វិទ្យាស្ថានសេដ្ឋកិច្ច និង ហិរញ្ញវត្ថុ - Economics and Finance Institute

  • Home
  • Cambodia
  • Phnom Penh
  • វិទ្យាស្ថានសេដ្ឋកិច្ច និង ហិរញ្ញវត្ថុ - Economics and Finance Institute

វិទ្យាស្ថានសេដ្ឋកិច្ច និង ហិរញ្ញវត្ថុ - Economics and Finance Institute វិទ្យាស្ថានសេដ្ឋកិច្ច និង ហិរញ្ញវត្ថុ A leading financial institution in Cambodia. Initially, It had been a financial training institute.

Economics and Finance Institute or EFI fully founded as Institute in 2004 which established by the Ministry of Economy and Finance. EFI is of one the state institutes which provides the specific majors such as accounting- finance and finance- banking. All students must be passed the entrance exam before starting the class. The outputs of EFI are the qualified students who are potential enough to fulfill human resource demands in Cambodia jobs market.

ឧត្តមក្រុមប្រឹក្សាសេដ្ឋកិច្ចជាតិ រៀបចំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើសេចក្តីព្រាង «គោលនយោបាយអភិវឌ...
18/09/2026

ឧត្តមក្រុមប្រឹក្សាសេដ្ឋកិច្ចជាតិ រៀបចំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើសេចក្តីព្រាង «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០២៦-២០៣៥»
----------

នារសៀលថ្ងៃទី១៨ ខែ កញ្ញា ឆ្នាំ ២០២៦, ឯកឧត្តមបណ្ឌិតសភាចារ្យ ហ៊ាន សាហ៊ីប អនុប្រធានប្រចាំការឧត្តមក្រុមប្រឹក្សាសេដ្ឋកិច្ចជាតិ (កបស) និង ជាប្រធានក្រុមការងារគោលនយោបាយអភិវឌ្ឍន៍វិស័យឧស្សាហកម្មកម្ពុជា (IDP) បានដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើសេចក្តីព្រាង «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០២៦-២០៣៥» ដោយមានការអញ្ជើញចូលរួមពី ឯកឧត្តម លោកជំទាវ សមាជិក-សមាជិកា នៃឧត្តមក្រុមប្រឹក្សាសេដ្ឋកិច្ចជាតិ និង សមាជិក-សមាជិកានៃក្រុមការងារ IDP នៃ កបស ព្រមទាំងមន្រ្តីជំនាញពាក់ព័ន្ធ ។

ជាកិច្ចចាប់ផ្ដើម, ឯកឧត្តមបណ្ឌិតសភាចារ្យ បានគូសរំលេចអំពីសាវតារនៃការរៀបចំគោលនយោបាយ IDP ដែលត្រូវបានចាប់ផ្ដើមដំបូងនៅខែ ឧសភា ឆ្នាំ ២០២៥ និង បន្តបន្ទាប់មកទៀត មានការប្រជុំពិគ្រោះយោបល់ជាមួយក្រសួង-ស្ថាប័នពាក់ព័ន្ធ, ដៃគូអភិវឌ្ឍន៍, និង វិស័យឯកជន ព្រមទាំងបានធ្វើការសិក្សាពីបទពិសោធន៍អន្តរជាតិ ដើម្បីប្រមូលធាតុចូល សំដៅដាក់ចេញនូវវិធានការគោលនយោបាយជាក់លាក់ និង ប្រាកដនិយម សម្រាប់ការអភិវឌ្ឍន៍វិស័យឧស្សាហកម្មកម្ពុជា ។

ឯកឧត្តមបណ្ឌិតសភាចារ្យ បានសង្កត់ធ្ងន់អំពីភាពចាំបាច់នៃការរៀបចំគោលនយោបាយ IDP ដែលមានចក្ខុវិស័យក្នុងការធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម និង ជំនាញទាប ទៅឧស្សាហកម្មដែលផ្អែកលើជំនាញ និង បច្ចេកវិទ្យាខ្ពស់ ព្រមទាំងដាក់ចេញនូវគោលបំណងចម្បងចំនួន ៤ ដែលរួមមាន ៖ ទី១. បង្កើនការវិនិយោគដែលមានគុណភាព និង បង្កើតការងារដែលមានជំនាញ, បច្ចេកវិទ្យា, ផលិតភាពខ្ពស់ជាងមុខ និង ប្រាក់ចំណូលប្រសើរ, ទី២. រក្សា និង ជំរុញការចាក់ឫសឱ្យកាន់តែស៊ីជម្រៅ នូវរចនាសម្ព័ន្ធឧស្សាហកម្មកម្ពុជា ដើម្បីទ្រទ្រង់កំណើនសេដ្ឋកិច្ចសម្រាប់រយៈពេលវែង, ទី៣. កសាងវិស័យដែលគាំទ្រដល់ការបង្កើនផលិតភាព នៃវិស័យឧស្សាហកម្មផ្សេងៗទៀត, និង ទី៤. តម្រង់ទិសគ្រប់វិស័យពាក់ព័ន្ធ ឱ្យមានភាពត្រៀមខ្លួនរួចរាល់សម្រាប់និន្នាការអនាគត, មានភាពធន់នឹងបរិស្ថាន និង ការគ្រប់គ្រងផលប៉ះពាល់បរិស្ថានឧស្សាហកម្ម ។

គោលនយោបាយ IDP ២០២៦-២០៣៥ បានកំណត់យកឧស្សាហកម្មយុទ្ធសាស្រ្ត ក្នុងវិស័យអាទិភាពចំនួន ៤ ក្រុម គឺ៖ ១). វិស័យឧស្សាហកម្មដែលមានស្រាប់, ២). វិស័យឧស្សាហកម្មកំពុងលូតលាស់, ៣). វិស័យឧស្សាហកម្មយុទ្ធសាស្រ្តរយៈពេលវែង, និង ៤). វិស័យឧស្សាហកម្មគាំទ្រ និង សេដ្ឋកិច្ចចក្រា ដោយបានដាក់ចេញនូវវិធានការគោលនយោបាយជាក់លាក់ និង អាចអនុវត្តបានភ្លាម សម្រាប់ការអភិវឌ្ឍន៍វិស័យឧស្សាហកម្ម ។ វិធានការទាំងនោះ ត្រូវបានរៀបចំដោយឈរលើសសរស្តម្ភចំនួន ៧ រួមមាន៖ ១). ការលើកកម្ពស់ និង សម្របសម្រួលការវិនិយោគ, ២). ការពង្រីក និង ពិពិធកម្មទីផ្សារនាំចេញ, ៣). ការពង្រឹងការតភ្ជាប់ និង ការធ្វើមូលដ្ឋានីយកម្មឧស្សាហកម្ម, ៤). ការកែលម្អបរិយាកាសធុរកិច្ច, ៥). ការអភិវឌ្ឍហេដ្ឋារចនាសម្ព័ន្ធផ្នែករឹង និង ទន់, ៦). ការពង្រឹងការអភិវឌ្ឍជំនាញ បច្ចេកវិទ្យា និង ទីផ្សារការងារ និង ៧). ការបង្កើនហិរញ្ញប្បទាន ។

ឯកឧត្តមបណ្ឌិតសភាចារ្យ បានគូសរំលេចបន្ថែមថា គោលនយោបាយ IDP នេះ គឺជាត្រីវិស័យសម្រាប់តម្រង់ទិសឧស្សាហកម្មកម្ពុជា សម្រាប់ទសវត្សរ៍ខាងមុខ តាមរយៈការដោះស្រាយរាល់បញ្ហាប្រឈមជារចនាសម្ព័ន្ធ, កសាងមូលដ្ឋានឧស្សាហកម្មប្រកួតប្រជែង, ធ្វើពិពិធកម្មមុខទំនិញនាំចេញ និង ពង្រឹងការតភ្ជាប់រវាងការវិនិយោគបរទេស ជាមួយសហគ្រាសក្នុងស្រុក ។ បន្ថែមពីនេះ, ការជំរុញការអភិវឌ្ឍវិស័យឧស្សាហកម្ម នឹងកាន់តែមានភាពមុតស្រួច និង ជាក់លាក់ តាមរយៈការកំណត់ឱ្យបានលម្អិតនូវវិស័យឧស្សាហកម្មគន្លឹះ ដែលមានឧត្តមភាព និង ផ្ដោតលើការជំរុញការអភិវឌ្ឍសកម្មភាពឧស្សាហកម្មជាជំហានៗ ទៅតាមដំណាក់កាល ស្របទៅតាមភាពប្រកួតប្រជែងជាក់ស្តែងរបស់កម្ពុជា ។

