PEO SPORTS

2026 වසරේ ලොව වැඩිම ආදායමක් ඉපැයූ ක්‍රීඩකයින් 10 දෙනාගේ ලැයිස්තුව ෆෝබ්ස් සඟරාව නිකුත් කරයි

සුප්‍රසිද්ධ ෆෝබ්ස් (Forbes) සඟරාව විසින් 2026 වසරේ ලොව වැඩිම ආදායමක් උපයන ලද ක්‍රීඩකයින් 10 දෙනාගේ (The World's 10 Highest-Paid Athletes) වාර්ෂික ලැයිස්තුව ප්‍රකාශයට පත් කර තිබෙනවා.

මෙවරත් එම ලැයිස්තුවේ ප්‍රථම ස්ථානය දිනා ගැනීමට සමත් වී ඇත්තේ පෘතුගාලයේ සුපිරි පාපන්දු ක්‍රීඩක ක්‍රිස්ටියානෝ රොනාල්ඩෝ (Cristiano Ronaldo) යි. සවුදි අරාබියේ අල්-නස්ර් (Al-Nassr) කණ්ඩායම සමඟ ඇති ගිවිසුම සහ වෙළෙඳ දැන්වීම් ප්‍රවර්ධන කටයුතු හරහා 41 හැවිරිදි රොනාල්ඩෝ පසුගිය මාස 12 තුළ උපයා ඇති මුළු ආදායම ඇමරිකානු ඩොලර් මිලියන 300ක් ලෙස ඇස්තමේන්තු කර තිබෙනවා.

රොනාල්ඩෝ ෆෝබ්ස් ලැයිස්තුවේ පෙරමුණ ගත් හයවැනි අවස්ථාව මෙය වන අතර, මීට පෙර බොක්සිං ක්‍රීඩක ෆ්ලොයිඩ් මේවෙදර් (2015 වසරේදී) තැබූ ඩොලර් මිලියන 300ක ඉතිහාසගත වාර්තාව සම කිරීමට ද ඔහු සමත්ව තිබෙනවා.

මෙම ලැයිස්තුවේ දෙවැනි ස්ථානය ඇමරිකානු ඩොලර් මිලියන 170ක ආදායමක් උපයාගත් මෙක්සිකෝවේ සුපිරි බොක්සිං ක්‍රීඩක කැනෙලෝ අල්වාරෙස් (Canelo Álvarez) හිමිකරගෙන ඇති අතර, ආර්ජන්ටිනාවේ පාපන්දු ක්‍රීඩක ලියොනල් මෙසී (Lionel Messi) ඩොලර් මිලියන 140ක ආදායමක් සමඟින් තෙවැනි ස්ථානයට පත්ව තිබෙනවා.

ෆෝබ්ස් සඟරාවට අනුව 2026 වසරේ වැඩිම ආදායම් ලැබූ ක්‍රීඩකයින් 10 දෙනා මෙසේය.
1. ක්‍රිස්ටියානෝ රොනාල්ඩෝ (පාපන්දු) - අමෙරිකානු ඩොලර් මිලියන 300
2. කැනෙලෝ අල්වාරෙස් (බොක්සිං) - අමෙරිකානු ඩොලර් මිලියන 170
3. ලියොනල් මෙසී (පාපන්දු) - අමෙරිකානු ඩොලර් මිලියන 140
4. ලෙබ්‍රොන් ජේම්ස් (බාස්කට්බෝල්) - අමෙරිකානු ඩොලර් මිලියන 137.8
5. ෂෝහෙයි ඔටානි (බේස්බෝල්) - අමෙරිකානු ඩොලර් මිලියන 127.6
6. ස්ටෙෆන් කරි (බාස්කට්බෝල්) - අමෙරිකානු ඩොලර් මිලියන 124.7
7. ජෝන් රාම් (ගොල්ෆ්) - අමෙරිකානු ඩොලර් මිලියන 107
8. කරීම් බෙන්සෙමා (පාපන්දු) - අමෙරිකානු ඩොලර් මිලියන 104
9. කෙවින් ඩියුරන්ට් (බාස්කට්බෝල්) -අමෙරිකානු ඩොලර් මිලියන 103.8
10. ලුවිස් හැමිල්ටන් (ෆෝමියුලා 1) - අමෙරිකානු ඩොලර් මිලියන 100
මෙම සමස්ත ලැයිස්තුවේ කැපී පෙනෙන ලක්ෂණය වන්නේ පාපන්දු සහ බාස්කට්බෝල් යන ක්‍රීඩාවලින් ක්‍රීඩකයින් තිදෙනා බැගින් ඇතුළත් වෙමින් වැඩිම ආධිපත්‍යයක් පෙන්නුම් කර තිබීමයි.

