大數據預測中心

【英超】2026/27英超列強前瞻
全部資訊: https://www.bdpredict.hk/content/202627EPLPREVIEW

世界盃轉眼就過咗一個月，英超亦已密鑼緊鼓展開新球季。列強今期備戰有咩大動作？邊隊開季最難搞？今次就同大家介紹番！

#英超 #阿仙奴 #曼城 #利物浦 #曼聯 #車路士 #阿士東維拉 #紐卡素 #白禮頓 #富咸

20/07/2026 西班牙 vs 阿根廷（世界盃決賽）
直播資訊: Now 616/618/630, ViuTV 99
排名: 世界(2) vs 世界(1)

2026年世界盃決賽週已為國際大型足球錦標賽帶嚟新嘅比賽生態，講嘅唔係嚟緊呢場決賽嘅中場休息因為要加入half-time show而變成有半個鐘咁耐，而係強隊原本「踢七場」嘅盤算已因為加長至八場而已經睇得出有啲質變，每支勁旅都要重新學習如何應對更長、更混亂，亦都更為艱苦嘅爭標路線，球員傷患、被迫輪換嘅現象比以往都出現得更為頻繁，徹底考驗球隊嘅陣容深度同臨場應變能力：新丁佛得角打法硬淨比外界想像中行得遠咗（分組賽賽和西班牙、三十二強負阿根廷）、十六強常客瑞士開初將秘密武器先列後備亦都為殺到入第三圈淘汰賽（八強負阿根廷）奠下基礎。而巴西、德國呢啲陣容看似厚實嘅傳統大佬，卻因為節奏散漫、輪換調配失誤等問題而早早出局，反映出呢個「增量版」世界盃對教練團隊嘅戰術儲備，以至一眾球員嘅自我調節都訂立咗更嚴苛嘅標準。

從已完成嘅102場波所見，強隊要面對嘅已經唔再只係「踢得夠唔夠好」，而係「有冇本錢將踢自己最熟嗰套長久keep住踢落去」。球隊要更夠膽輪換、要識得節奏收放自如，又要識得喺受到高壓嗰陣避免出現致命失誤。而西班牙同阿根廷都屬於可以長時間保持自己最煞食打法嘅隊伍，喺呢次要鬥執行力同鬥續航力嘅長命賽中脫穎而出，回想起嚟都唔係偶然。

被編為主隊嘅西班牙晉級路上多次主導咗場上大局，四強戰對法國更近乎完美咁演繹出球隊嘅踢波理念。西班牙一貫嘅tiki-taka傳控打法喺現任教練迪拉富安特指導之下再加入壓迫嘅元素，將對手嘅進攻火力徹底壓制之餘，更踢到係中場鐵三角無論點調度都維持到節奏：及時恢復狀態嘅隊長洛迪（Rodri）、調養到四強啱啱好開行火力嘅法比安路爾斯（Fabian Ruiz），與及爭取踢番正選嘅攻中奧姆（Dani Olmo）成功令到個波長留喺自己友腳下，配合一條年輕化嘅防線交出七場之中有六場不失球嘅驚人成果，就算法國前面四個火力有幾強大都好，只要中場俾西班牙緊緊揸住，法國就已無法踢番出本色，最終亦都逃不出西班牙今期平均xGA低見0.3嘅瘋狂水平。與此同時，西班牙則已係連續37場國際賽保持90分鐘不敗（期間喺去年歐國聯決賽互射十二碼輸俾葡萄牙），極高嘅穩定性與及戰術純熟程度都係恨死隔離。

而另一邊廂嘅阿根廷喺八強俾瑞士死纏之下，捱到加時靠前鋒艾華利斯（Julian Alvarez）福至心靈嘅遠射打破均勢，四強又喺第85分鐘仍然落後之下靠美斯（Lionel Messi）接連送出致命助攻，將體能同調度上都一早進入咗極限嘅英格蘭擊敗，以另一種方法展現出屬於自己嘅一貫風格。今屆阿根廷防守缺點依然明顯，喺比賽末段嘅壓力亦從未擺脫過，佢哋能夠保持自己風格過關嘅關鍵在於核心球員嘅細節把握能力與及本身嘅強大心理質素，而佢哋之所以能夠撐過之前六場，或多或少都係同大軍維持適量減慢步伐、正中場佔滿中場線造波、開段唔爭控球主攻嘅「養生式」部署有關。

