04/08/2022
അതേടോ ഞങ്ങൾ കൊല്ലക്കാരാണ്.നിങ്ങൾ പറയുന്ന, കേൾക്കുന്ന കൊല്ലമല്ല.'കൊല്ലം കണ്ടവനില്ലം' വേണ്ട എന്ന് പറയിപ്പിക്കുന്ന കൊല്ലം.
ലോകത്തിലെ ഏറ്റവും വലിയ പക്ഷി ശില്പം ജടായു ഞങ്ങളുടെ ചടയമംഗലത്താണ്.തിരുവതാംകൂറിൽ ആദ്യമായി ട്രെയിൻ ഓടിയത് ഞങ്ങളുടെ കൊല്ലം - പുനലൂർ -ചെങ്കോട്ട റൂട്ടിലാണ്. ഇന്ത്യയിലെ ആദ്യത്തെയും, ഏഷ്യയിലെ രണ്ടാമത്തെയും ഇക്കോ ടൂറിസം ഞങ്ങളുടെ തെന്മലയിലാണ്.
145 വർഷം പഴക്കമുള്ള സിവിൽ എഞ്ചിനീയറിങ് വിസ്മയമായി ഇന്നും തല ഉയർത്തി നിൽക്കുന്ന തൂക്കുപാലവും, കേരളത്തിലെ ആദ്യത്തെ പേപ്പർമില്ലും ജില്ലയുടെ ടൂറിസം ആസ്ഥാനവും ഞങ്ങളുടെ പുനലൂരിലാണ്.ഇന്ത്യയിലെ രണ്ടാമത്തെ ഉയരമുള്ള വിളക്കുമാടം സ്ഥിതി ചെയ്യുന്നത് ഞങ്ങളുടെ തങ്കശ്ശേരിയിലാണ്.അഷ്ടമുടിക്കായലും,നീണ്ടകരയും, മൺട്രോത്തുരുത്തും, ശാസ്താംകോട്ടക്കായലും,അച്ചൻകോവിലും, ആര്യങ്കാവും,കുളത്തൂപ്പുഴയും,കഥകളിയുടെ ജന്മനാടായ കൊട്ടാരക്കര യും കരുനാഗപ്പള്ളി യും പത്തനാപുരം വും പരവൂർ ഉം അഞ്ചലും സാമ്പ്രാണിക്കൊടിയും ഞങ്ങൾക്ക് തിലകക്കുറികളാണ്.
1809 ജനുവരി 16 ന് വേലുതമ്പി ദളവ ബ്രിട്ടീഷ് സാമ്രാജ്യത്തെ വെല്ലുവിളിച്ചുകൊണ്ട് വിളംബരം പുറപ്പെടുവിച്ചത് ഞങ്ങളുടെ കുണ്ടറയിലാണ്.1938 ൽ കടക്കലിൽ നീതിരഹിതമായ കരങ്ങള്‍ക്കും ചുങ്കങ്ങള്‍ക്കും എതിരെ ഉയര്‍ന്ന കര്‍ഷകപ്രക്ഷോഭം പിന്നീട് സര്‍ക്കാര്‍ ശക്തികള്‍ക്കെതിരെ നടന്ന സായുധവിപ്ലവമായി മാറിയ കടയ്ക്കല്‍വിപ്ലവം നടന്നതും,5 ധീരന്മാർ തൂക്കുമരത്തിലേക്ക് നടന്നു കയറിയതും ഞങ്ങളുടെ ദേശ സ്നേഹത്തിന്റെ ചരിത്രം.
1915ൽ മഹാനായ അയ്യങ്കാളി ജാതീയതയുടെ അടയാളമായി അടിച്ചേൽപ്പിക്കപ്പെട്ട കല്ലുമാല വലിച്ചെറിയാൻ സ്ത്രീകളോട് ആവശ്യപ്പെട്ടതും നവോത്ഥാന കേരളത്തിന് ശിലപാകിക്കൊണ്ട് ജാതി തമ്പുരാക്കന്മാരുടെയും, പ്രമാണിത്തത്തിന്റെയും മുഖത്തേക്ക് അവർ കല്ലുമാലകൾ വലിച്ചെറിഞ്ഞതും ഞങ്ങളുടെ പീരങ്കി മൈതാനത്താണ്.