ជាមួយនេះ, អង្គប្រជុំ បានធ្វើការពិភាក្សាយ៉ាងផុសផុល និង បានផ្ដល់មតិយោបល់កែលម្អបន្ថែមសេចក្ដីព្រាងគោលនយោបាយ IDP នេះ សំដៅធ្វើឱ្យ វិធានការគោលនយោបាយដែលនឹងដាក់ចេញ កាន់តែមុតស្រួច ជាក់លាក់ និង អាចអនុវត្តបានភ្លាម, ការរៀបចំយន្តការស្ថាប័នអាចអនុវត្តបាន ស្របតាមអភិក្រម «ជវភាពនៃប្រព័ន្ធតួអង្គតែមួយ», ការផ្ទេរបច្ចេកវិទ្យា និង ការអភិវឌ្ឍជំនាញ គឺជាស្ពានចម្លងដ៏សំខាន់ដើម្បីភ្ជាប់ការស្រាវជ្រាវ នវានុវត្តន៍ និង ចំណេះដឹងថ្មីៗ ទៅកាន់ការអនុវត្តជាក់ស្តែងក្នុងវិស័យឧស្សាហកម្ម និង ទីផ្សារការងារ ។

ឯកឧត្តមបណ្ឌិតសភាចារ្យ បានគូសបញ្ជាក់បន្ថែមថា ការរៀបចំគោលនយោបាយ IDP នេះ បានដាក់ចេញនូវវិធានការគោលនយោបាយជាក់លាក់ សម្រាប់កសាងវិស័យឧស្សាហកម្មកម្ពុជា ឱ្យកាន់តែមានពិពិធកម្ម, ភាពធន់ និង សមត្ថភាពប្រកួតប្រជែងខ្ពស់ សំដៅរួមចំណែករុញច្រានកំណើនសេដ្ឋកិច្ច និង សម្រេចឱ្យបាននូវចក្ខុវិស័យប្រែក្លាយកម្ពុជា ឱ្យទៅជាប្រទេសមានប្រាក់ចំណូលខ្ពស់នៅឆ្នាំ២០៥០ ៕

https://t.me/efinews/4402

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយគណៈប្រតិភូសម្ព័ន្ធសភាពាណិជ្ជកម្ម និងសមាគមសកល (GCCAA) ដើម្បីស...
15/09/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយគណៈប្រតិភូសម្ព័ន្ធសភាពាណិជ្ជកម្ម និងសមាគមសកល (GCCAA) ដើម្បីស្វែងយល់អំពីកាលានុវត្តភាពវិនិយោគនៅកម្ពុជា
----------

នារសៀលថ្ងៃទី ១៥ ខែកញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី រដ្ឋលេខាធិការ និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ និង ក្រុមការងារជំរុញការវិនិយោគក្នុងភូមិភាគឦសាន, តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារជាមួយគណៈប្រតិភូសម្ព័ន្ធសភាពាណិជ្ជកម្ម និងសមាគមសកល (GCCAA) ដែលដឹកនាំដោយលោក យ៉ាវ ហៃថោ (Yao Haitao) ប្រធានសម្ព័ន្ធ GCCAA ដើម្បីជួបសម្តែងការគួរសម និង ស្វែងយល់អំពីកាលានុវត្តភាពវិនិយោគ នៅព្រះរាជាណាចក្រកម្ពុជា ។

ជាកិច្ចចាប់ផ្តើម, ឯកឧត្តមបណ្ឌិតសភាចារ្យ បានស្វាគមន៍យ៉ាងកក់ក្តៅចំពោះគណៈប្រតិភូសម្ព័ន្ធ GCCAA មកកាន់ព្រះរាជាណាចក្រកម្ពុជា ដោយបានគូសបញ្ជាក់ថា រាជរដ្ឋាភិបាលកម្ពុជា បន្តប្តេជ្ញាចិត្តក្នុងការពង្រឹងបរិយាកាសវិនិយោគ ឱ្យកាន់តែមានតម្លាភាព អាចព្យាករបាន និង ផ្តល់ភាពអំណោយផលខ្ពស់ សម្រាប់វិស័យឯកជន តាមរយៈការដាក់ចេញនូវ «កម្មវិធីពិសេសជំរុញការវិនិយោគក្នុងខេត្តព្រះសីហនុ» និង «កម្មវិធីពិសេសនៅភូមិភាគឦសាន (SPIN)» ដែលផ្តោតការយកចិត្តទុកដាក់ជាពិសេសលើ «សេវាថែទាំវិនិយោគ (Aftercare Service)» ក្រោយពេលអនុម័តគម្រោង ។

ឯកឧត្តមបណ្ឌិតសភាចារ្យ បានមានប្រសាសន៍បន្ថែមអំពីភាពធន់នៃសេដ្ឋកិច្ចកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈការរក្សាស្ថិរភាពម៉ាក្រូសេដ្ឋកិច្ច និង ការកែលម្អបរិយាកាសធុរកិច្ចឥតឈប់ឈរ សំដៅជំរុញ និង គាំទ្រវិស័យឯកជន (Pro-Business Government) ។

លោក Yao Haitao ប្រធានសម្ព័ន្ធ GCCAA បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិតសភាចារ្យ ដែលបានចែករំលែកព័ត៌មានអំពីស្ថានភាពសេដ្ឋកិច្ច ការលើកទឹកចិត្តវិនិយោគ និង សក្តានុពលវិនិយោគនៅកម្ពុជា ។ ជាមួយនេះ, លោក Yao Haitao បានជម្រាបជូនអំពីសក្តានុពលរបស់ GCCAA ដែលត្រូវបានបង្កើតឡើងតាំងពីឆ្នាំ ២ ០០០ និង មានបណ្តាញសហគ្រាសចិន និង អន្តរជាតិជាង ៦ ០០០ ក្រុមហ៊ុន ព្រមទាំងមានវត្តមាននៅ ៥០ ប្រទេសជុំវិញពិភពលោក, ហើយគណៈប្រតិភូដែលអញ្ជើញមកទស្សនកិច្ចនៅព្រះរាជាណាចក្រកម្ពុជា នាពេលនេះ គឺមកពីពហុវិស័យ រួមមាន វិស័យសុខាភិបាល សម្ភារៈសំណង់ បច្ចេកវិទ្យាកសិកម្ម បរិក្ខារវេជ្ជសាស្ត្រ និង ទេសចរណ៍ ដើម្បីស្វែងរកកាលានុវត្តភាពវិនិយោគ និង/ឬ កិច្ចសហប្រតិបត្តិការ នៅព្រះរាជាណាចក្រកម្ពុជា ។

ឆ្លៀតក្នុងឱកាសនៃជំនួបនោះ, លោក Yao Haitao រួមទាំងតំណាងសហគ្រាស បានជម្រាបជូនបន្ថែមអំពីផែនការស្វែងរកកាលានុវត្តភាពវិនិយោគ ដែលនឹងជួយពង្រឹងតួនាទីរបស់កម្ពុជា ក្នុងខ្សែច្រវាក់តម្លៃសកល ព្រមទាំងបានលើកឡើងនូវសំណូមពរ ក៏ដូចជាការស្វែងយល់បន្ថែម អំពីកាលានុវត្តភាពវិនិយោគ ក្នុងវិស័យ និង/ឬ តំបន់អាទិភាព របស់រាជរដ្ឋាភិបាលកម្ពុជា ។

ជាការឆ្លើយតប, ឯកឧត្តមបណ្ឌិតសភាចារ្យ បានប្តេជ្ញាចូលរួមផ្តល់ការសម្របសម្រួល ឱ្យបានជាអតិបរមា រហ័ស និង មានប្រសិទ្ធភាព តាមរយៈយន្តការ «ច្រកចេញចូលតែមួយ» ស្របតាមអភិក្រម «ជវភាពនៃប្រព័ន្ធតួអង្គតែមួយ» ដើម្បីបង្កលក្ខណៈងាយស្រួលដល់ធុរកិច្ច និង វិនិយោគរបស់សហគ្រាសចិន ។ ជាមួយគ្នានេះ, ឯកឧត្តមបណ្ឌិតសភាចារ្យ បានលើកទឹកចិត្តឱ្យសម្ព័ន្ធ GCCAA ផ្តោតអាទិភាពចូលរួមក្នុងការអភិវឌ្ឍវិស័យកសិកម្ម, កសិ-ឧស្សាហកម្ម ទេសចរណ៍ និង វិស័យបច្ចេកវិទ្យាឌីជីថលនៅកម្ពុជា សំដៅពង្រឹងការប្រើប្រាស់វត្ថុធាតុដើមក្នុងស្រុក និង ការផ្តល់ការងារជំនាញ ដែលមានសារៈសំខាន់សម្រាប់ការលើកកម្ពស់ការប្រកួតប្រជែង និង ការអភិវឌ្ឍសេដ្ឋកិច្ច រយៈពេលវែង ។