咁樣一拼埋嚟睇，西班牙應係較有本錢維持自己打法嘅一方。話晒較為年輕有活力嘅西班牙已經證明到，佢哋有足夠能力通過控球同中場嘅統治力招呼強隊，所以就算等極都未見到歷高威廉斯（Nico Williams）完全恢復回歸正選左翼位置，現時有巴安拿（Alex Baena）呼應另一翼嘅耶馬（Lamine Yamal）都足以做到間中切換去邊路突擊爆發，以保持進攻嘅多樣性。反觀阿根廷就係更加需要靠微調同臨場變招嘅一方，尤其喺邊路速度、第二點爭奪與及副選球員嘅即時作用呢幾方面。講到後備奇兵呢招，大家不妨回帶望番上屆決賽嘅「天使」迪馬利亞，再睇下今屆四強史卡朗尼安排「真．右翼」祖利安奴施蒙尼（Giuliano Simeone）喺闊別三場後重返右中場、取代迪保羅（Rodrigo de Paul）做正選呢一著，會唔會覺得有啲似曾相識呢？

#世界盃 #西班牙 #阿根廷

16/07/2026 英格蘭 vs 阿根廷（世界盃四強）
直播資訊: Now 616/618
排名: 世界(4) vs 世界(2)

阿根廷球王美斯馳騁沙場超過二十年，踢過二百幾場國際賽，卻從來未遇過英格蘭，呢場世界盃四強大戰單講呢點就已經重要過晒咩嘢「上帝之手」、「碧咸領紅」、甚至福克蘭戰役嗰堆新仇舊恨。呢場交鋒唔單止同爭冠有直接關係，更早已預料到會係集技術、戰術、體能與意志力嘅多重較量。

衛冕冠軍阿根廷喺J組出線後「僅係」遇過佛得角、埃及同埋瑞士呢三支各具特色但整體實力都未及得上英格蘭嘅隊伍，但正係呢三場淘汰賽暴露咗阿根廷嘅多重隱憂。先講條後防，阿根廷喺防守端組織其實唔算十分緊密、尤其係兩邊閘位就令阿根廷多次陷於被動：對佛得角百二分鐘被兩度追平最後要靠對手烏龍波過關、對埃及更係一度落後到0:2，期間又係多次靠交番個波俾美斯，等佢以一己之力扭轉局勢先至過關。阿根廷多場以嚟一直堅持自己嘅踢法同節奏，靜待對手出錯得分奠定勝局，呢種堅持同自信好大程度係源於對手同自己級數有差距，但今場對手世界排名同自己只係相差兩位，大家都會好想知教練史卡朗尼能否繼續按捺得住。

事實上，阿根廷今期邊路防守已見有明顯弱點，尤其係由達利亞費高（Nicolas Tagliafico）與及摩連拿（Nahuel Molina）把守嘅左、右閘位經常出現俾對方快攻突破嘅情況。此外，中後場組織配合以至門將達米安馬天尼斯（Emiliano Martinez）今期亦唔算得上好順，就足以令阿根廷整體表現持續起伏不定。再加上體能下下俾對手搾盡，阿根廷喺多場比賽嘅末段都出現疲態，呢方面理應可以俾英格蘭多加利用，但關鍵在於：英格蘭自己又有幾多貨剩？

對英格蘭嚟講，佢哋嘅征途同樣充滿咗嚴酷嘅考驗。從十六強墨西哥城嘅高海拔作戰，到八強再俾邁亞密嘅濕熱氣候摧殘，單計飛行里數到目前為止就已經比阿根廷多出四千幾公里。年近33歲嘅中鋒哈利卡尼（Harry Kane）喺持續高強度賽事之下，體能同速度都已呈現下滑趨勢，上一場八強對挪威亦冇斬獲。決賽週開始前一致被睇好嘅核心中場迪勤懷斯（Declan Rice）就更係受到痛症影響表現持續低迷，直接導致英格蘭中場嘅屏障功能受到削弱，亦因此令到球隊必須更加依賴後生細仔比寧咸（Jude Bellingham）「出賣勞力」撐起成隊波嘅運作。就以上一場對挪威嘅八強戰為例，教練杜曹多次調整中場都未見湊效，就需要比寧咸喺一次長達百一分鐘嘅惡鬥裡面跑勻晒正中場、攻中、防中幾個位置，呢種打法喺身體同心理上構成嘅雙重壓力如果喺賽前賽後調理得唔好，隨時會危及全隊臨到最後一刻衝刺嘅能力。

呢場波之中，「杜sir」喺古希（Marc Guehi）之外，再安排多一位佢嘅曼城隊友史東斯（John Stones）組成正選中堅組合防守同樣來自曼城嘅夏蘭特，獲得成功實屬合理，但今次換成要主力防守美斯，英格蘭將失去人選上嘅先天優勢之餘，美斯更係一位仍可以喺9號同10號位之間自由切換嘅多面手，如果今次阿根廷喺球員體能部署上稍有進步，都足以隨時令英格蘭嘅防務陷入混亂。