ප්‍රංශ විවෘත ටෙනිස් තරගාවලියේ නව රැජින ලෙස මිරා ඇන්ඩ්‍රීවා කිරුළු පළඳියි

2026 ප්‍රංශ විවෘත ටෙනිස් තරගාවලියේ කාන්තා ඒකල ශූරතාවය දිනා ගැනීමට රුසියාවේ යොවුන් සුපිරි ක්‍රීඩිකා Mirra Andreeva සමත් වී තිබෙනවා.

පැරිස් නුවරදී පසුගිය (06) වැනිදා පැවැති අතිශය උණුසුම් අවසන් මහා තරගයේදී පෝලන්තයේ (Maja Chwalinska) වට 2-0ක් ලෙස සෘජු වටවලින් පරාජය කරමිනුයි 19 හැවිරිදි ඇන්ඩ්‍රීවා සිය ප්‍රථම (Grand Slam) ශූරතාවය මෙලෙස තමන් සතු කරගනු ලැබුවේ

තරගයේ ලකුණු තත්ත්වය ලෙස සටහන් වූයේ 6-4ක් සහ 6-2ක් වශයෙන්.

මෙම ජයග්‍රහණයත් සමඟ Mirra Andreeva, 2004 වසරේදී මරියා ෂරපෝවා තැබූ වාර්තාවකට පසු ග්‍රෑන්ඩ් ස්ලෑම් ටෙනිස් ශූරතාවයක් දිනාගත් ලොව ලාබාලම ක්‍රීඩිකාවන් අතරට එක්වීමට ද සමත්ව තිබෙනවා.

මැටි පිච් (Clay court) මත තමන් සතු සුවිශේෂී දක්ෂතා නැවත වරක් ප්‍රදර්ශනය කළ ඇන්ඩ්‍රීවා, මෙම සමස්ත තරගාවලිය පුරාම කිසිදු වටයක් (Set) පරාජය නොවීම ද කැපී පෙනෙන ලක්ෂණයක්.

සිය ප්‍රථම ග්‍රෑන්ඩ් ස්ලෑම් අවසන් මහා තරගයට සුදුසුකම් ලැබූ පෝලන්තයේ ච්වාලින්ස්කා වෙතින් ද තරගයේ මුල් භාගයේදී ප්‍රබල අභියෝගයක් එල්ල වුවද, Andreevaගේ දක්ෂ උපක්‍රම හමුවේ ඇයට අනුශූරතාවයෙන් සෑහීමකට පත්වීමට සිදු වුණා.

ලෝක ටෙස්ට් ශූරතාවලියේ ලකුණු සටහන උඩුයටිකුරු වෙයි - ශ්‍රී ලංකාව තුන්වැනි ස්ථානය දක්වා ඉදිරියට

ලෝඩ්ස් ක්‍රීඩාංගණයේදී පැවැති පළමු ටෙස්ට් තරගයෙන් නවසීලන්ත කණ්ඩායම පරාජය කරමින් ලකුණු 115ක අතිවිශිෂ්ට ජයක් වාර්තා කිරීමට එංගලන්ත කණ්ඩායම සමත් වී තිබෙනවා.

මෙම තරගයේදී දීර්ඝ කාලයකට පසු එංගලන්ත සංචිතයට නැවත කැඳවූ වේග පන්දු යවන ක්‍රීඩක ඔලී රොබින්සන්ගේ (Ollie Robinson) දක්ෂ පන්දු යැවීම එංගලන්ත ජයග්‍රහණය වඩාත් පහසු කිරීමට හේතු වුණා.