ជំនួបនេះបានបញ្ចប់ក្នុងបរិយាកាសស្និទ្ធស្នាល និង ប្រកបដោយផ្លែផ្កា ដោយភាគីទាំងពីរបានបញ្ជាក់ជាថ្មីនូវការប្តេជ្ញាចិត្ត ក្នុងការបន្តពង្រឹងកិច្ចសហប្រតិបត្តិការ និង ការសន្ទនា ប្រកបដោយស្ថាបនា ។ ភាគីសម្ព័ន្ធ GCCAA បានសន្យានឹងរៀបចំដឹកនាំគណៈប្រតិភូមួយក្រុមទៀតមកកម្ពុជា នៅចុងខែតុលា ឆ្នាំ ២០២៦ ខាងមុខនេះ ។

ឯកឧត្តមបណ្ឌិតសភាចារ្យ បានថ្លែងអំណរគុណចំពោះចំណាប់អារម្មណ៍របស់សម្ព័ន្ធ GCCAA មកលើកាលានុវត្តភាពវិនិយោគ និង កិច្ចសហប្រតិបត្តិការ នៅព្រះរាជាណាចក្រកម្ពុជា និង ទន្ទឹងរង់ចាំការពង្រឹងភាពជាដៃគូកាន់តែរឹងមាំ ព្រមទាំងការប្រែក្លាយកិច្ចជំនួបនេះ ទៅជាគម្រោងវិនិយោគជាក់ស្តែង នាពេលអនាគត ៕

https://t.me/efinews/4392

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7



ផ្សារមូលបត្រកម្ពុជា ទទួលបានក្រុមហ៊ុនចុះបញ្ជីលក់មូលបត្រសរុប ចំនួន ២៨ ដោយកៀរគរបានមូលធនសរុបប្រមាណ ៧២០ លានដុល្លារ ពីទីផ្សារម...
10/09/2026

ផ្សារមូលបត្រកម្ពុជា ទទួលបានក្រុមហ៊ុនចុះបញ្ជីលក់មូលបត្រសរុប ចំនួន ២៨ ដោយកៀរគរបានមូលធនសរុបប្រមាណ ៧២០ លានដុល្លារ ពីទីផ្សារមូលបត្រកម្ពុជា
----------

នាព្រឹកថ្ងៃទី ១០ ខែ កញ្ញា ឆ្នាំ ២០២៦ នៅអគារផ្សារមូលបត្រកម្ពុជា, ផ្សារមូលបត្រកម្ពុជា បានរៀបចំ “ពិធីចុះបញ្ជីលក់សញ្ញាបណ្ណចីរភាពជាផ្លូវការរបស់ គ្រឹះស្ថានមីក្រូហិរញ្ញវត្ថុ អិលអូអិលស៊ី (ខេមបូឌា) ភីអិលស៊ី”, ក្រោមអធិបតីភាព ឯកឧត្តមបណិ្ឌតសភាចារ្យ ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមប្រឹក្សាភិបាលនៃផ្សារមូលបត្រកម្ពុជា ដោយមានការអញ្ជើញចូលរួមពី ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា, ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា, លោក ណូ លីដា អគ្គនាយកនៃសាជីវកម្មធានាឥណទានកម្ពុជា (CGCC), លោក សុខ វឿន ប្រធាននាយកប្រតិបត្តិនៃក្រុមហ៊ុន អិលអូអិលស៊ី (ខេមបូឌា) ភីអិលស៊ី, ឯកឧត្តម លោកជំទាវ, លោក លោកស្រី តំណាងក្រសួងស្ថាប័ន និង វិស័យឯកជន ព្រមទាំងភ្ញៀវកិត្តិយសជាច្រើនរូប ។

ជាកិច្ចចាប់ផ្តើម, ឯកឧត្តមបណ្ឌិតសភាចារ្យ ប្រធានក្រុមប្រឹក្សាភិបាល បានសម្តែងការអបអរសាទរជូន គណៈគ្រប់គ្រង និង បុគ្គលិកគ្រប់ជាន់ថ្នាក់របស់ គ្រឹះស្ថានមីក្រូហិរញ្ញវត្ថុ LOLC ដែលសម្រេចបាននូវការបោះផ្សាយ និង ចុះបញ្ជីលក់សញ្ញាបណ្ណចីរភាពមានបុគ្គលធានា ក្រោមទឹកប្រាក់សរុប ២០ លានដុល្លារអាមេរិក ជាមួយនឹងអត្រាការប្រាក់ ៥,៧៥% សម្រាប់រយៈពេល ៥ ឆ្នាំ ។ ឯកឧត្តមបណ្ឌិតសភាចារ្យ បានគូសរំលេចថា គ្រឹះស្ថានមីក្រូហិរញ្ញវត្ថុ LOLC ធ្លាប់បានកៀរគរទុនលើកទី ១ ពីទីផ្សារមូលបត្រកម្ពុជា ក្នុងឆ្នាំ ២០១៩ ក្នុងទំហំទឹកប្រាក់សរុប ២០ លានដុល្លារអាមេរិក, ហើយពេលនេះ គ្រឹះស្ថានមីក្រូហិរញ្ញវត្ថុនេះ បានវិលត្រលប់ និង ជ្រើសរើសនូវប្រភពទុនពីទីផ្សារមូលបត្រជាថ្មីម្តងទៀត (ជាលើកទី២), ដែលទាំងពីរលើក គ្រឹះស្ថាននេះបានកៀរគរមូលធនសរុបប្រមាណ ៤០ លានដុល្លារអាមេរិក ។

ឯកឧត្តមបណ្ឌិតសភាចារ្យ បានគូសរំលេចបន្ថែមថា ការចូលក្នុងផ្សារមូលបត្រ បានបង្ហាញយ៉ាងច្បាស់អំពីរូបភាពល្អចំនួន ៣ ៖ ទី១. តម្លាភាព និង អភិបាលកិច្ចដ៏រឹងមាំ តាមរយៈការអនុញ្ញាតឱ្យចុះបញ្ជីផ្លូវការពី និយ័តករមូលបត្រកម្ពុជា និង ផ្សារមូលបត្រកម្ពុជា បានបញ្ជាក់អំពីអនុលោមភាពផ្លូវច្បាប់, ស្តង់ដារបាយការណ៍ហិរញ្ញវត្ថុ និង ស្ថិរភាពប្រតិបត្តិការខ្ពស់ របស់ក្រុមហ៊ុនបោះផ្សាយ, ទី២. ទំនុកចិត្តពីវិនិយោគិន ដោយការទទួលបានការគាំទ្រយ៉ាងច្រើនលើសលប់ ពីសំណាក់វិនិយោគិនជាតិ និង អន្តរជាតិ ស្តែងឱ្យឃើញអំពីជំនឿទុកចិត្តលើ ចក្ខុវិស័យ និង និរន្តរភាពនៃការីកចម្រើនរបស់ក្រុមហ៊ុនបោះផ្សាយ, និង ទី៣. ការរួមចំណែកអភិវឌ្ឍទីផ្សារមូលធនកម្ពុជា ដែលការចូលរួមរបស់ក្រុមហ៊ុនបោះផ្សាយ ជួយបង្កើនទំហំជួញដូរ និង ផ្តល់នូវជម្រើសវិនិយោគចម្រុះ ប្រកបដោយសុវត្ថិភាព និង មានផលតបស្នងសមរម្យ ជូនវិនិយោគិនសាធារណៈ និង វិនិយោគិនស្ថាប័ន ។

ឯកឧត្តម ស៊ូ សុជាតិ បានមានប្រសាសន៍ថា សមិទ្ធផលនាថ្ងៃនេះ កើតចេញពីការរួមចំណែករបស់ CGCC ដែលបានធ្វើជាបុគ្គលធានាមូលបត្របំណុលរបស់ គ្រឹះស្ថានមីក្រូហិរញ្ញវត្ថុ អិលអូអិលស៊ី, ហើយការផ្ដល់ការលើកកម្ពស់ឥណទាន (Credit Enhancement) តាមរយៈការធានានេះ បានដើរតួនាទីយ៉ាងសំខាន់ជា “ខែលការពារហានិភ័យ” ក្នុងការកាត់បន្ថយផលប៉ះពាល់ពីឥណទានមិនដំណើរការ (NPL) ដែលអាចប៉ះពាល់ដល់លទ្ធភាពរបស់គ្រឹះស្ថាន ក្នុងការទូទាត់សងការពារប្រាក់ដើម និង ការប្រាក់ជូនវិនិយោគិន ។ ការចូលរួមធានាមូលបត្របំណុលពី CCC មិនត្រឹមតែជួយកសាង និង បង្កើនទំនុកចិត្តខ្ពស់ ដល់វិនិយោគិនសាធារណៈប៉ុណ្ណោះទេ, ប៉ុន្តែថែមទាំងជាជំហានឈានមុខដ៏សំខាន់មួយ ក្នុងការលើកកម្ពស់កម្រិតឥណទានទីផ្សារ (Market Credit) និង ការបើកទំព័រប្រវត្តិសាស្ត្រថ្មី សម្រាប់ទីផ្សារមូលធនកម្ពុជា ដែលស្ថាប័នធានាឥណទានក្នុងស្រុក បានដើរតួនាទីក្នុងការគាំទ្រដល់ការបោះផ្សាយមូលបត្របំណុល នៅលើទីផ្សារមូលបត្រកម្ពុជា ។

