24/06/2026
主角Mary Stephen 雪美蓮是位在港出生的100%華人，卻從父親身上繼承了西方姓氏。同時係資深剪接師的她將佢搵真相嘅過程+家庭錄像拍成呢套紀錄片。
認識得我耐嘅朋友，就會明白點解我想睇呢套戲，因我都一樣有個西方姓。當我去搵家族歷史，去問長輩嘅時候，都會好似Mary 咁聽到兩三個版本。我亦都係由細到大被人問點解個名係咁。所以呢套戲，我係睇得好有共鳴。我都係影後對談同Mary 講左我個故事的簡短版，YEAH。
呢套戲好睇嘅位有好幾樣：
1. 好多珍貴嘅40至60年代舊香港嘅家庭錄像，嗰個年代會自己有錄影機同埋膠片，仲會記低屋企人成長過程及生活片段係好罕有。
而且Mary仲應該有做一些數碼修復曬，靚到一個位係我睇緊嘅時候懷疑係咪AI。
2. 個story telling 係好：既是追憶，亦是尋找回憶中的空白。既有承傳，亦有對照的部份。
身份危機，Mary 係移民去加拿大的華人。Mary 父親就係個在香港的不自認中國人。都係某種異鄉人嘅對照。
呢個尋找自己身份嘅故事，其實亦都係追憶緊自己嘅家庭及成長。
承傳 一
父親係好鍾意電影，鍾意到自己會拍片啦。所以令到mary真係又細到大就睇電影同拍嘢。佢屋企人真係做創作，點會可以寫到個咁長的
承傳二
Mary 係製作這個紀錄片時，都如其父親一樣，加入一些虛構部份。都係某種致敬
3. 「黃皮膚，鬼佬姓」，見到舊殖民地時代，華人為了向上流動，如何將自己西化。創作自己混血兒的身份，及顯赫嘅家族背景，為了在這個華洋混雜嘅地方生存。我覺得呢個都可能係比較後期的原因。
早期的原因，我覺得佢父親就係透個呢種書寫自我的方法，去重新建構自己的身份去治療「中國人」身份破滅、或者亡國的悲傷。同時，亦都有某種叛逆? i dont know。
4. 我好鍾意佢引用波斯詩人Rumi ，係畫龍點睛
Don't be satisfied with stories, how things have gone with others. Unfold your own myth.
片名Palimpsest原指古代的重寫羊皮書卷，改呢個名真係好。
18/06/2026
呢本書個作者叫Dan John ，所以我覺得應該要有一個釘裝嘅版本。
點解呢本書我嘅評分係？，因為佢係一個阿叔講經的書。入面對訓練具體建議既部份不多，兼且係簡單新手向。
咁所以你可以當佢係一本輕鬆讀物去打發時間，而唔係資訊好多的書。
我覺得最有價值嘅部分，都係佢講依從性、訓練紀律、習慣養成的部份。
節錄：「一天就是一生的縮影」
我理解：
如果你今天有做好今天的訓練及飲食，你就比較似係一生都健康。若然沒有，好多籍口，你也許就會一直咁樣落去。
一天就是一生的縮影，所以一生及一天都有不可控的部份，亦有可控的部份。
充分而不過份嘅計劃、學習、流程，確保自己有足夠條件去完成習慣，最後讓一切東西變成無心操作嘅習慣，而不需選擇。
（條件：環境、群體、資訊、專屬時間、工具）本書就係講好多「昨天就要執好個gym bag」「擺第二對跑鞋係office」「旅行就執橡筋繩入喼」呢類野。
做好以上準備，就會有盛餘時間及心力去應付打擾執行計劃的事情。
節錄「減肥最好的方法，就是一開始沒有變肥。」其實佢想講維持身型係遠遠易過減。不過佢outdate啦，而家最好嘅方法係glp1。
「If you chase two rabbit you go hungry」佢係講訓練課表，尤其是中高手向，不可以太貪心，如果想幾樣野一齊進步，就會好容易幾樣嘢都一齊原地踏步。
入面都有一個關於佢對精英運動員嘅觀察幾好
如果你青少年時期，沒有接受運動員嘅生活方式訓練好幾年，及努力訓練自己的專項枝術。
沒有發展出任何基本嘅肌力及體能，並且係呢個過程入面開始見到天份，無論係單一特質並且同時有幾樣特質。
咁其實你成年後先開始認真做運動訓練，你已經冇乜可能成為精英選手。
17/06/2026
呢一個post 都會繼續延續《槓鈴處方：抗老化肌力訓練》嘅一啲節錄及觀點，去延伸討論老年人訓練嘅一啲情況。
Best quote of the book
「有一種看待這件事情的觀點（有些爭議）是這樣的：細胞的預設模式並不是生存，而是死亡，如果你去除其生長因子的刺激，細胞就會自殺。死亡的機制已經設定好了，隨時等待被啟動。這種觀點的目的論、進化論、發展論以及其哲學含意是相當驚人的，但這已超出本書的範圍。」
My note on it
生命嘅單位係細胞，既然細胞存在嘅目的係完成其使命後就是死亡，咁生命都係。
最難既唔係訓練嘅具體內容或者科學上既野，而係要令到中老年人有訓練嘅動力同埋觀念上嘅變化。
