06/09/2026
അഹ്മദ് ഇമ്രാന് അര്ദ്ധ സെഞ്ച്വറി; കാലിക്കറ്റിനെ തകര്ത്ത് തൃശ്ശൂര് ടൈറ്റന്സിന് കെ.സി.എല് കിരീടം
കാലിക്കറ്റ് ഗ്ലോബ്സ്റ്റാഴ്സിനെ തോല്പ്പിച്ച് കേരള ക്രിക്കറ്റ് ലീഗ് കിരീടമുയർത്തി തൃശൂർ ടൈറ്റൻസ്. കാലിക്കറ്റ് ഉയർത്തിയ 168 റണ്സ് വിജയലക്ഷ്യം മൂന്ന് പന്തുകള് ശേഷിക്കെ മറികടന്നാണ് തൃശൂർ കപ്പുയർത്തിയത്.
അഹ്മദ് ഇമ്രാന്റെ തകർപ്പൻ അർധസെഞ്ചുറിയും ബാറ്റിങ്ങിലും ബൗളിങ്ങിലും തിളങ്ങിയ ക്യാപ്റ്റൻ എംഎസ് അഖിലിന്റെ പ്രകടനവുമാണ് തൃശൂരിന്റെ ജയത്തില് നിർണായകമായത്. അഹ്മദ് ഇമ്രാനാണ് പ്ലെയർ ഓഫ് ദി മാച്ച്. ഒപ്പം ആലപ്പി റിപ്പിള്സിൻ്റെ മുഹമ്മദ് അസറുദ്ദീൻ പ്ലെയർ ഓഫ് ദി ടൂർണ്ണമെൻ്റായും തെരഞ്ഞെടുക്കപ്പെട്ടു.
ഫൈനലില് ടോസ് നേടിയ കാലിക്കറ്റ് ക്യാപ്റ്റൻ രോഹൻ കുന്നുമ്മല് ബാറ്റിങ് തെരഞ്ഞെടുക്കുകയായിരുന്നു. പതിവുപോലെ തകർപ്പൻ ഫോമില് ബാറ്റ് വീശിയ രോഹൻ, ശരത്ചന്ദ്രപ്രസാദ് എറിഞ്ഞ രണ്ടാം ഓവറില് ഒരു സിക്സും രണ്ട് ഫോറുമടക്കം 15 റണ്സ് വാരിക്കൂട്ടി. എന്നാല് അടുത്ത ഓവറില് രണ്ട് റണ്സെടുത്ത വരുണ് നായനാരെ പുറത്താക്കി ആനന്ദ് ജോസഫ് കാലിക്കറ്റിന് ആദ്യ പ്രഹരമേല്പ്പിച്ചു. റണ്റേറ്റ് ഉയർത്താനുള്ള ശ്രമത്തിനിടെ രോഹൻ കുന്നുമ്മലും മടങ്ങിയതോടെ കാലിക്കറ്റ് പ്രതിരോധത്തിലായി. 17 പന്തുകളില് നിന്ന് 21 റണ്സായിരുന്നു രോഹൻ നേടിയത്.
തുടർന്ന് മൂന്നാം വിക്കറ്റില് ഒന്നിച്ച അഖില് സ്കറിയയും അശ്വിൻ ആനന്ദും ചേർന്ന കൂട്ടുകെട്ട് കാലിക്കറ്റിന് മുതല്ക്കൂട്ടായി. ഇരുവരും ചേർന്ന് 49 പന്തുകളില് 73 റണ്സ് കൂട്ടിച്ചേർത്തു. 45 റണ്സെടുത്ത അഖില് സ്കറിയയെ പുറത്താക്കി ബിജു നാരായണനാണ് ഈ കൂട്ടുകെട്ടിന് അവസാനമിട്ടത്. തൊട്ടടുത്ത ഓവറില് 40 റണ്സെടുത്ത അശ്വിൻ ആനന്ദും മടങ്ങുമ്പോള് നാല് വിക്കറ്റിന് 144 റണ്സെന്ന നിലയിലായിരുന്നു കാലിക്കറ്റ്. എന്നാല് തുടർന്ന് കണ്ടത് തൃശൂരിന്റെ ശക്തമായ തിരിച്ചുവരവാണ്. കണിശതയോടെ പന്തെറിഞ്ഞ ടൈറ്റൻസിന്റെ ബൗളർമാർ കാലിക്കറ്റിന്റെ സ്കോറിങ് ദുഷ്കരമാക്കി.