ឯកឧត្តម ហុង សុហួរ បានជម្រាបជូនអង្គពិធីថា គិតត្រឹមថ្ងៃនេះ ក្រុមហ៊ុនចុះបញ្ជីសរុបចំនួន ២៨ បានកៀរគរទុនសរុបប្រមាណ ៧២០ លានដុល្លារអាមេរិក រួមមានក្រុមហ៊ុនចំនួន ១២ បានចុះបញ្ជីលក់មូលបត្រកម្មសិទ្ធិ និង ក្រុមហ៊ុនចំនួន ១៦ ទៀត បានចុះបញ្ជីជាសញ្ញាបណ្ណសាជីវកម្ម ។ បរិមាណជួញដូរភាគហ៊ុនប្រចាំថ្ងៃជាមធ្យមគិតត្រឹម ៨ ខែ ឆ្នាំ ២០២៦ មានប្រមាណជាង ២៣ ម៉ឺនភាគហ៊ុន កើនឡើងជិត ១៥០% បើធៀបនឹងឆ្នាំ២០២៥, ហើយទំហំជួញដូរភាគហ៊ុនប្រចាំថ្ងៃជាមធ្យមមានប្រមាណ ៣០ ម៉ឺនដុល្លារអាមេរិក ។ សម្រាប់ខែសីហាកន្លងទៅនេះ, បរិមាណជួញដូរភាគហ៊ុនប្រចាំថ្ងៃជាមធ្យម បានកើនឡើងគំហុកដល់ជាង ៥៨ ម៉ឺនភាគហ៊ុនក្នុងមួយថ្ងៃ និង ទំហំជួញដូរភាគហ៊ុនប្រចាំថ្ងៃជាមធ្យមមានប្រមាណ ៨០ ម៉ឺនដុល្លារអាមេរិក ។ ដោយឡែក, ចំនួនគណនីជួញដូរមានការកើនឡើង រហូតដល់ប្រមាណ ៨២ ០០០ គណនី ។

លោក សុខ វឿន ប្រធាននាយកប្រតិបត្តិ នៃក្រុមហ៊ុន អិលអូអិលស៊ី (ខេមបូឌា) បានមានប្រសាសន៍ថា មូលបត្របំណុលចីរភាពនេះ ត្រូវបានរៀបចំឡើងក្នុងគោលបំណងប្រមូលមូលនិធិរយៈពេលវែង សម្រាប់គាំទ្រគម្រោង និង សកម្មភាពដែលផ្តល់ប្រយោជន៍ជាក់ស្តែងដល់បរិស្ថាន និង សង្គម, ហើយការបោះផ្សាយមូលបត្របំណុលនេះ បង្ហាញអំពីការប្តេជ្ញាចិត្តរបស់ក្រុមហ៊ុន អិលអូអិលស៊ី ក្នុងការធ្វើអាជីវកម្មប្រកបដោយការទទួលខុសត្រូវ ស្របតាមគោលការណ៍បរិស្ថាន សង្គម និង អភិបាលកិច្ច (ESG), និង ការចូលរួមគាំទ្រគោលដៅអភិវឌ្ឍប្រកបដោយចីរភាព របស់រាជរដ្ឋាភិបាល ។ មូលនិធិដែលទទួលបានពីការបោះផ្សាយមូលបត្របំណុលចីរភាពនេះ នឹងត្រូវយកទៅប្រើប្រាស់សម្រាប់ការផ្តល់ហិរញ្ញប្បទាន ដល់គម្រោងដែលគាំទ្រផ្នែកបរិស្ថានប្រមាណ ២០% និង ផ្នែកសង្គមប្រមាណ ៨០% ។

ឯកឧត្តមបណ្ឌិតសភាចារ្យ ប្រធានក្រុមប្រឹក្សាភិបាល បានវាយតម្លៃខ្ពស់ចំពោះគ្រប់តួអង្គពាក់ព័ន្ធ ដែលបានផ្តល់កិច្ចសហការល្អ និង ផ្តល់ការគាំទ្រ ក្នុងការអភិវឌ្ឍទីផ្សារមូលបត្រកម្ពុជា ។ ឯកឧត្តមបណ្ឌិតសភាចារ្យ បានគូសរំលេចថា ភាពជោគជ័យរបស់ គ្រឹះស្ថានមីក្រូហិរញ្ញវត្ថុ LOLC ក៏ដូចជា បណ្តាក្រុមហ៊ុននានាដែលបានចុះបញ្ជី (ទាំងមូលបត្រកម្មសិទ្ធិ និង មូលបត្របំណុល) អាចសម្រេចទៅបាន គឺកើតចេញពីការចូលរួមយ៉ាងសកម្ម ពីគ្រប់ភាគីពាក់ព័ន្ធ ទាំងនិយ័តករមូលបត្រកម្ពុជា, ផ្សារមូលបត្រកម្ពុជា, ក្រុមហ៊ុនមូលបត្រ, ភ្នាក់ងារផ្តល់សេវាមូលបត្រ, ក្រុមហ៊ុនបោះផ្សាយលក់មូលបត្រ និង វិនិយោគិន ។

ឯកឧត្តមបណ្ឌិតសភាចារ្យ បានមានប្រសាសន៍បន្ថែមថា ការចូលរួមរបស់វិស័យឯកជន ជាពិសេស សហគ្រាសក្នុងស្រុក និង គ្រឹះស្ថានហិរញ្ញវត្ថុ ក្នុងផ្សារមូលបត្រកម្ពុជា ពិតជាបានរួមចំណែកដល់ការអនុវត្តគោលនយោបាយរបស់រាជរដ្ឋាភិបាល ក្នុងការពង្រឹងវិស័យហិរញ្ញវត្ថុ និង ការអភិវឌ្ឍទីផ្សារមូលបត្រកម្ពុជា ដើម្បីឈានទៅជាជន្ទល់នៃកំណើនសេដ្ឋកិច្ចជាតិ ប្រកបដោយចីរភាព ។ ជារួម, ផ្សារមូលបត្រកម្ពុជា នឹងបន្តចូលរួមគាំទ្រ និង ជំរុញការលូតលាស់នៃសហគ្រាសធុនតូច និង មធ្យម ក្នុងគោលដៅរួមចំណែកដល់កំណើនអាជីវកម្ម/ធុរកិច្ចក្នុងស្រុក ព្រមទាំងជំរុញការពង្រីកខ្សែច្រវាក់ផលិតកម្ម និង បង្កើនសមត្ថភាពប្រកួតប្រជែងរបស់សហគ្រាសក្នុងស្រុក ដើម្បីកាត់បន្ថយការពឹងផ្អែកលើការនាំចូល និង ឈានជើងចូលទីផ្សារតំបន់ ។

ស្របតាមស្មារតីនេះ, ឯកឧត្តមបណ្ឌិតសភាចារ្យ បានលើកទឹកចិត្តដល់សហគ្រិនទាំងអស់ សូមគិតគូរ និង ផ្សារភ្ជាប់អាជីវកម្មរបស់ខ្លួន ទៅនឹងការរីកលូតលាស់នៃទីផ្សារមូលបត្រកម្ពុជា, ជាពិសេស ត្រូវខិតខំទាញយកអត្ថប្រយោជន៍ជាអតិបរមា ពីការកៀរគរទុនជាសាធារណៈ និង ការធ្វើពិពិធកម្មប្រភពទុន តាមរយៈទីផ្សារមូលបត្រកម្ពុជា ជំរុញឱ្យការប្រកបអាជីវកម្មបានរលូន និង រីកចម្រើនប្រកបដោយចីរភាព ៕

https://t.me/efinews/4382

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

វិទ្យាស្ថានសេដ្ឋកិច្ចនិងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ និង អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ច...
08/09/2026

វិទ្យាស្ថានសេដ្ឋកិច្ចនិងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ និង អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ចុះអនុស្សរណៈយោគយល់លើការកសាងគុណវុឌ្ឍិវិជ្ជាជីវៈជំនាញហិរញ្ញវត្ថុសាធារណៈ
----------

នារសៀលថ្ងៃទី ៨ ខែកញ្ញា ឆ្នាំ ២០២៦, នៅទីស្តីការក្រសួងសេដ្ឋកិច្ច និងហិរញ្ញវត្ថុ មានរៀបចំពិធីចុះហត្ថលេខាលើអនុស្សរណៈយោគយល់រវាង វិទ្យាស្ថានសេដ្ឋកិច្ចនិងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ និង អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ក្នុងគោលបំណងលើកកម្ពស់កិច្ចសហប្រតិបត្តិការ លើការកសាងគុណវុឌ្ឍិវិជ្ជាជីវៈ និង ការអភិវឌ្ឍសមត្ថភាពលើជំនាញសម្រាប់ការគ្រប់គ្រងហិរញ្ញវត្ថុសាធារណៈ ជូនសវនករផ្ទៃក្នុង នៃក្រសួងមហាផ្ទៃ ។

