Football Analyst

上個post主要講到利物浦中後場嘅問題，有人就問到我對佢地前場嘅睇法。首先版主從來唔認為Gakpo係一個差嘅球員，至少唔係坊間一面倒講到咁惡劣。明白佢嘅決定有時係幾令人沮喪（好似下半場嘅機會冇用左腳射門），經常拐大位嘅傾向容易被對手捉路，但至少佢處理最後一腳嘅能力有一定保證。比到少少空位佢起腳或傳中，佢嘅ball striking其實有相當威脅。

論質素Gakpo一定唔係世界級，亦冇可能去到Olise、Kvaratskhelia呢啲級數，但對比其他英超競爭對手嘅翼鋒，佢嘅輸出未至於太差。比較琴晚曼城嘅Semenyo/Foden、前日曼聯嘅Dorgu、上季車路士嘅Neto同阿仙奴嘅Madueke，呢位荷蘭人嘅表現已算不俗。退一步講，至少佢唔會係利物浦首要要處理嘅問題。

Wirtz嘅處境反而更加尷尬。如Neville賽後所講，球迷似乎對佢太nice、要求太低。作為攻中，佢保護皮球嘅能力不足，導致經常只能踢一兩腳波同隊友配合。佢偏好腳內檔埋門而甚少用腳面，ball striking上嘅限制進一步局限佢嘅功用，唔能夠喺禁區外圍施射。喺Iraola重視兩翼側擊嘅體系，佢唯一用途係入禁區入楔接應，但佢本身嘅profile亦唔適合做一個box crasher。

琴晚Wirtz第一個被換出唔係冇原因。Szoboszlai同Gravenberch踢法都偏向8號，球隊好需要Mac Allister去逗住中場維持平衡（儘管佢狀態同跑動能力不足），而Wirtz嘅角色係最可有可無一個。有意見認為可以將Wirtz或Szoboszlai放去翼鋒，但喺Iraola強調兩翼突破嘅踢法入面，缺乏速度同爆破能力嘅佢地唔太可能勝任呢個角色。利物浦接下來點樣搵番中場平衡，係值得留意嘅課題。

Iraola接掌利物浦後首場正式比賽，作客正在重建嘅紐卡素，踢得非常直接、非常進取，導致非常多transitions、非常多射門（兩隊合計40次攻門）。對於中立球迷而言，雙方你來我往可能睇得過癮；但對於一支要爭取成績嘅big 6球隊而言，未能控制比賽、太多混亂場面唔係一個正面嘅訊號。

導致呢個局面嘅原因，係球隊只係垂直地踢波，缺乏橫向移動。基本上一攞到波球員就向前傳、向前衝，而呢個似乎係Iraola嘅指示。就算係閘位、雙中場（已經前到唔可以叫佢地做pivot）呢啲較防守性嘅位置，球員一樣無視防守責任、未有rest defence嘅準備、不顧後果地冒險。咁樣踢法，其實比起Klopp時期更加「重金屬」。

Gravenberch同Szoboszlai都係具實力嘅中場，但兩者均偏向8號位嘅踢法、易失控球，缺乏一個逗後嘅6號位作為防線前嘅屏障、提供傳球相對穩健嘅中場調度。兩球失波都係源於Gravenberch失去控球，就被長驅直進反擊。第二球Szoboszlai有提早起步回追，但唔係純防中嘅佢太易被拐過。Iraola換入Mac Allister踢6號位，就係嘗試處理呢個問題。

兩閘位置問題更加大，除左角色安排仲有能力問題。身形上嘅不足令佢地喺防守端相當吃力，雙雙喺30分鐘領黃；進攻端佢地好勤力前插，但出波質素難以令人滿意。所以Slot上季唔少時間寧願將Frimpong放喺右翼，Neville亦曾批評Kerkez踢到好似一個青年軍球員。無奈嘅係，佢地係利物浦現時陣中僅餘嘅閘位選擇。

假如我係利物浦球迷見到愛隊攞住皮球，我嘅反應唔係期待球隊點樣入波，而係擔心球隊點樣輸反擊。快上快落嘅transitional football對於中型班而言可能奏效，但強隊更加講求控制節奏主導比賽。利物浦今夏喺轉會市場似乎唔太順利，未能彌補上季squad building嘅失誤，亦未能搵到Salah嘅接班人。整體而言，對佢地今季嘅走向並唔樂觀。

正選名單10號位寧願用O'Reilly都唔用Cherki、6號位寧願用Guehi都唔用Nico Gonzalez，大概已經可見Maresca對呢兩位球員有幾大保留，亦符合版主一直以黎對佢地嘅評價。

曼城反勝過程驚險，但整場都成功控制比賽，表現遠比琴日失分嘅兩隊big 6為佳。Maresca有汲取社區盾大敗嘅教訓，有對症下藥改善球隊，亦係值得樂觀嘅原因。

今場曼城控球時改用3-2-5 (圖1)，將Anderson放番喺中場，終於發揮到佢嘅passing range同ball recovery嘅強項。Guehi客串6號位表現不俗，用球前插效果都比想像中好。

