Aðdáendasíða Kormáks

Laugardagurinn 23. maí er gleðidagur fyrir aðdáendur ekta fótbolta á ekta grasi. Þá verður spilaður fyrsti grasleikur sumarsins á Norðurlandi og eins og undanfarin ár þá fer hann fram á Blönduósi!

Lagt verður af stað í tvisvar sinnum 45 mínútna vegferð klukkan 14:00 og um kaffileitið ætlum við Kormáks Hvatar menn að vera komnir með þrjú stig til viðbótar í sarpinn.

Káramenn hafa farið vel af stað í deildinni, svo búast má við hörkuleik eins og venjulega. Síðast þegar þeir komu í heimsókn tókum við þá næsta örugglega, en hver leikur á sitt líf og þessi er engu undanskilinn í þeim efnum.

Við hvetjum fólk til að mæta á völlinn og styðja sitt lið. Hin sívinsæla árskortasala er í gangi, hægt er að horfa á leikinn í Livey fyrir þá sem lengra frá sitja (muna afsláttarkóðann kormakurhvot2026). Sjá allt um það í kommentum!

Koma svo - áfram bleikir!

Aðdáendasíðan minnir á að sala árskorta er í fullum svíng og hvernig liðið kemur út úr rásblokkunum lofar góðu fyrir sumarið!

Unun hefur verið að horfa á hvernig við erum að spila saman og þegar liðið verður orðið slípað þá biðjum við Guð að blessa Ísland.

Afar & ömmur, meirihlutar & minnihlutar, foreldrar & börn - sýnið stuðning í verki og tryggið ykkur ársmiðann strax! Styttist í fyrsta heimaleikinn!

Kormákur/Hvöt Miðasala

Hlutfallslega væri íslenska útgáfan af þessu að Laugarbakki ætti lið í efstu deild. Gamla góða höfðatalan getur verið skemmtilegur herra.

Einhvern tímann var sungið á pöllunum um "Kormák Hvöt í Pepsídeild", svo maður veit aldrei hvað framtíðin færir oss. Stay tuned!

Minnsta bæjarfélag sem hefur átt lið í Bundesligunni

ÆÐRULEYSI NÚ!

Fræg eru orð Frank Costanza úr Seinfeld þáttunum, þegar hann hafði fengið nóg af sinni frú og ákallaði æðri máttarvöld. Leikmenn og áhengjur Kormáks Hvatar eru í skóm Franks þessa dagana, þar sem eiginkonan eru dómar sem falla á móti okkur í uppbótartímum.

Þegar Dalvíkur-draugsi var næstum kominn úr minni okkar kom annan álíka óvelkominn og óréttlátur löðrungur á Selfossi í dag. Nú, eins og þá gerði að grautinn saltari að dómaratríóið viðurkenndi að hafa tekið ranga ákvörðun eftir leik.

EN STOPP HÉR.

Við ætlum ekki að verða fórnarlömb. Við ætlum ekki að mæta í næsta leik með þandar taugar og upplifa okkur í eilífum mótvindi. Knattspyrnan á það til að jafna sig út, svo við lifum í þeirri von að vindmylla handahófskenndra atburða fari að snúast okkur í vil.

Liðið er að spila vel. Von er á einhverjum úr meiðslum og vorið er að grípa um sig á norðurhjara landsins. Tökum það jákvæða úr leik dagins og leyfum því að spillast yfir í næsta leik. Mark Guzman í dag var eitt það fallegasta sem við munum sjá í sumar. Vörnin var í 95% leiksins með allt í teskeið. Trausti heldur áfram að stimpla sig inn í liðið og miðjan okkar er frábær.

Þetta var svo nálægt og það að við séum með allt á hornum okkar eftir að hafa haldið Selfossi á þeirra grund nákvæmlega þar sem við viljum hafa þá er ákveðinn mælikvarði á hvert við erum komin sem lið.

Konfúsíus sagði á sínum tíma: 知之者不如好之者，好之者不如乐之者。Lauslega þýðist þetta "Að skilja er gott, að njóta er betra og að gleðjast er best."

Við skiljum að þetta kemur allt. Við njótum þess að liðið er mjög gott og við munum gleðjast þegar stigin fara að koma í land. Því þau munu koma í land.

Það er ekki nóg að á laugardaginn límist landinn við EuroVision, gangi að kjörkössunum og fagni afmælisdegi Emilíönu Torrini, heldur fer þá fram stórleikur Selfoss og Kormáks Hvatar í þriðju umferð 2. deildar 2026.

Hér fara liðin í fjórða sæti (við) og því tíunda (þeir), en ekkert ber á milli í stigafjöld, svo lítið er að marka eftir svona stuttan tíma móts. Ef rýnt er í gögn, þá má sjá að engin vörn hefur staðið jafn föst og okkar, með aðeins eitt "mark" á sig. Á móti kemur að engin sókn hefur hrellt varnarlið andstæðinganna jafn mikið og við, með aðeins tvö skoruð.

