គណៈកម្មការ ទូកងសារាយផ្កាយព្រឹក

✍️សារចូលរួមរំលែកទុក្ខ គណៈកម្មការទូកងសារាយផ្កាយព្រឹក មានសេចក្ដីសោកស្ដាយ ក្រៀមក្រំ និងតក់ស្លុតជាទីបំផុត ក្រោយពីបានទទួលដំណឹងដ៏សែនក្រៀមក្រំអំពី មរណភាពភរិយារបស់លោក ផា និត ដែលជាកីឡាករទូកងសារាយផ្កាយព្រឹក ដោយរោគាពាធ។

ក្នុងឱកាសប្រកបដោយសោកសៅនេះ យើងខ្ញុំទាំងអស់គ្នា ជាគណៈកម្មការទូកងសារាយផ្កាយព្រឹក សូមសម្ដែងនូវសេចក្ដីសោកស្ដាយ និងចូលរួមរំលែកទុក្ខយ៉ាងក្រៀមក្រំជាទីបំផុតជាមួយលោក ផា និត ចំពោះការបាត់បង់ភរិយាជាទីស្រឡាញ់ យើងខ្ញុំសូមចូលរួមជាមួយក្រុមគ្រួសារនៃសព ក្នុងការកាន់ទុក្ខចំពោះការបាត់បង់ដ៏ធ្ងន់ធ្ងរនេះ។

ជាមួយគ្នានេះ យើងខ្ញុំសូមបួងសួងដល់វិញ្ញាណក្ខន្ធនៃសព សូមបានទៅកាន់សុគតិភព កុំបីឃ្លៀងឃ្លាតឡើយ។

សូមក្រុមគ្រួសារនៃសព មេត្តាទទួលយកនូវសមានទុក្ខដ៏ស្មោះស្ម័គ្រពីយើងខ្ញុំទាំងអស់គ្នា ជាគណៈកម្មការទូកងសារាយផ្កាយព្រឹក៕

០៩/០៨/២០២៦ ប្រធានទូកង កាប់ ច្រឹក

✍️អនុស្សាវរីយ៍ដ៏មានអត្ថន័យ និងសមិទ្ធផលរបស់ទូកង សារាយផ្កាយព្រឹក កាលពីឆ្នាំ ២០១៧ វត្ត និងក្រុមទូកង លោកតាសារាយផ្កាយព្រឹក ចំណុះ៣៣នាក់ បានប្រារព្ធពិធីសម្ពោធសមិទ្ធផលនានា ព្រមទាំងកាត់ខ្សែបូដាក់ឱ្យប្រើប្រាស់ អគារបេតុងរោងទូកង ដែរពិធីនោះបានប្រព្រឹត្តទៅ ក្រោមអធិបតីភាពឯកឧត្តមបណ្ឌិត សួន សិទ្ធី និងលោកជំទាវ ដែលជាម្ចាស់សទ្ធា និងឯកឧត្តម លូ គឹមឈុន អគ្គនាយកកំពង់ផែស្វយ័តក្រុងព្រះសីហនុ ប្រតិភូអមរាជរដ្ឋាភិបាលកម្ពុជា និងជាគណៈពង្រឹងចុះជួយស្រុកស្រីសន្ធរ អញ្ជើញចូលរួមជាអធិបតីកិត្តិយស។

សមិទ្ធផលថ្មីក្នុងឆ្នាំ ២០២៧ នៅឆ្នាំ ២០២៧ ខាងមុខនេះ វត្ត និងក្រុមទូកង សារាយផ្កាយព្រឹក នឹងបន្តប្រារព្ធពិធីសម្ពោធសមិទ្ធផលនានា ព្រមទាំងកាត់ខ្សែបូដាក់ឱ្យប្រើប្រាស់ អគារបេតុងរោងទូកងថ្មី សម្រាប់ទូកងដែលមានចំណុះ ៦៧នាក់ និង ៧៥នាក់ យើងខ្ញុំទាំងអស់គ្នានៅតែបន្តគោរពអញ្ជើញ ឯកឧត្តម លូ គឹមឈុន អគ្គនាយកកំពង់ផែស្វយ័តក្រុងព្រះសីហនុ ប្រតិភូអមរាជរដ្ឋាភិបាលកម្ពុជា និងជាគណៈពង្រឹងចុះជួយស្រុកស្រីសន្ធរ អញ្ជើញជាអធិបតីកិត្តិយស ក្នុងពិធីដ៏មានអត្ថន័យនោះជាថ្មីម្ដងទៀត។