නවසීලන්තය ලැබූ මෙම දරුණු ටෙස්ට් පරාජයත් සමඟ ලෝක ටෙස්ට් ශූරතාවලි (WTC) ප්‍රසාද ලකුණු සටහන ද සම්පූර්ණයෙන්ම වෙනස් වී තිබෙනවා.

ඒ අනුව මෙතෙක් දෙවන ස්ථානයේ පසුවූ නවසීලන්තය සිව්වැනි ස්ථානය දක්වා පහත වැටී ඇති අතර, එහි වාසිය ලබාගනිමින් දකුණු අප්‍රිකානු කණ්ඩායම ප්‍රසාද ලකුණු සටහනේ දෙවැනි ස්ථානය දක්වා ඉදිරියට පැමිණ තිබෙනවා.

මෙම වෙනස් වීමත් සමඟ ශ්‍රී ලංකා කණ්ඩායමද ප්‍රසාද ලකුණු සටහනේ තෙවැනි ස්ථානය දක්වා එක් ස්ථානයක් ඉදිරියට පැමිණ තිබෙනවා.

ශ්‍රී ලංකා සහ කොදෙව් නැගී එන කණ්ඩායම් අතර සිව්දින ක්‍රිකට් සටන අද සූරියවැවේදී ඇරඹෙයි

මෙරට සංචාරයක නිරත බටහිර ඉන්දිය කොදෙව් නැගී එන ක්‍රිකට් කණ්ඩායම සහ ශ්‍රි ලංකා නැගී එන කණ්ඩායම අතර සිව් දින ක්‍රිකට් තරගාවලිය අද (08) ආරම්භ වනවා.

ඒ සූරියවැව ක්‍රිඩාංගණයේදි යි.

තරගාවලියට සිව් දින තරග 2ක් ඇතුළත්.

දිනුර කලු‍පහනගේ නායකත්වය යටතේ නැගී එන කණ්ඩායමක් තරගාවලිය සඳහා නම් කර තිබෙනවා.

ඓතිහාසික මොනාකෝ FIA ෆෝමියුලා 3 තරග බිමේදී යෙවාන් ඩේවිඩ්ගෙන් අතිවිශිෂ්ට ධාවනයක්

කීර්තිමත් මොනාකෝ (Monaco) ධාවන පථයේ පැවැති FIA ෆෝමියුලා 3 (Formula 3) තරගාවලිය සඳහා ප්‍රථම වරට සහභාගී වූ ශ්‍රී ලංකාවේ 19 හැවිරිදි යොවුන් ධාවන සූර යෙවාන් ඩේවිඩ් (Yevan David), ජාත්‍යන්තර මෝටර් රථ ක්‍රීඩා විචාරකයින්ගේ සහ ලෝකවාසී ප්‍රේක්ෂකයින්ගේ දැඩි අවධානය දිනා ගැනීමට සමත් වී තිබෙනවා.

පටු සහ අතිශය දුෂ්කර මොනාකෝ ධාවන පථය තුළ මෙවර තරග බොහෝ දුරට පසුකර යාම් (Overtaking) රහිත, මන්දගාමී ස්වභාවයක් ගත් බව මෝටර් රථ විචාරකයින් පෙන්වා දෙනවා.

කෙසේ වෙතත්, AIX Racing කණ්ඩායම නියෝජනය කරමින් 23 වැනි ස්ථානයෙන් තරගය ආරම්භ කළ ද, යෙවාන් ඩේවිඩ් ධාවන පථය පුරා දැක්වූ අතිශය නිර්භීත ධාවන විලාසය සහ ප්‍රතිවාදීන් පසුකර යාමට සිදුකළ සුවිශේෂී උත්සාහයන් (Transition attempts) හේතුවෙන් සමස්ත තරගයටම සජීවී බවක් සහ ප්‍රාණවත් බවක් එක් කිරීමට ඔහුට හැකි වුණා.

