冬蔭波 Tomyumball

今日兩場港泰拍跳，
各贏一場。
傑志炒 T3 嘅曼谷菁英，
東方輸 T2 嘅北碧動力。
2023 年深水埗泰國孖寶就係踢完曼谷菁英過嚟，
今季佢兩個都踢 T2，
自己努力嘞。
至於北碧動力今季務求一降即升，
上半場兩球領先，兩球完場。

FIFA 東盟盃結果係巴基斯坦代中國，
咁啱巴基斯坦同中國好 Friend，
有「巴鐵」之稱，
亦係人口大國，合晒 FIFA 河車。
雖然論世界排名巴基斯坦喺咁多隊排尾二，
但喺流出嘅比賽編排都仲有得踢 Division 1。
Maybe 中國始終係中途退出，
之前好多嘢都 Set 好咗，
例如香港定咗主辦 D2 就冇得搬上去，
咁就直接位換位唔好煩，
又或者 FIFA 始終想 D1 每組都有邀請隊，
多啲新意多啲收益，
所以亦冇順住排名搬緬甸上去。

喺國際賽期踢，
咁泰國喺 J2 同埋歐洲嗰啲就可以返晒嚟，
若果印尼都召晒荷蘭兵，
就有機會睇下兩邊今時今日夫添對撼會係咩環境。

至於香港就會對返安達臣，
睇下入唔入到決賽鬥柬埔寨（大機）報返六月一箭之仇。
再贏返個盃仔展開下一個四年週期。
‧
睇流傳賽制，D2 包尾就只得兩場比賽，
但正路佢哋點都要預留成個九月十月嘅合拼賽期 for 呢個盃，
即係本來可以踢四場波嘅賽期，
分分鐘結果只能踢兩場，
FIFA 今屆成功嘅話，
睇怕下次都要請多兩隊踢 Division 2，
咁就斯里蘭卡孟加拉台灣都有機會，
睇下台灣會唔會再有啦啦隊。

見北區都去泰國，
暫時我已知嘅係傑理南北東方流埔七隊。
東區去柬埔寨，
港會通常唔出去，
即係得返九龍城同至尊沙田，
煩請波友畀料。

點解鍾意揀泰國集訓已經講咗好多年好多次，
依家夾硬舉多個理由，
就係泰國球會普遍唔出去集訓，
至多係應邀先會出去踢下季前賽，
咁即係 99.9 % 球隊都留喺泰國待約，
拍跳選擇永遠充足。
而除咗泰國球隊，
亦周時有機會踏正馬來西亞、柬埔寨、新加坡、印度球隊嚟集訓，
再多啲選擇。

嚟緊大埔就會對馬來西亞超聯嘅雪蘭莪同鄧嘉樓。
金判坤教緊嘅雪蘭莪啱啱大炒拉查武里四蛋，
都幾兇猛。
又記得以前流浪同柬埔寨嘅金邊皇冠喺泰國拍跳，
又有某隊同獅城水手閉門跳，
好鬼熱鬧。

而就算係雄心壯志同柔佛一樣嘅武里南，
都繼續留喺國內備戰，
日前半粒鐘就 KO 咗未盡全力嘅巴吞聯，
反而柔佛已經連續幾年拉大隊去西班牙。
J League 今年開始跨年，
睇下將來武里南會唔會試下去日本集訓拍下啲硬嘢，
嫌去西班牙太貴嘅話。

又講下 FIFA 東盟盃，
見到話中國退出，
睇下會唔會搵紐西蘭頂，
話晒係世界盃球隊。
而香港嗰組就有餘地加到八隊咁話。
睇 FIFA 規矩，
客隊練波係一定要真草，
但可以輪住用，咁就夠用，
汶萊東帝汶嗰啲整個小西灣過佢哋就 Good。
又係嗰句，希望 FIFA 巡視場地嗰陣，
見到香港仲有用緊大葉草呢啲世界文化遺產，
會批舊錢畀呢個落後地方換多幾塊新草。

尋晚東方都正式公布晒泰國集訓對手，
第一場係對上季 T1 降班嘅北碧動力，
舊年港隊去北碧府踢泰王盃記憶猶新。
呢場拍跳人哋仲 set 做慈善賽，
入場收五十銖，幫助當地青少年成長發展，
咁應該會去馬了。
北碧動力由疫前幾年帶領越南冒起嘅韓國教頭朴恆緒執教，
不過唐辛已經轉會去咗巴蜀，
巴蜀仲出 Post 公開幫佢搵屋，搞笑。

係咪港超隊第一次喺泰國集訓時同非泰國嘅球隊拍跳？
咁多年咁多隊，
又有啲係閉門唔公開，
我都唔記得晒亦唔敢肯定，
記憶中係有對過獅城水手。
至於同樣去咗泰國集訓嘅馬來西亞雪蘭莪就由金判坤帶，
陣中亦有兩個前武里南外援，
包括圖中嚟過香港踢友賽嘅菲律賓國腳泰賓拿斯。
亦見到大埔喺八月一日有另一場拍跳，
對手係 T2 嘅尖竹汶。
八月三就對另一馬超球隊登嘉樓。