講到呢度，相信大家已經會聯想到一旦進入互射十二碼決勝嘅殘酷劇本。英迷一講起射十二碼大概已係皺晒眉頭，無他嘅，當近代多位英格蘭教練都認為射十二碼純粹講運氣、冇得練，球員都已接受自己總係射輸嘅一方，形成惡性循環，但大家唔好忽略嘅係，英格蘭近十年已經引入數據分析結合系統化訓練嘅手法，以2018年做分界嘅話，之前七次大賽要互射十二碼就只係贏過一次，但打後四次同類情況則已經贏過三次。反觀阿根廷佢哋雖然擁有一位幾叻救十二碼嘅門將馬天尼斯，但始終美斯今屆已經喺法定時間內接連射失，未知會否為球隊帶嚟心理上嘅負面影響。唯一可以肯定嘅係，雙方打到入嚟四強都已經面臨體能同心理上嘅極限，球場上嘅細微變數都足以影響賽局。

#世界盃 #英格蘭 #阿根廷

15/07/2026 法國 vs 西班牙（世界盃四強）
直播資訊: Now 616/618, ViuTV 99
排名: 世界(1) vs 世界(3)

世界盃眨下眼就嚟到四強大戰，首場法國對西班牙表面上係「巨星幫」同「團隊合作」兩種打法風格嘅對決，但隨著兩隊逐級逐級打上去，漸漸會見到兩隊其實都已逐漸具備能力喺兩種打法之間游走，能夠因應戰況轉招，不論係場上嘅體能比拼與及場外嘅智力比拼都有十足睇頭。

嚟到八強完成呢刻，今屆世界盃已經踢咗足足一百場波，有個明顯現象就係平時耳熟能詳嘅一班球星都keep到強勢。要知道呢個現象並唔係必然，而且今次係唔止一位球星發光：39歲嘅美斯六場轟入八球佔咗阿根廷入球四成七，哈利卡尼射入六球，對英格蘭嘅貢獻率亦差唔多，而首次參加世界盃嘅夏蘭特少踢一場都幫挪威射入七球，貢獻率就更係超過五成。講到呢度又點可以唔提法國嘅麥巴比（Kylian Mbappe）啊？話說「麥總」都已經射入八球，貢獻率同樣有五成之餘，更重要係麥巴比唔入波時都識得助攻，暫時佢已交出過三次助攻，無疑係法國陣中嘅絕對進攻支柱。

相比之下，西班牙則係形勢使然一直以團隊先行。早喺介紹西班牙備戰嗰陣，我哋已經報道過西班牙天王雙翼耶馬（Lamine Yamal）及歷高威廉斯（Nico Williams）同時受傷嘅潛在影響，當時亦已經預計到教練迪拉富安特需要增加使用奧耶沙巴（Mikel Oyarzabal，入四球）與及參考阿仙奴賦予中場馬連奴（Mikel Merino）後上射門嘅任務，馬連奴已係接連兩場後備入替兼射入奠勝入球，一定已引起法國教練團嘅關注。此外我哋指出嘅中堅位置隱憂亦隨著戰況發展證明有得解決：一對中堅拉樸迪（Aymeric Laporte）與及古巴斯（Pau Cubarsi），與及正選位置一直受到質疑嘅門將烏尼西蒙（Unai Simon）最終已係連續合作六場波，直至八強面對比利時先首次失球，左右閘嘅古古列拿（Marc Cucurella）、柏度樸路（Pedro Porro）組合又經固定到落嚟，西班牙亦得以從開局意外賽和佛得角嘅打擊中逐漸企穩，形成多點開花、令對手防不勝防嘅格局。

從八強賽淘汰比利時所見耶馬已回復番八九成功力，參與咗首個入球之餘尾段就算體力下降仍不斷令比利時後防風聲鶴唳，歷高威廉斯則係自分組賽對烏拉圭再度整親之後首次復出。接落嚟如果兩位復元進度理想，迪拉富安特大可以考慮還原番耶馬、歷高威廉斯兩翼齊飛嘅戰術，利用兩個已經逐漸恢復功力嘅球星，進襲賽前未算係好受到考驗嘅法國兩閘。而法國今期防守勝在兩個中堅烏柏美卡奴（Dayot Upamecano）、沙列巴（William Saliba）已建立到默契，能夠符合現代防守體系中兼顧高位壓迫及回防兩大功能嘅要求，加上防中干尼（Manu Kone）完成對摩洛哥一役之後亦跟番上個節奏，令法國喺正選曹亞文尼（Aurelien Tchouameni）已因傷錯過對上兩場嘅陰影之中加添番啲信心。

