Electric Veng Football Club

Club din tirh aṭanga theihtawp chhuahtu kan u te, vawi tam tak min Champion pui hnuah GIG Motors Veteran Football Tournament 2023 final in thleng hi kan chhuang che u a, naktuk (16.03.2023)-a FINAL in khelh turah CHAMPION ngei turin duhsakna kan hlan a che u.

SUNNA

MPL 2018 under 18-a kan player David Lalnunfela, Phunchawng Veng Aizawl chu vawiin (March 8, 2023) chhun dar 12:30 khan a boral a, naktuk (March 9, 2023) chhun dar 12:00-ah vui a ni ang. Club chuan David Lalnunfela hi a ui in a sun tak zet a, a kalsan tak a chhungte Pathianin awmpui se tih hi kan ṭawngṭaina a ni.

INKHEL EN TURA SAWMNA

MPL Season 9 khelh mekah vawiin (26.10.2022) tlai dar 3:00 hian RG Stadium Mualpuiah Electric Veng Football Club (EFC) leh Chawnpui FC kan inkhel dawn a, EFC team ṭawiawma a hmuna inkhel en ṭheuh turin veng mipuite kan sawm e.

Mizoram Premier League (MPL) Season 9 khelh mekah vawiin (October 20, 2022) tlai dar 4:00 hian Electric Veng Football Club (EFC) leh FC Bethlehem te kan inkhel dawn a, kan team EFC ṭawiawma a hmuna inkhel en turin kan veng mipuite leh EFC ṭantu zawng zawngte kan insawm e.

INKHEL EN TURA SAWMNA

Mizoram Premier League (MPL) Season 9 khelh mekah vawiin (15.10.2022) tlai dar 4:00 hian RG Stadium Mualpuiah Electric Veng Football Club (EFC) leh Chawnpui FC te kan inkhel dawn a, EFC team ṭawiawma a hmuna inkhel en turin veng mipuite kan insawm e.

Sd/-
General Secretary
EFC 2022 - 2023

KHAWZAWL PANIN ELECTRIC VENG FOOTBALL CLUB

Mizoram Premier League (MPL) Season 9 round 7 khel turin tukin dar 7:30 khan EFC team te chu Khawzawl panin an chhuak ta a, ni 7.10.2022 (Zirtawpni) chhun dar 12:00-ah FC Venghnuai nen an inkhel ang.

EFC team hi Upa R. Ramngaihzuala'n ṭawngṭaina in a thlahliam a, a chungah EFC in lawmthu kan sawi e.

Tunlai hian Khawzawl kalkawng hi leimin leh kawng siam avangin a chhe nasa hle mai a, MPL team dang nimin zinga chhuak te pawh nizan zanlaiah an thleng thei chauh a, EFC team te kalkawngah harsatna tawk loa tluang taka an kal theih nan veng mipuite ṭawngṭainaa min hre reng turin kan ngen a che u.

HRIATTIRNA LEH NGENNA
Khawzawlah MPL

Tunkar MPL hi Khawzawlah khelh tur a ni a, EFC hi naktuk (5.10.2022) zingah Khawzawl panin kan chhuak ang a, ni 7.10.2022 (Zirtawpni) chhun dar 12:00-ah KzDFA Ground, Mualvawm, Khawzawlah FC Venghnuai nen kan inkhel ang.

EFC ṭantu zawng zawng te a thei apiang Khawzawl lama min ṭawiawm turin kan sawm che u a, a kal thei lo te pawh ṭawngṭaina lama EFC min hre reng turin kan ngen bawk a che u.

Sd/-
General Secretary
EFC 2022 - 2023

Ṭha taka hmawr kan bàwk theih nan min ṭawngṭaipui ru – Head Coach

MIZORAM Premier League FINAL chu zanin (December 14) hian RG Stadium-ah ELECTRIC VENG FOOTBALL CLUB leh Aizawl Football Club-te’n kan khel dawn a, veng mipui, Electric Venga awm tawh zawng zawng leh ELECTRIC VENG FOOTBALL CLUB ṭantu zawng zawng a hmuna kan team-te ṭawiawm turin kan sawm a, Head Coach Lalsangzuala Hmar chuan ṭha taka hmawr an bàwk theih nan veng mipuite ṭawngṭaipui turin a ngen.

FINAL hi zan dar 7:30-ah ṭan tur a ni a, nizan khan team chuan FINAL khelh hmaa an inbuatsaihna hnuhnungber an hmang a, Champion ngei turin an infuih.

Club Head Coach Lalsangzuala Hmar chuan EFC-in final a khel dawn a, final chu a tawpna tur a ni lo a, ṭha taka hmawr an bàwk theih nan veng mipuite ṭawngṭaipui turin a ngen a.

