29/08/2024
واحد السيدة كتبيع البيض، كل مرة كنمشي لعندها كنسولها شحال البيض كتقولي : الرومي درهم و نص والبلدي جوج دراهم ، والرومي لي فيه جوج محاح (أصفرين) ثلاثة دراهم.
واحد النهار سولتها و عطاتني نفس الجواب و قلت لها عطيني هداك جوج محاح نكتاشف واش بالصح فيه جوج ولا لا، قالت ليا راه بالصح فيه، و انا قلت لها نسولك و سمحيليا: واش هذا لي فيه جوج محاح كيتباع لك مزيان زعما، قالت لي : اه
قلت لها وا دبا علاش يشريه بنادم بلاصت مايشري جوج بيضات ب 3 دراهم ايكونو حسن من بيضة وحدة ب 3 دراهم، قالت لي راه بالصح جوج بيضات احسن و لكن الأغلبية د لي كيشريو لي فيه جوج محاح كيبغيو غير يكتاشفو بحالك واش بالصح فيه جوج محاح ولا لا أما من حيث الكمية راه جوج بيضات حسن من وحدة..
وهذا يسمى ب "تكلفة الفضول" شي مراات كنبغيو نعرفو شي حاجات لي معندا تا قيمة مضافة فحياتنا و لي ممكن تجبدلنا غير صداع وتقام علينا بتكاليف أكثر من ايلا ماعرفناهاش بمرا...