രാജ്യത്തെ 70% വരുന്ന കശുവണ്ടി കയറ്റുമതിയും കൈയാളുന്ന,മത്സ്യ സമ്പത്തിന് പേരുകേട്ട ജില്ലയാണ് ഞങ്ങളുടെ കൊല്ലം. കഥകളിയുടെ തമ്പുരാൻ കൊട്ടാരക്കര തമ്പുരാനും,അമ്മയാം ഭൂമിയെ പാടിയുണർത്തിയ കവി ഓ.എൻ.വി യും ഞങ്ങളുടെ സ്വത്താണ്.ആദ്യ എഴുത്തച്ഛൻ പുരസ്‌കാരം നേടിയ ശൂരനാട് കുഞ്ഞൻപിള്ളയും,ആദ്യ വയലാർ അവാർഡ് നേടിയ ലളിതാംബിക അന്തർജ്ജനവും ഞങ്ങളുടെ സാഹിത്യ സംഭാവനകളുടെ സാക്ഷ്യങ്ങളാണ്.
മലയാള സിനിമയുടെ പൗരുഷത്തിന്റെ പ്രതീകമായി ഇന്നും അടയാളപ്പെടുത്തുന്ന അനശ്വര നടൻ ജയനും,നാടക കുലപതി ഓ. മാധവനും,കഥാപ്രസംഗകലയെ മലയാള മണ്ണിൽ ജനകീയമാക്കിയ സാംബശിവനും അരങ്ങത്തെ ഞങ്ങളുടെ ജില്ലയുടെ അഭിമാനങ്ങളാണ്.ഓസ്‌കർ വേദിയിൽ മലയാളത്തെ എത്തിച്ച റസൂൽ പൂക്കുട്ടിയും,മലയാള ചലച്ചിത്ര ഗാനശാഖയെ പതിറ്റാണ്ടുകളോളം നയിച്ച രവീന്ദ്രൻ മാഷും,ദേവരാജൻ മാഷും ഞങ്ങളുടെ കൊല്ലത്തിന്റെ സ്വത്താണ്.
പുരാതന സന്ദേശകാവ്യമായ 'ഉണ്ണൂനീലിസന്ദേശ'ത്തിലും, കേരളവർമ്മ വലിയകോയിത്തമ്പുരാന്റെ 'മയൂരസന്ദേശ'ത്തിലും കൊല്ലം നഗരത്തിന്റെയും ഭൂപ്രദേശങ്ങളുടെയും അത്യാകർഷകമായ വർണ്ണനകൾ ധാരാളമുണ്ട്‌.
അങ്ങനെ എണ്ണിയാൽ ഒടുങ്ങാത്ത നേട്ടങ്ങളും,അഭിമാനം പേറുന്ന ചരിത്രങ്ങളും, വർഗീയ ലഹളകൾ ഇല്ലാത്തതും,മതം പറഞ്ഞ് തമ്മിൽതല്ലാത്തതുമായ നല്ല മനുഷ്യരുടെ നാടാണ് ഞങ്ങളുടെ കൊല്ലം. പ്രളയം വന്ന് സർവ്വതും തകർത്ത നാളുകളിൽ പിറ്റേന്നാൾ സ്വന്തം വീട്ടിലെ അടുപ്പ് പുകയില്ലെങ്കിലും മതമേതെന്ന് അറിയാത്ത ജാതിയെന്നറിയാത്ത മനുഷ്യന്റെ ജീവൻ രക്ഷിക്കുവാൻ പ്രളയ ജലത്തിലെ ആഴങ്ങളിലേക്ക് ഊളിയിട്ട കേരളത്തിന്റെ സൈന്യം ഞങ്ങളുടെ കൊല്ലം കാരായിരുന്നു.ഏതെങ്കിലും തുരുത്തുകളിൽ ഉണ്ടാകുന്ന ഒറ്റപ്പെട്ട സംഭവങ്ങൾക്ക് ജില്ലയുടെ പ്രതിച്ഛായ നൽകി നാലെഴുത്ത് എഴുതി ഞങ്ങളെ അങ്ങ് മോശമാക്കി കളയാം എന്നാണ് ചില ഫേസ്ബുക്ക് ജീവികളുടെ വിചാരമെങ്കിൽ ആ മോഹങ്ങൾക്ക് സോപ്പു കുമിളകളുടെ ആയുസ്സ് മാത്രമേ ഉണ്ടാകൂവെന്ന് ഓർത്തു കൊള്ളുക.നേട്ടങ്ങളുടെ പട്ടികയിൽ സ്വന്തം ചരിത്രത്തോട് മത്സരിക്കുവാൻ ഞങ്ങളുടെ കൊല്ലം ഇനിയുമുണ്ടാവും.
©അഡ്വ. ശ്യാം. എസ്