കാലിക്കറ്റിന്റെ ബിഗ് ഹിറ്റർമാരായ സല്മാൻ നിസാർ, അബ്ദുള് ബാസിദ്, കൃഷ്ണദേവൻ എന്നിവരില് ഒരാള്ക്ക് പോലും നിർണായക മത്സരത്തില് തിളങ്ങാനായില്ല. സല്മാൻ 16-ഉം, അബ്ദുള് ബാസിദ് 14-ഉം കൃഷ്ണദേവൻ ഏഴും റണ്സെടുത്ത് മടങ്ങിയതോടെ കാലിക്കറ്റിന്റെ സ്കോർ 167-ല് അവസാനിച്ചു. മൂന്ന് വിക്കറ്റ് വീഴ്ത്തിയ അബ്ദുള് റമീസാണ് തൃശൂർ ബൗളിങ് നിരയില് ഏറ്റവും തിളങ്ങിയത്. രണ്ട് വിക്കറ്റ് വീതം നേടിയ ആനന്ദ് ജോസഫിന്റെയും ശരത്ചന്ദ്രപ്രസാദിന്റെയും പ്രകടനങ്ങളും ശ്രദ്ധേയമായി.
മറുപടി ബാറ്റിങ്ങിനിറങ്ങിയ തൃശൂരിന് ആദ്യ ഓവറില് തന്നെ വിഷ്ണുരാജിന്റെ (8) വിക്കറ്റ് നഷ്ടമായി. തുടരെ രണ്ട് ഫോറുമായി തുടങ്ങിയ വിഷ്ണുരാജിനെ അഖിൻ സത്താർ റിട്ടേണ് ക്യാച്ചിലൂടെ പുറത്താക്കുകയായിരുന്നു. നാലാം ഓവറില് 18 റണ്സെടുത്ത കെ.ആർ. രോഹിതും മടങ്ങി. എന്നാല് മൂന്നാം വിക്കറ്റില് ഒന്നിച്ച അഹ്മദ് ഇമ്രാനും സഞ്ജീവ് സതീശനും ചേർന്ന കൂട്ടുകെട്ട് തൃശൂരിന്റെ വിജയത്തിന് അടിത്തറയിട്ടു. വിക്കറ്റ് കാത്തുസൂക്ഷിക്കുന്നതിനൊപ്പം മോശം പന്തുകളെ അതിർത്തി കടത്തിയും ഇരുവരും അനായാസം ഇന്നിങ്സ് മുന്നോട്ടുനീക്കി. തകർപ്പൻ ബാറ്റിങ്ങിലൂടെ 87 റണ്സിന്റെ കൂട്ടുകെട്ടാണ് ഇരുവരും പടുത്തുയർത്തിയത്.
16-ആം ഓവറില് അഹ്മദ് ഇമ്രാനെയും സഞ്ജീവ് സതീശനെയും പുറത്താക്കി ജോസ് പെരയില് കാലിക്കറ്റ് ആരാധകർക്ക് പ്രതീക്ഷ നല്കി. 49 പന്തുകളില് നിന്ന് ഏഴ് ഫോറും രണ്ട് സിക്സുമടക്കം 69 റണ്സാണ് അഹ്മദ് ഇമ്രാൻ നേടിയത്. സഞ്ജീവ് സതീശൻ 29 റണ്സെടുത്തു. വിജയത്തോടടുക്കെ തൃശൂരിന് രണ്ട് വിക്കറ്റുകള് കൂടി നഷ്ടമായി. നിഖില് തോട്ടത്ത് 14-ഉം മുഹമ്മദ് ഇനാൻ എട്ടും റണ്സുമായി മടങ്ങി. എന്നാല് മറുവശത്ത് നിലയുറപ്പിച്ച എം.എസ്. അഖില് ക്യാപ്റ്റന്റെ ഇന്നിങ്സുമായി ടീമിനെ വിജയത്തിലെത്തിച്ചു. 11 പന്തുകളില് നിന്ന് 19 റണ്സുമായി അഖില് പുറത്താകാതെ നിന്നു. കാലിക്കറ്റിന് വേണ്ടി ഇബ്നുള് അഫ്താബും ജോസ് പെരയിലും രണ്ട് വിക്കറ്റ് വീതം വീഴ്ത്തി.
മൂന്ന് സെഞ്ച്വറിയടക്കം ടൂർണ്ണമെൻ്റിലാകെ 596 റണ്സ് നേടിയ മൊഹമ്മദ് അസറുദ്ദീനാണ് ടൂർണ്ണമെൻ്റിൻ്റെ താരവും മികച്ച ബാറ്ററുമായി തെരഞ്ഞെടുക്കപ്പെട്ടത്. 18 വിക്കറ്റുകള് വീഴ്ത്തിയ ട്രിവാണ്ഡ്രം റോയല്സിൻ്റെ എം നിഖിലാണ് മികച്ച ബൗളർ. മികച്ച യുവതാരത്തിനുള്ള പ്രോമിസിംഗ് യങ്സ്റ്റർ പുരസ്കാരം തൃശൂർ ടൈറ്റൻസിൻ്റെ മൊഹമ്മദ് ഇനാൻ സ്വന്തമാക്കി. ഏരീസ് കൊല്ലം സെയിലേഴ്സിനാണ് ഫെയർ പ്ലേ പുരസ്ക്കാരം.