逼搶時曼城亦摒棄被睇穿、漏洞甚多嘅4-2-4 high block，用一個man-oriented press：用Haaland看管對手左中堅、Semenyo看管對手右閘同右中堅。喺龍門球呢啲settled play佢地對位唔錯，但open play執行嘅時機掌握得未夠好，就導致上半場嘅失球 (圖2)。

至於破密集方面，睇得出曼城刻意落底唧floated cross去遠柱，但Haaland今場把握力一般。Cherki嘅不可預測性係一把雙面刃，但正面作用似乎點都比無力對抗、頻失控球嘅Foden為多。

琴晚熱刺作客賓福特，可謂完全被torn apart。面對對手極高流動性嘅踢法，佢地缺乏溝通嘅防守導致交人唔清晰，一時幾個mark一個一時走甩人 (圖1)。球員經常唔知應該跟位定跟人，甚至有時出現盲目跟波走嘅情況。

熱刺壓迫同樣執行得唔一致。De Zerbi嘅pressing structure用右翼Moore向對手左中堅施壓，但右閘Gray往往未能及時back up the press (圖2-3)，走漏對手左閘。面對咁well drilled嘅賓福特，對手兩三球猜傳就輕鬆解壓將皮球運到前場 (圖4)。

戰術尚且可以透過訓練同磨合調整，前場人選先係重災區。有睇熱刺熱身賽就知佢地嚴重欠缺進攻質素，只係靠Tel單打獨鬥創造機會，但番到英超賽場就冇呢支歌仔唱。Gallagher踢法只係一名工兵，放喺10號位毫無威脅同創造力。

前場未能停球，大大加重中後場球員嘅負擔。熱身賽表現出色嘅Bergvall屢次嘗試憑一己之力殺出重圍，但往往被洞悉而釀成大錯。喺Kudus同Simons復出前，熱刺急需提升前線實力，難怪佢地同Savinho、Marmoush、Gakpo傳出緋聞。

足球世界嘅轉會市場，其實好多時都係一分錢一分貨。當其他競爭對手都用緊身價過億嘅中場，曼聯Santos搭Tielemans呢個組合就明顯被比下去，尤其喺身體質素同對抗性方面。熱身賽對AC米蘭已經見到問題所在，難怪賽後隨即傳出收購Baleba嘅消息（雖然都係能力狀態成疑）。

Carrick戰術上同其他big 6主帥有一段距離（可能稍後再詳細補充），好需要球員質素搭夠，但目前嘅曼聯仲有好多位置有改善空間。除左一對中場孖寶，左翼嘅Dorgu同中堅嘅Heaven都未達到爭標或者爭前四嘅級數。雙線作戰下，Carrick今季要保住帥位仍要多加努力。

進攻端將隻閘壓得太前，防守端就要付出代價。港會兩球失波左翼何東霖已經好勤力回防，奈何進攻球員防守意識不足，被對手兩次攝贏頂入。本應同潘沛軒對位嘅姚浩明，一次只顧跟人而離開自己崗位，一次壓前助攻後未能及時回防。

戴雅諾麾下嘅港會有好清晰嘅identity。無球在腳嘅4-4-2 diamond press令對手需要經常大腳，消耗對手一定體能。有球在腳堅持短傳，雖然球員實力可能遜於對手，但體力有優勢下就喺下半場兩次透過悅目組織扳平。

相比之下，冠忠南區喺呢啲細節位顯得較遜色，過於依賴球員嘅個人能力，尤其進攻端只係不斷搵兩翼單打獨鬥。雖然阿古路同潘沛軒今場表現出色，最後亦成功由卡朗絕殺，但球隊始終未能透過中場控制比賽，製造太多混亂場面。

有球在腳下嘅至尊沙田，確實幾令人期待。3-4-3將強邊一邊翼衞內收，目的唔單止係喺中路製造人數優勢，更重要係將對手對位嘅翼鋒帶走，讓出一條邊路比順腳嘅邊中堅後上出波。馬利安奴得以頻頻overlap，與其怪責羅倫素疏於防守，不如稱讚郭嘉諾戰術上幫佢製造到空間出黎。

至尊沙田進攻端做得好嘅另一點，係識得追住外援黎踢。上半場左翼龜谷宇護面對羅振庭有優勢，就不斷利用呢邊進襲，收到唔錯效果。下半場換入右翼馬文面對龍梓軒，就將長傳重心放去右路，隨即擴大比數。相反東方浪費太多球權喺李俊霆身上，發揮唔到羅倫素嘅突破能力。

阿仙奴對曼城嘅社區盾比賽，好明顯見到一支夾慣夾熟嘅球隊同一支新帥上任嘅球隊嘅分別。兵工廠喺Arteta嘅多年帶領下，已經蛻變成一支非常well-coached嘅球隊，對於場上唔同狀況都有清晰嘅解決方案。球員熟習自己嘅戰術角色、掌握好時機，喺場上自然唔需要多花時間思考。

後場開短時用8號位同10號位輪流墮後作為third man，開長時用Havertz作為支點解壓（今場刻意針對Khusanov一邊），White嘅overlapping run，Calafiori喺左邊half space前插——每項事件單獨睇起黎平常不過，但做得協唔協調、時機掌握得好唔好，踢出黎就係三比零嘅分別。

