Stjarnan körfubolti

Óskar Þór ráðinn yfirþjálfari yngri flokka 🤝

Það er okkur sérlega ánægjulegt að segja frá því að Óskar Þór Þorsteinsson hefur verið ráðinn til starfa sem yfirþjálfari yngri flokka hjá körfuknattleiksdeild Stjörnunnar.

Óskar er sannkallaður Stjörnumaður, uppalinn hjá félaginu og þjálfaði áður yngri flokka Stjörnunnar með frábærum árangri. Síðustu tvö tímabil hefur hann starfað hjá ÍA, þar sem hann stýrði karlaliði félagsins upp í efstu deild í fyrsta sinn frá aldamótum.

Óskar mun vinna náið með Hlyni Bæringssyni, rekstrarstjóra deildarinnar, og saman munu þeir, í góðu samstarfi við Barna- og unglingaráð og stjórn körfuknattleiksdeildarinnar, vinna að því að styrkja starfið enn frekar.

Stjarnan er með eitt öflugasta og fjölmennasta yngri flokka starf landsins. Það er því bæði mikilvægt og tímabært að efla umgjörðina, fá fleiri hendur inn í starfið og halda áfram að gera gott betra.

Við bjóðum Óskar hjartanlega velkominn aftur heim í Stjörnuna og hlökkum til samstarfsins.

SKÍNI STJARNAN 💙

Í sumar verður Jakob Breki Ingason styrktarþjálfari körfuknattleiksdeildar með snerpu og styrktaræfingar fyrir iðkendur á aldrinum 12-16 ára.
Æft verður þrisvar í viku frá 15.júní - 22.júlí og 5.ágúst til 26.ágúst, fyrir þau sem ekki verða á svæðinu hluta sumar mun Jakob útvega prógram fyrir hvern og einn sem hægt er að gera sjálf.

Æft verður mánu, miðviku og föstudaga í lyftingasalnum í Miðgarði og Ásgarði en æfingar munu einnig færast út þegar veður leyfir.
Æfingar taka tillit til aldurs og reynslu hvers og eins.

12-13 ára (2013 og 14) kl 14:30
14-16 ára (2012 -2010) kl 16:00

Styrktar og snerpuþjálfun er gríðarlega mikilvæg fyrir allt íþróttafólk, við hvetjum okkar iðkendur til að nýta sumarið til að styrkja sig fyrir komandi tímabil.

Skráning er á Abler.

https://www.abler.io/shop/stjarnan/korfubolti

Sigurður Friðrik framlengir!

Siddi hefur framlengt samning sinn við Stjörnuna og mun áfram vera aðstoðarþjálfari meistaraflokks kvenna sem og stýra 1.deildar liðinu okkar kvk.

Siddi kom til okkar fyrir síðasta tímabil úr yngri flokka þjálfun og stimplaði sig vel inn í ÞG Verkhöllina.
Þar á hann heima áfram með okkur.

Til hamingju Stjarnan 💙 - Til hamingju Siddi

Skíni Stjarnan 💙

Stjarnan hefur ráðið Emil Barja sem aðalþjálfara meistaraflokks karla til tveggja ára 👏✍

Emil kemur frá Haukum þar sem hann þjálfaði síðast meistaraflokk kvenna sem meðal annars urðu Íslandsmeistarar í fyrra.

Emil lék með mfl. karla hjá Haukum frá árinu 2007 til 2023 og spilaði öll sín ár með félaginu fyrir utan árið 2018-2019 þegar hann var spilaði með KR og varð Íslandsmeistari það ár.

„Ég er spenntur að koma til Stjörnunnar og taka við þessu nýja starfi. Stjarnan hefur byggt upp öflugt starf og leikmannahópurinn er sterkur og verður gaman að verða þátttakandi í framhaldinu“ sagði Emil Barja um nýja starfið.