វត្តមានដ៏ខ្ពង់ខ្ពស់របស់ឯកឧត្តម នឹងក្លាយជាកិត្តិយសដ៏ឧត្តុង្គឧត្តមសម្រាប់វត្ត និងក្រុមទូកង សារាយផ្កាយព្រឹក ព្រមទាំងជាកម្លាំងចិត្តដ៏សំខាន់សម្រាប់ព្រះសង្ឃ គណៈកម្មការ ក្រុមកីឡាករទូកង និងសប្បុរសជនទាំងអស់ ដែលកំពុងរួមគ្នាថែរក្សា និងលើកស្ទួយ កីឡាប្រពៃណីប្រណាំងទូកខ្មែរ ឱ្យកាន់តែរីកចម្រើន និងមានភាពអស្ចារ្យតទៅមុខ៕

📢 សារជូនដំណឹង

ស្តីពី៖ ការកែសម្រួល និងពង្រឹងសមត្ថភាពក្រុមកីឡាករទូកងសារាយផ្កាយព្រឹក

ដោយមានការឯកភាពពី ព្រះចៅអធិការស្តីទី ក្នុងគោលបំណងកែសម្រួលព្រមទាំងពង្រឹងសមត្ថភាពកីឡាករឱ្យកាន់តែមានប្រសិទ្ធភាព ដើម្បីឆ្ពោះទៅរកលទ្ធផលល្អប្រសើរក្នុងការប្រកួតរដូវកាលថ្មីខាងមុខនេះ ប្រធានគណៈកម្មការទូកងលោកតា កាប់ ច្រឹក សូមជូនដំណឹង និងអំពាវនាវដល់ក្រុមកីឡាករ ទូកងសារាយផ្កាយព្រឹកទាំងអស់ សូមមេត្តាយកចិត្តទុកដាក់ខ្ពស់ចំពោះការថែរក្សាសុខភាព និងការត្រៀមកម្លាំងកាយឱ្យបានពេញលេញ ដើម្បីត្រៀមខ្លួនចូលរួមការហ្វឹកហាត់ និងការប្រកួតក្នុងរដូវកាលថ្មីដែលនឹងចូលមកដល់ក្នុងពេលឆាប់ៗខាងមុខ។

លោកតាប្រធានគណៈកម្មការទូកង បានលើកឡើងថា ការអំពាវនាវឱ្យកីឡាករយកចិត្តទុកដាក់លើសុខភាពនេះ គឺដោយសារកន្លងមក ក្នុងការប្រកួតនានាជារៀងរាល់ឆ្នាំ ក្រុមកីឡាករមិនសូវមានពេលវេលាគ្រប់គ្រាន់សម្រាប់ការហ្វឹកហាត់ជាប្រចាំ និងការរៀបចំកម្លាំងកាយឱ្យបានល្អប្រសើរឡើយ ដូច្នេះក្នុងដំណាក់កាលត្រៀមខ្លួននេះ ការថែរក្សាសុខភាព ការរក្សាកម្លាំងកាយ និងការត្រៀមខ្លួនឱ្យបានល្អ គឺជាកត្តាសំខាន់មួយដែលកីឡាករគ្រប់រូបអាចចូលរួមចំណែកបាន។

ការកែសម្រួលក្រុម និងការពង្រឹងសមត្ថភាពនៅពេលនេះ មិនមែនជាការបែងចែក ឬបោះបង់អ្នកណាម្នាក់ឡើយ ប៉ុន្តែជាការរៀបចំថ្មីក្នុងគោលបំណងបង្កើនសមត្ថភាព សាមគ្គីភាព វិន័យ និងការទទួលខុសត្រូវរបស់កីឡាករម្នាក់ៗ ដើម្បីឱ្យក្រុមទូកងសារាយផ្កាយព្រឹកកាន់តែមានភាពរឹងមាំ និងមានសមត្ថភាពប្រកួតប្រជែងបានល្អប្រសើរ។

