Dima Raja - ديما راجا

المهدي موهوب رسمياً كاينتقل لفريق يونايتد إف سي الإماراتي على سبيل الإعارة مع أحقية الشراء ✅.

واحد من الپروفيلات اللي كانو محطوطين على طاولة الرجاء كايمشيو واللي كان عليه نقاش كبير، دابا خاص يكونوا déjà موجدين البديل واللي خاص يكون أحسن.

HERE WE GO! 🚨

أخيراً الفيلم سالا وغانتهنّاو منّو ✅!

اتفاق نهائي بين الأطراف بثلاثة آخرهم توارگة اللي عطاو الأوكي ديالهم للعرض د الرجاء، واتفقو بشكل رسمي على انتقال يونس الدحماني، في انتظار توقيع العقود اليوم ولا غدا الصباح .. ⏳✍️.

مرحبا مُسبقاً للدحماني ونتمنّاو ليه إن شاء الله كامل التوفيق والنجاح معانا، وإن شاء الله يقدّم لينا الإضافة ويكون عند حُسن الظّن ديالنا 👏🏻.

بس : رسالة للمكتب بهاد الوتيرة ماغانساليو حتى يسالي السوق كامل، ماشي كل لعّاب ديرو فيه 3 السيمانات باش تجيبوه، تعطّلنا وأكثر من القياس والوقت ماشي فصالحنا !

الاتفاق الثلاثي بين الأطراف تم، ولكن signature مزال !

لابد من الخدمة تسالي ويطرّق المسمار معاه دغيا، كاملين عارفين الفراقي د الرباط كيف دايرين وكيفاش كايتعاملو معانا، وعندنا أمثلة كثيرة على هاد البلان معاهم.

نتمنّى يتحسم ملف الدحماني ويتسد دابا ✅✍️.

رسمياً :

توارگة كايعطيو l'feu vert للدحماني وكايقلبو أخيراً عرض الرجاء ✅.

اتفاق نهائي بين الأطراف بثلاثة في انتظار يكملو إجراءات التوقيع اليوم بالعشية ولا غدا صباح ✍️.

بلاغ الكورڤا سود يمثّلني، ميساج واضح وصريح العبارة ✅!

النقاش بين المدير الرياضي ماتياس واللاعبين داز tranquille بيخير وعلى خير، عكس ما يروّج له البعض من نقاش وهضرة خاوية.

ماتياس غايكون بمثابة target لدوك الناس، حيت بكل بساطة النهار الكبير عندهم هو الميركاتو على جوج مرّات فالعام، كايقتارحو فيه اللعّابة ديالهم ويفرضوهم على الإدارة ويدّيو commission مفرگة وباردة على جوج مرّات، منين جا ماتياس مابقاتش هاد الحاجة، donc سي نورمال نشوفو هاد les attaques على مدار الساعة.

كونوا أكيدين أن أي تعثّر وأي تخربيقة غادي يتسنّاوها هاد الناس على أحر من الجمر باش يلصقوها فماتياس ويهيجو عليه الرأي العام، ولهذا كانقولوها قبل كل الدعم للإدارة الرياضية فخدمتها 💚.

من المُرتقب باش يرجع مدرب الحرّاس السابق واين سانديلاندز للطاقم التقني ✅.

صراحة مزيانة، النيڤو ديال الحرار طوّر معاه وحتى طريقة الخدمة ديالو كلشي كايشكرها 💚.

عودة كل من بوشعيب عرّاصي وبلال ولد الشيخ من الإعارة ✅.

فنظركم (رأي شخصي) : فيديكم قرار البيع ولا الإبقاء عليهم، شنو تختارو ؟