講番法國嘅進攻，麥巴比個人數據無疑係極之亮麗，但法國亦唔一定執著於要麥巴比自己入波嘅打法。就以喺巴黎聖日耳門早已轉型踢中鋒嘅迪比利（Ousmane Dembele）為例，佢嚟到國家隊需要踢番翼位一適應番就入球停不了，至今已射入五球。需知道世界盃對上一次有一pair隊友同時入到五球，就已經要數番去2002年冠軍巴西「3R組合」之中嘅朗拿度與及李華度，今次法國成功孕育出廿年嚟首見嘅雙射手體系，加上家陣嘅麥巴比都識得自己拉空幫隊友製造機會、自己又可以禁區外放冷箭，再加上其他位置仲有奧利斯（Michael Olise，六個助攻），巴高拿（Bradley Barcola，兩入球一助攻）、杜爾（Desire Doue，一入球兩助攻）以至卓基（Rayan Cherki）輪流喺中路同兩翼發難。賽前六場平均xGA（預期失球）低見0.3嘅西班牙今仗迎戰法國呢支「豪華團」，將要迎嚟決賽週至今嘅最大考驗。

由此睇嚟，今場兩隊都應已有晒兩手準備，不論係法國抑或西班牙都可以根據臨場賽況喺靠球星定係靠整體之間作出選擇。如果法國晉級，就會成為繼德國（1982、1986、1990）同巴西（1994、1998、2002）之後第三支連續三屆打入世界盃決賽嘅球隊，又如果係西班牙成功淘汰法國嘅話，則會係連續三年喺大賽（歐國盃、歐國聯、世界盃）四強鍊贏對手之餘，兼可以繼2010年後再次躋身決賽，雙方實力、戰意都係不相伯仲。

#世界盃 #法國 #西班牙

12/07/2026 05:00 挪威 vs 英格蘭
直播資訊: Now 616/618, ViuTV 99
排名: 世界(19) vs 世界(4)

挪威同英格蘭呢場世界盃八強對決，將會係一場集體能、戰術同心理強度比拼於一身嘅對抗。上一場最終比挪威遲開波五粒鐘嘅英格蘭匆匆喺墨西哥高原趕番出美國邁亞密應戰，球員攰爆之餘更要面對球員停賽帶嚟嘅缺口。闊別決賽週多年嘅挪威征戰近一個月亦開始出現疲態，球員免疫力下降引發咗陣中一輪唔大唔細嘅小病風潮。

英格蘭賽前五日喺墨西哥城阿茲特克體育場上演「勝利大逃亡」，呢場賽事展現出球隊喺極端環境同極高壓力下嘅應變能力同韌性。用番賽前部署角度嚟睇，英格蘭教練杜曹嘅部署同調整係得到顯著嘅成果。足總嘅體能科學職員呢場就威番次，一早為球員應對2200米嘅高海拔同濕冷氣候制訂出相應嘅戰術，透過拉慢控球節奏適量咁減少球員嘅跑動距離與及高強度奔跑，等球員保存體能留番喺關鍵時刻先至嚟爆發。同決賽週首戰對克羅地亞時嘅數據相比，英格蘭隊員對陣墨西哥時嘅總跑動距離係少咗10公里，高速跑動距離則由大約1400米減到去1000米，即場避免到俾墨西哥球員爆盡之餘，亦為準備下一場減輕咗若干負擔。

咁當然，數據只係睇到呢場波嘅其中一面，另一面則係英格蘭面對有主場球迷吶喊助威嘅墨西哥，再加上咁早已要踢少一人，就算有意識減少咗跑動得嚟又保住咗勝果，整體上體能消耗仍然係好大。而且嚟緊亦要面對好實在嘅人手緊張問題：串演右閘嘅後衛昆沙一次落腳唔準嘅犯規俾VAR捉到換嚟直紅實在係魯莽到極，嚟緊要睇本來係正印右閘嘅列斯占士（Reece James）係唔係一如傳聞所講趕及復出。此外32歲中鋒哈利卡尼（Harry Kane）由決賽週開波至今幾乎全勤，對墨西哥呢場所見杜曹踢到最後收起卡尼就唔敢再收埋23歲仔但已經攰爆嘅中場比寧咸（Jude Bellingham），間接睇出英格蘭實在好依賴呢兩位球員去改變戰局。大軍一惡鬥完墨西哥就已經要咩聲飛番出美國，準備嚟緊喺邁阿密嘅八強大戰。暫時預測邁阿密呢場喺傍晚上演嘅戶外波氣溫仍有機會直逼三十度，到時哈利卡尼、比寧咸兩個以至防中迪勤懷斯（Declan Rice）嘅恢復進度將會好影響對挪威嘅整體表現。