"FINAL kan thleng hi kan phu loh malsawmna a ni a, he dinhmun thleng tur hian team chuan theihtawp a chhuah a, FINAL hi team, Club hruaitu leh veng mipui ṭanhona leh thawhrim rah a ni a, he dinhmun kan thleng thei hi kan inchhuang hle a ni. Tunah hian a tawp kan la thleng lo a, ṭha taka a hmawr kan bàwk theih nan min ṭawngṭaipui ru.

"Aizawl FC hi I-League team an ni a, Coach leh player ṭha tak an nei a, anni lakah chuan tereuh tè kan ni a, mahse, kan theihna zawng zawngin, kan beka thlan tui luang zawih zawihin ELECTRIC VENG tan kan khel dawn a, a tam thei ang berin min ṭawiawm ru," a ti.

Football-ah hian mipuite hi player 12-na tia sawi a ni a, zanin FINAL-ah pawh hian team-te ṭawiawm a, minute 90 chhung au phur turin veng mipui a tam thei ang ber a hmuna en turin kan sâwm a, Electric Venga awm tawh, tuna tlang hrang hrang leh mual hrang hranga awmte a hmuna inkhel en turin Club chuan a sawm a, ṭan hun hi inkhawm ban hnu ni dawn mah se, RG Stadium pana kal hma a ngaih avangin veng chhunga Kohhran hrang hrang hriatthiamna kan ngen a, zanin Kohhran inkhawmah team tana ṭawngṭai tur leh zanriah ei hmaa chhung inkhawma team-te ṭawngṭaipui turin Kohhran hrang hrang leh chhungtin kan ngen bawk.

MPL FINAL kan thlen theih chhan hi team-te inpêk vang leh veng mipuite ṭanrual vang a ni a, team ṭha tak din nan sum mamawh a ni a, Club main sponsor, SL Sailo Pharmacy leh co-sponsor, Hotel Rengency chungah lawmthu kan sawi nawn leh a, veng chhunga mi inphalte hnenah sum kan khawn ṭhin a, phal taka min pêk avangin lawmthu kan sawi a, sum mai bakah Club tana lirthei thawhchhuahpui tute, an bungrua phal taka min hmantir ṭhintu Local Council, YMA, MUP leh MHIP-te chungah lawmthu kan sawi a, bang loa min ṭawngṭaipuitu Kohhran leh chhungtin te chungah lawmthu kan sawi.





- Media Cell, EFC

TLANGTIN MUALTINA MITE RG STADIUM-AH AW!!

DECEMBER 14, 2019 (Inrinni) zana ELECTRIC VENG FC leh Aizawl FC te'n Mizoram Premier League FINAL kan khelh turah Club hruaitute chuan Electric Veng mi, hmun hrang hranga awm leh kan venga cheng tawh hmun danga awmte a hmuna inkhel rawn en a, min ṭawiawm turin a sawm.

ELECTRIC VENG FOOTBALL CLUB chuan k*m 25 a tlin k*mah MPL FINAL a lût a, Inrinni zan dar 7:30 hian Aizawl FC nen kan inkhel dawn a, Club hruaitute chuan FINAL en tur hian kan veng mi hmun hrang hranga awm te haw khawm a, inkhel en vek turin a ngen a, kan venga awm tawh hmun danga pem chhuak tawhte pawh kan team te ṭana RG Stadium-a rawn kal turin a sawm a, a hmuna rawn ṭawiawm remchang lo te pawh TV lama lo ṭawiawm a, team te lo ṭawngṭaipui turin a ngen.

MPL FINAL kan thlen lawm nan hian bialtu MLA Pu C Lalmuanpuia chuan ₹50,000 min pe a, lawmthu kan sawi a, Club chuan tun season kal meka min sponsor tu, SL Sailo Pharmacy leh co-sponsor, Hotel Regency chungah lawmthu a sawi thar leh a, Club tana sum thawhtu veng mipui leh veng pawna awmte chungah lawmthu a sawi nawn bawk.





- Media Cell, EFC

MPL FINAL/ ELECTRIC VENG FC VS AIZAWL FC

Mizoram Premier League FINAL, December 14, 2019 (Inrinni) zana khelh turah ELECTRIC VENG FC leh Aizawl FC kan intum dawn.

ELECTRIC VENG FC hian semi final vawi hnih khelhah Chhinga Veng FC kan hneh a, zanin (December 11) khan Chanmari FC leh Aizawl FC te'n semi final 2nd leg an khel a, 1-1 in an inhnehtâwk a, 1st leg-ah Aizawl FC 1-0 a an chak avangin a belhkhawmin Aizawl FC 2-1 in an chak a, FINAL-ah kan intum dawn a ni.