又係舊年 hurt 爆香港嘅伊翰芬迪，
上季巴吞聯借佢去勁多鬼嘅武里南，
基本上用唔著，
上半季間唔中後備落場，
同埋盃賽對低組別時落場屠殺，
上半季 Highlights 都喺新加坡，
尤其是香港嗰場，
佢亦喺嗰場受傷抖咗一排，
喺武里南更加冇機會。

但半季時巴吞聯冇收佢返去，
有人話因為佢喺武里南有次入波之後，
嘴件波衫個武里南會徽，
巴吞聯唔 like，
就由得佢喺武里南坐到尾，
唔知係咪真，
係嘅就幾搞笑。
總之佢上季喺武里南大致荒廢，
季尾回流去獅城水手，
離開泰國聯賽。

佢二佬艾辛芬迪就去日本 J3。
大佬艾雲芬迪未知，
已經離開泰港，
加埋佢喺泰國出晒名嘅傷病史，
可能芬迪三兄弟會一次過全部離開泰國。
大佬二佬都喺巴吞聯叱咤一時，
但輸畀傷患。

伊翰喺武里南冇乜點踢，
踢東南亞錦標賽就正好操返起。
尋晚入個靚波。
若果之後對到泰國，
又繼二佬之後一腳搞掂泰國都幾 Dramatic，
但首先兩隊都要分組出線。

暫時至少知道傑理東南流埔六隊去泰國集訓。
其中傑志理文夾埋有六場泰國拍跳直播，
日子咁啱跳過晒啟德嗰三場歐洲球會季前賽。
全季經營亦包括季前經營。

傑志對曼谷菁英（T3）、拉查武里、巴蜀。
拉查係會連鬥傑志東方，
至於巴蜀就講緊已經簽咗上季踢北碧降咗班嘅前英超兵唐辛，
係嘅話就會再多啲睇頭。

理文就對曼谷聯、巴吞聯、四色菊聯。
其中曼谷聯同巴吞聯都熟到爛了，
拍跳同亞洲賽都對過晒，
依家兩隊共用主場，
喺武里南強勢下都仲係揼本組軍，
繼續係泰國勁旅，
反而蒙通聯已經縮到降咗班。
巴吞聯會踢亞冠兩，
睇下抽唔抽中香港。

其他港超隊就仲見有東方喺八月一對大城聯。
依家隨緣見到就講下，
想保密嘅就由得佢。
尋日亞運男足香港抽中泰國，
若果亞冠易又中嘅，
咁呢個幾兩個月兩邊就真係對到識得講對方啲話了，
至少一至十兩邊都肯定好快學識。

執 X 咗佢啦。

世界盃就完，
東南亞錦標賽緊接，
等於 37 度粉嶺瞬間轉移到青衣凍倉。
佢哋 2022 年都試過，
睇完阿根廷對法國兩日，
就係柬埔寨對菲律賓。
但當時東南亞仲叫做有丁點坐完疫監果種 Free 感，
而今次，隔完一屆，
又衰多兩錢。

今次，一來，
喺東南亞雨季踢，高危；
二來，更加緊要，
就係東南亞啲聯賽轉做跨年制之後，
（除咗東帝汶）
喺大家聯賽嘅季前舉行，
阻 X 住晒備戰，
但又冇因應情況而改革賽制，
繼續要人喺非國際賽期入面，
踢一個至長係一個月零兩日嘅賽事。
（七月廿四至八月廿六）

所以，執 X 咗佢啦。

咁嘅情況，
雖然 Madam 都仲係睇重呢個盃，
但啲球會當然理 X 得你，
連想組隊 U23 都無符，
結果叫做勉強湊到隊波出嚟，
有老有嫩，
都仲有啲出名但已經就嚟淡出嘅國腳。
最出力係泰港，
咁當然啦，
Madam 自己隊波都唔身先士卒，
點叫到人畀面幫手。

聽講衛冕嘅越南都仲會去馬，
印尼未贏過亦始終想贏，
新加坡為咗喺亞洲盃好好睇睇都似乎會去馬備戰。
今次泰國應該冇乜機會。
話知佢啦，睇完 48 隊世界盃，
更加需要時間回氣。

今屆世界盃 FIFA 又有嘢俾人鬧，
但望吓東南亞呢邊，
好好多架啦。
所以由 FIFA 東盟盃收東南亞錦標賽嘅皮唔係壞事，
而且香港有份。
今屆世界盃 FIFA 賺大錢，
希望趁呢次香港有份主辦東盟盃，
再多啲錢批到落呢個仲係成日踢大葉草嘅落後成員。
指定係旺角場換草，實報實銷。

傑志日前公布三個泰國拍跳對手，
包括拉查武里；
輪到拉查武里今日正式公布時，
就見到除咗傑志亦有東方。
東方上季先喺亞冠兩俾拉查炒過兩鑊，
不過今次係季前拍跳，
應該無咁大鑊亦無乜所謂。
由於跟住有東南亞錦標賽，
所以泰國九月先至會開 League，
成個八月有排跳。

可惜嘅係度假仔已經唔喺拉查武里，
睇消息話去咗降落 T3 嘅泰國農業大學跟操。
上季泰國農業大學都有同傑志拍過一場，
睇下今季又有冇港超隊搵佢哋拍。

【🇭🇰🔁🇹🇭】
--------------
冠忠南區巴西中場梅里路 ➡️ T1 素可泰