11/04/2026
अंजनी बुद्रुक येथे क्रांतिसूर्य महात्मा ज्योतिबा फुले यांची जयंती उत्साहात संपन्न
मेहकर: तालुक्यातील अंजनी बुद्रुक येथील महात्मा फुले व्यायामशाळेत 11 एप्रिल रोजी क्रांतिसूर्य महात्मा ज्योतिबा फुले यांची जयंती मोठ्या उत्साहात साजरी करण्यात आली. याप्रंगी प्रमुख मार्गदर्शक म्हणून बोलताना भास्करराव पाटील यांनी प्रतिपादन केले की, शिक्षणानेच मनुष्याला सत्य-असत्य आणि अंतिम हिताचा विचार करण्याची शक्ती प्राप्त होते; हाच उद्देश समोर ठेवून महात्मा फुलेंनी शिक्षण चळवळ गतिमान केली. स्त्री शिक्षणासह सामाजिक सुधारणेची मुहूर्तमेढ रोवणारे फुले हे अज्ञानरुपी अंधकार दूर करणाऱ्या 'शिक्षण' या अस्त्राचे पुरस्कर्ते आणि आधुनिक समता-स्वाभिमान चळवळीचे जनक होते, त्यामुळे त्यांचे विचार सर्वांसाठी प्रेरणादायी आहेत. पुढे बोलताना ते म्हणाले की, महात्मा फुले हे समाजक्रांतीचे खरे जनक, शिक्षणतज्ञ आणि शेतकऱ्यांच्या समस्यांचे सखोल अभ्यासक होते; सध्याच्या काळात धर्मांमधील वाद थांबवण्यासाठी त्यांच्या तत्वज्ञानाशिवाय दुसरा पर्याय नाही. कार्यक्रमाच्या सुरुवातीला भास्करराव पाटील, व्यायामशाळेचे अध्यक्ष गजानन पायघन, डॉ. अभिषेक अवचार, विनायक नागोलकर, करण पारिस्कर, प्रतिक पायघन व अन्य मान्यवरांनी महात्मा फुलेंच्या प्रतिमेला पुष्पहार अर्पण करून अभिवादन केले. या कार्यक्रमाचे नेटके सूत्रसंचालन विशाल पायघन यांनी केले तर आभार प्रदर्शन गजानन पायघन यांनी मानले असून, यावेळी व्यायामशाळेचे सभासद व ग्रामस्थ मोठ्या संख्येने उपस्थित होते.
