04/10/2026
⚽️ ජස්වර් උමර්ට තවත් ජාත්‍යන්තර පාපන්දු නායකත්ව තනතුරු දෙකක්
ශ්‍රී ලංකා පාපන්දු සම්මේලනයේ සභාපති ජස්වර් උමර් මහතා, දකුණු ආසියානු පාපන්දු ක්ෂේත්‍රය තුළ සිය ජාත්‍යන්තර වගකීම් තවදුරටත් පුළුල් කරමින් තවත් වැදගත් ජාත්‍යන්තර පාපන්දු නායකත්ව තනතුරු දෙකක් භාරගෙන ඇත.
ඒ අනුව, ජස්වර් උමර් මහතා දකුණු ආසියානු පාපන්දු සම්මේලනයේ (SAFF) ජ්‍යෙෂ්ඨ උප සභාපතිවරයා ලෙස උසස් කර ඇති අතර, දකුණු ආසියානු පාපන්දු තරග කමිටුවේ සභාපතිවරයා ලෙසද පත් කර තිබෙනවා.
මෙම නව වගකීම්වලට අමතරව, ඔහු දැනට FIFA Grassroots & Amateur Football Committee හි සාමාජිකයෙකු ලෙසත්, AFC Development Committee හි සාමාජිකයෙකු ලෙසත් කටයුතු කරයි.
මෙම නව පත්වීම් මගින් ජස්වර් උමර් මහතා කලාපීය හා ජාත්‍යන්තර පාපන්දු ක්ෂේත්‍රය තුළ ඉටු කරන වගකීම් සහ ඔහු කෙරෙහි තබා ඇති විශ්වාසය තවදුරටත් තහවුරු වේ.
ශ්‍රී ලංකා පාපන්දු සම්මේලනයේ ඔහුගේ නායකත්වය යටතේ ජාතික කණ්ඩායම ශක්තිමත් කිරීම, ජාත්‍යන්තර මට්ටමේ පුහුණුකරුවෙකු පත් කිරීම, ජාත්‍යන්තර තරග අවස්ථා වැඩි කිරීම, ආයෝජන සහ අනුග්‍රාහකත්ව ලබා ගැනීම මෙන්ම පාපන්දු සංවර්ධන වැඩසටහන් පුළුල් කිරීම කෙරෙහි අවධානය යොමු කර තිබේ.
මෙම කාලය තුළ ශ්‍රී ලංකාවේ FIFA ශ්‍රේණිගත කිරීමද සැලකිය යුතු ලෙස ඉහළ ගොස් ඇති අතර, 207 වන ස්ථානයේ සිට 186 වන ස්ථානය දක්වා ස්ථාන 21කින් ඉදිරියට පැමිණ ඇත.
ජස්වර් උමර් මහතා ශ්‍රී ලංකා පාපන්දු ක්‍රීඩාව සඳහා අභිලාෂකාමී දැක්මක් ඉදිරිපත් කර ඇති අතර, විශේෂයෙන් දකුණු ආසියානු මට්ටමේ ශක්තිමත් තරගකාරී කණ්ඩායමක් ගොඩනැගීම සහ ශ්‍රී ලංකාව අවසන් වරට 1995දී දිනාගත් SAFF ශූරතාව නැවත දිනා ගැනීම කෙරෙහි අවධානය යොමු කර ඇත.
මෙම පුළුල් වූ කලාපීය වගකීම් සමඟින්, ජස්වර් උමර් මහතාට ශ්‍රී ලංකා පාපන්දු ක්‍රීඩාවේ සංවර්ධනයට පමණක් නොව, දකුණු ආසියාව පුරා පාපන්දු තරග සහ සංවර්ධන වැඩසටහන් තවදුරටත් ශක්තිමත් කිරීමටද දායක වීමට නව අවස්ථාවක් උදා වී තිබෙනවා.