ក្នុងន័យនេះ សូមកីឡាករគ្រប់រូបចូលរួមគោរពតាមការណែនាំរបស់គណៈកម្មការ រក្សាសាមគ្គីភាព និងមានស្មារតីទទួលខុសត្រូវចំពោះក្រុម ជោគជ័យរបស់ទូកយើងអាស្រ័យលើកម្លាំងសាមគ្គី ការខិតខំប្រឹងប្រែង និងការចូលរួមរបស់សមាជិកគ្រប់រូប។

ជាចុងក្រោយលោកតា ប្រធានគណៈកម្មការទូកង សូមផ្ញើក្តីនឹករឭក និងក្តីស្រឡាញ់ជូនចំពោះក្រុមកីឡាករទូកងសារាយផ្កាយព្រឹកទាំងអស់ ដែលកំពុងស្ថិតនៅទីជិត ឬទីឆ្ងាយ ទោះបីនៅឆ្ងាយពីគ្នាក៏ដោយ ក្តីស្រឡាញ់ សាមគ្គីភាព និងស្មារតីជាក្រុមនៅតែស្ថិតនៅជាមួយគ្នាជានិច្ច។

សូមជូនពរកីឡាករទូកងសារាយផ្កាយព្រឹកទាំងអស់ សូមមានសុខភាពល្អ កម្លាំងកាយមាំមួន ប្រកបការងារ និងការរកស៊ីទទួលទានមានបានគ្រប់ក្រុមគ្រួសារ និងជួបតែសេចក្តីសុខ សុភមង្គល និងសំណាងល្អគ្រប់ពេលវេលា។

សូមអរគុណចំពោះការចូលរួម សាមគ្គីភាព និងការគាំទ្ររបស់កីឡាករទាំងអស់៕

✍️គណៈកម្មការទូកងសារាយផ្កាយព្រឹក

✍️សារចូលរួមអបអរសាទរ🎉🎉🎉

គណៈកម្មការ កីឡាករ និងអ្នកគាំទ្រទូកង សារាយផ្កាយព្រឹក ទាំងអស់ សូមសម្ដែងនូវសេចក្ដីអបអរសាទរ និងត្រេកអរយ៉ាងក្រៃលែង ចំពោះព្រះគ្រូ គម្ពីរធម្មោ ភី សាំងហេង ព្រះចៅអធិការស្ដីទី ដែលបានទទួលសញ្ញាបត្រថ្នាក់ បរិញ្ញាបត្រ និងអនុបណ្ឌិត ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។

សមិទ្ធផលដ៏ឧត្តុង្គឧត្តមនេះ គឺជាផ្លែផ្កានៃការព្យាយាម សេចក្ដីអត់ធ្មត់ និងការខិតខំសិក្សារៀនសូត្រដោយមិនខ្លាចនឿយហត់ ការទទួលបានសញ្ញាបត្រទាំងពីរថ្នាក់នេះ មិនត្រឹមតែជាកិត្តិយសដ៏ខ្ពង់ខ្ពស់សម្រាប់ព្រះអង្គប៉ុណ្ណោះទេ ប៉ុន្តែក៏ជាមោទនភាពដ៏ធំធេងសម្រាប់វត្ត សម្រាប់មហាគ្រួសារទូកងសារាយផ្កាយព្រឹក និងសហគមន៍ទាំងមូលផងដែរ។

ក្នុងឱកាសដ៏មហាមង្គលនេះ យើងខ្ញុំទាំងអស់គ្នា ដែលជាមហាគ្រួសារទូកង សារាយផ្កាយព្រឹក សូមប្រគេនពរព្រះគ្រូជាទីគោរព សូមមានព្រះសុខភាពពេញបរិបូរណ៍ ព្រះកាយពលមាំមួន ព្រះជន្មាយុយឺនយូរ និងព្រះបញ្ញាញាណភ្លឺថ្លា ដើម្បីបន្តបេសកកម្មដ៏ឧត្តមក្នុងការបម្រើព្រះពុទ្ធសាសនា និងសង្គមជាតិ។