ពិធីនេះប្រព្រឹត្តទៅក្រោមការដឹកនាំរបស់ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និងជាប្រធានក្រុមការងារកសាងសមត្ថភាពនៃក្រសួងសេដ្ឋកិច្ចនិងហិរញ្ញវត្ថុ និង ឯកឧត្តម រស់ វរុណ រដ្ឋលេខាធិការក្រសួងមហាផ្ទៃ អមដោយ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គលេខាធិការ អគ្គនាយក អគ្គនាយករង ជាថ្នាក់ដឹកនាំ និង លោក លោកស្រី ជាមន្ត្រីរាជការ នៃក្រសួងសេដ្ឋកិច្ចនិងហិរញ្ញវត្ថុ និង ក្រសួងមហាផ្ទៃ ។

ឯកឧត្តមបណ្ឌិតសភាចារ្យ បានគូសបញ្ជាក់ថា ការចុះអនុស្សរណៈនៃការយោគយល់នេះ បង្ហាញពីការយកចិត្តទុកដាក់រួមគ្នា របស់ក្រសួងសេដ្ឋកិច្ចនិងហិរញ្ញវត្ថុ និង ក្រសួងមហាផ្ទៃ លើការកសាង និង ការអភិវឌ្ឍសមត្ថភាព ជូនមន្រ្តីអនុវត្តការងារហិរញ្ញវត្ថុ ជាពិសេស សវនករផ្ទៃក្នុង ដើម្បីរួមចំណែកគាំទ្រ និង អនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ និង កម្មវិធីកែទម្រង់គន្លឹះៗដទៃទៀត របស់រាជរដ្ឋាភិបាល ដែលតែងចាត់ទុក ការអភិវឌ្ឍមូលធនមនុស្ស ជាអាទិភាពទី១ ដើម្បី កំណើន ការងារ សមធម៌ ប្រសិទ្ធភាព និង ចីរភាព សំដៅសម្រេចចក្ខុវិស័យ «ប្រែក្លាយកម្ពុជាឆ្ពោះទៅជាប្រទេសចំណូលខ្ពស់នៅឆ្នាំ ២០៥០» ។

ឯកឧត្តមបណ្ឌិតសភាចារ្យ បានគូសរំលេចបន្ថែមថា បច្ចុប្បន្ន ការអនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ កំពុងស្ថិតក្នុងដំណាក់កាលទី៤ ជាដំណាក់កាលចុងក្រោយ ក្នុងគោលដៅគឺ គណនេយ្យភាពសមិទ្ធកម្ម ដែលសិទ្ធិអំណាច ភាពជាម្ចាស់ និង ការទទួលខុសត្រូវកាន់តែច្រើន ក្នុងការគ្រប់គ្រងហិរញ្ញវត្ថុ ត្រូវបានផ្ទេរទៅឱ្យក្រសួងស្ថាប័ន និង មន្ទីរអង្គភាពក្រោមឱវាទ គ្រឹះស្ថានសាធារណរដ្ឋបាល និង រដ្ឋបាលថ្នាក់ក្រោមជាតិ តាមរយៈការអនុវត្តអង្គភាពថវិកា ថវិកាព័ត៌មានសមិទ្ធកម្ម និង កិច្ចព្រមព្រៀងសមិទ្ធកម្ម ព្រមជាមួយនឹងការដាក់ឱ្យអនុវត្តជាផ្លូវការនូវ ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS) ដែលជាឆ្លឹងខ្នងនៃកែទម្រង់ ការគ្រប់គ្រងហិរញ្ញវត្ថុសាធារណៈ ។

ឯកឧត្តមបណ្ឌិតសភាចារ្យ បានគូសបញ្ជាក់បន្ថែមថា ផ្អែកតាមការវាយតម្លៃ និង បទពិសោធអន្តរជាតិ, ការសម្រេចជោគជ័យនៃដំណាក់កាលចុងក្រោយ គឺពឹងអាស្រ័យជាចាំបាច់ ទៅនឹងសមត្ថភាពធនធានមនុស្ស និង ការចូលរួមអនុវត្ត ប្រកបដោយបុរេសកម្ម និង សកម្មក្នុងភាពជាម្ចាស់ និង ដោយឆន្ទៈមុតមាំ ពីគ្រប់ក្រសួងស្ថាប័ន ដោយហេតុថាការកែទម្រង់នេះ មានវិសាលភាពកាន់តែទូលាយ និង ស្មុគស្មាញ ហើយមានភាពប្រទាក់ក្រឡាទៅនឹងកម្មវិធីកែទម្រង់គន្លឹះសំខាន់ៗ ដទៃទៀតរបស់រាជរដ្ឋាភិបាល ។ ក្នុងន័យនេះ, ការកសាង និង ការអភិវឌ្ឍសមត្ថភាពមន្រ្តីអនុវត្តការងារហិរញ្ញវត្ថុសាធារណៈ គឺជាការងារចាំបាច់ ដែលគ្រប់ក្រសួងស្ថាប័ន ត្រូវបន្តបង្កើនការចូលរួម និង ការយកចិត្តទុកដាក់ខ្ពស់ ។

ឯកឧត្តម រស់ វរុណ បានមានប្រសាសន៍ថា អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ បានដើរតួនាទីជាសេនាធិការ និង ជាភ្នែកជាច្រមុះក្នុងការត្រួតពិនិត្យ វាយតម្លៃ និង បង្ការរាល់ហានិភ័យនានា ក្នុងការប្រើប្រាស់ថវិកាជាតិ ការចាត់ចែងទ្រព្យសម្បត្តិរដ្ឋ ធនធានមនុស្ស និង ប្រតិបត្តិការផ្សេងៗ របស់បណ្តាអង្គភាពស្ថិតក្រោមដែនសមត្ថ កិច្ចក្រសួងមហាផ្ទៃ ទាំងថ្នាក់ជាតិ និង ថ្នាក់ក្រោមជាតិ ។ ក្នុងន័យនេះ, ដើម្បីបំពេញបេសកកម្មនេះឱ្យទទួលបានជោគជ័យ អគ្គនាយកដ្ឋានសវនកម្មផ្ទៃក្នុង មិនអាចខ្វះបានឡើយនូវ «ធនធានមនុស្ស» ដែលមានសមត្ថភាពពិតប្រាកដ មានក្រមសីលធម៌វិជ្ជាជីវៈ និង ដើរទាន់ការរីកចម្រើននៃបច្ចេកវិទ្យាព័ត៌មាន ។

ឯកឧត្តម បានថ្លែងអំណរគុណចំពោះវិទ្យាស្ថានសេដ្ឋកិច្ចនិងហិរញ្ញវត្ថុ ដែលតែងសម្របសម្រួល និង ផ្តល់ការបណ្តុះបណ្តាល ជូនមន្ត្រីអនុវត្តការងារហិរញ្ញវត្ថុសាធារណៈ នៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ។ ឯកឧត្តម បានបង្ហាញជំនឿមុតមាំថា អនុស្សរណៈនៃការយោគយល់គនេះ នឹងមិនមែនត្រឹមតែជាស្មារតីរួម លើក្រដាសប៉ុណ្ណោះទេ ប៉ុន្តែវានឹងក្លាយជាសកម្មភាពជាក់ស្ដែង ក្នុងការជំរុញការកសាងសមត្ថភាពមន្ត្រីរាជការ នៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ឱ្យកាន់តែខ្លាំងក្លា បង្កើតបានជាផ្លែផ្ការហ័សទាន់ចិត្ត និង រួមចំណែកយ៉ាងពិតប្រាកដ ដល់ការកសាងអភិបាលកិច្ចល្អ នៅក្នុងស្ថាប័នរដ្ឋ ។

ឯកឧត្តមបណ្ឌិតសភាចារ្យ ហ៊ាន សាហ៊ីប បានសង្កត់ធ្ងន់ថា ការចុះអនុស្សរណៈនៃការយោគយល់វាង វិទ្យាស្ថានសេដ្ឋកិច្ចនិងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ និង អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ នាថ្ងៃនេះ គឺជាសក្ខីកម្មឆ្លុះបញ្ចាំងអំពីកិច្ចខិតខំប្រឹងប្រែង ប្រកបដោយបុរេសកម្ម និង សកម្ម និង បង្កើតឡើងនូវកាលានុវត្តភាព និង ជាគំរូថ្មីមួយ ក្នុងការពង្រឹង និង ពង្រីកកិច្ចសហប្រតិបត្តិការ លើការបណ្តុះបណ្តាល និង វិក្រឹតការ សំដៅលើកកម្ពស់ការកសាងគុណវុឌ្ឍិវិជ្ជាជីវៈ និង ការអភិវឌ្ឍសមត្ថភាព ជូនមន្ត្រីអនុវត្តហិរញ្ញវត្ថុសាធារណៈ ជាពិសេស សវនករផ្ទៃក្នុង សម្រាប់ចូលរួមគាំទ្រ និង អនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ឱ្យសម្រេចជោគជ័យ ប្រកបដោយប្រសិទ្ធភាព និង ចីរភាព ។

