02/10/2026
2ND MIZORAM OPEN AMATEUR MMA CHAMPIONSHIP HLAWHTLING TAKA NEIH ZAWH A NI
AIZAWL: Mizoram State Mixed Martial Arts Association (MISMA) buatsaihin September ni 29 aṭanga October ni 2 chhung khan '2nd Mizoram Open Amateur MMA Championship' chu hlawhtling taka neih zawh a ni. He inelnaah hian MISMA affiliated club leh gym hrang hrang bakah individual entry aṭangin MMA fighter ṭhahnem tak an inlan a, mipui hlut pawh a hlawh hle.
Championship-ah hian International Mixed Martial Arts Federation (IMMAF) dan awmlai angin Youth category (A, B leh C) bakah Senior category-ah te inelna sang tak neih a ni a, Mizo ṭhalaite zingah MMA thiam leh tui an pung chho hle tih a hmuh theih a ni. A pumpuiah Dawrpui-a awm SPES Martial Arts Academy fighter-te an che ṭha hle a, Gold 10, Silver 4 leh Bronze 4 lain Team Champion an ni. PMS MMA academy chuan Gold 2, Silver 2 leh Bronze 1 lain 1st Runner-up an hauh ve thung a; 2nd Runner-up chu Elbruz Combat niin, Gold 1, Silver 1 leh Bronze 1 an la a ni.
Mimal chawimawinaah Best Fighter atan Biaklawmthara (SPES) thlan a ni a, Most Promising Fighter atan Malsawmsanga (Reignite) thlan a ni bawk.
MISMA Technical Chairman Pu Dengthanchhunga hnen atanga report dawn danin Weight hrang hranga champion te chu hetiang hi a ni:
Youth-C:
44 kg: Lalzirtluanga (IND)
57 kg: John Malsawmsanga (IND)
Youth-B:
44 kg: Krish Raj (PMS)
52 kg: Benjamin C. Lalrempuia (SPES)
56.6 kg: C. Lalrammawia (SPES)
62 kg: John Paul (IND)
72 kg: C. Lalawmpuia (SPES)
Youth-A:
52 kg: Malsawmdawngkima (SPES)
56.7 kg: Thanghan (Indiv)
61.2 kg: Lalbiakkima (SPES)
70.3 kg: Gabriel Khiangte (SPES)
Senior:
52.2 F: Elizabeth Kawngkharmawii (Elbruz)
52.2 kg: Zakaria Thanmawia (PMS)
56.7 kg: Biaklawmthara (SPES)
61.2 kg: Alex Lalremrua (SPES)
65.8 kg: Laltlansanga (SPES)
70.3 kg: Lalțanzuala (SPES)
77.1 kg: Michael VL Awmpuia (Alpha)
MISMA President Pu T. Lalrinpuia chuan he championship hlawhtling taka buatsaih a ni chu lawmawm a tih thu sawiin, Mizo ṭhalaiten national leh international thlenga MMA hmanga hlawhtlinna an chan theih nan leh, mahni ke ngeia an dinchana professional fighter an nih theih nan theih tawp chhuah a nih zel tur thu a sawi.
MISMA General Secretary Pu Samuel Lalrozama chuan, k*mtir lama State Championship an neih zawh tawh avanga tel an tlem an rin laia mi 80 chuang lai mai an in-register hian Mizo ṭhalaite zingah MMA an ngaihhlutzia leh an huaisen tawhzia a tarlang hle a ni tiin, tun tum inelna hi Open a nih angin Mizoram district 6 bakah Manipur leh Assam lam aṭangin fighter-te an lo tel ve phalsak a nih thu a sawi bawk.
MISMA Treasurer Pu Lalthakima chuan, entry fee chhete an lak bakah pawl hruaitu (Executive Committee Member)-te thla tin sum thawhkhawm avanga national championship khel tura intir thei leh hetiang event hi k*m khatah vawi thum te nei thei an nih thu tarlangin, Pathian kaihhruaina hi a lawmawmin mak an tih ṭhin thu a sawi bawk.
He inelna hian Mizoram-a Mixed Martial Arts hmasawn zia a pholang chiang hle a, nakin zelah pawh professional fighter ṭha tak tak an rawn chhuah theihna tura stepping stone pawimawh tak a ni. He event hi MISMA media partner BR Studio YouTube channel-ah a thlawnin live-a thlir theih reng a ni. October 2, 2026 (Zirtawpni) zing dar 10:00 aṭangin final fight neih a ni a, chhun dar 12:00-ah Closing Function neih niin, kharna hun hi MISMA Honorary President Lt. Col. Clement Lalhmingthanga, MLA-in a hmanpui a, MMA hi ruihhlo do kawnga tha berte zing ami niin khawvel hriatah kan la inpho lang ngei dawn a ti a, thalaite chu kan ram tung dingtu ni tur leh thalai dangte entawn tlak ni turin MMA fighter te a chah a, a tul tula hman atan MISMA hnenah Rs. 20,000 a hlan nghal a ni.