ជាពិសេស សូមព្រះគ្រូយកចំណេះដឹង និងជំនាញដែលបានសិក្សាស្វែងយល់ មកអភិវឌ្ឍការងារព្រះពុទ្ធសាសនា អប់រំទូន្មានពុទ្ធបរិស័ទឱ្យប្រកាន់ខ្ជាប់នូវសីលធម៌ និងគុណធម៌ ព្រមទាំងបន្តដឹកនាំវត្ត និងទូកង សារាយផ្កាយព្រឹក ឱ្យកាន់តែមានភាពរីកចម្រើន រុងរឿង ល្បីល្បាញ និងសម្រេចបាននូវសមិទ្ធផលថ្មីៗជាបន្តបន្ទាប់ ដើម្បីរួមចំណែកលើកតម្កើងវប្បធម៌ ប្រពៃណី និងកីឡាប្រណាំងទូកជាមរតកដ៏មានតម្លៃរបស់ជាតិឱ្យស្ថិតស្ថេរគង់វង្សតទៅអនាគត៕

០៧/០៨/២០២៦ ប្រធានទូកង កាប់ ច្រឹក

នៅថ្ងៃចន្ទ ទី០៣ ខែសីហា ឆ្នាំ២០២៦ ឪច្រឹក ប្រធានទូកងសារាយផ្កាយព្រឹក បានដឹកនាំកូនចៅ ចុះសម្អាតទូក បិទជ័រ ពិនិត្យលក្ខណៈបច្ចេកទេស និងរៀបចំទូកឱ្យបានរួចរាល់ ដើម្បីត្រៀមខ្លួនសម្រាប់រដូវកាលប្រណាំងទូកថ្មីដែលនឹងឈានមកដល់។

ឪច្រឹក គឺជាប្រធានទូកដែលប្រកបដោយគុណធម៌ មេត្តាធម៌ និងការទទួលខុសត្រូវខ្ពស់ លោកតែងតែស្រឡាញ់ និងយកចិត្តទុកដាក់ចំពោះកីឡាករទូកង និងវត្តអារាមជាទីគោរព ជាពិសេស លោកមានសេចក្ដីគោរពព្រះសង្ឃនៅក្នុងវត្ត ដោយចាត់ទុកព្រះសង្ឃប្រៀបដូចជាសមាជិកក្នុងគ្រួសាររបស់លោកផ្ទាល់។

លោកបានក្លាយជាប្រធានទូកង សារាយផ្កាយព្រឹក តាំងពីឆ្នាំ១៩៩៩។ នៅក្នុងសម័យនោះ អតីតព្រះចៅអធិការ និងគណៈកម្មការវត្ត បានរៀបចំការជ្រើសរើសប្រធានទូកតាមរយៈការបោះឆ្នោត។ ដោយសារតែគុណធម៌ ការលះបង់ និងក្ដីស្រឡាញ់ចំពោះទូកងដែលកើតចេញពីបេះដូងដ៏ស្មោះត្រង់ លោកត្រូវបានកីឡាករទាំងអស់បោះឆ្នោតគាំទ្រជាប្រធានទូកដោយសំឡេងគាំទ្រ ១០០%។

បច្ចុប្បន្ន លោកមានវ័យចំណាស់ហើយក្នុងនាមកូនចៅ និងជាអ្នកជំនាន់ក្រោយ យើងខ្ញុំទាំងអស់គ្នាបានព្យាយាមឱ្យលោកសម្រាក និងថែរក្សាសុខភាព ដើម្បីជាម្លប់ដ៏ត្រជាក់សម្រាប់កូនចៅជំនាន់ក្រោយ ប៉ុន្តែដោយសារតែទឹកចិត្តស្រឡាញ់ទូកង និងការទទួលខុសត្រូវដ៏មុតមាំ លោកនៅតែបន្តដឹកនាំ និងចូលរួមការងារទូកយ៉ាងសកម្ម មិនដែលបោះបង់ឡើយ។

ក្នុងនាមកូនចៅ កីឡាករ និងសមាជិកទូកង សារាយផ្កាយព្រឹក ទាំងអស់ យើងខ្ញុំសូមគោរពថ្លែងអំណរគុណចំពោះការលះបង់ និងការដឹកនាំរបស់ឪច្រឹកកន្លងមក សូមគោរពជូនពរលោកឱ្យមានសុខភាពរឹងមាំ កម្លាំងមាំមួន អាយុយឺនយូរ ព្រមទាំងជួបប្រទះតែសេចក្ដីសុខ សេចក្ដីចម្រើន និងបន្តជាម្លប់ដ៏កក់ក្ដៅសម្រាប់កូនចៅ និងទូកង សារាយផ្កាយព្រឹក ជារៀងរហូត៕