Síðast þegar liðin mættust fór 1-0 fyrir heimamenn í fyrsta leik ársins 2024. Nú tökum við trompin á loft og náum í stigin til baka - Sjáumst þar og munið að kjósa!

Laugardagarnir verða ekki mikið friðsælli en sá 9. maí 2026, þegar lið Kormáks Hvatar rúllaði inn í Ólafsvík á höttunum eftir sínum fyrstu stigum á Íslandsmótinu þetta árið. Eftir umdeilt tap á Dalvík helgina á undan var fyrir leik talsvert rætt um hvernig sú niðurstaða fékkst, en þó skynjuðu fréttaritarar að þessi hópur væri nógu þroskaður og hefði séð nógu margt til að láta þetta ekki fella sig. Það er nefnilega þannig að ein dásemdin við Íslenskan fótbolta er sú, að ekki er búið að ræna hana sálinni með myndbandseftirspili og nemum um allan völl. Hér gera leikmenn og dómarar mistök og það er hægt að ræða alla vikuna og fram að næsta leik. Stundum ertu yfir og stundum lendir þú undir.

Víkingur Ólafsvík skartar glæstri sögu fyrir þessa deild. Þeirra lið spilaði í efstu fyrir ekki svo löngu og hefur alið af sér mjög góða fótboltamenn í gegnum tíðina. Á spjalli við heimamenn kom í ljós að á körfuboltinn heimavöll í Stykkishólmi, Grundarfjörður er í blakinu og Ólafsvík er fótbolti út í gegn. Vallarstarfsmenn vöruðu þó við því að mætingin gæti orðið slök, enda skákmót í félagsheimilinu á sama tíma og margir í öðru. Vallarstjórinn var að fá sendan varahlut í bátinn um morguninn og ætlaði að starta leiknum og bruna svo út á sjó. Allt eins og það á að vera á sjávarplássinu. Þó rættist mjög úr mætingum og sérstaklega var gaman að sjá að einkennismerki góðra leikja úti á landi - karlar með pípu og sixpensara - lifa góðu lífi fyrir vestan.

Í síðustu umferð höfðu þeir skriplað á skötunni heima gegn nýliðum Hvíta Riddarans, en rétt náð jafntefli gegn þeim með tveimur mörkum í uppbótartíma. Bæði lið komu því hungruð í réttlæti í blankalogninu við Breiðafjörð.

Það var sérstaklega gaman að sjá að liðið sem þjálfari okkar Dominic Furness er búinn að smíða er sett saman úr þeim mönnum sem hann vill, og þeir menn sem eru inni á vellinum geta spilað fótbolta eins og hann hefur lagt upp með. Í slettufræðum er talað um "identity" liða og við sjáum auðkenni þessa liðs vel eftir tvo leiki.

Við stjórnum leikjum aftarlega á vellinum með varnarmenn sem kunna að fara með boltann. Ekkert kick and run og ekkert vöðvaduft í brúsum varnarmanna. Boltanum strokið fram og aftur þangað til miðjumaður kemur niður og nær í boltann, snýr og upp, eða aftur til baka á varnarmenn og rúllað aftur.

Uros í markinu er í formi lífs síns. Áður var hann óárennilegur, en nú er hann alger endakall. Happafengur að fá þennan ljúfa risa aftur í Kormák Hvöt. Fyrir framan hann spiluðu á helginni þeir Pol Morlans í hægri og Siggi Aadnegard í vinstri. Miðverðir þeir Papa og fyrirliðinn Fede. Allir spiluðu þeir vel og lokuðu teignum fyrir nokkurri hættu. Þó að valminnið sé vissulega ljár fréttaritara, þá munum við eiginlega ekki eftir eiginlegu færi frá Ólsurum. Þeir voru í langskotunum og Uros elskar þau og étur með bestu list.

Pol var ekkert minna en frábær í leiknum, hélt þeirra beittasta hníf í skefjum og varð sá óalandi og óferjandi af frekju eftir því sem leið á. Sennilega átti hann ekk von á að láta taka sig svona úr sambandi í leiknum.

Á miðjunni réðu þeir ríkjum Manu (sem var valinn maður leiksins), Pere og Trausti. Manu var óstöðvandi í leiknum og ef tölfræði yfir hlaup væri haldin (sem hún sennilega er), þá væru þær eitthvað annað. Lykilmaður alger í uppspili og varnartalningu liðsins í dag. Pere snéri óvænt í byrjunarliðið eftir að hafa verið meiddur á fæti í nokkrar vikur. Það var lítið að sjá á honum, óþreytandi allan leikinn og algert augnayndi að sjá drenginn spila fyrir þá sem hafa gaman af fótafimi á litlu svæði. Eitthvað verður það þegar hann er kominn á fullt. Þá verður að minnast á Trausta nokkurn Þorgilsson. Sá er að spila vel og sá er með fótboltagáfur sem eru í ósamræmi við lífaldur (hann er fæddur árið 2009 gott fólk). Hann gefur sér mikið stærri og eldri mönnum ekkert eftir og ef heldur áfram sem horfir þá spilar hann þarna á miðjunni - sem er ekki auðvaldasta staðan fyrir unga menn - í allt sumar.