節錄：「老化的特徵是肌力、柔韌性和有適應力的生理儲備的喪失，隨之而來的有生長及修復系統衰老、荷爾蒙反應減弱，以及肌肉、神經、肌腱、韌帶和骨骼的流失。這些生理性的萎縮伴隨同樣致命的心智功能下降。常見到的情況是，老化的人看到自己變得愈來愈虛弱，因此降低了對自己的期望以及努力的動機，從而愈發虛弱，這就像是細胞切斷自己的DNA樣。一旦心靈向衰退和死亡投降，那除了受苦以外就什麼都沒有了。」
呢個情況其實好全球性同埋普遍，好多中老年人都覺得「老左就係咁」自己冇用、咩都做唔到，身體每一日只會越來越差。佢地太快就打定輸數，唔相信自己可以變好、可以進步，覺得已經冇辦法。
再難一步嘅，係呢樣嘢要喺生意上係可行，又或者社會上的推廣。
節錄：「現在我們可以知道，為什麼雖然網球、太極拳和排球是很棒的運動，但不適合作為一般運動處方。這些運動不是訓練而是練習。你可以培養技巧，而且不可否認，每一項運動都順便增進了一些身體素質。」
長者做運動已經少咗好多，通常都係停留喺去公園fing個身、fing 隻手。
如果真係認真地做運動，佢哋都會先考慮娛樂性，之後再諗邊樣嘢可以同朋友聯誼。
而好少會現實地想科學上最有效防止退化的訓練。
中老年人就係已經臨近退休或者退咗休，所以消費上都會較為保守，難上手所以要俾錢學嘅運動，加埋又要會籍，就更加唔會考慮。(亦都因為呢個原因，大部份的銀髮族訓練係以小組班形式出現 )
另外，有一種中老年人係打從心底入邊，已經覺得人生最重要嘅嘢已經完成曬。每一刻離開個世界、或者身體差落去、發生意外都冇問題，因為呢個就係人生必輕之苦，自然嘅生老病死，亦都唔強求去做任何事情去改變（包括做運動）。
而對佢嚟講，開開心心活好每一日，例如去茶樓度食啲好明顯高膽固醇嘅點心都冇問題。佢係完全清楚自己嘅決定，並且為此負責嘅。佢就算出現係訓練堂上，都只係因為想陪朋友或者應酬仔女。
呢一類人，我係好尊重嘅，雖然我都會好想同佢講，佢仲有其他可能性可以選擇。
07/01/2026
應承了自己在今年開始，要好好將自己的想法及感受表達出來，所以就由發佈一篇早係2022年已寫下的文章開始。
鑽研運動同人既身體耐左，就會發現生理同心理有時都好似，尤其是當中身體受傷、痛楚、復原機制，以及人面對受傷嘅時候嘅各種處理做法。
只求止痛止果及避開未來所有受傷的風險
痛楚真係一樣好複雜既訊號。唔係話痛就代表受傷，亦唔係傷口愈合左就代表無痛楚，亦唔係唔痛就代表功能正常，有時都需要更多既時間同耐性，亦有時唔只需要時間。
而大部份人係欠缺知識同面對痛楚的經驗下，第一個直覺應對都係：點樣去令痛楚這個感覺消失。即係太過俾個痛楚去帶住自己處理既方法，只係識諗點樣減輕痛楚。在意的，只是當下的果。
所以會買埋啲傻鳩護具或停止任何嘅動作，又或停止任何的人生經歷，覺得總會像上一次一樣，受傷收場。
但會痛嘅往往係受害者，而唔係加害者，不斷去舒緩個痛其實係冇撚用，所以麻煩大家咪撚再買按摩椅，你一張按摩椅夠同我買50堂(置入式廣告)。
甚麼的痛及傷要找出成因並修正? 甚麼的痛及傷不用解釋及檢討?
可能我們往往都易落在極端的一邊，扮演無辜的受害者，所以沒有自己的事去反思及學習改變，又或者自責不已，連好好放過自己都做不到。
痛楚有時係代表人類動作系統有功能異常，所以反而應該係要諗自己一直以來有咩嘢係無能為力，專心去創造返嗰個能力出嚟，原來就會自然唔痛。
但點解我講痛及傷係好複雜，就係佢又唔一定係身體機能失衡。亦都真係可以你所有功能正常，只係因為有純粹意外，即係你經歷親人過世。咁又確實係冇嘢需要去查去學 ，只需要時間慢慢癒合。
時而逃避，時而強求
好多人以為係唔好彩/解釋唔到的事件導致受傷。所以好多人復完後，就咁由佢就算。但其實所有傷過嘅地方都會更容易再受傷，所以真係唔可以就咁算，好返少少就逃避囉。
可以係唔去搞自己的生活、飲食、訓練方式的問題。亦可以係始終都不面對自己的某段關係、內心的恐懼、
逃避的對面是執著：有一些傷，就算付出了無窮的時間、錢及心力，就係唔可以100%復原，強求又會是另一痛苦，或者是浪費自己人生的時間，或訓練量。
知識固然會幫我們找到大致的平衡，餘下的是個人智慧及決定。
執行及其困難
自身錯誤嘅模式/過弱的部份 》受傷(事件) 》傷口。所以更加要搵出錯誤的模式去修正，同埋強化因受傷弱左既部份，再鬆綁返其他因為受傷而暫時緊張左既部分， 例如因為後悔決定帶來的overthinking 、俾背叛過後對別人的過份警戒、斷左某樣野後既附近的肌肉。
係放鬆部份，係要一層一層咁處理落去，冇得跳step，唔處理第一層都唔知道原來第二層係咁。
強化過弱部份、修正錯誤模式、鬆綁代償部份。其實三者又係缺一不可，我諗做到其中兩樣已經好犀利。但無論係身體定心理，現代都市人又點會有嗰個時間、心機、知識(情緒智商)、金錢和周圍嘅幫助，去處理好每一次受傷嘅事件。
社會的急速推每個人做社會運作機器的零件，所以我們就只可亦習慣對自身的一切草草了事。
