Haukar körfubolti

INGA LEA AFTUR HEIM TIL HAUKA

Inga Lea Ingadóttir hefur ákveðið að snúa aftur heim til Hauka og hefur skrifað undir samning til 2ja ára. Inga Lea ákvað í fyrra að færa sig til Njarðvíkur og var því í sigurliði þeirra sem vann Hauka í úrslitum um Íslandsmeistaratitilinn í vor.

Inga Lea er uppalin í Haukum og er 17 ára 186 cm miðherji. Inga Lea hefur verið fastamaður í yngri landsliðum og tekur þátt í verkefnum U18 landsliðsins í sumar og er því mjög efnilegur leikmaður. Inga Lea bætir við meðalhæðina í lið Hauka og þá verður hún einnig hluti af hinu nýstofnaða U-liði félagsins í 1.deild.

Viktor hafði þetta að segja: "Það er afar kærkomið að endurheimta Ingu Leu til okkar en það er mikilvægt að halda uppöldum leikmönnum hjá liðinu. Hún er klárlega hluti af framtíðarplönum Hauka og er mjög efnilegur leikmaður".

Við bjóðum Ingu Leu velkomna heim aftur og hlökkum til að sjá hana aftur í rauðu í Ólafssal næstu árin.

Áfram Haukar, framtíðin er björt!

ARNHEIÐUR ÁFRAM HJÁ HAUKUM

Arnheiður Ísleif Ólafsdóttir hefur framlengt samning sinn við félagið til eins árs og verður því með liðinu næsta vetur. Arnheiður er ein af efnilegri leikmönnum landsins og hefur verið hluti af yngri landsliðum undanfarin ár. Arnheiður var valin í úrvalslið Norðurlanda nýverið eftir frábæra frammistöðu á Norðurlandamóti U18 nú fyrr í sumar.

Arnheiður, sem hefur leikið með Haukum nánast allan sinn feril, er 180 cm framherji og verður 17 ára í ár.

Viktor hafði þetta að segja: "Stefna félagsins er að hlúa vel að ungum og efnilegum leikmönnum og gefa þeim færi á að verða hluti af framtíð þess. Það er því frábært að halda Arnheiði hjá okkur næsta vetur, hún er mjög efnileg og er mikilvægt að hún fái tækifæri hjá okkur til að sanna sig."

Haukar stefna í fyrsta skipti fram U-liði í 1.deild og verður Arnheiður mikilvægur hluti af því verkefni sem er ætlað að styðja við afreksstarfið hjá félaginu. Þjálfari þess verður Hákon Hjartarson.

Við hlökkum til að sjá Arnheiði í Ólafssal næsta vetur.

Áfram Haukar, framtíðin er björt!

U20 MEÐ SILFUR OG LEIKUR Í A DEILD

Íslenska U20 landslið karla í körfubolta tryggði sér silfur á Evrópumótinu í B-deild í Bratislava eftir hörkuleik gegn Úkraínu í úrslitaleik en lokatölur urðu 64–74 fyrir Úkraínu.

Haukar eiga fjóra fulltrúa í í liðinu, tvo leikmenn þá Frosta Valgarðsson og Kristófer Breka Björgvinsson. Þá er Gunnar Sverrisson yfirþjálfari í þjálfarateyminu og Alex Mar Bjarkarson er sjúkraþjálfari liðsins. Verðugir fulltrúar Hauka svo sannarlega.

Mikil liðsheild einkenndi liðið og margir stigu upp þegar á reyndi en Viktor Lúðvíksson leikmaður Stjörnunnar var valinn í úrvalslið mótsins. Þjálfari liðsins er Kjartan Atli Kjartansson.

Frosti og Kristófer Breki áttu góða leiki og stóðu sig mjög vel. Þeir félagar eru mikilvægir hlekkir í liði Hauka og verða í baráttunni næsta vetur í 1.deildinni.

Við óskum liðinu og okkar strákum til hamingju með frábæran árangur.

Áfram Haukar!

KRISTÓFER KÁRI FRAMLENGIR Í TVÖ ÁR

Kristófer Kári Arnarson hefur framlengt samning sinn við Hauka til 2ja ára eða út tímabilið 2028. Kristófer Kári er 195 cm bakvörður fæddur 2004, hann er uppalinn Haukastrákur og hefur leikið með liðinu upp alla yngri flokka. Á síðasta tímabili fyrir Hauka skilaði Kristófer Kári um 5 stigum og 2 fráköstum í leik í 1.deildinni.