Fyrir framan þá voru svo Guzman, Bilal og Ismael sem djöfluðust í sterkum varnarmönnum heimaliðsins í 97 mínúturnar sem leikurinn lifði. Bilal var líflegur á hægri kantinum og ósjaldan þurftu varnarmenn að taka hann niður til að koma sér ekki í klandur. Guzman er eins og fleiri í liðinu að spila þá stöðu sem liðið þarf, en hann kannski ekki vanur, svo við fáum án nokkurs vafa að njóta galdrafótanna sem eru undir honum meira í komandi leikjum. Ismael var svo eins og oft áður með tvo menn á sér stóran hluta leiksins og gerði oft vel í að halda boltanum á meðan liðið færði sig upp.

Mörkin tvö voru uppskera þeirra færa sem við bjuggum okkur til. Án þess að sýna of mikla frekju þá hefðu mörkin okkar vel getað orðið fimm á þessum degi. Fyrra markið kom eftir horn þegar Pol þrusaði boltanum í lappirnar á Fede og upp í sammarann. Sennilega auðveldasta mark sem fyrirliðinn hefur skorað á ferlinum, en hann sýndi þarna hvernig batti á að haga sér. Seinna markið var frábær vinna frá Arnóri Sindrasyni sem gerði gríðarlega vel í að hundelta varnarmann Ólsara, hirða af honum boltann og leika fram hjá markmanninum, sem felldi hann í teignum en áður en dómarinn hafði haft tækifæri á að flauta vítaspyrnu þá barst boltinn til Bilal sem gerði vel í að smella honum í markið á lokamínútunni!

Vel verðskuldaður sigur og Kormákur Hvöt endurtók leikinn frá í fyrra og hirti þrjú stig í Ólafsvík. Eftir hann situr liðið í fjórða sæti, en allir eru að vinna alla um þessar mundir. Til marks um hversu þétt liðið er má benda á að ekkert lið hefur fengið á sig færri mörk eftir tvo leiki og Uros er sestur þar sem hann ætlar að vera til loka leiktíðar - í efsta sæti Gullhanskans fyrir flest hrein lök!

Selfoss á Selfossi næstu helgi, sem er þriðji útileikurinn í röð hjá okkur. Kemur það til af veðurskilyrðum nyrðra, en skilar okkur þá bara fleiri heimaleikjum í seinni umferð.

Á morgun renna Kormáks Hvatar menn yfir holt og heiðar alla leið á Ólafsvík. Þar bíða okkar Víkingar, sem náðu að bjarga jafntefli í fyrstu umferð síðustu helgi. Þeir eru eflaust með blóð á tönn eins og við, svo búast má við hörkuleik.

Útsendarar Aðdáendasíðunnar fóru í vikunni með hálfpott af vígðu vatni og helltu á útlínur vallarins, markteig og netin, svo ekki þarf að búast við draugagangi í kringum þennan leik.

Herlegheitin hefjast klukkan 14:00, svo áhugasamir ættu að leggja af stað frá Blönduósi eigi síðar en um 11, Hvammstanga 11:30 og Reykjavíkursvæðinu um svipað leiti. Gert er ráð fyrir eins ljúfum blæ og Snæfellsnesið býður upp á, tveir metrar á sek úr suðri og allt að fimm stiga hita.

Megi allar góðar vættir vaka yfir bleikliðum og færa okkur stig á töfluna.

Fregnir af sjónvarpsrétti hafa borist, þar sem fyrirtækið Livey mun sýna beint frá öllum leikjum í 2. deild karla í sumar. Þetta er fagnaðarefni fyrir þá sem ekki komast á alla útileikina, það er einnig gaman frá að segja að afsláttarkóði fyrir stuðningsmenn Kormáks Hvatar er "kormakurhvot2026".

Að auki þá fær klúbburinn aur í kassann fyrir hverja selda áskrift þar sem kóðinn er notaður, svo þetta er nokkurs konar win-win!

https://www.ksi.is/um-ksi/frettir/motamal/livey-synir-beint-fra-2-deildum-karla-og-kvenna/

Smella sér á Livey og ná sér í áskrift!

Hér er komið nýtt og ferskt hlaðvarp um neðri deildir - þeir sem ekki áttu heimangengt á leikinn síðustu helgi geta hlustað hér.

Þátturinn ber nafn með rentu, "Draugamark á Dalvík". Áfram gakk.

Harkið - Draugamark á Dalvík