ජාත්‍යන්තර මෝටර් රථ ක්‍රීඩා පිටුවල සටහන් වන පරිදි, "මොනාකෝ හි පැවැති මෙම තරගාවලියට යම් වර්ණවත් බවක් එක්කළ එකම ක්‍රීඩකයා යෙවාන් ඩේවිඩ්" බවයි විචාරකයින් පවසන්නේ.

කණ්ඩායම් මට්ටමින් මෝටර් රථයේ වේගය උපරිම ලෙස ප්‍රදර්ශනය කිරීමට යම් බාධා පැවතියද, තමන් සතු සහජ දක්ෂතාවය ලෝකය හමුවේ තැබීමට ලාංකීය සුපිරි තරුව සමත් වී තිබෙනවා.

ඉදිරි තරගාවලිවලදී යෙවාන් ඩේවිඩ්ට පෙරමුණටම පැමිණීමට විශාල අවස්ථාවක් පවතින බව ද ජාත්‍යන්තර මාධ්‍ය විශ්වාසය පළ කරනවා.

ප්‍රංශ විවෘත ටෙනිස් කිරුළ ඇලෙක්සැන්ඩර් ස්වෙරෙව්ට - කෝබෝලි පරදා ප්‍රථම ග්‍රෑන්ඩ් ස්ලෑම් ජයග්‍රහණය සනිටුහන් කරයි

2026 Roland Garros හෙවත් ප්‍රංශ විවෘත ටෙනිස් තරගාවලියේ පිරිමි ඒකල ශූරතාවය තමන් සතු කරගැනීමට ජර්මනියේ සුපිරි ක්‍රීඩක, ඇලෙක්සැන්ඩර් ස්වෙරෙව් (Alexander Zverev) සමත් වී තිබෙනවා.

පැරිස් නුවර Philippe-Chatrier ක්‍රීඩාංගණයේදී ඊයේ (07) පැවැති අතිශය උණුසුම් මුහුණුවරක් ගත් අවසන් මහා තරගයේදී, ඉතාලියේ ෆ්ලේවියෝ කෝබෝලි (Flavio Cobolli) වට 3-2ක් ලෙස පරාජය කරමිනුයි ස්වෙරෙව් සිය ප්‍රථම ග්‍රෑන්ඩ් ස්ලෑම් (Grand Slam) ශූරතාවය මෙලෙස දිනාගත්තේ.

පැය කිහිපයක් පුරා ඇදී ගිය මෙම දීර්ඝ තරගයේ ලකුණු තත්ත්වය සටහන් වූයේ 6-1ක්, 4-6ක්, 6-4ක්, 6-7ක්, 5-7ක් සහ 6-1ක් වශයෙනි.

මීට පෙර ග්‍රෑන්ඩ් ස්ලෑම් අවසන් මහා තරග තුනකදීම අවාසනාවන්ත ලෙස පරාජයට පත්ව සිටි 29 හැවිරිදි ස්වෙරෙව්, මෙම සුවිශේෂී ජයග්‍රහණයත් සමඟ 1996 වසරේ බොරිස් බෙකර් (Boris Becker) තැබූ වාර්තාවෙන් පසු ග්‍රෑන්ඩ් ස්ලෑම් ඒකල ශූරතාවයක් දිනාගත් ප්‍රථම ජර්මානු ක්‍රීඩකයා බවට ද පත්වුණා.

පළමු වරට ග්‍රෑන්ඩ් ස්ලෑම් අවසන් මහා තරගයකට සුදුසුකම් ලබා, ස්වෙරෙව්ව පස්වැනි වටය (5th Set) දක්වා ඇද දමමින් ප්‍රබල අභියෝගයක් එල්ල කළ ඉතාලියේ 24 හැවිරිදි ෆ්ලේවියෝ කෝබෝලිට අනුශූරතාවයෙන් සෑහීමකට පත්වීමට සිදු වුණා.