ឯកឧត្តមបណ្ឌិតសភាចារ្យ បានគាំទ្រ និង លើកទឹកចិត្តដល់អង្គភាពទាំងពីរ ឱ្យបន្តកិច្ចសហការជិតស្និទ្ធ សំដៅជំរុញការអនុវត្តការកសាងគុណវុឌ្ឍិវិជ្ជាជីវៈ និង ការអភិវឌ្ឍសមត្ថភាព លើជំនាញសម្រាប់ការគ្រប់គ្រងហិរញ្ញវត្ថុសាធារណៈ ជូនមន្ត្រីអនុវត្តការងារហិរញ្ញវត្ថុ នៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ឱ្យទទួលជោគជ័យ ប្រកបដោយប្រសិទ្ធភាព និង ទាន់ពេល ៕

https://t.me/efinews/4374

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

ក្រុមការងារជំរុញការវិនិយោគក្នុងខេត្តព្រះសីហនុ បើកកិច្ចប្រជុំពិនិត្យគម្រោងវិនិយោគ និង ធុរកិច្ច ចំនួន ១០ ក្រោមទុនវិនិយោគជា...
08/09/2026

ក្រុមការងារជំរុញការវិនិយោគក្នុងខេត្តព្រះសីហនុ បើកកិច្ចប្រជុំពិនិត្យគម្រោងវិនិយោគ និង ធុរកិច្ច ចំនួន ១០ ក្រោមទុនវិនិយោគជាង ៤២ លានដុល្លារ និង អាចបង្កើតឱកាសការងារប្រមាណ ១ ៣៦១ កន្លែង
----------

នាព្រឹកថ្ងៃទី ៨ ខែ កញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានដឹកនាំកិច្ចប្រជុំលើកទី ២៧ ដើម្បីពិនិត្យគម្រោងវិនិយោគ និង ធុរកិច្ច ចំនួន ១០ ដោយមានការអញ្ជើញចូលរួមពីតំណាងក្រសួងស្ថាប័ន និង រដ្ឋបាលខេត្ត ព្រមទាំងមន្ត្រីជំនាញពាក់ព័ន្ធ ។ គម្រោងទាំងនេះរួមមាន៖ គម្រោងបង្កើតតំបន់សេដ្ឋកិច្ចពិសេស, គម្រោងរោងចក្រផលិតគ្រឿងសង្ហារិម គ្រឿងបង្គុំគ្រឿងសង្ហារិម ក្តារបន្ទះ និង ក្តារប៉ាកេ, គម្រោងរោងចក្រផលិត និង ដំឡើងឧបករណ៍ប្រើប្រាស់ ដោយអគ្គិសនី គ្រឿងបង្គុំសម្រាប់ឧបករណ៍អគ្គិសនី, គម្រោងអភិវឌ្ឍអចលនទ្រព្យ, គម្រោងសណ្ឋាគារ និង រីសត និង គម្រោងអគារស្នាក់នៅរួម ក្រោមទុនវិនិយោគជាង ៤២ លានដុល្លារអាម៉េរិក ដែលអាចបង្កើតឱកាសការងារ ប្រមាណ ១ ៣៦១ កន្លែង ។

គិតចាប់ពីឆ្នាំ ២០២៤ ដល់ខែសីហា ឆ្នាំ ២០២៦, ក្រុមការងារបានសម្រេចផ្តល់ការលើកទឹកចិត្ត និង ការសម្រួលនីតិវិធី ដល់គម្រោងសរុប ៥០០ គម្រោង ដែលមានទុនវិនិយោគប៉ាន់ស្មាន ៨,៤៧ ប៊ីលាន ដុល្លារអាម៉េរិក និង អាចបង្កើតឱកាសការងារជាង ៦ ម៉ឺនកន្លែង ។ គម្រោងទាំង ៥០០ នេះ រួមមាន៖ គម្រោងពាក់ព័ន្ធអគារជាប់គាំងចំនួន ២១៧, គម្រោងពុំពាក់ព័ន្ធអគារជាប់គាំង ឬ គម្រោងថ្មីចំនួន ២៤៣, គម្រោងពង្រីកចំនួន ២៥, និង គម្រោងមានស្រាប់ចំនួន ១៥ ។

ឯកឧត្តមបណ្ឌិតសភាចារ្យ បានគូសរំលេចនូវសមិទ្ធផលសំខាន់ៗ ដែលក្រុមការងារសម្រេចបានក្នុងត្រីមាសទី៣ រួមមានជាអាទិ៍ ការធ្វើបច្ចុប្បន្នភាពប្រព័ន្ធ CamDX ដើម្បីអាចចេញលិខិតបញ្ជាក់អត្ថប្រយោជន៍ពន្ធដារដោយស្វ័យប្រវត្តិ, ការរៀបចំនីតិវិធីនៃការផ្តល់ការលើកទឹកចិត្តផ្នែកគយ, ការសិក្សាពីការសម្រួលនីតិវិធីក្នុងការផ្តល់អាជ្ញាបណ្ណហាងលក់ទំនិញរួចពន្ធ (Duty Free) នៅតំបន់កោះរ៉ុង, ការសម្របសម្រួលដោះស្រាយវិវាទក្រៅប្រព័ន្ធតុលាការ សម្រាប់គម្រោងដែលមានទំនាស់ព្រំដី និង ការតភ្ជាប់ហេដ្ឋារចនាសម្ព័ន្ធ (ទឹក ភ្លើង) ជូនវិនិយោគិនប្រកបដោយប្រសិទ្ធភាព និង តម្លាភាព ព្រមទាំងការគាំទ្រដល់គម្រោងវិថីថ្មើរជើងតេជោ ដោយមានការចូលរួមយ៉ាងសកម្ម និង ការគាំទ្រពេញទំហឹង ពីក្រុមការងារ ព្រមទាំងក្រសួង-ស្ថាប័នពាក់ព័ន្ធ ។

ឯកឧត្តមបណ្ឌិតសភាចារ្យ បានគូសបញ្ជាក់ថា ការទាក់ទាញ និង ការថែរក្សាទំនុកចិត្តវិនិយោគិន និង ធុរជន គឺជាកិច្ចការដែលទាមទារនូវការយកចិត្តទុកដាក់ខ្ពស់បំផុត ដែលតាមនេះ ក្រសួង-ស្ថាប័នពាក់ព័ន្ធ ត្រូវបន្តពង្រឹងកិច្ចសហការឱ្យកាន់តែស្អិតរមួត និង ធ្វើការរួមគ្នាដោយភាពស៊ីសង្វាក់គ្នា ក្រោមអភិក្រម “ជវភាពនៃប្រព័ន្ធតួអង្គតែមួយ” ហើយត្រូវលុបបំបាត់ ឬ កាត់បន្ថយជាអតិបរមា នូវរបាំងរដ្ឋបាលស្មុគស្មាញ, ចូលរួមដោះស្រាយបញ្ហាប្រឈមរបស់វិនិយោគិនរួមគ្នាដោយផ្ទាល់ និង ត្រូវដាក់ចេញនូវយន្តការសម្របសម្រួល/ដោះស្រាយបញ្ហា ប្រកបដោយសង្គតិភាព និង ប្រសិទ្ធភាព ។ បន្ថែមពីនេះ, រាល់ការសម្របសម្រួលនីតិវិធី និង ការផ្តល់ការលើកទឹកចិត្ត ត្រូវតែអនុវត្ត ប្រកបដោយបុរេសកម្ម ឆាប់រហ័ស និង មានតម្លាភាព ។

ក្រុមការងារជំរុញការវិនិយោគខេត្តព្រះសីហនុ សូមលើកទឹកចិត្តដល់ធុរជន និង វិនិយោគិន អញ្ជើញមកដាក់ពាក្យ ឬ ស្នើមកកាន់ក្រុមការងារ ដោយឥតគិតថ្លៃ ដើម្បីទទួលបានការលើកទឹកចិត្តពិសេស ការសម្របសម្រួល និង ការសម្រួលនីតិវិធី ។ វិនិយោគិនអាចទំនាក់ទំនងមកការិយាល័យរបស់ក្រុមការងារ នៅ ៖
១). ការិយាល័យក្រុងព្រះសីហនុ ស្ថិតនៅផ្លូវជាតិលេខ ៤ ភូមិ ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ឬ ទូរស័ព្ទ ៖ (+៨៥៥) ១២ ៩០២ ២០០, (+៨៥៥) ៨៩ ៧២៦ ០២៨ និង (+៨៥៥) ១៦ ៣២១ ០១០ និង
២). ការិយាល័យរាជធានីភ្នំពេញ នៅអគារមជ្ឈមណ្ឌលអភិវឌ្ឍធុរកិច្ច ជាន់ទី ២១ សង្កាត់/ខណ្ឌជ្រោយចង្វារ រាជធានីភ្នំពេញ ឬ ទូរស័ព្ទ ៖ (+៨៥៥) ៩៣ ៨៥៨ ៥៤៣ ៕

https://t.me/efinews/4365

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

ផ្សារមូលបត្រកម្ពុជា រៀបចំកិច្ចប្រជុំក្រុមប្រឹក្សាភិបាលលើកទី២៩ នៃអាណត្តិទី២----------នារសៀលថ្ងៃទី ៧ ខែកញ្ញា ឆ្នាំ ២០២៦ នៅ...
07/09/2026