挪威今期亦係威盡。踢英超曼城嘅皇牌中鋒夏蘭特（Erling Haaland）持續喺大賽中展現出門前嘅決定性力量與及身體對抗上嘅優勢。挪威至今出賽五次夏蘭特只係參與咗其中四場，但就已經攻入七球，十六強面對傳統強國巴西更係個人包辦兩球，巴西嘅後防顯得毫無招架之力。呢場波挪威更係將控球比率推到上66%，繼三十二強對科特迪瓦之後再一次表現出從防守反擊發展至識玩控球進攻嘅戰術演化，呢方面確係俾到球迷驚喜，亦冇辜負到夏蘭特超凡嘅統治力。挪威門將利蘭（Orjan Nyland）再一次喺賽事中多次撲救關鍵射門，當然包括咗十六強早段就撲出巴西中場古馬雷斯嘅十二碼罰球，為最終淘汰巴西奠定好基礎。防守中場柏德列貝治（Patrick Berg）中場分波精準，能夠控制場面，亦係近兩場嘅關鍵人物。而後備方面上場又有翼鋒舒特立（Andreas Schjelderup）替補上場整兩個助攻送俾夏蘭特建功，單睇統計數字就更係有蓋過英格蘭後備力量之勢。當然公道啲講挪威今次強勢出線，有部分係源於巴西嘅持續低迷，但不能忽視嘅係挪威已經慢慢練成咗中高位主動掌控球權與及轉守為攻的能力，而接落嚟就要睇一度喺隊中肆虐嘅流感能否早日消除，減少對球員戰鬥力嘅耗損。

喺今期決賽週期間，英格蘭無疑係通過咗多重歷練逐步提升到韌性與及團隊士氣：從對加納領教過低位死守有幾難搞，到迎戰剛果民主共和國識得沉著等候反勝時機，更試埋高原面對東道主硬撐到尾，種種「升呢」考驗並唔係你想遇到就遇得到。而面對開始識得高位壓迫、又擁有統治英超禁區經驗嘅中鋒，但有可能因為球員患病而被逼輪換嘅挪威，英格蘭能否憑住整體技術同大賽經驗過關，將會係呢場八強話題之作嘅矚目焦點。

#世界盃 #挪威 #英格蘭

世界盃八強賽前分析(10-12/07/2026)
直播資訊: Now TV

10/07/2026 04:00 法國(世界1) vs 摩洛哥(世界6)
（ViuTV 99台及網絡平台免費直播）
（請留意網站詳細分析）

11/07/2026 03:00 西班牙(世界3) vs 比利時(世界8)
西班牙面對自亂陣腳嘅葡萄牙，俾到機會中場Rodri重拾中場統治能力，亦俾到空間Merino複製喺阿仙奴嗰套「中場當中鋒用」嘅入波大法，今場關鍵就在於比利時能否兼顧到高壓防守與及快速反擊阻止西班牙慢慢build up。但隨著防中A.Onana上場受傷，比利時中場三角地帶嘅選人靈活性已經受到削弱，如此一來本身級數只屬一般嘅防線亦將會更易受壓。

12/07/2026 05:00 挪威(世界19) vs 英格蘭(世界4)
（ViuTV 99台及網絡平台免費直播）
（請留意網站詳細分析）

12/07/2026 09:00 阿根廷(世界2) vs 瑞士(世界14)
阿根廷在十六強艱難擊敗埃及，再一次發生控球佔絕對優勢但中後場回防失位導致失分嘅尷尬局面。面對身形稍為輸蝕嘅埃及，阿根廷最終仍可以憑改打九九八十一斬破局，但今場對手係歐洲防守到家嘅瑞士，就算瑞士好大機會接連失去膝傷嘅進攻好手Manzambi，單打硬淨防守亦好大機會令阿根廷連續第三仗陷入苦戰。

*各隊世界排名以十六強階段完成後版本為準

#世界盃

（世界盃圖片）

10/07/2026 04:00 法國 vs 摩洛哥
直播資訊: Now 616/618, ViuTV 99
排名: 世界(1) vs 世界(6)

1998年主場出擊嘅法國隊贏得首個世界盃冠軍，當時法國嗰套多元嘅「3B陣容」（Black, Blanc, Beur，即黑人、白人、阿拉伯裔人）亦係令人大開眼界：例如防中韋拉係前殖民地塞內加爾嘅移民，就算係白人中場皮里斯，佢其實都係擁有法國同葡萄牙嘅雙重國籍，而隨住移民落地生根，好似球王施丹呢類生於法國嘅移民後裔就逐漸成為主流。今屆世界盃單計大巴黎地區出世嘅球員，就已經散佈喺五支國家隊之中。

