成日話要去追逐夢想

如果冇夢想，人生係咪就冇意義呢？會唔會冇夢想，活好每一日，感受下啖飯喺自己個口嘅感覺，已經覺得好充實好有意義呢？

夢想既可怕唔係在於難以完成，雖然都係。而係在於去滿足不斷嘅慾望，而不是滿足於現有的野。

夢想，好多時只係社會和關係的期待，甚至要求，都係想你消費。

或者人總會俾一堆to do list 及夢想俾自己，覺得做左先叫有好好經歷同完成人生。

但就算做不到，
我們的人生都已經係完整。

教練行業，可以係好單打獨鬥，亦唔易搵到同自己差不多訓練理念的教練。

搵到啱傾既教練，可以一齊講下
1. 教學上的困難。
2. 遇到的特別個案。
3. 互相學習下。
4. 笑下啲痴線/呃錢既人。
5. 講下自己啲訓練。

係真心正既。

我諗五年前你仲會見到健身室公司呢，係會用有免費身體成分測試嚟做宣傳賣點。今日康文署都有了。

所以話世界真係變得好快，行慢半步都出事。

(更多例子：你今日再去學stick mobility拍片講其動作係咪真係有人睇)

始終健身教練呢一項係直接面對個市場同消費者，所以行業嘅運作情況對以下嘅變化反應好快：

知識的普及化、潮流嘅變化、消費能力嘅變化，宣傳工具包括但不限於演算法嘅變化，硬件或者技術嘅普及與創新，健身產業從業員的進進出出

所以其實其中一個做教練嘅核心能力，我會覺得係學習能力、心理的適應力及實踐能力。你可以真係要接受一樣嘢就係你今年做緊work嘅嘢，下年就冇咁work，你可能係要改曬啲做法。

所以如果你嚟緊係考慮做健身教練，我都會建議你諗下你自己鍾意不鍾意呢種變化咁多，好似好同時間競爭嘅模式。