以下用一球波做例子睇下兩隊執行上嘅分別。圖1 Raya持球，一對中堅好自然擘開提供短傳選擇。圖2皮球傳到Mosquera腳下，Bruno G.回徹作為third man，White亦現身準備接應。圖3 Raya接應回傳後選擇長傳，由於曼城一對中堅被Havertz同Madueke pin住拉開，中路有大量空位，Tzolis無人看管控定後形成圖4嘅三打二之勢。

點解一個長傳就會形成三打二？還原睇下曼城發生緊咩事。圖1係佢地標誌性嘅4-2-4 high block。圖2 Doku認為係上搶時機轉為一個man-oriented press，但其他隊友未有及時跟隨，可以特別留意Haaland同Foden同時看管Lewis-Skelly，浪費左一個人手。圖3藍月亮人員終於壓前盯人，但對位不清下前場藍衫竟然多於紅衫，後防不但未有+1保護反而少左個人，結果形成圖4人少對人多嘅劣勢。

呢球波只係成場比賽一個縮影。事實上阿仙奴不斷透過呢啲有系統嘅走動輕鬆拆解對手嘅逼搶，相反曼城各自為政嘅踢法容易被打穿。有人將失利歸咎Khusanov同Kovacic，但更深層原因在於兩隊戰術運用上嘅差距。當然Maresca剛走馬上任，需要時間同訓練去實踐心目中一套，不過可以預料幾支剛換帥嘅球隊喺季初表現未必穩定。

Maresca個game model其中一大敗筆，係有球在腳時將Anderson放喺3-1-6入面右邊half space嘅位置。眾所周知呢位英格蘭國腳強項係回收控球權、中場調度、控制節奏，做一個派牌嘅角色。而家勉強將佢放喺最前線，改為做一個接應嘅角色，效果當然未如理想。

事實上Anderson並唔具備踢half space嘅條件：佢欠缺壓落底線出波需要嘅速度，又未有進攻球員突破過人嘅靈氣，亦少見作為box crasher後上入波嘅嗅覺。因此佢今場唯一作用就係單調地不斷喺45度角傳中，威脅十分有限，有時甚至略嫌佢阻礙Semenyo嘅盤扭同傳送路線。

情況其實同Arteta上季一開頭用Rice踢「左8」有異曲同工之妙。解決方法係進攻時將佢放番喺中場（即3-1-6個1）或者墮到三人防線攞波（喺英格蘭都試過），比佢有更多時間面向對方龍門持球派牌。Rodri離隊已成定局，Kovacic老化明顯，將Anderson確立為6號位人選方為上策。

過往外隊夏天訪港，一般由足總或本地球會主辦或協辦，定價唔會過於進取。好似2017年英超亞洲盃，由利物浦、水晶宮、李斯特城、西布朗競逐，首日票價只係由$300至$600，仲設有$180特惠票。一個價錢睇晒兩場比賽，唔洗KOL宣傳已經喺一日內將所有門票售罄。

又好似2024年傑志同馬體會進行熱身賽，公開發售嘅門票一律為$420，特惠票$120。就算2013年同2019年分別邀請曼聯同曼城訪港，最貴票種嘅票價分別都只係$990同$1190。球迷花幾百蚊入場支持愛隊，見到大牌球星落場固然興奮，就算見唔到都唔會有太多投訴。

但近年開始有活動公司以「搞event」嘅心態主辦呢啲熱身賽，將賽事包裝成高檔嘅「盛事」，抬高票價藉以賺盡一分一毫。雖然最平$399看似一個好低嘅門檻，但眾所周知只有極少量嘅山頂位屬於呢個價錢。想要較好嘅觀賞角度同距離，動輒都要$2000起跳，最貴票種更達$2999。

昂貴嘅票價好自然令人卻步。未能負擔嘅球迷只能無奈放棄，能夠負擔嘅球迷大多都唔介意花多少少直接飛到歐洲朝聖。去現場睇英超、西甲、意甲、歐聯、歐霸，好多時$2000內已經可以買到好唔錯嘅座位。更重要係比賽具競爭性，唔需要擔心大牌球星會否隨隊、落到場會否揸流灘。

花呢個價錢睇熱身賽嘅球迷，固然期望見到球星落場獻技，但從來冇人能夠保證某球員必定能夠落場。好似拜仁對濟洲有Neuer缺陣，對維拉到Kimmich未有落場；車路士嘅Palmer喺香港站避戰，到印尼就正選披甲。有人提議加入條款強制球星上陣，但現實中根本難以得到球會同意，就算有相關條款球員都好容易用受傷為由推搪。

近年歐洲列強對於訪亞已經冇以往咁積極，反而更傾向到美國掘金，好似2023同2024年嘅Soccer Champions Tour就係例子。難得邀得外隊訪港，主辦方應當以球迷為本，否則只會透支球迷嘅熱情同期待。外隊出訪其中一個目的係同世界各地球迷拉近距離，但如果票價高到令球迷卻步，賽事已經失去其中一個意義。

Football without fans is nothing.