小舞門 Little Dance Moon Studio

舞室默默地踏入了8周年零幾日🙂

我記得的，只係太忙碌🫠

人變、環境變，要追上時代嘅變化實在太唔容易。

有好艱難嘅時刻，有好難拆嘅炸彈…

感謝呢8年內參與過每一位學生同家長，每一位曾經幫忙、支持過嘅人，仲有所有合作單位❣️因為你哋，先可以堅持落去💜

教學、培育依然係我第一順位，優質服務、星級體驗、VIP優惠、包攞獎包升學包生仔… 呢啲繼續唔會有😂

補充：

💟 約1個多星期前，小舞門WhatsApp曾因容量不足，導致少量訊息遺失。假如有家長搵過我哋而一直無收到回覆，請再send多次🙇🏻‍♀️

💟 8月底比賽後，本人會放幾天假✨ 期間舞室照常運作❣️雖說放假，其實都係帶比賽🇰🇷🤭 今次帶成人，所以應該可以嘆吓咖啡☕️😝 入到決賽先有機會跳🙈祝福我哋🇭🇰🥹

#小舞門
#又一年
#身體健康最緊要

完成幼兒班+穎妍姐姐solo賽事✨

感謝Austin團隊用心籌辦舞蹈活動，細心安排，俾咗班小朋友一個美好嘅回憶❣️

多謝每位小朋友，大家都好叻好勇敢。多謝家長們，多謝支持🥰

特別鳴謝希希媽咪、YY媽咪、豆豆媽咪、穎妍媽咪，仲有臨時出手相助嘅小芸媽咪！多得大家，先可以喺咁短時間完成梳化，綵排幾次先出發🥹

謝謝黃老師、Jena老師協助排練，及各項籌備工作。上星期仲嘔緊血，今日可以鬆一口氣了🤣

#小舞門

純分享✨
大家有冇睇Netflix 嘅《鐵拳教育》？

睇到上星期香港發生嘅悲劇，再去睇呢套劇，感觸更深❤️‍🩹

雖然韓國同香港嘅情況不盡相同，為咗戲劇效果亦有誇張成份… 但總括而言呢套劇非常精彩而發人深省。

作為老師，我諗感受最受應該係第5集。「你的孩子是寶貝，老師也是別人的寶貝孩子」，呢句對白亦深深打動到我。

作為舞蹈班導師，好多學生只會一星期見一次，比起學校老師，交集唔算多。加上大部分家長都好錫我，我已經算係好幸運、幸福嘅一群🥰 雖然如此，我都睇到好肉緊，身同感受。

收到來電、訊息時會恐懼，會手震，我都經歷過。不分晝夜嘅訊息、追魂「？」、自私而不合理嘅要求、高高在上嘅指教、明示暗示威脅多關照其小朋友嘅說話…

「唔洗理佢」「洗乜唔開心」「鬧佢啦」…煲劇時，呢啲說話我都係邊睇邊講😅 但當身處其中，尤其當對方理直氣壯得過分，有時真係會陷入自我懷疑：真係我錯？

身邊有好多唔同界別嘅老師，聽埋聽埋，大部份都係一啲唔好嘅事件同情緒。似乎大家最後嘅結論都係：嘗試當一份工去做，盡量唔好放太多感情。（或者轉行）

我都唔知咁樣係好定唔好… 但我嘅體會同領悟係：要愛人，先愛自己；要照顧學生，請先照顧好自己。

網上面睇到呢段說話：
「一定有不適任的老師
但也有很多老師
很用心對待教育這件事」
希望天下間所有用心教學嘅老師，都得到更好嘅對待🫂

除此之外，仲有關於校園暴力、網絡欺凌、升學壓力、少年犯罪…等主題，現實得來亦有笑位，好睇❣️推😘

#感恩仲有好多好好嘅家長同學生
#小舞門先可以繼續走落去
#辦法總比問題多
#如果跳舞能成為你嘅出口
#我亦義不容辭支持你

差啲唔記得影過呢張相🤭

呢排中小學考試週。咁耐以來，每當同啲學生問起考試未、幾時考完，我有時都會隨口講句「識唔識啊」「考試加油」「考完就練返舞啦」🤣

但係我近排開始思考，喺Gen Z…甚至Gen α世代，呢啲說話會唔會對佢哋來講係壓力？畢竟地球會轉、社會會變，唔通仲提倡用藤條打腳咩🫪 如果想避免成為討厭嘅大人，就要嘗試調整一下自己😅

於是乎，上堂前我同班學生講「知道你哋考緊試冇乜時間練習，放心Miss Leung今日會好溫柔🧟‍♀️」跟住佢哋哈哈大笑😀

上堂上到如火如荼之際，作為老師我少不免有點肉緊激動…😂 陳同學話「Miss Leung你又話今日會好溫柔嘅？」

空氣靜止咗3秒…

「我唔溫柔咩？好溫柔啦喎」
同學們紛紛「唔溫柔啊」跟住開始起哄😵‍💫 我瞪咗陳同學一眼「妳個衰妹」。

我話「好啦，咁我再溫柔啲」，跟住開始用疊字講嘢，對每位同學都呵護備至🥰 班人仔開始彈開、話我「好恐怖」「你可唔可以正常啲」…🥲

結論係你哋真係難服侍🤣🤣🤣

好啦，考試辛苦哂啦✨ 不如諗吓考完想做啲咩放鬆吓🫶🏻

#小舞門

大會拍攝嘅靚相同video出爐❤️‍🔥 感謝攝影師❣️

每次完賽後大家問我覺得跳成點，我都真係答唔到，因為喺側邊睇唔到全貌… 所以我都期待咗大會嘅錄影好耐！同自己比嘅，的確每一隊都係比上一次進步咗🫶🏻 讚讚讚✨

但係… 可摸以教吓我點樣用一個欣賞嘅眼光去enjoy啲video🤣 我眼裡只見到甩step、唔對位、冇表情、唔夠俾力… 某一隊直頭係要🫣咁樣睇，唔敢再睇第2次😵‍💫😅

真係好希望有一日可以喺台下做觀眾欣賞🥹

#小舞門
#香港精英舞蹈大賽2026

呢班小魔怪上堂上到拍哂手、Yeah哂咁，估吓發生咩事：

👍🏻跳得好有獎勵
❤️小朋友互相鼓勵
😆表面上鼓勵、實際上恰緊個老師

相信答案已經呼之欲出，嗚…🥹

#小舞門