時代一直在變，法國仍然可以循呢啲途徑不斷吸收新血，例如今屆已射入七球嘅前鋒麥巴比（Kylian Mbappe），佢喺巴黎出世，本來係可以考慮跟番爸爸入喀麥隆，或者跟媽媽嗰邊嘅阿爾及利亞，更複雜嘅例子就要數到今屆已累積六個助攻嘅奧利斯（Michael Olise，圖左）：佢有來自尼日尼亞嘅爸爸與及阿爾及利亞嘅媽媽、生於英國倫敦，但最終因為佢媽媽已擁有法國國籍，喺英格蘭、法國嘅U隊兜兜轉轉幾年之後，人人都想爭嘅奧利斯無懼位置上嘅激烈競爭揀咗代表法國，轉眼間已成為法國隊不可或缺嘅進攻核心。

但長期作為「人才輸出地」嘅非洲國家並唔係坐以待斃。就以摩洛哥為例，佢哋一直四出發掘海外移民後代「認祖歸宗」，就算未能早日將佢哋招攬入青訓系統，亦都會嘗試盡最後努力邀請佢哋代表大國腳參賽。再加上有份主辦下屆世界盃呢啲額外因素，摩洛哥對擁有雙重國籍嘅年輕球員嚟講係幾有吸引力。繼前年從西班牙手中搶嚟右翼巴謙迪亞斯（Brahim Diaz，決賽週至今已錄得四次助攻），摩洛哥今屆世界盃前再成功趕尾班車，說服到法國出世、喺里爾青訓系統長大、青年軍一直踢緊法國嘅中場保亞迪（Ayyoub Bouaddi，圖右）「加盟」。就喺今屆48隊嘅名單之中，摩洛哥就有高達73%嘅球員係喺海外出世，僅次於庫拉索與及剛果民主共和國，或多或少反映咗近年人才流動喺規例限制之下嘅發展新趨勢。

現時仍只係18歲嘅保亞迪去到五月先首次為摩洛哥披甲，但已經立即拍住土生球員奧拿希（Azzedine Ounahi，基羅納）與及同樣生於法國嘅艾拿奧爾（Neil El Aynaoui，羅馬）組成中場核心。喺上一仗淘汰其中一隊主辦國加拿大嘅十六強賽事之中，打攻中嘅奧拿希就梅開二度，但呢場淨贏三球嘅勝仗既喜且悲，摩洛哥上半場意外地陷於被動不特止，剛俾拜仁慕尼黑簽入、今期充當「假九」嘅沙巴利（Ismael Saibari）肌肉受傷提早離場，情況並不樂觀。沙巴利喺分組賽期間就已經射入三球，佢如果最終一如所料缺陣，叫左翼拉希美（Soufiane Rahimi）移前就已經唔係最好嘅選擇。再加上踢水晶宮嘅主力中堅利亞特（Chadi Riad）喺再早一場淘汰荷蘭嘅三十二強賽事已經傷出，嚟緊能否上陣亦都係成疑。

另一方面，外界一致認為陣容無敵嘅法國亦開始要面對主力受傷患與及停賽風險影響嘅問題。早喺決賽週前介紹法國嗰陣，我哋已經提及過法國中場行精兵制嘅潛在風險，而喺防中曹亞文尼（Aurelien Tchouameni）有傷避戰嘅十六強賽事中，對手巴拉圭踢法粗野令場波充滿火藥味，改踢正選中場嘅干尼（Manu Kone）級數稍有不及就即刻食牌，就連翼鋒巴高拿（Bradley Barcola）甚至奧利斯都係遭殃領黃。假如今場對摩洛哥佢哋再食牌，就等唔到洗牌機會需要即時停賽一場，咁樣或多或少都會影響到佢哋今場嘅進取程度。稍為慶幸嘅係，法國喺十六強嘅另一勁敵——高溫天氣，嚟緊喺波士頓一戰將有望得到舒緩，再加上摩洛哥自己亦有多名主力出戰成疑，就算摩洛哥有保亞迪呢位熟知法國青訓系統嘅「內應」，上屆四強嘅復仇劇本（輸0:2）想要上演仍有一定難度。

#世界盃 #法國 #摩洛哥

世界盃十六強賽前分析(07-08/07/2026)
直播資訊: Now TV

07/07/2026 03:00 葡萄牙(世界7) vs 西班牙(世界3)
三十二強所見Yamal持續上力，加上奧地利表現不滯造就西班牙大勝三球而回，左翼方面就算Williams仍未ready都有Baena接力，近兩場已有入球同助攻。仍要不斷修正嘅葡萄牙則喺上場補時反勝老波骨克羅地亞，嚟緊期待能進一步發揮韌性與團隊協作方面嘅潛力以蓋過狀態同默契不足等問題。葡萄牙如果今場繼續高壓嘗試爭取主導節奏，西班牙19歲但已穩佔中堅位置嘅Cubarsi喺Laporte帶領下將會迎嚟首次真正挑戰。