FINAL hi RG Stadium-a khelh tur a ni a, zan dar 7:30-ah ṭan a ni ang. EFC hruaitute chuan FINAL atan team te ṭawngṭaipui turin chhungtin leh mitin a ngen a, a hmuna a tam thei ang ber en turin veng mipuite a sawm bawk.





- Media Cell, EFC

KAN RUAHMANNA PIAH LAMAH PATHIAN A CHE A, FINAL MIN HRUAI THLENG - HEAD COACH

ELECTRIC VENG FOOTBALL CLUB Head Coach Lalsangzuala Hmar chuan MPL semi final-a Chhinga Veng FC kan hneh chungchangah player-te’n Club an hmangaih a, tlawm an duh loh rualin tlem zawk ni chungin an lamah Pathian a ṭang a, an ruahmanna piah lamah thil a tih sak a, FINAL a hruai thleng niin a sawi.

ELECTRIC VENG FOOTBALL CLUB chuan a vawi khat nan Mizorama football inelna sâng ber, Mizoram Premier League FINAL a lût a, November 10 zana RG Stadium-a Chhinga Veng FC nen semi final 2nd leg kan khelhah hun pangngaiah 1 – 1 a inhnehtâwkin penalty shootout-ah 5 – 4 in kan chak a, FINAL kan lût ta a ni.

Semi final 1st leg-ah Club pahnihte hi goal thun lo vin kan inhnehtâwk a, 2nd leg-ah ṭan aṭanga minute 4-naah EFC forward Ramhlunchhunga chuan goal a thun a, minute 73-naah Chhinga Veng hian an si phurh sût mah se, penalty shootout-ah EFC keeper Lalmuansanga chuan ṭum hnih a dan avangin EFC chuan a k*m 25-na tlin k*mah MPL FINAL a lût ta a, Lalmuansanga hi he inkhelah hian khel ṭha ber, Man of the Match-ah thlan a ni.

Semi final 2nd leg thlir kirin Head Coach chuan FINAL an luh chhan chu Pathian vang niin a sawi a, team-te thawhrimna leh veng mipuite ṭanrualna Pathianin mal a sawm a, tlem zawk ni mah ila, Pathian an lama a ṭan avangin 11 an nih thu a sawi a.

“A hmasa berin Pathian chungah lawmthu ka sawi. Coaching staff leh player te thawhrimna te, veng mipui ṭanrualna Pathianin mal a sawm a, Club hruaitu ṭha tak kan nei a, an inpe a, kan vaia ṭanrualna Pathianin mal min sawm a ni. CVFC player-te kha 95% chu ka hriat chian an ni a, anni khel tur khan plan A, B leh C kan nei a, mahse, first half-ah kan tlem ta zawk a, 10 kan nih tâkah chuan kan ruahmanna te kan thlâk vek a, a namai lo tak zet a ni.

“Ka naute’n ELECTRIC VENG FOOTBALL CLUB an hmangaih takzet a, tlawm an duh lo a, result aṭangin an tih mai mai lohzia a lang a, kan thawhrimna te, kan tlawm duh lohna te, veng mipuiin Pathian an auhna te Pathianin a chhang a, tlem zawk ni mah ila, Pathian kan lamah a ṭang tlat a, kan goal min venhim sak a, Muansanga k*t hmangin FINAL min hruai thleng ta a ni. Kan plan piah lamah Pathian a che.

“FINAL kan thleng hi Pathian vang a ni ka ti lo thei lo a, lawmthu ka sawi a, veng mipuite pawhin Pathian hnenah lawmthu sawi zel ila, RG stadium-ah mi tam takin min ṭawiawm a, FINAL-ah kha aia tam kha kal ila, inungrual takin team-te min ṭawiawm a, team-te min ṭawngṭaipui turin kan ngen,” a ti.

Club Manager Samuel Vanlalpeka pawhin Pathian hnenah lawmthu an sawi a, coaching staff, player leh veng mipuite thawhrimna leh ṭanrualna Pathianin mal a sawm niin a sawi.

EFC President Pu Lalhmingmawia pawhin FINAL kan thlen chungchangah ‘veng mipuite’n Pathian hnenah lawmthu sawi mawlh mawlh ang u’ a ti a, FINAL-ah veng mipui a tam thei ang berin team-te ṭawiawm a, ṭawngṭaipui turin a ngen.

FINAL hi December 14, 2019 (Inrinni) zanah RG Stadium-ah khelh tur a ni a, semi-final pakhat zawkah zanin (December 11) hian Aizawl FC leh Chanmari FC-te an inkhel ang.

FINAL atan hian Club pawhin theihtawp a chhuah niin Club Vice President Pu Lalzuitluanga Ralte chuan a sawi bawk.





- Media Cell, EFC

The Club salute and wel-come Lalnunsanga & Lalrinzuala Tlau, Champion of India.