„Við erum mjög ánægð með að fá Emil til okkar. Hann hefur náð áhugaverðum árangri á sínum þjálfaraferli og verður gaman að fá hann inn í okkar öfluga starf. Framtíðin er björt hjá okkur og bindum við miklar vonir við samstarfið“ sagði Einar Karl Birgisson formaður körfuknattleiksdeildar Stjörnunnar.

Samhliða ráðningu Emils var gengið frá samningi við Inga Þór Steinþórsson um að verða áfram aðstoðarþjálfari liðsins. Inga Þór þarf ekki að kynna fyrir Stjörnufólki. Við
erum heppin að hafa Inga Þór áfram með okkur.

SKÍNI STJARNAN 💙

Síðasti leikur Stjörnunnar 2025-26 fór fram á mánudaginn þegar 10.fl. stúlkna mætti Keflavík.
Okkar stúlkur unnu öruggan sigur og seríuna 2-0.

Flokkurinn hefur verið sigursæll og átti frábært tímabili, varð bæði bikar og Íslandsmeistarar.

Þjálfari liðsins er Hörður Unnsteinsson og Berglind Katla Hlynsdóttir var valin besti leikmaður úrslitanna.

Vel gert stelpur. Skíni Stjarnan!

Ægir Þór semur við Stjörnuna ✍🏻

Ægir Þór hefur gert nýjan tveggja ára samning við Stjörnuna.

Hann kom fyrst til Stjörnunnar árið 2018 og spilaði með liðinu til 2021, en þá hélt hann út í atvinnumennsku, en snéri til baka 2023 og hefur síðan spilað í Garðabænum.
Ægir Þór hefur verið lykilmaður hjá Stjörnunni, bæði innan vallar og utan og mikil fyrirmynd. Hann átti stóran þátt í fyrsta Íslandsmeistaratitli Stjörnunnar í fyrra, hann meiddist í úrslitakeppninni í ár á móti KR, en er á góðum batavegi.

Það er Garðbæingum mikil gleði að Ægir Þór spili áfram með Stjörnunni næstu tvö árin enda er hann mikilvægur hlekkur í samsetningu á liði fyrir næsta vetur.

Til hamingju Ægir Þór – Til hamingju Stjarnan!

SKÍNI STJARNAN 💙

12. flokkur drengja varð Íslandsmeistari á sunnudaginn eftir sigur á Selfossi í þriðja leik liðinna um Íslandsmeistaratitilinn.

Flottur vetur að baki hjá strákunum, þeir urðu bikarmeistarar í vetur og kórónuðu nú flottan vetur.

Þjálfari liðsins er Ingi Þór Steinþórsson og besti leikmaður seríunnar var valinn Jakob Kári Leifsson.

Til hamingju drengir, Skíni Stjarnan!

7. flokkur drengja í frábærri ferð til Gautaborga!

7. flokkur drengja tók þátt í Göteborg Basketball Festival dagana 14.–17. maí.

Hópnum var skipt upp í þrjú lið og var meginmarkmið ferðarinnar að efla liðsheild, styrkja vináttuna innan hópsins og ýta undir áhuga strákanna á áframhaldandi körfuboltaiðkun. Ferðin var stórt skref fyrir marga þeirra, enda voru margir að fara í fyrsta sinn erlendis með liðinu og flestir án foreldra.

Strákarnir stóðu sig frábærlega, bæði innan vallar og utan. Árangurinn á mótinu var mjög góður, en það sem stendur ekki síður upp úr er hvernig hópurinn þjappaðist saman naut þess að upplifa körfuboltann í alþjóðlegu umhverfi.

Svona ferðir skipta miklu máli í uppbyggingu yngri flokka. Þær gefa iðkendum minningar, reynslu og tengingu við félagið sem getur skipt miklu fyrir áframhaldandi þátttöku og ánægju í íþróttinni.

Strákarnir komu reynslunni ríkari heim, stækkuðu um nokkur númer og voru félaginu til mikils sóma.

Við óskum strákunum, þjálfurum og fararstjórum innilega til hamingju með vel heppnaða ferð og frábæra framkomu fyrir hönd Stjörnunnar. 💙⭐🏀