07/07/2026 08:00 美國(世界16) vs 比利時(世界9)
同三月主場友賽大敗俾比利時呢場相比，中場、龍門換咗血嘅美國更關鍵嘅演化在於已成功從實戰建立氣勢同信心。今場本來有射手Balogun直紅停賽帶嚟隱憂，勢估唔到FIFA喺賽後跪低改判緩刑，令呢支僅餘嘅主場球隊重燃希望。比利時方面則有中場Tielemans成功躋身核心內圍，喺De Bruyne、Lukaku都需要就住嚟用嘅日子裡面撐起大局。比利時上階段同塞內加爾苦戰百二分鐘先至分出勝負，但又比美國多一日休息之餘更係唔使搬竇，或會抵銷到部分活力上嘅不足。

08/07/2026 00:00 阿根廷(世界2) vs 埃及(世界24)
本身已比埃及唞少一日嘅阿根廷，踢到加時先至淘汰新丁黑馬佛得角，暴露出防守空間過闊嘅問題有待修正。埃及打法似佛得角大可以多加參詳，但已經兩場法定時間冇入球助攻嘅Salah喺淘汰澳洲後驗出傷勢唔輕，佢打算食止痛藥都要死拼阿根廷有可能反而令阿根廷少咁重顧慮（埃及三十二強需踢到互射十二碼）。

08/07/2026 04:00 瑞士(世界15) vs 哥倫比亞(世界11)
瑞士喺今期展現出攻守平衡嘅成熟狀態，四場攻入九球僅失三球，中場Manzambi亦因有亮眼表現已唔能夠再成為秘密武器。哥倫比亞方面則只限於個別球員有良好發揮，上場遇上實力不足打法消極嘅加納，就連自己都表現「降呢」，把握力之差嚇人一跳，嚟緊需要加強專注力。

*各隊世界排名以三十二強階段完成後版本為準

#世界盃

（世界盃圖片）

世界盃十六強賽前分析(05-06/07/2026)
直播資訊: Now TV

05/07/2026 01:00 加拿大(世界30) vs 摩洛哥(世界6)
（ViuTV 99台及網絡平台免費直播）
摩洛哥作風硬朗，至今已先後喺法定時間賽和巴西、荷蘭，打起高節奏壓迫上嚟以加拿大嘅級數未必夠頂。加拿大正印Davies唔喺度時就會戴起隊長章嘅中場Eustaquio喺三十二強補時絕殺，力克南非晉級，但整體而言加拿大只算係防守組織穩健而前鋒把握能力有限，而一直同傷患搏鬥嘅Davies暫時評估係今場出到，對加拿大後防而言或會多番些少信心。

05/07/2026 05:00 巴拉圭(世界34) vs 法國(世界1)
巴拉圭四場波平均控球率僅僅過30%，黃牌則已經收到第九張，明顯係放棄控球結合硬淨防守嘅類型，但從首場分組賽大敗俾美國所見，呢種傳統守勢波其實係守唔到擅打高強度壓迫嘅對手。因此正常環境下巴拉圭守到死蛇爛鱔嘅德國唔奇，面對進攻多點開花嘅法國則係另一回事。今屆目前四場全勝嘅法國最大敵人反而係天氣，費城當地氣溫預計將逼近40度。

06/07/2026 04:00 巴西(世界5) vs 挪威(世界21)
（ViuTV 99台及網絡平台免費直播）
巴西上場面對日本沉著應戰獲得最終勝利，期間重啟「九九八十一斬」頭球戰術瞬即俾各隊抄考。防中Casemiro再一次證明自己價值得嚟亦已成為最明顯嘅招呼對象，嚟緊對佢嘅企位以至落場時間安排將成為焦點。挪威有Haaland休息一場後繼續交貨，三場都有波入，而呢場淘汰科特迪瓦嘅三十二強更值得留意係挪威已嘗試提升防守質量，門將Nyland多次關鍵撲救以外防中Berg亦提供到穩定支援，預料挪威將會以攻守更為均衡嘅一面迎戰巴西。

06/07/2026 08:00 墨西哥(世界10) vs 英格蘭(世界4)
（請留意網站詳細分析）

*各隊世界排名以三十二強階段完成後版本為準

#世界盃
（世界盃圖片）

06/07/2026 墨西哥 vs 英格蘭
直播資訊: Now 616/618
世界(10) vs 世界(4)
（球賽開賽時間有機會因應當地天氣狀況作調動，請密切留意賽會官方公佈）