ផ្សារមូលបត្រកម្ពុជា រៀបចំកិច្ចប្រជុំក្រុមប្រឹក្សាភិបាលលើកទី២៩ នៃអាណត្តិទី២
----------

នារសៀលថ្ងៃទី ៧ ខែកញ្ញា ឆ្នាំ ២០២៦ នៅអគារផ្សារមូលបត្រកម្ពុជា, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមប្រឹក្សាភិបាលនៃផ្សារមូលបត្រកម្ពុជា (ផមក) បានដឹកនាំកិច្ចប្រជុំលើកទី២៩ នៃអាណត្តិទី២ របស់ក្រុមប្រឹក្សាភិបាលនៃ ផមក ដោយមានការអញ្ជើញចូលរួមពី ឯកឧត្តមប្រតិភូរាជរដ្ឋាភិបាលទទួលបន្ទុកជាអគ្គនាយក, សមាជិកក្រុមប្រឹក្សាភិបាល និង មន្រ្តីត្រួតពិនិត្យរដ្ឋ ព្រមទាំងថ្នាក់ដឹកនាំ និង មន្ត្រីជំនាញពាក់ព័ន្ធនៃ ផមក មួយចំនួន ។

អង្គប្រជុំ បានពិនិត្យពិភាក្សាលើរបៀបវារៈសំខាន់ៗ រួមមាន៖ ១. ពិនិត្យអនុម័តលើការពិនិត្យលទ្ធភាពអាចចុះបញ្ជីលក់មូលបត្របំណុលរបស់ក្រុមហ៊ុន ស្នេថេក ជុភីធើរ ឯ.ក, ២. ពិនិត្យអនុម័តលើសង្ខេបលទ្ធផលត្រីមាសទី២ នៃឆ្នាំ ២០២៦ រហូតមកដល់បច្ចុប្បន្ន របស់ផ្សារមូលបត្រកម្ពុជា, ៣. ពិនិត្យអនុម័តលើការបន្តសមាជិកភាពរបស់ ធនាគារ វីង (ខេមបូឌា) ម.ក ជាភ្នាក់ងារតំណាងម្ចាស់មូលបត្របំណុល និង ធនាគារ កាណាឌីយ៉ា អ.ក ជាភ្នាក់ងារបញ្ជិកាមូលបត្រ ភ្នាក់ងារចុះបញ្ជីផ្ទេរមូលបត្រ និង ភ្នាក់ងារទូទាត់, និង ៤. របៀបវារៈសំខាន់ៗមួយចំនួនទៀត ។

ក្នុងកិច្ចប្រជុំនេះ, ឯកឧត្តមបណ្ឌិតសភាចារ្យ បានជំរុញថ្នាក់ដឹកនាំ និង មន្ត្រីជំនាញនៃផ្សារមូលបត្រកម្ពុជា ឱ្យបន្តខិតខំអភិវឌ្ឍផ្សារមូលបត្រកម្ពុជាថែមទៀត តាមរយៈការខិតខំបន្តដោះស្រាយនូវបញ្ហាប្រឈមនានា និង ចាប់យកកាលានុវត្តភាព ដែលកំពុងកើតមានឡើង រួមទាំងការគិតគូរអំពីយន្តការផ្សេងៗ ក្នុងទិសដៅអភិវឌ្ឍផ្សារមូលបត្រកម្ពុជា ឳ្យមានការរីកចម្រើនក្នុងពេលអនាគត ឆ្លើយតបបានទាន់សភាពការណ៍ទៅនឹងដំណើរការរីកលូតលាស់នៃសង្គមសេដ្ឋកិច្ច និង ហិរញ្ញវត្ថុជាតិ ។

អង្គប្រជុំបានបញ្ចប់នៅម៉ោង ០៥ និង ០០ នាទីនៃថ្ងៃដដែល ក្នុងបរិយាកាសយកចិត្តទុកដាក់ និង ការទទួលខុសត្រូវខ្ពស់ ៕

https://t.me/efinews/4355

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំគណៈប្រតិភូក្រសួងសេដ្ឋកិច្ចនិង ហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ អ...
03/09/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំគណៈប្រតិភូក្រសួងសេដ្ឋកិច្ចនិង ហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ អញ្ជើញដាក់កម្រងផ្កា គោរពវិញ្ញាណក្ខន្ធសព ឯកឧត្តម ទួន ថាវរ:
----------

នារសៀលថ្ងៃទី ៣ ខែកញ្ញា ឆ្នាំ ២០២៦, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ចនិង ហិរញ្ញវត្ថុ និង ជាអនុប្រធានប្រចាំការឧត្តមក្រុមប្រឹក្សាសេដ្ឋកិច្ចជាតិ, តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និង ជាប្រធានឧត្តមក្រុមប្រឹក្សាសេដ្ឋកិច្ចជាតិ បានដឹកនាំគណៈប្រតិភូអញ្ជើញដាក់កម្រងផ្កា គោរពវិញ្ញាណក្ខន្ធសព ឯកឧត្តម ទួន ថាវរ: រដ្ឋលេខាធិការប្រចាំការក្រសួងផែនការ និង ជាសមាជិកឧត្តមក្រុមប្រឹក្សាសេដ្ឋកិច្ចជាតិ ដែលបានទទួលមរណភាព កាលពីថ្ងៃទី ១ ខែកញ្ញា ឆ្នាំ ២០២៦ ក្នុងជន្មាយុ ៦៨ ឆ្នាំ ដោយរោគាពាធ ។

ក្នុងឱកាសប្រកបដោយសមានទុក្ខដ៏ក្តុកក្តួល និង សោកស្តាយជាទីបំផុតនេះ, ថ្នាក់ដឹកនាំ និង គណៈប្រតិភូបានសម្តែងនូវក្តីសោកស្រណោះយ៉ាងជ្រាលជ្រៅចំពោះការបាត់បង់ ឯកឧត្តម ទួន ថាវរៈ ដែលជាឧត្តមស្វាមី បិតា បិតាក្មេក និង ជាជីតា ប្រកបដោយព្រហ្មវិហារធម៌ដ៏ឧត្តុង្គឧត្តមរបស់ក្រុមគ្រួសារ និង ជាឥស្សរជនឆ្នើមមួយរូប ដែលបានលះបង់កម្លាំងកាយចិត្តក្នុងការបម្រើជាតិ សាសនា ព្រះមហាក្សត្រ នាពេលកន្លងមក ។

ក្នុងពិធីដ៏ក្រៀមក្រំនេះ, ថ្នាក់ដឹកនាំ និង គណៈប្រតិភូបានដាក់កម្រងផ្កា គោរពវិញ្ញាណក្ខន្ធ និង ចូលរួមរំលែកមរណទុក្ខដ៏សែនក្រៀមក្រំ ជូនចំពោះ លោកជំទាវ យុង ពិសិដ្ឋា ភរិយានៃសព និង ក្រុមគ្រួសារ ។ ទន្ទឹមនេះ, ថ្នាក់ដឹកនាំ និង គណៈប្រតិភូ បានឧទ្ទិសបួងសួងដល់ដួងវិញ្ញាណក្ខន្ធរបស់ ឯកឧត្តម ទួន ថាវរៈ សូមបានសោយសុខក្នុងសុគតិភព កុំបីឃ្លៀងឃ្លាតឡើយ ៕

https://t.me/efinews/4349

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

ពិធីបើកវគ្គបណ្តុះបណ្តាលស្តីពី «ការរៀបចំនិងបង្កើតមាតិកាមេរៀនឌីជីថលនៃកម្មវិធីបណ្តុះបណ្តាលកម្រិតវិញ្ញាបនបត្រផ្សារភ្ជាប់មុខត...
03/09/2026

ពិធីបើកវគ្គបណ្តុះបណ្តាលស្តីពី «ការរៀបចំនិងបង្កើតមាតិកាមេរៀនឌីជីថលនៃកម្មវិធីបណ្តុះបណ្តាលកម្រិតវិញ្ញាបនបត្រផ្សារភ្ជាប់មុខតំណែង កម្រិត ២»
………………………………………

