The Giants of Doukkali Cap Football

الآن نوقف لحظة باش نوضح أن دكالي كاب ماشي غير شخصية فالمواقع ولا فكرة مكتوبة دكالي كاب خارج من داخل كل دفاعي دكالي من الإحساس الحقيقي بالانتماء من النفس اللي كيتنفس بألوان عاصمة دكالة بتاريخها العريق وبروح الأجداد اللي وقفوا ضد أي واحد حاول يمس بوحدة المنطقة وهاد الشي باين حتى فاختيار اسم الفريق اللي جا دفاعا عن الوطن ولهذا طبيعي تكون شخصية دكالي كاب متشبعة بهاد الروح معتزة بالمنطقة قبل أي حاجة وهاد الإحساس كيتقاسموه بزاف ديال الدفاعيين

ودكالي كاب ماشي غير رمز ديال الانتماء هو كذلك مرآة حقيقية لتصرفات المشجع فدكالة للطريقة اللي كيتفاعل بها مع المقابلة مع الهدف مع الخسارة مع الفرح والحزن كيجسد العقلية ديال المدرج بأسلوب بسيط قريب وممتع كيخلي أي واحد يشوف راسو فيه بلا تصنع

وفي الأخير خاص كل واحد كيشوف دكالي كاب يفهم باللي ماشي شي شخص بعيد عليه دكالي كاب هو أنا وهو أنت وهو أي واحد كيلبس توني الدفاع ويدخل للمدرج بنفس الشغف كنعيشوه معاه فكل مقابلة كنشجعو نفس الفريق كنفرحو بنفس الانتصار وكنحسو بنفس الألم فالهزيمة وكنبقاو ديما واقفين حيث الفريق ماشي غير تسعين دقيقة بل حكاية انتماء كتكبر بينا وكتعيش فينا كل نهار

أنا دكالي كاب ما كنعيش منكسّر وما كنقبلش نكون تابع كنرفض الذل والخضوع حيث الكرامة عندي ما فيهاش التنازل وكنبقى ديما كنتساءل فين غاب صوت الرجال فهاد المدينة

أنا من دكالة كنمشي رافع راسي كنوقف ثابت قدام الصعاب ما كنتهربش من المدرج فساعة الضيق بالعكس كنشوف الحضور ديالي واجب تجاه الفريق وتجاه المدينة كنصبر اليوم وكنعيش بالأمل ديال غد أفضل يرد لينا الاعتبار

نهار المقابلة من الأول حسّيت بالجو ماشي عادي كان تضييق فالتذاكر وغموض فالتوزيع بحال إلى شي حد باغي يبعدني على فريقي ولكن أنا دكالي كاب ما كنرجعش اللور بقيت حاضر رغم كلشي

دخلت للملعب وأنا عارف راسي جاي نوصل صوتي ولكن منين حاولت نرفع الرسالة ديالي لقيت عراقيل من كل جهة تضييق فالدخول تفتيشات بزاف وبطريقة مستفزة بحال إلى الصوت ديالي خاصو يتخنق

ومع بداية المقابلة تزاد الضغط أكثر قربو ليا حاولو ينزعو الرسالة ويمنعوني نعبر ولكن أنا غير كنستغرب علاش هاد الشي كامل وعلاش صوتي أنا بالضبط كيتستهدف

أنا دكالي كاب ماشي غير واحد بوحدو أنا صوت ديال بزاف ديال الناس صوت المدرج صوت المدينة اللي كيبغي فريقو بصدق واللي باقي متشبث بحقو فالتعبير وفالحضور مهما كانت الظروف.