英格蘭喺三十二強淘汰賽中面對剛果民主共和國以2:1反勝，原來係佢哋自1966年世界盃決賽以來首次喺淘汰賽階段先落後一球然後勝出賽事。根據官方統計，過去英格蘭喺世界盃淘汰賽共有22次係先失波，當中就只有1966年決賽嗰次能夠後來居上，其餘係輸咗17場咁多。今次能夠上映逆轉唔單止展現出球員嘅心理韌性，亦都為教練杜曹帶嚟更多信心，叫做平反咗外界對佢戰術安排方面嘅部分質疑。

杜曹對剛果民主共和國嘅神來之筆，就係將迪勤懷斯（Declan Rice）從中場拉到去右邊後方，一次過加強番邊路防守同埋傳中質素，同時大幅增加兩側傳中次數。呢兩步棋配合埋改踢後備嘅左翼哥頓（Anthony Gordon）、攻中艾斯（Eberechi Eze，近三場平均出場約20分鐘）與及右翼布卡約沙卡（Bukayo Saka）陸續入場，令英格蘭邊路攻勢更具威脅，追平與及反勝嘅入球皆係源自邊路傳中與及相關嘅第二浸攻擊。中鋒哈利卡尼（Harry Kane，四場入五球）嘅個人級數固然係救到全家，但杜曹嘅調動有時都幾令人抹一額汗，尤其喺右後衛位置上，當原先主力列斯占士以至替補嘅昆沙都因傷陸續缺陣，從左閘抽調嚟右邊踢正選嘅迪積史賓斯（Djed Spence）亦係表現不穩，搞到杜曹出到叫迪勤懷斯（Declan Rice）調位守右邊呢招。話說回來，杜曹喺今屆世界盃四場波四套正選已出現過多達十處改動，不論係為咗應對傷患定係調整戰術，頻繁嘅更動只係反映出球隊基礎尚未好firm，顯示英格蘭仍有待尋找更穩定嘅整體節奏同陣容默契。

接落嚟呢場十六強會戰，將會喺海拔約2,200米嘅墨西哥城阿茲特克體育場進行，對英格蘭隊嚟講呢度唔單止係1986年世界盃對阿根廷「上帝之手」出現嘅傷心地，對現役球員而言就更加係體能上嘅一大考驗。研究指出，運動員喺抵達高海拔地區後嘅24到48小時內體能表現好容易變成「有限公司」，球員唔適應高原環境更可能引發呼吸困難、疲勞加劇及運動能力下降等一系列問題。處理高原不適不外乎兩種極端嘅做法：一係預早啲上去、預留時間俾身體慢慢適應或者等啲反應發咗出嚟先，一係就「快入快出」，將停留引致高原反應嘅概率減到最低。而賽前仍喺美國低海拔地區作賽嘅英格蘭就只能選擇後者，等到賽前兩日先抵達墨西哥城，並喺出發前結合使用高壓氧艙進行恢復治療。當然，呢啲權宜之計仍係無可能完全抵銷高原帶來嘅生理挑戰。可以想像得到墨西哥球員呢方面將會有更多優勢，而如果賽事拖到進入加時，英格蘭球員嘅體能負擔亦有機會係百上加斤，更加唔好講迪勤懷斯嘅腿筋傷勢一直冇斷尾跡象，本來就唔能夠寫包單場場踢足90分鐘。

墨西哥嗰邊就唔洗驚啦，事關就算唔係全隊成員都以墨西哥城作根據地，但唔覺唔覺墨西哥嚟緊已係連續第三場喺阿茲特克體育場出擊，上場三十二強就已係以2:0擊敗厄瓜多爾，終結自1986年以來未能喺世界盃淘汰賽晉級嘅魔咒。先唔好計主隊球迷「使橫手」、喺厄瓜多爾球隊下榻嘅酒店外日嘈夜嘈製造壓力，事實上墨西哥三線至今為止都交出令人滿意嘅表現，尤其係中後場方面，教練艾古爾因應球員停賽等原因嘗試不同組合，但對上四場墨西哥無論點轉人都保持到零失球，呢方面相信杜曹都會好羨慕。中場方面，17歲天才球員基拔圖摩拿（Gilberto Mora）適應到大賽之後近兩場已增加咗唔少落場時間，能有效串聯起羅拔圖艾華拉度（Roberto Alvarado，四場三助攻）等隊友，加快中前場攻擊節奏，再加上最前面有艾卡迪沙（Julian Quinones，四場三入球一攻）及老將魯爾占美利斯（Raul Jimenez，三場兩入球）嘅進攻配合，英格蘭面對嘅挑戰，就已經唔係純粹個對手坐擁主場之利咁簡單。

#世界盃 #墨西哥 #英格蘭