នាព្រឹកថ្ងៃទី២ ខែកញ្ញា ឆ្នាំ២០២៦ វិទ្យាស្ថានសេដ្ឋកិច្ចនិងហិរញ្ញវត្ថុ បានរៀបចំ វគ្គបណ្តុះបណ្តាលស្តីពី«ការរៀបចំនិងបង្កើតមាតិកាមេរៀនឌីជីថលនៃកម្មវិធីបណ្តុះបណ្តាលកម្រិតវិញ្ញាបនបត្រផ្សារភ្ជាប់មុខតំណែង កម្រិត ២» ជូនមន្ត្រីរាជការ បុគ្គលិកសិក្សា និងឧទ្ទេសាចារ្យរបស់វិទ្យាស្ថានសេដ្ឋកិច្ចនិងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ សំដៅរួមចំណែកបង្កើនសក្ដានុពលនៃការបណ្ដុះបណ្ដាលនិងវិក្រឹតការសមត្ថភាពមន្រ្តីអនុវត្តការងារហិរញ្ញវត្ថុសាធារណៈ ដើម្បីចូលរួមគាំទ្រនិងអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ឲ្យសម្រេចជោគជ័យ ប្រកបដោយប្រសិទ្ធភាព និងចីរភាព។

កម្មវិធីនេះ បានប្រព្រឹត្តទៅក្រោមការដឹកនាំរបស់ លោកនាយករង ប៊ុន ឆាយ តំណាងដ៏ខ្ពង់ខ្ពស់ ឯកឧត្តមនាយកវិទ្យាស្ថានសេដ្ឋកិច្ចនិងហិរញ្ញវត្ថុ និង មានការចូលរួមពី លោកប្រធាននាយកដ្ឋាន ឧទ្ទេសាចារ្យ គ្រូបង្គោល និងបុគ្គលិកសិក្សាសរុបចំនួន ១៥រូប។ កម្មវិធីបណ្តុះបណ្តាលនេះ មានគោលបំណងក្នុងការពង្រឹងនិងពង្រីកសមត្ថភាពលើជំនាញផលិតមាតិកាមេរៀនឌីជីថល ឆ្លើយតបទៅនឹងតម្រូវការជាក់ស្តែងក្នុងការអនុវត្តនិងជំរុញការផ្តល់សេវាបណ្តុះបណ្តាលឱ្យកាន់តែមានភាពបុរេសកម្ម និង សកម្ម តាមរយៈការពង្រីកវិសាលភាព និងការពង្រឹងគុណភាពនិងប្រសិទ្ធភាពវគ្គបណ្តុះបណ្តាល ដែលរៀបចំដោយវិទ្យាស្ថានសេដ្ឋកិច្ចនិងហិរញ្ញវត្ថុ នាពេលខាងមុខ។

គួរបញ្ជាក់ថា វគ្គបណ្តុះបណ្តាលនេះ ប្រព្រឹត្តទៅរយៈពេលចំនួន ៣ថ្ងៃ គឺចាប់ពីថ្ងៃទី២-៤ ខែកញ្ញា ឆ្នាំ២០២៦ ដោយរួមបញ្ចូលទាំងទ្រឹស្តី ការប្រើប្រាស់ឧបករណ៍ និងការផលិតមាតិកាមេរៀនឌីជីថលសាកល្បង។

https://t.me/efinews/4340

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

ក្រុមការងារជំរុញការវិនិយោគក្នុងខេត្តព្រះសីហនុ រៀបចំកិច្ចប្រជុំពិភាក្សាលើការស្នើសុំសម្របសម្រួលលើសំណើវិនិយោគគម្រោងបង្កើតតំ...
01/09/2026

ក្រុមការងារជំរុញការវិនិយោគក្នុងខេត្តព្រះសីហនុ រៀបចំកិច្ចប្រជុំពិភាក្សាលើការស្នើសុំសម្របសម្រួលលើសំណើវិនិយោគគម្រោងបង្កើតតំបន់ប្រមូលផ្តុំសហគ្រាសធុនតូច មធ្យម និង រោងចក្រ ស្ថិតក្នុងខេត្តព្រះសីហនុ
----------

នារសៀលថ្ងៃទី ១ ខែ កញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានដឹកនាំកិច្ចប្រជុំពិភាក្សាលើការស្នើសុំសម្របសម្រួលលើសំណើវិនិយោគគម្រោងបង្កើតតំបន់ប្រមូលផ្តុំសហគ្រាសធុនតូច មធ្យម និង រោងចក្រ (SME Cluster) ស្ថិតនៅក្រុងកំពង់សោម ស្រុកព្រៃនប់ និង ស្រុកស្ទឹងហាវ ខេត្តព្រះសីហនុ ។

កិច្ចប្រជុំនេះ មានការអញ្ជើញចូលរួមពីតំណាង ក្រសួងរៀបចំដែនដី នគរូបនីយកម្ម និង សំណង់, ក្រសួងកសិកម្ម រុក្ខាប្រមាញ់ និង នេសាទ, រដ្ឋបាលខេត្តព្រះសីហនុ ព្រមទាំងមន្ត្រីជំនាញពាក់ព័ន្ធ ។

អង្គប្រជុំ បានផ្តោតការពិភាក្សាលើបញ្ហាដីធ្លី និង ស្ថានភាពនៃការកាន់កាប់ដីជាក់ស្តែងនៅទីតាំងដែលបានស្នើសុំវិនិយោគ ។ ជាមួយនេះ, អង្គប្រជុំបានផ្តល់ធាតុចូល ពាក់ព័ន្ធនឹងទិដ្ឋភាពច្បាប់ នីតិវិធីនៃការគ្រប់គ្រងដីធ្លី និង ភាពស្មុគស្មាញនៃការកាន់កាប់ជាក់ស្តែងនៅទីតាំងនោះ ដើម្បីជាមូលដ្ឋានក្នុងការវាយតម្លៃឱ្យបានគ្រប់ជ្រុងជ្រោយ និង មានសង្គតិភាព មុននឹងឈានដល់ការពិនិត្យលើសំណូមពរផ្សេងៗរបស់ក្រុមហ៊ុន ដែលបានស្នើសុំការសម្របសម្រួល និង ការលើកទឹកចិត្តពិសេសនានាពីរាជរដ្ឋាភិបាល ។

ជាលទ្ធផលនៃកិច្ចពិភាក្សា, ឯកឧត្តមបណ្ឌិតសភាចារ្យ ប្រធានអង្គប្រជុំ បានវាយតម្លៃខ្ពស់ចំពោះគម្រោងវិនិយោគនេះ ដែលមានសក្តានុពលក្នុងការចូលរួមចំណែកជំរុញកំណើនសេដ្ឋកិច្ចមូលដ្ឋាន ក្នុងខេត្តព្រះសីហនុ ។ យ៉ាងណាមិញ ដោយសារការស្នើសុំនេះមានការពាក់ព័ន្ធភាគច្រើនទៅនឹងភាពមិនទាន់ច្បាស់លាស់នៃបញ្ហាកាន់កាប់ដីធ្លី ក្រុមការងារបានផ្តល់ការណែនាំឱ្យលេខាធិការដ្ឋានក្រុមការងារ បន្តសហការជិតស្និទ្ធជាមួយក្រសួង ស្ថាប័នជំនាញពាក់ព័ន្ធ និង រដ្ឋបាលខេត្ត ដើម្បីធ្វើការសិក្សា និង សម្របសម្រួលដោះស្រាយ ស្របតាមច្បាប់ និង នីតិវិធី ឱ្យបានច្បាស់លាស់សិន មុននឹងឈានដល់ការពិនិត្យសម្រេចផ្តល់គោលការណ៍លើកទឹកចិត្ត និង ការអនុគ្រោះនានា ៕

https://t.me/efinews/4330

==============

🌐 Website : https://efi.mef.gov.kh
👤 Facebook : https://facebook.com/efimef
✈️ Telegram : https://t.me/efinews
🎬 YouTube : https://www.youtube.com/
📱 Location : https://goo.gl/maps/LoWR9eSYBU243DHZ7

Address

EFI, WIN-WIN Boulevard, Prek Taroth, Prek Tasek, Chroy Changva
Phnom Penh

Opening Hours

Monday 07:00 - 11:30
14:00 - 17:30
Tuesday 07:00 - 11:30
14:00 - 17:30
Wednesday 07:00 - 11:30
14:00 - 17:30
Thursday 07:00 - 11:30
14:00 - 17:30
Friday 07:00 - 11:30
14:00 - 17:30

Telephone

+85523885855

Website

Alerts

Be the first to know and let us send you an email when វិទ្យាស្ថានសេដ្ឋកិច្ច និង ហិរញ្ញវត្ថុ - Economics and Finance Institute posts news and promotions. Your email address will not be used for any other purpose, and you can unsubscribe at any time.

Contact The Business

Send a message to វិទ្យាស្ថានសេដ្ឋកិច្ច និង ហិរញ្ញវត្ថុ - Economics and Finance Institute:

Shortcuts

Share