Pétur þjálfari hafði þetta að segja: "Kristófer Kári leggur sig fram í allt sem hann gerir og kemur með mikla orku í æfingar og leiki. Það er því mikilvægt að halda uppöldum strákum hjá félaginu eins og Kristófer Kára og er hluti af þeim unga kjarna sem verið er að hlúa að og byggja upp hjá Haukum".

Við hlökkum til að sjá baráttuglaðan Kristófer Kára í Ólafssal næsta vetur og taka slaginn í 1.deild.

Áfram Haukar!

KRAFTMIKILL BAKVÖRÐUR SEMUR VIÐ HAUKA

AC Bryant hefur samið við lið Hauka um að leika með liðinu næsta tímabil. AC er bandarískur 190 cm bakvörður sem kemur beint úr Jacksonville State háskólanum en þar áður lék hann með Alabama A&M.

Á síðustu leiktíð skilaði hann góðum tölum eða 12 stigum, 4 fráköstum að meðaltali í leik og var með 40% nýtingu í 3ja stiga skotum . AC er sterkur og fjölhæfur bakvörður með fjölbreytt vopnabúr sóknarlega og er góður varnarmaður.

Pétur hafði þetta að segja um AC: " Við í þjálfarateyminu erum mjög ánægðir með að við höfum náð að semja við AC, hann smell passar inn í þá hugmyndafræði sem við erum að vinna með bæði sóknar og varnarlega. Við erum gríðarlega spenntir að vinna með AC í vetur og teljum hann eiga góða möguleika á að vera bæði leiðtogi og frábær leikmaður fyrir liðið."

AC hafði þetta að segja: "I’m blessed and honored to announce that I’ll be beginning my professional basketball career with Haukar basketball in Iceland. This is my first season overseas and my first opportunity to play the game I love as a professional. I appreciate Haukar giving me the opportunity , can’t wait to meet the fans and experience the country."

Haukar bjóða AC Bryant velkominn til félagsins og hlakka til samstarfsins við hann næsta tímabil.

Áfram Haukar!

U16 landslið stúlkna og drengja eru um þessar mundir að keppa á Norðurlandamótinu í Kisakallio, Finnlandi. Við eigum fjóra fulltrúa í þessum hópi - þau Evu Bryndísi Ingadóttur, Hildi E. Kristinsdóttur og Sindra Logason ásamt þjálfara U16 stúlknaliðsins, hann Hákon Hjartarson sem tekur við U-liði kvenna á næsta tímabili.

Liðin eiga bæði tvo leiki eftir á mótinu, einn í dag á móti Dönum og á morgun gegn Finnum. Gengið hefur verið upp og niður, sigrar og töp en mikil barátta og reynsla í bankann✨ Við hlökkum til að fylgjast með síðustu leikjunum og óskum þeim góðs gengis! Áfram Ísland!

Áhugasamir geta fylgst með LIVE stat hér

(kk) 👉 https://tulospalvelu.basket.fi/category/42633!kvkp2627/group/302997

(kvk) 👉 https://tulospalvelu.basket.fi/category/44060!kvkp2627/group/302998

Meira um mótið:
https://koristv.fi/nordicchamps/games/event/wu16-kansainvaeliset-2026-2027

HÁKON HJARTARSON TEKUR VIÐ U-LIÐI HAUKA

Það er ánægjulegt að tilkynna að Hákon Hjartarson hefur verið ráðinn þjálfari U-liðs Hauka í 1. deild kvenna fyrir komandi tímabil.
Haukar munu tefla fram ungu og efnilegu liði Haukastelpna í 1. deildinni á næsta tímabili og fá til liðs við sig þaulreyndan þjálfara í Hákoni. Hann mun stýra U-liðinu og þjálfa hópinn ásamt Stefaníu Ósk, nýráðnum þjálfara 12. flokks kvenna.

Hákon er mörgu körfuboltafólki að góðu kunnur og hefur mikla reynslu af þjálfun bæði í meistaraflokki og yngri flokkum. Hann hefur undanfarin tímabil þjálfað Hamar/Þór, bæði í 1. deild kvenna og síðar í Bónusdeild kvenna, auk þess að koma að þjálfun yngri landsliða Íslands.