ඉන්දීය T20 ක්‍රිකට් නායකත්වයට අයියර් පත්වෙයි - සූර්යකුමාර් යාදව් සංචිතයෙන්ම ඉවතට

පසුගිය මාර්තු මාසයේදී ඉන්දීය කණ්ඩායම විස්සයි20 ලෝක කුසලාන ශූරතාවය කරා මෙහෙයවූ සූර්යකුමාර් යාදව් (Suryakumar Yadav) වහාම ක්‍රියාත්මක වන පරිදි නායකත්වයෙන් මෙන්ම සමස්ත විස්සයි20 සංචිතයෙන්ම ඉවත් කිරීමට ඉන්දීය ක්‍රිකට් පාලක මණ්ඩලය (BCCI) පියවර ගෙන තිබෙනවා.

ඒ අනුවයි ඉන්දීය විස්සයි20 කණ්ඩායමේ නව නායකයා ලෙස ප්‍රබල පිතිකරු ශ්‍රෙයාස් අයියර් (Shreyas Iyer) නිල වශයෙන් පත් කර ඇත්තේ.

ඉදිරියේදී පැවැත්වීමට නියමිත අයර්ලන්ත සහ එංගලන්ත සංචාරයන් සඳහා ඉන්දීය ක්‍රිකට් තේරීම් කමිටුව විසින් පසු ගිය (06) වැනිදා නිල වශයෙන් සංචිතය ප්‍රකාශයට පත් කරමින් මෙම වෙනස සිදුකර ඇති අතර, කණ්ඩායමේ උපනායකයා ලෙස තිලක් වර්මා (Tilak Varma) පත් කර තිබෙනවා.

35 වැනි වියේ පසුවන සූර්යකුමාර් යාදව්ගේ වයස සහ මෑත කාලීනව ලෝක කුසලාන තරගාවලියේදී මෙන්ම අයි.පී.එල් (IPL) තරගාවලියේදී ඔහුගේ පිතිකරණයේ පැවැති දුර්වලතා සලකා බලමින් 2028 ලොස් ඇන්ජලීස් ඔලිම්පික් උළෙල ඉලක්ක කරගත් දිගුකාලීන සැලසුමක් මත තේරීම් කමිටුව මෙම තීරණය ගෙන ඇති බවයි වාර්තා වන්නේ.

අයි.පී.එල් තරගාවලිය තුළ කල්කටා නයිට් රයිඩර්ස් (KKR) කණ්ඩායමට ශූරතාවය දිනා දෙමින් සහ අනෙකුත් කණ්ඩායම් සාර්ථකව මෙහෙයවමින් පෙන්වූ විශිෂ්ට නායකත්ව කුසලතා මෙන්ම, පිතිකරුවෙකු ලෙස දැක්වූ ඉහළ දක්ෂතා හේතුවෙන් 31 හැවිරිදි ශ්‍රෙයාස් අයියර් වෙත මෙලෙස ජාතික කණ්ඩායමේ මෙහෙයවීමේ වගකීම පැවරී තිබෙනවා.

ඔහු 2023 දෙසැම්බර් මාසයෙන් පසු ඉන්දියාව වෙනුවෙන් විස්සයි20 තරගයකට ක්‍රීඩා කර නොමැති වීම ද විශේෂත්වයක්.

මීට අමතරව, මෙවර සංචිතයට 15 හැවිරිදි යොවුන් පිතිකරු වෛභව් සූරියවංශි (Vaibhav Sooryavanshi) ද ප්‍රථම වතාවට කැඳවා තිබෙනවා.

ශ්‍රෙයාස් අයියර්ගේ නායකත්වයෙන් යුත් ඉන්දීය කණ්ඩායමේ පළමු අභියෝගය එළඹෙන ජූනි 26 වැනිදා අයර්ලන්තයට එරෙහිව බෙල්ෆාස්ට් (Belfast) නුවරදී ආරම්භ වීමට නියමිතයි.

Tune-up before the big showdown!

Watch 'ICC Women's T20 World Cup 2026' Warm-up matches in true HD quality | LIVE | On PEO SPORTS 2 HD (CH.324) & SD (CH.151) on SLT-MOBITEL PEOTV

Tune-up before the big showdown!

Watch 'ICC Women's T20 World Cup 2026' Warm-up matches in true HD quality | LIVE | On PEO SPORTS 1 HD (CH.323) & SD (CH.150) on SLT-MOBITEL PEOTV