Við teljum Hákon frábæran kost í þetta mikilvæga verkefni. Hann kemur inn með reynslu, metnað og þekkingu sem mun nýtast vel við að byggja upp ungan leikmannahóp og hjálpa stelpunum að taka næstu skref í sinni körfuboltavegferð. Hákon mun jafnframt falla vel inn í öflugan þjálfarahóp Hauka í eldri flokkum kvenna.

Við erum virkilega ánægð með að fá Hákon til liðs við Hauka og hlökkum til samstarfsins á komandi tímabili. Við bjóðum Hákon hjartanlega velkominn til Hauka!

Áfram Haukar ❤️🏀

ARNHEIÐUR Í ÚRVALSLIÐ NORÐURLANDA

Arnheiður Ísleif Ólafsdóttir leikmaður Hauka og U-18 landsliðs Íslands var valin í úrvalslið Norðurlandarmótsins eftir lokaleik mótsins en Ísland lenti í 3ja sæti á mótinu. Arnheiður hefur staðið sig mjög vel í gegnum allt mótið og átt frábæra leiki.

Síðasti leikur liðsins var á móti Svíðþjóð sem tapaðist 118-89, en í þeim leik átti Arnheiður stórleik. Sóknarlega var hún best í liðinu og skoraði 22 stig og tók 9 fráköst á tæpum 30 mínútum og endaði með 32 í framlag sem var það hæsta í leiknum.

Frammistaða Arnheiðar á mótinu skilaði henni þessum verðlaunum og Haukar óskar henni til hamingju með árangurinn og viðurkenninguna.

Áfram Ísland og áfram Haukar.

Mynd: Karfan.

JADA GUINN TIL HAUKA

Jadakiss Guinn hefur skrifað undir samning um að leika með liðinu á næstu leiktíð. Jada er kraftmikill 175 cm, 25 ára bakvörður sem lék með Hamar/Þór síðasta vetur og skilaði þá 24 stigum 7,7 fráköstum og 5,6 stoðsendum að meðaltali í leik.

Hún spilaði í 4 ár í Tennessee Tech University við góðan orðstýr en færði sig svo yfir í Chattanooga háskólann og kláraði 5. háskólaárið sitt þar. Þar hjálpaði hún skólanum sínum að vinna deildina sem þau spiluðu í og var valin MVP mótsins.

Viktor hafði þetta að segja: "Jada er sigurvegari og kemur með mikil gæði til Hauka og mun efla bæði sóknar- og varnarleikinn okkar. Við erum að fá leikmann sem skapar bæði fyrir sig og aðra og mun því hjálpa liðinu mikið".

Þess má geta að í Haukum hittir hún fyrrum liðsfélaga sinn, Sigrúnu Björgu Ólafsdóttur sem lék með henni í Chattanooga skólanum sem hafði þetta að segja um Jada: "Jada er frábær liðsfélagi og hæfileikaríkur leikmaður, ég er mjög spennt að spila með henni aftur".

Haukar bjóða Jada Guinn velkomna til liðsins og hlakkar samstarfsins við hana.

Áfram Haukar!

SOLLA FRAMLENGIR Í TVÖ ÁR!

Það er með mikilli ánægju að tilkynna að Sólrún Inga Rósants Gísladóttir hefur framlengt samning sinn við Hauka til næstu 2ja ára. Sólrún Inga er nýorðin þrítug og skilaði 7,2 stigum og 2,3 frákostum í leik í fyrra. Solla er okkar allra besta 3ja stiga skytta og það er ekkert færi of langt fyrir hana þegar hún dettur í gírinn.

Viktor hafði þetta að segja: "Það er gríðarlega mikilvægt að hafa Sollu áfram í okkar leikmannahóp. Hún styrkir breidd liðsins mikið og hennar styrkleikar munu nýtast okkur mjög vel. Það skemmir ekki að er hún með fyndnari persónum sem finnast og það er aldrei leiðinlegt í kringum Sollu".

Solla hafði þetta að segja: "Það er frábært að skrifa undir nýjan samning, ég er mjög ánægð í Haukum og er með frábæra liðsfélaga með mér. Ég hlakka til að byrja nýtt tímabil og gera mitt allrabesta fyrir Hauka og allt liðið."

Við í Haukum erum himinlifandi yfir því að halda Sollu áfram í okkar herbúðum og hlökkum til að sjá hana áfram í Haukabúning og bjóða upp á þriggja stiga sýningu í Ólafssal.

Áfram Haukar.